Денеска во Букурешт, претседателот на Република Македонија д-р Ѓорге Иванов, постхумно ја одликува Лиана Думитреску, првиот претставник на Македонците во романскиот Парламент, со Орден за заслуги за Македонија. Думитреску е одликувана со ова највисоко признание за нејзината посветеност кон македонската заедница и унапредувањето на македонско-романските односи. Орденот за заслуги за Македонија и беше врачен на нејзината мајка Константина Думитреску, актуелен претседател на Асоцијацијата на Македонците во Романија.

„Со негувањето на македонското име и идентитет, на семејните вредности, на нашите традиции и обичаи, Лиана даваше пример којшто треба да го следат оваа и наредните генерации Македонци од пријателска Романија. Верувам дека секоја македонска заедница во светот би сакала да биде предводена, промовирана и застапувана од личност каква што беше Лиана Думитреску. Таа покажа колку е важно Македонците активно да учествуваат во општествениот, културниот и политичкиот живот во Романија, промовирајки ги со тоа македонските вредности во романското општество,“ истакна претседателот Иванов.

Нејзината мајка, Константина Думитреску, нагласи дека Асоцијацијата на Македонците во Романија ќе ја продолжи мисијата на Лиана  - да ги застапува и брани интересите на македонското малцинство во Романија.

Лиана Думитреску почина годинава на 38 годишна возраст. Таа беше првиот претставник на Македонците во Романскиот параламент во два мандата, од 2004 до 2008 година и од 2008 до 2011 година. Како пратеник беше член на повеќе комисии во Романскиот парламент, меѓу кои и во Комисијата за соработка на Романскиот парламент со Македонското собрание. Сестрано ја помогаше иницијативата за признавање на македонската заедница како официјално малцинство во Романија, а во 2002 година успешно ја реализира идејата за внесување на македонците во пописните графи на официјалниот попис на населението во Романија.

Македонскиот претседател д-р Ѓорге Иванов денеска во Букурешт, во рамки на официјалната посета на Романија, оствари средба со патријархот на Романската православна црква, неговото блаженство Данаил.

Претседателот Иванов на средбата изрази благодарност што Романската православна црква  го даде светото миро кога Македонската православна црква се одвои од Српската црква.

Како што истакна Претседателот Иванов, решенија за проблемите меѓу братските православни цркви треба да се бараат само преку дијалог, а државите да го помагаат тој процес.

Романскиот патријарх на средбата посочи дека имаат разбирање за проблемот на МПЦ и смета дека секоја црква има право на сопствен живот, идентитет и автокефалност. Го поздрави и го поддржа ангажманот на Иванов за мултиетничкиот соживот и верската толеранција во Македонија.

Патријархот Данаил исто така предложи на нивните медиуми во идината да бидат емитувани емисии за длабоките корени и врски мегу двете држави и цркви.

За нас Романија е важен партнер и од клучно значење за двете држави е интензивирање на меѓусебната економска соработка, особено во текот на трговската размена, им порача македонскиот претседател Ѓорѓе Иванов на романските бизнисмени на денешниот македонско–романски бизнис форум што се одржува во Комората за индустрија и трговија во Букурешт. На Форумот, покрај македонски и романски компании учествуваат и компании од Италија.

Иванов ги повика романските бизнисмени да ја посетат Македонија и да ги искористат нејзините предности при реализацијата на нивните бизнис планови не само на македонскиот пазар, туку и за целиот регион.

Потсети дека Македонија има макроекономска стабилност со ниска инфлација која во просек изнесува 2%, избалансирани јавни финансии со низок буџетски дефицит, стабилен девизен курс и низок јавен долг кој изнесува под 26% од Бруто домашниот производ.

„Имаме одговорни компании со конкурентни прозводи кои можат да се најдат на вашиот пазар бидејќи тие се барани, како во светски рамки така и од романските потрошувачи. Затоа очекувам со ваш ангажман трговскиот дисбаланс во иднина да се намалува,“ истакна претседателот Иванов.

Генерална оценка на македонските и романските бизнисмени е дека поголемата соработка и заедничкиот настап на трети пазари е излезот од светската економска криза. Македонските компании беа поканети да учествуваат на Форумот на економски инвестиции што Романија ќе го организира заедно со Кина И Русија во 2012 година.

Вкупната трговска размена со Романија во првите седум месеци од годинава изнесува 87 милиони американски долари, со трговски дефицит на македонска страна. Во споредба со првите седум месеци од минатата година трговската размена е намалена за 15%.

Според агендата, денеска претседателот Иванов ќе се сретне и со претставници на македонското малцинство во Романија, а со Орден за заслуги за Македонија постхумно ќе ја одликува Лиана Думитреску. Орденот ќе го прими нејзината мајка Константина Думитреску, актуелен претседател на Асоцијацијата на Македонци. Лиана Думитреску беше прв претставник на Македонците во Парламентот на Ромамнија во два мандата од 2004 до 2008 година и од 2008 до 2011 година. Сестрано ја помогаше иницијативата за признавање на македонската заедница како официјално малцинство во Романија.

Романија безрезервно ја поддржува интеграцијата на Македонија во Европската унија и НАТО, но одлуките за тоа се носат колективно од сите земји-членки и затоа е потребно да се реши спорот за името, порача романскиот претседател Трајан Басеску по денешната средба во Букурешт со македонскиот претседател Ѓорге Иванов.

„Романија сама не може да одлучи ниту за влегување во НАТО, ниту за прием во ЕУ. Таквата одлука треба да биде донесена колективно од страна на сите земји-членки без разлика дали зборуваме за ЕУ или НАТО. Без разлика кој ќе биде текот на настаните на релацијата меѓу Македонија и Грција, Романија секогаш безрезервно ќе го поддржува вклучувањето на Македонија во НАТО и ЕУ. Ние немаме ниту еден мотив да не ја поддржиме Македонија за нејзиниот влез во ЕУ,“ нагласи романскиот претседател Трајан Басеску.

„Проблемот, додаде претседателот Басеску, е билатерален и колку ние и да ја поддржуваме Македонија, сè додека постои вето не ќе може да има прогрес. Тоа е мојот повик – пронаоѓање на билатерално решение за спорот за името.“

Романскиот претседател на заедничката прес конференција, исто така нагласи дека од интерес на Романија е земјите од Западен Балкан да влезат во ЕУ и НАТО и дека во овој момент според нив, држави кои можат да имаат забрзан процес на  пристапување во овие структури се Македонија, Црна Гора и Србија.

Претседателот на Република Македонија д-р Ѓорге Иванов се заблагодари за поддршката што  Романија и ја дава на Македонија во евроинтегративните процеси, но и за сè што Романија има направено за македонската заедница, за Македонците да можат да го учат својот мајлин јазик, да ги остваруваат своите права, како што Македонија тоа го прави за влашката зедница.

„Во наш интерес е оваа поддршка што ја имаме од Романија во однос на нашата интеграција во ЕУ и НАТО да продолжи со ист интензитет,“ истакна претседателот Иванов.

Во присуство на двајцата претседатели беа потпишани билатерални договори од областа на научната, економската и техничката соработка и од областа на туризмот. Договорите од македонска страна ги потпиша министерот без ресор задолжен за привлекување странски инвестиции Веле Самак.

Потпишувањето на двата договора, според двајцата претседатели, ќе придонесе за интензивирање на билатералните односи и на економската соработка. Досега Македонија и Романија имаат потпишано повеќе од 30 билатерални договори.

На Универзитетот „Димитрие Кантемир“ на претседателот Иванов му беше доделена тутулата Почесен Доктор на науки . Ова е трет почесен докторат што претседателот Иванов го добива за време на неговиот претседателски мандат. Во октомври 2009 година му беше врачен почесен докторат на науки од ТОББ Универзитетот во Анкара, а во март годинава од Универзитетот во Истанбул.

Претседателот Иванов попладнево во Букурешт ќе има средби и со претседателот на Сенатот Мирчеа Џоана и со романскиот премиер Емил Бок.