Претседателот на Република Македонија, д-р Ѓорге Иванов, по повод терористичките напади во Волгоград, упати писмо со сочувство до претседателот на Руската Федерација, Н.Е. г. Владимир Путин.

Почитуван господине Претседателе,

Со длабока тага и чувство на огорченост ја примив веста за терористичките напади во Волгоград, Руската Федарација, и искрено жалам за загубените животи од овој злосторнички акт.

Во овие тажни моменти за Вас, за граѓаните на Вашата земја и семејствата на настраданите и повредените, дозволете ми, од името на граѓаните на Република Македонија и од мое лично име да Ви упатам изрази на длабоко сочувство. Сакам да Ве уверам дека мислите на македонските граѓани се со Вас и со пријателскиот руски народ.

Господине Претседателе, овој грозоморен чин, како и впрочем сите кукавички акти на тероризмот, чија цел е сеење страв и чувство на несигурност, чии жртви се недолжни луѓе, нема да не поколеба во истрајноста на зачувување на споделените човечки и цивилизациски вредности и придобивки. Напротив, овој глобален предизвик бара и глобален одговор, соработка и взаемна поддршка.

Ве молам, господине Претседателе, изразите на сочувство да ги пренесете до семејствата на трагично настраданите.

д-р Ѓорге Иванов

Претседателот на Република Македонија д-р Ѓорге Иванов денеска оствари работна средба со шефовите на дипломатско-конзуларните претставништва и мисии на Република Македонија во странство.

На средбата, македонските дипломати го информираа претседателот Иванов за нивните активности во текот на 2013 година и беа разменети мислења и предлози во насока на подобрување на состојбите во македонската дипломатија.

Централна тема на средбата беа најважните надворешно-политички приоритети на Република Македонија и предизвиците со кои се соочуваме. Претседателот Иванов ги изнесе позициите, размислувањата и очекувањата на државниот врв за наредната 2014-та година.

Претседателот изрази задоволство од ангажманот на македонската дипломатија во афирмацијата на Република Македонија, нејзините постигнувања, придобивки и нејзините вредности, како и од придонесот во градење на позитивен имиџ за земјава на меѓународен план.

Македонскиот претседател побара од дипломатската мрежа натамошна максимална посветеност на афирмирање на позицијата на Република Македонија во однос на стратешките надворешно-политички цели, како и афирмација на конструктивноста на државата во регионалните иницијативи и континуираните придонеси и конкретни активности во градење на добрососедските односи.

Со цел кредибилна дипломатија, претседателот Иванов го реафирмираше ставот за поголема слобода во делувањето на македонските дипломати, пропратено со поригорозна контрола и оценување на нивниот ангажман. Воедно, беше потенцирана потребата од зајакнување на активностите на дипломатите во функција на економскиот развој на државата и промовирање на економските потенцијали на Република Македонија со цел привлекување на странски инвестиции во земјава. Претседателот Иванов ја потенцираше важноста и од засилена јавна дипломатија. „Мора да се пронајде начин како сите успеси на Македонија, без оглед на кое поле, да бидат афирмирани во јавниот и стручен простор на земјата – домаќин. Очекувањето други да ја завршат работата која треба да ја сработи македонската дипломатија, или недоволното присуство во јавната дипломатија, се луксуз кој не можеме и не смееме да си го дозволиме" посочи пред дипломатите претседателот Иванов.

Во однос на македонското национално малцинство, беше истакната потребата за поголема заложба за обединување на дијаспората, надминување на проблемите и унапредување на положбата на македонското национално малцинство во одредени земји, и нивни ангажман во насока на економскиот развој на државата.

Претседателот Иванов изрази задоволство од постигнатата добра координираност на дипломатската мрежа со надлежните институции во земјата, но посочи дека на овој план се уште има простор за подобрувања.

Претседателот на Република Македонија, д-р Ѓорге Иванов, по повод Новата 2014 година, даде помилување на 53 осудени лица, од кои 11 потполно, а 42 делумно се ослободуваат од натамошно извршување на казната затвор.

Претседателот на Република Македонија д-р Ѓорге Иванов упати честитка до сите христијански верници кои го прославуваат Божик според Грегоријанскиот календар.

Почитувани,

Ми претставува чест и задоволство во овие претпразнични денови да Ви го честитам претстојниот голем христијански празник, празникот на Раѓањето Христово – Божик.

Овој голем празник на љубовта, мирот и на помагањето нè учи да живееме во простување и во милосрдие, да ги следиме врвните морални закони во нас и да дејствуваме во согласност со начелата на вистината.

Божик е време за мир, заедништво и добри дела. Време кога на нашите ближни им подаруваме љубов и добрина. Време кога одново ги потврдуваме нашите искрени заложби за негување и за почитување на верските различности и религиозните посебности како врвна вредност на македонското многуетничко, многурелигиско и многујазично општество.

Честитајќи им го Денот на Раѓањето Христово – Божик на сите македонски граѓани кои го прославуваат според Грегоријанскиот календар, посакувам да продолжиме да ја пренесуваме божиќната порака за вистината за верата која ја живееме. И овој Божик, нека светлината и топлината ги исполнат нашите домови, нека ни донесат лична и семејна среќа, верба во себе и во другите, и креативна енергија за да придонесеме за севкупниот напредок на нашата татковина Македонија.

Христос се роди!
Вистина се роди!

д-р Ѓорге Иванов

Претседателот на Република Македонија, д-р Ѓорге Иванов, во пресрет на 21 декември, Денот на наставата на турски јазик, денеска прими претставници на Сојузот на турски невладини организации - МАТУСИТЕБ.

На средбата, на која присуствуваа г. Тахсин Ибрахим, претседател на МАТУСИТЕБ, и членовите на управниот одбор на организацијата, г. Шенол Тахир, г. Хушреф Емин и г. Хајати Шабан, беа разменети мислења за положбата на турската заедница во Република Македонија.

Претседателот Иванов истакна дека Република Македонија високо го цени придонесот што припадниците на турската заедница го даваат за целокупниот развој на државата и изрази надеж дека ќе продолжат да ја негуваат својата традиција и да придонесуваат за просперитетна иднина на сите граѓани на Република Македонија, како и за продлабочување на пријателските односи меѓу Република Македонија и Република Турција.

Соговорниците го запознаа претседателот Иванов со тековните активности на МАТУСИТЕБ, како и со состојбите и предизвиците во процесот на образование и наставата на турски јазик. Воедно, беше поздравено значењето кое Република Македонија му го придава на правото на настава на мајчин јазик, како и континуираните заложби на Претседателот за рамноправен статус на припадниците на сите етнички заедници во државата и за заштита на нивната култура и традиција.

По повод одбележувањето на Денот на наставата на турски јазик - 21 декември, претседателот Иванов упати и честитка до претставниците на турската заедница во Република Македонија.

Почитувани сограѓани,

Дозволете ми по повод Денот на наставата на турски јазик до сите претставници на турската заедница во Република Македонија да им го честитам Денот на наставата на турски јазик.

Јазикот на еден народ ја претставува душата на една нација. Преку него се изразуваат националните и културните особености, идентитетот и духовното богатство на земјата. Различностите, сплетот на култури и религии нè прави посебни, додека нашето меѓусебно почитување и доверба ни даваат за право да кажеме дека создадовме цврст мост за меѓусебна соработка и партнерство. Показател за тоа е добрата соработка меѓу Република Македонија и Република Турција за што сведочат и многубројните заеднички реализирани проекти. Нашиот адут е традицијата која нè поврзува и истовремено нè обврзува заеднички да ги промовираме интересите и културните вредности како дел од нашата заедничка иднина.

Можноста која ја имаат турската, и другите заедници во Република Македонија, да се образуваат и да говорат на својот мајчин јазик, говори доволно за универзалните вредности за кои се залагаме и за демократската особеност која ја создаваме со векови наназад.

Честитајќи ви го Денот на наставата на турски јазик сакам да истакнам дека и во иднина, како и досега, ќе се залагаме за унапредување на општествените процеси за негување и за промовирање на културните особености и традиција на турската заедница во Македонија.

д-р Ѓорге Иванов

Претседателот на Република Македонија, д-р Ѓорге Иванов, денеска во проштална средба го прими апостолскиот нунциј, надбискупот Јануш Болонек.

Претседателот Иванов се заблагодари за досегашниот ангажман на надбискупот Јануш Болонек во унапредување и негување на односите меѓу Република Македонија и Светиот Престол.

На средбата беше потврдена силната поврзаност меѓу Република Македонија и Светиот Престол и меѓусебното разбирање, при што беа разменети и мислења околу можната реализација на одредени иницијативи кои би допринеле за јакнење на пријателството и соработката меѓу Република Македонија и Светиот Престол.

Надбискупот Јануш Болонек ги поздрави континуираните заложби на претседателот Иванов за јакнење на меѓу-религискиот дијалог, толеранцијата и почитувањето на различностите во Република Македонија.