Претседателот на Република Македонија, д-р Ѓорге Иванов, денеска во проштална средба го прими амбасадорот на Република Куба во Република Македонија со седиште во Софија, Н.Е. г-ѓа Тересита де Хесус Капоте Камачо.

На средбата, претседателот Иванов се изрази задоволство од досегашната соработка со амбасадорката, и од нејзиниот придонес и ангажман во унапредување на билатералните односи и соработката меѓу двете земји.

Заедничка констатација на средбата, беше дека соработката меѓу двете земји во наредниот период треба да биде насочена кон интензивирање на економијата, како и на соработката во областа на културата, образованието, науката и на здравството, за што е неопходно да се пристапи кон уредување на правната рамка.

На интерес на претседателот Иванов, амбасадорката Тересита, го запозна со актуелните состојби во Куба, со промените во економската сфера што Куба ги прави во моментов, со детали за законот за странски инвестиции усвоен неодамна од Парламентот на Куба, како можност за развивање на економската соработка.

Претседателот на Република Македонија, д-р Ѓорге Иванов, по повод Националниот празник на Соединетите Американски Држави, 4 јули – Денот на независноста, упати честитка до Претседателот на Соединетите Американски Држави, г. Барак Обама.


Почитуван господине Претседателе,

По повод 4 јули - Денот на независноста на Соединетите Американски Држави, ми претставува особена чест и големо задоволство, во мое лично име и во името на граѓаните на Република Македонија, да Ви упатам најискрени честитки и срдечни желби за просперитет на Вашата ценета држава, како и за благосостојба на пријателскиот американски народ.

Односите со Соединетите Американски Држави ги ценам за исклучително значајни, а заложбата за нивното натамошно зацврстување од посебен интерес за Република Македонија и за нејзините граѓани. Соединетите Американски Држави даваат силна и континуирана поддршка на напорите за консолидирање на мирот, демократијата и стабилноста во регионот, како и за остварување на стратешките надворешнополитички цели на Република Македонија.

Одамна заслуженото полноправно членство на нашата држава во НАТО, како и натамошната интеграција во Европската унија, стабилноста и просперитетот на нашиот регион, регионалната соработка и градењето добрососедски односи, остануваат наши највисоки надворешно- политички приоритети, но истовремено и предизвици со кои нашата држава се соочува. Во насока на што поскора реализација на овие значајни цели, ја очекуваме Вашата натамошна, уште позасилена поддршка во претстојниот период, особено во пресрет на следниот Самит на Алијансата во септември оваа година.

На крајот би сакал да ја пренесам подготвеноста на Република Македонија за натамошна успешна соработка со Соединетите Американски Држави во сите области од заемен интерес, како заеднички придонес кон просперитетот на регионот на Југоисточна Европа, но и воопшто, во глобални рамки, како стратешка определба на нашите држави.

Со такво убедување, како и во очекување на можноста за лична размена на мислења по сите прашања од заемен интерес, дозволете ми, господине Претседателе, да Ви ги упатам изразите на моето највисоко почитување.

д-р Ѓорге Иванов

Претседателот на Република Македонија, д-р Ѓорге Иванов, по повод Националниот празник на Канада, упати честитка до Н.Е. г. Дејвид Џонстон, Генерален гувернер на Канада


Ваша Екселенцијо,

По повод Националниот празник на Канада, ми претставува особена чест и големо задоволство, во мое лично име и во името на граѓаните на Република Македонија, да Ви упатам најискрени честитки и срдечни желби за просперитет на Вашата држава, како и за благосостојба на пријателскиот народ на Kанадa.

Ја користам оваа свечена пригода за да го нагласам своето задоволство од исклучително позитивниот развој на односите и континуираниот политички дијалог, како и плодната соработка меѓу нашите две држави во повеќе области од заемен интерес, коишто го потврдуваат традиционалното пријателство што заемно нè поврзува.

Воедно, би сакал да ја искажам својата длабока увереност дека во претстојниот период нашите билатерални односи ќе продолжат да се развиваат со уште посилна динамика, отворен и конструктивен дијалог на заемно разбирање и доверба, како и со поцврсти економски релации.

Дозволете ми да ја искажам и големата благодарност за досегашната цврста и принципиелна поддршка од Вашата држава на заложбите на Република Македонија за што поскоро целосно интегрирање во евроатлантските структури, за која искрено се надевам дека ќе продолжи со несмален интензитет и во претстојниот период.

Со такво уверување и со најискрени желби за Ваша натамошна успешна работа и добро здравје, Ви ги упатувам, Ваша Екселенцијо, изразите на моето највисоко почитување.

д-р Ѓорге Иванов

Претседателот на Република Македонија, д-р Ѓорге Иванов, денеска во Сараево оствари работна средба со Претседателот на Република Австрија, Н.Е. г. Хајнц Фишер.

На средбата двајцата претседатели разменија мислења за билатералните односи и соработка помеѓу Република Македонија и Република Австрија, политичките и економските состојби во Република Македонија, интеграцијата во Европската унија и во НАТО, како и за состојбите во регионот.

Претседателот Иванов и претседателот Фишер констатираа одлични билатерални односи меѓу двете земји и динамична соработка во повеќе области. Двајцата претседатели ја нагласија потребата и очекувањето дека во наредниот период двете страни ќе се фокусираат на уште позасилена економска соработка.

Во контекст на европските аспирации на Република Македонија, претседателот Иванов изрази благодарност за постојаната силна поддршка од страна на Република Австрија.

Претседателот Иванов го повтори ставот дека отворањето на пристапните преговори за членство во Европската унија останува најважна цел за Република Македонија, посочувајќи дека тоа несомнено ќе придонесе за јакнење на мултиетничката кохезија во Република Македонија, за засилување на реформските процеси и за поуспешно соочување со предизвиците.

„Република Македонија е решителна во исполнувањето на поставените стратешки цели, членството во Европската унија и во НАТО. Република Македонија ги исполни сите критериуми за членство во Алијансата и е подготвена веднаш, неодложно да ја започне следната фаза во интеграцијата во ЕУ. Република Македонија бара еднаков и фер третман од земјите-членки на ЕУ, односно очекуваме позитивниот пример на паралелно движење во интеграцијата и во надминувањето на билатералните прашања да биде применет и во нашиот случај. Република Македонија истовремено бара почитување на меѓународното право и на меѓународните обврски. Членството на Република Македонија во ЕУ и НАТО не е придобивка само за нас, туку и за унијата, и за алијанската и за нашиот регион", порача македонскиот претседател.

На средбата претседателот Фишер истакна дека е потребно да се интензивираат напорите за следниот чекор во интеграцијата во Европската унија и дека Република Македонија, како и досега, може да смета на австриската поддршка.

Претседателот на Република Македонија, д-р Ѓорге Иванов, по повод почетокот на рамазанските пости, упати честитка до поглаварот на Исламската верска заедница во Република Македонија, реис-ул-улема ефенди Сулејман Реџепи, до членовите на Ријасетот и до сите припадници на исламската вероисповед во Република Македонија.

Почитуван реис-ул-улема ефенди Сулејман Реџепи,

Дозволете ми, Вам лично, на членовите на Ријасетот на Исламската верска заедница и на сите граѓани со исламска вероисповед во земјава да Ви го честитам започнувањето на рамазанските пости.

Одбележувајќи го започнувањето на постите за големиот празник Рамазан-бајрам, кој според муслиманските верувања е месец на проштавање, истрајност и посветеност кон верата, верувам дека и годинешново празнување ќе помине во духот на споделување на љубов, милосрдие и добрина.

Верувањето нè учи на почитување на верските и духовните вредности и ни укажува на единство меѓу луѓето во духот на меѓуверската толеранција, без разлика на верската, етничката и политичката припадност.

Од сè срце Ви посакувам рамазанските пости да Ви бидат исполнети со хармонија и во радост да го дочекате големиот празник Рамазан-бајрам. На припадниците на исламската заедница во земјава им посакувам фамилијарна топлина, мир и љубов.

д-р Ѓорге Иванов

Претседателот на Република Македонија, д-р Ѓорге Иванов, денеска прими делегација од Универзитетот за традиционална кинеска медицина во Ченгду, провинција Сичуан од Народна Република Кина.

На средбата беа разменети мислења, околу пројавените иницијативи и проекти, кои беа разговарани при посетата на претседателот Иванов на Универзитетот за традиционална кинеска медицина во Ченгду, во однос на соработка со универзитети од Република Македонија, за примена и воведување на кинеската традиционална медицина во нашиот здравствен систем, како и обука и едукација на кадар.

Претседателот Иванов, изрази задоволство од можноста да го возврати гостопримството, кое му беше укажано при посетата на Универзитетот за традиционална кинеска медицина во Ченгду, во рамки на посетата на НР Кина минатиот октомври, на која се отворија вратите за нови можности за соработката во различни сфери од заемен интерес.

Заблагодарувајќи се за приемот, претставниците од Универзитетот за традиционална кинеска медицина, изразија надеж дека нивната посета ќе отвори едно ново поглавје во соработката меѓу двете земји на полето на образованието, здравството и медицината.