Претседателот на Република Македонија д-р Ѓорге Иванов денеска беше одликуван со највисокиот орден на Редот „Свети Лазарус“ од Ерусалим.

Денешниот чин го сметам за гест на големо признание. Македонија е древна земја, земја од дамнина посветена на Бога, во која живеат и се негуваат вистинските вредности, истакна претседателот денеска по доделувањето на орденот. Претседателот Иванов изрази благодарност од посветеноста на Редот на „Свети Лазарус“ во негувањето на заедничките вредности. Денешната чест ја сметам како залог и јас, лично, и мојата земја да се приклучиме на негувањето на ова братство на искрени пријатели и на вредностите кои нè прават вистински луѓе, нагласи македонскиот претседател.

Дон Карлос Гереда де Борбон од  Редот на „Свети Лазарус“ предавајќи му го орденот на Претседателот Иванов изрази задоволство што е во Македонија веднаш по прославата на 20-годишнината од независноста на државата. Со отворањето на нашето претставништво во Македонија, Вашата држава ќе биде една од позначајните мисии во светот, рече Гереда де Борбон. Тој потсети дека Редот на „Свети Лазарус“ потекнува од 11-от век. Постоиме 900 години и нашата цел е да му помагаме на народот. Нашиот ред е стар, но и модерен. Во 13-от век дозволивме жени да станат членови и со тоа сме значи модерни и пред времето. Од 18 -от век почнавме да примаме членови од редот на ортодоксните христијани, протестанти, католици и со тоа сме посебни, рече Дон Карлос Гереда де Борбон и додаде дека нивниот Ред се шири брзо во светот од Австралија, Канада, Јапонија, Индонезија...

Претседателот Иванов им се заблагодари на Лазар Лазаров, Илија Џонов, Ѓоко Динев, Петар Ѕалев, како и на останатите истакнати членови на Редот на „Свети Лазарус“ од Ерусалим во Македонија.

Редот „Свети Лазарус“ од Ерусалим е еден од најстарите редови во христијанството во кои членуваат претседатели на држави, влади, кралски семејства и интелектуалци од целиот свет.

Повикувајќи на единство и нарекувајќи го Музејот на македонската борба за државност и самостојност како Музеј на слободата, претседателот на Република Македонија д-р Ѓорге Иванов ја положи оригиналната Декларација за независност во новоотворениот објект.

Од Собранието преку Триумфалната порта и Камениот мост, на денот на прославата на 20-годишнината од независноста на Република Македонија, Декларацијата за независност, овој клучен историски документ, го доби своето централно место во новоизградениот музејски комплекс во кој сликовито е прикажана борбата на македонскиот народ за слобода и самостојност.

Како што нагласи Претседателот Иванов во своето свечено обраќање, ова е музеј на сите идеолошки правци на Македонија  што произлегоа од револуционерното движење, од борбата за слобда, но и сведоштво  и за злосторствата на некои комунисти, социјалисти, револуционери.
„Ова е музеј на сите чеда на Македонија. Овој музеј е споменик на нескротливиот марш кон слободата! Во музејот среќаваме и херои и луѓе кои застраниле од каузата. И хуманисти и грешници. Но, овој музеј повикува на историско помирување и ни говори – да паметиме за да не ги повториме старите грешки. Ние едноставно не смееме да дозволиме правта на заборавот повторно да го прекрие големото пожртвувано дело на Шатев и на многубројните македонски родољуби кои неправедно беа заборавани, обвинувани и оцрнувани,“ нагласи претседателот Иванов.

Според него, Музејот на македонската борба за државност и самостојност ги осветлува скриените катчиња, скриените периоди на нашата историја, и токму затоа неговото отворање е важен историски настан, симбол на обединувањето, што го прави вистинскиот дом за Декларацијата на независноста.

„Она што нè прави особено горди е што во сите конститутивни документи на македонската држава се гарантира полна вклученост на сите, без оглед на етничката и верската припадност. Да се биде Македонец значи почитување на сограѓанинот и вклучување на најдоброто од вредносниот систем на другиот. Тоа е моќта на оваа наша земја и на оваа наша национална кауза. Да се биде Македонец значи да се биде толерантен и да се почитува културата и обичаите на другиот. Така било од дамнина уште пред Христа, така било и во сите епохи и царства кои поминале на овој простор, така е и денес. Тоа е Македонија!“ посочи претседателот Иванов истовремено повикувајќи на заедничка балканска интеграција во Европската унија бидејќи, како што рече, без мир на Балканот, нема да има мир во Европа.

„Никогаш во историјата не се случило назадна политика да победи напредна политика. Концептот на хомогена држава, нација, не може да победи концепт за мултиетничка демократија“ посочи претседателот.

По положувањето на Декларацијата, од скопското Кале беа испукани неколку топовски плотуни во чест на Денот на независноста, а Армијата на Република Македонија пред музејот изведе почесна стрелба за сите херои кои своите животи ги положиле за денешната независна македонска држава.
 

Претседателот на Република Македонија д-р Ѓорге Иванов денес присуствуваше на свеченото отворање на новиот Аеродром „Александар Велики“ во Скопје, заедно со премиерот Никола Груевски, владиниот економски тим, претседателот на Собранието Трајко Вељаноски, бројна турска бизнис делегација и граѓани на Република Македонија.

Новиот аеродром кој е обновен и модернизиран со најсовремена технолошка опрема според сите светски стандарди, од страна на концесионерот – турската авио-компанија ТАВ, има капацитет да опслужува четири милиони патници годишно.

Инвестицијата во овој значаен инфраструктурен проект ќе придонесе кон напорите за забрзување на економскиот раст, привлекување на нови инвестиции и туристи. Со оглед на фактот што е најмодерен аеродром на Балканот, а поради стратешката локација, се очекува да прерасне во клучен Балкански транспортен центар.

Претседателот на Република Македонија и Врховен командант на вооружените сили д-р Ѓорге Иванов денеска оствари координативна средба со Министерот за одбрана Фатмир Бесими и со Началникот на Генералштабот на АРМ, Генерал Мајор Горанчо Котески.

Целта на оваа прва средба во ваков состав беше координација во однос на стратегиските приоритети и проекти од делокругот на одбраната и безбедноста до крајот на годината, каде уставни надлежности и компетенции, овластувања и одговорности имаат Претседателот на Република Македонија, Министерот за одбарана и Началникот на Генералштабот на АРМ.

На средбата стана збор за идните реформски процеси и претстојната трансформација на Армијата на Република Македонија, ангажманот на АРМ во меѓународните мисии раководени од НАТО, ЕУ и ООН, се координираа гледиштата во сферата на одбранбената дипломатија, а се разговараше и за други тековни состојби во Армијата на РМ и Министерството за одбрана.
 

Претседателот на Република Македонија д-р Ѓорге Иванов, денеска ја посети Општината Јабука во Војводина, каде што живеат најмногу Македонци од кое било друго место во Србија. Во Јабука оваа година е воведен македонски јазик во прво одделение и е објавен Буквар на македонски јазик со елементи на национална култура.

По средбата со Македонците во зградата на Општината, Претседателот јавно ги повика на претстојниот попис да се изјаснат како Македонци и да продолжат да ги негуваат својата култура и традиции.

„Овде македонската заедница е со години присутна и ги негува своите културни особености, го почитува својот јазик и обичаи. Затоа ја користам оваа пригода да ја посетам Јабука и да ги повикам сите Македонци на претстојниот попис во Србија слободно да се изјаснуваат, за да не робуваат на предрасудите од минатото и во согласност со времето во кое живеат да го искажат својот идентитет. Исто така, им порачувам да ги негуваат односите помеѓу заедниците, како што ги негуваме ние со претседателот Борис Тадиќ. Пријателството доведува до заемна доверба. Се надевам дека тоа ќе влијае на нашите заедници – и на Србите што живеат во Македонија, но и на Македонците што живеат во Србија,“ изјави Претседателот Иванов.

Тој го посети и Основното училиште „Гоце Делчев“ каде што настава посетуваат околу 500 ученици.

Во Јабука постои македонското здружение ’’Илинден’’ и Македонска куќа. На месната заедница, улиците и училиштето се поставени двојазични табли. Пописниот образец исто така е преведен на македонски јазик. Во Србија е формиран Национален совет на Македонците, а се организира и политичка партија која  ќе се залага за правата на Македонците во Србија.

Со посетата на Јабука, Претседателот Иванов го заврши престојот во Србија каде што вчера учествуваше на 9-иот УНЕСКО Самит на претседатели од Југоисточна Европа, посветен на современата уметност и помирувањето.
 

Претседателот на Република Македонија д-р Ѓорге Иванов во рамките на 9-иот УНЕСКО Регионален самит на шефови на држави од Југо-источна Европа, што денеска се одржа во Србија, се сретна и со еврокомесарката г-ѓа Андрула Василиу, со која размени мислења за поинтензивна и посодржајна соработка помеѓу Република Македонија како земја-кандидат и Европската комисија, во областите во кои еврокомесарката е надлежна - образование, култура, повеќејазичност и млади.

На средбата беше искажана заемна надеж дека наскоро ќе се надминат проблемите и ќе бидат исполнети условите за укинување на суспензијата за програмите на Европската унија „Доживотно учење“ и „Млади во акција“, која беше воведена поради злоупотреба на функцијата на поранешниот директор на Националната агенција за европски образовни програми и мобилност. Василиу апелираше земјата да посвети посебно внимание на финансискииот менаџмент на Агенцијата, што ќе биде во корист на Република Македонија, иако таа не единствената земја која се соочува со проблеми во овој контекст. Претседателот Иванов ја информираше еврокомесарката Василиу дека Министерството за образование и наука и Националната агенција интензивно работат на исполнување на условите за повторно воспоставување на овие програми.

Шефот на државата ја запозна еврокомесарката со проектот „Школа за млади лидери“, што годинава вторпат се одржа под негово покровителство, како и со Законот за млади. Еврокомесарката, искажа целосна подготвеност и интерес за тесна и продлабочена соработка на Европската комисија во споменатите сфери, истакнувајќи го значењето на вклучувањето на младите во јавниот живот, што е обврска од Лисабонскиот договор но и тема на која таа лично е целосно посветена.

Василиу го информира Претседателот и дека во план е Европската комисија да го зголеми буџетот за култура за околу 30 отсто, што е можност за Македонија и за Западен Балкан да ги продолжат напорите и процесите во сферата на културата, а во функција на економски развој.

Претседателот Иванов, исто така, побара од еврокомесарката поддршка за успешна реалиозација на реформите во образованието во Република Македонија, како и за Стратегијата за интегрирано образование.