Претседателот на Република Македонија, д-р Ѓорге Иванов, денеска ја прими, г-ѓа Луиза Винтон, новиот постојан координатор на Обединетите Нации и претставник на Програмата за развој на Обединетите нации (УНДП) и Фондот за популација на Обединетите нации (УНФПА) за Република Македонија.

Претседателот Иванов и посака добредојде на г-ѓа Винтон и изрази очекување дека досегашната успешната соработка со УНДП ќе продолжи и во иднина, со реализација на тековните и идни проекти од интерес на државата и граѓаните.

Постојаниот координатор на ОН, г-ѓа Винтон, ја поздрави посветеноста на претседателот Иванов на темите од интерес на Обединетите Нации, и искажа подготвеност за конструктивна соработка со сите македонските институции и за проширување на поддршката во иднина.

Македонскиот претседател изрази очекување дека успешно ќе бидат реализирани Милениумските развојни цели на ОН за Република Македонија, како и целите во областите идентификувани со Акцискиот план 2010-2015, кои меѓудругото се значајни и од аспект на приближување на земјата кон стандардите на Европската унија.

На средбата, претседателот Иванов ги истакна и достигнувањата на Република Македонија во полето на намалување на ризици од катастрофи, адаптација кон климатските промени и заштитата на животната средина, што во голема мера се должи на ангажманот и проектите на УНДП.

Претседателот на Република Македонија, д-р Ѓорге Иванов, денеска во проштална средба го прими Н.Е. г. Вашингтон Луис Переира де Суса Нето, амбасадор на Федеративна Република Бразил.

На средбата, претседателот Иванов изрази благодарност за дипломатската мисија на амбасадорот де Суса Нето и очекување дека одличните билатерални односи меѓу двете земји ќе продолжат да се развиваат во сите области од заемен интерес.

Во тој контекст, претседателот Иванов изрази интерес за подобрување на економската соработка и зголемување на трговската размена, како и за привлекување на бразилски инвестиции во Република Македонија.

Истакнувајќи ја добрата соработка меѓу двете земји во мултилатерален контекст, претседателот Иванов изрази очекување за идна соработка и меѓусебна поддршка во меѓународните организации.

На средбата двајцата соговорници разменија мислења и информации околу актуелните случувања во двете земји, регионот, како и во Латинска Америка.

Претседателот на Република Македонија, д-р Ѓорге Иванов, во пресрет на Денот на албанската азбука - 22 Ноември, денеска прими ученици од ОУ „Братство Миѓени" - Тетово, ОУ „Дитуриа" - Липково, ОУ „25 Мај " - Гази Баба и од OУ „Дитуриа" - Сарај.

По повод одбележувањето на 22 Ноември – Денот на албанската азбука, Претседателот на Република Македонија, д-р Ѓорге Иванов упати и честитка до припадниците на албанската етничка заедница.

Почитувани сограѓани,

Одбележувајќи го Денот на албанската азбука во Република Македонија ја потврдуваме заедничката заложба за почитување и за унапредување на етничката и културната разноликост и духовното богатство во земјава.

Азбуката и јазикот се основните елементи на националното идентификување, на културните особености и разлики, но истовремено тие се и обврска за заедничко меѓусебно разбирање, толеранција и соживот.
Албанскиот јазик е нераскинлив дел од јазичното и од културното богатство на Република Македонија. Негувањето на традицијата и културата придонесува за просперитетна иднина и за благосостојба на сите граѓани. Почитувањето на етничката и културната коегзистенција е наш аманет со кој се гордееме. Во Република Македонија се негуваат етничките, националните, верските и културните разлики. Тоа е, всушност, и формулата на посебноста и суштината на универзалните вредности кои ги градиме со векови и кои се столб на иднината.

Создавањето заедничка иднина е возможно само со почитување и со разбирање на различностите. Затоа сме горди на етничкиот и на јазичниот диверзитет. Затоа славејќи го Денот на албанската азбука заеднички го прославуваме и сплотувањето и зближувањето на двете култури кои опстојувале заедно со векови.

Во оваа пригода сакам да упатам порака до сите граѓани на Република Македонија дека моделот за иднината започнува со почитувањето на сите заедници во земјата, со зацврстувањето и со унапредувањето на меѓучовечките односи, толеранцијата и соживотот кои нè прават посилни во справувањето со предизвиците и нè обврзуваат да ја почитуваме разноликоста и важноста на јазикот и традицијата.

д-р Ѓорге Иванов

Претседателот на Република Македонија, д-р Ѓорге Иванов, денеска во проштална средба ја прими Н.Е. г-ѓа Хелена Стадерт, амбасадор на Комонвелтот Австралија.

На средбата, претседателот Иванов изрази задоволство од досегашната соработка со амбасадорката Стадерт, и й посака успех во натамошната кариера.

Двајцата соговорници, оценија дека билатералните односи меѓу двете земји се пријателски и бележат континуиран позитивен развој. Во однос на натамошната соработка, македонскиот претседател го истакна интересот и подготвеноста за натамошно интензивирање на политичкиот дијалог на сите нивоа, вклучувајќи и највисоко, како и потребата од фокусирање на вниманието во претстојниот период на зголемувањето на економската соработка, трговската размена и на привлекувањето на австралиските инвестиции во Република Македонија.

Претседателот Иванов посочи дека бројната македонска заедница во Австралија е мостот што секогаш ќе ги поврзува двете земји и претставува голема предност за понатамошно развивање и продлабочување на односите.

На средбата, беа разменети мислења и информации околу стратешките цели на Република Македонија и за актуелните случувања во двете земји.

Претседателот на Република Македонија, д-р Ѓорге Иванов, денеска ја прими г-ѓа Евелин Н. Фаркас, заменик-помошник на секретарот за одбрана на Соединетите Американски Држави.

Претседателот Иванов ја поздрави соработката во областа на одбраната меѓу двете земји и изрази задоволство од севкупната поддршка која Армијата на Република Македонија ја добива од страна на Соединетите Американски Држави, како од аспект на финансиска, така и практична и техничка поддршка, преку учество во заеднички обуки, вежби и мисии. Воедно, на средбата беа разменети мислења околу можностите за натамошно продлабочување на соработката во одбраната, при што беше поздравена иницијативата за трилатерално партнерство меѓу армиите на Република Македонија, Вермонт и Сенегал.

„Република Македонија е благодарна за пријателството, помошта и поддршката која ја добива од САД од првите денови на независноста до денес, особено за напорите и поддршката во реализација на нашите стратешките цели. Во Република Македонија секогаш можете да гледате како на искрен пријател и партнер", рече претседателот Иванов.

На средбата со г-ѓа Фаркас, која воедно е главен советник на командантот на НАТО за Европа и специјален советник на секретарот за одбрана за самитите на НАТО, претседателот Иванов го потенцираше очекувањето дека во пресрет на следниот НАТО Самит поддршката од САД ќе продолжи, со цел Република Македонија да го заземе заслуженото место во Алијансата.

Двајцата соговорници изразија задоволство од нивото на политичките односи меѓу двете земји, и се согласија дека воената соработка и соработката меѓу безбедносните служби, се исклучително значаен сегмент во севкупната соработка и партнерство.

Заменик-помошникот на секретарот за одбрана изрази благодарност за досегашниот ангажман на АРМ во меѓународните мировни мисии. „САД како и досега ќе продолжи да биде поддржуваш на стратешката определба на земјата за целосна интеграција во евроатланските структури", истакна Фаркас.

Претседателот на Република Македонија, д-р Ѓорге Иванов, денеска во проштална средба го прими амбасадорот на Република Албанија во Република Македонија, Н.Е. Арбен Чејку.

На средбата, двајцата соговорници изразија задоволство од севкупниот досегашен развој на билатералните односи, кои континуирано бележат позитивен и нагорен тренд, и изразија уверување дека политичките и економските односи и во наредниот период ќе се негуваат и унапредуваат.

Претседателот Иванов изрази задоволство што двете земји споделуваат идентична визија и приоритети за иднината, како што се негувањето на добрососедството, регионална соработка, и соработката и взаемната подршка во евроатлантските интеграции.

Амбасадорот Чејку се заблагодари за укажаното гостопримство во текот на неговиот мандат и изрази задоволство од соработката со сите македонски институции.