Почитуван господине Претседател,

Ми претставува особена чест и големо задоволство од името на граѓаните на Република Македонија и од свое име, да Ви упатам срдечни честитки по повод Националниот празник на Република Бугарија.

Дозволете ми во оваа свечена прилика, да го изразам моето уверување дека со заемен ангажман ќе ги јакнеме традиционално пријателските односи меѓу нашите две земји, како и регионалната соработка што ја остваруваме, што претставуваат значаен фактор во функција на остварувањето на стратешките определби на нашите две држави за стабилноста и просперитетот на регионот.

Дозволете ми, господине Претседателе, да Ви ги упатам изразите на моето највисоко почитување.

д-р Ѓорге Иванов

Претседателот на Република Македонија, д-р Ѓорге Иванов денеска прими претставници од зружението “ЕЛИФ–СН-ЛЕЈЛА“ од Лабуништа, кои го информираа за актуелните состојби во дримколскиот крај.

Претседателот на Република Македонија, д-р Ѓорге Иванов, денеска оствари средба со министерот за надворешни работи на Сојузна Република Германија, Н.Е. г. Гидо Вестервеле.

Во фокусот на разговорите беа предизвиците со кои се соочува Република Македонија во контекст на европските и евроатлантските интеграции, актуелните внатрешно-политички случувања во Република Македонија, како и развојот на билатералните односи меѓу двете земји.

Претседателот Иванов побара поддршка од Сојузна Република Германија и другите земји-членки на Европската унија за добивање датум за отпочнување преговори со Унијата. Во тој контекст, германскиот министер беше запознаен со актуелностите во разговорите за прашањето за името, како и за конструктивниот и посветен пристап на Република Македонија во унапредувањето на добрососедството со сите свои соседи.

Министерот Вестервеле изрази поддршка за евроатланските интеграции на земјава, со констатација дека за СР Германија не постои дилема дека иднината на Република Македонија е во евроатлантските семејства, оценувајќи дека интеграционите процеси се од клучно значење за зацврстување и унапредување на демократските процеси во Република Македонија.

Двајцата соговорници, разменија мислења и информации за актуелната политичка состојба во земјава. „Политичкиот дијалог е исклучително важен за одржување на потребниот баланс на општествено-политичките услови во кои моментално се наоѓа земјата. Во иднина, како и досега, континуирано ќе вложувам максимален напор за овозможување дијалог меѓу власта и опозицијата, во насока на целокупен напредок на македонското општество", истакна претседателот Иванов.

Министерот Вестервеле истакна дека Европската унија и Сојузна Република Германија ја подржуваат иницијативата на претседателот Иванов и неговите напори и ангажмани за надминување на политичките состојби во земјата, кои создаваат загриженост во однос на интеграциониот процес. Воедно изрази надеж дека разумот ќе надвладее и дека во Република Македонија ќе се врати нормалниот политички и парламентарен живот.

Претседателот Иванов и министерот Вестервеле го поздравија нагорниот развој на билатерални односи, изразен преку континуираната размена на посети на највисоко ниво, во годината на одбележување на 20-годишнината од воспоставувањето на дипломатските односи со Сојузна Република Германија.

Претседателот на Република Македонија, д-р Ѓорге Иванов, денеска приреди работен ручек за амбасадорите на земјите од Западен Балкан, амбасадорот на Република Словенија и Шефот на делегацијата на Европската унија во Република Македонија, во согласност со традицијата воспоставена минатата година.

На средбата присуствуваше Шефот на делегацијата на Европската унија во Република Македонија, Н.Е. г. Аиво Орав, амбасадорот на Република Словенија, Н.Е. г. Бранко Раковец, амбасадорот на Р. Хрватска, Н.Е. г. Златко Крамариќ, амбасадорот на Црна Гора, Н.Е. г. Душан Мрдовиќ, амбасадорот на Босна и Херцеговина, Н.Е. г. Здравко Беговиќ, амбасадорот на Р. Албанија, Н.Е. г. Арбен Чејку, амбасадорот на Р. Косово, Н.Е. г. Илбер Хиса и вршителот на должност во амбасадата на Р. Србија, г-ѓа Душанка Дивјак -Томиќ.

Во фокусот на разговорите беа евроатлантските интеграции како стратешка определба на земјите од регионот, тековните реформски процеси и перспективите на овој план. Претседателот Иванов и амбасадорите се согласија дека евроинтеграцијата на сите земји од Западен Балкан има посебно значење. Заемен заклучок беше дека интеграцијата треба да се гледа пред сè низ призма на обединување на општествата низ политички, етнички и социјален консензус, понатаму како алатка за исполнување на стандардите и критериумите што ќе доведе до подобрување на целокупните општествени перформанси, и конечно како алатка која ги упатува земјите на тесна соработка и заемна соработка.

Претседателот Иванов го реафирмираше ставот дека Република Македонија и натаму посветено работи на исполнување на европската агенда и дека одредувањето на датум за почеток на преговори со Европската унијата има суштинско значење за Република Македонија, но и за процесот на проширувањето како најуспешна политика на ЕУ. Продолжувањето на интеграцијата позитивно ќе влијае и на состојбите во регионот, беше заклучокот на учесниците.

На средбата беа разменети мислења за актуелните состојби во Република Македонија и во регионот, за предизвиците со кои се соочуваат одделните земји, при што беше изразена согласност дека сите отворени прашања треба да се решаваат со дијалог, меѓусебна почит и разбирање, и во духот на добрососедството и европските стандарди.

Македонскиот претседател ги потврди заложбите на Република Македонија за зацврстување, продлабочување и унапредување на добрососедството и регионалната соработка, како стратешка цел на земјата, и изрази очекување за конструктивност и успешност на претстојните регионални средби чиј домаќин е Република Македонија, како и надеж дека македонските претседавања со Процесот на соработка во Југоисточна Европа и Дијалогот на цивилизациите активно ќе придонесат во унапредување на соработката во регионот.

Во однос на билатералните односи со земјите од Западен Балкан, на средбата беше констатирано дека истите се на одлично ниво, со редовни средби и размени на посети. Како области со неискористени потенцијали за јакнење на соработката, соговорниците ги посочија економијата, трговската размена и инвестициите. Воедно, на средбата беше посочено и значењето од што поскоро завршување на инфраструктурите проекти од интерес за целиот регион, Јадранско-јонската магистрала и коридорите 8 и 10.

Претседателот на Република Македонија, д-р Ѓорге Иванов, денес беше домаќин на традиционалниот ручек со амбасадорите на земјите-членки на Вишеградската група, акредитирани во Република Македонија. На средбата присуствуваа министерот за надворешни работи на Република Македонија, г. Никола Попоски, амбасадорот на Чешката Република, Н.E. г. Мирослав Рамеш, амбасадорот на Република Полска, Н.Е. г. Пжемислав Чиж, вршителот на должност во амбасадата на Словачка Република, Н.Е. д-р Роберт Кирнаг и заменик амбасадорот на Унгарија, г. Атила Пинтер.

Претседателот Иванов изрази задоволство од одличните билатералните односи и континуираниот политички дијалог помеѓу Република Македонија и земјите од Вишеградската група, засновани на долги традиционални врски на пријателство и меѓусебно разбирање.

На средбата соговорниците констатираа дека меѓусебната билатерална соработка континуирано се продлабочува, но дека истовремено постои голем неискористен потенцијал за поинтензивна соработка во голем број области од заемен интерес, а особено на полето на економијата, инвестициите, образованието, културата, туризмот, информатичките технологии, како и земјоделието.

Претседателот Иванов се заблагодари за принципиелната, отворена и силна поддршка на земјите од Вишеградската група за напорите на Република Македонија и целиот регион за европска и евроатланска интеграција, како важен предуслов за трајна стабилност, мир и просперитет во Југоисточна Европа.

„Република Македонија е целосно посветена на остварување на реформите како и на унапредување на добрососедските односи со сите свои соседи, преку серија инцијативи, конкретни проекти. Република Македонија конструктивно учествува процесот за изнаоѓање решение за прашањето за името", истакна претседателот Иванов. Во тој контекст, Претседателот ги запозна амбасадорите со посветеноста и активното учество на Република Македонија во регионалните инцијативи, пред се со целите на македонското претседавање со Процесот на соработка во Југоисточна Европа, како и на 11. Форум на „Дијалогот меѓу цивилизациите", во соработка со УНЕСКО и Советот на Европа.

Амбасадорите ја поздравија и поддржаа регионалната активност на Република Македонија и изразија уверување дека земјите-членки на Вишеградската група како влијателен фактор во рамките на ЕУ, ќе продолжи со поддршката на европските и евроатланските аспирации на Република Македонија.

На средбата беа разменети мислења и ставови за актуелната политичка состојба во земјата, при што македонскиот претседател ги запозна амбасадорите со неговите видувања и ставови, како и заложби за надминување на политичката ситуација во земјата.

Македонскиот претседател уште еднаш ги поздрави одлуките на Унгарија и Чешката Република за официјализирање на досегашната пракса на обраќање кон Република Македонија со нејзиното уставно име во билатералната комуникација, и оцени дека истите се потврда за одличните меѓусебни односи и своевиден пријателски гест. Претседателот Иванов упати и честитки за новоизбраниот претседател на Чешката Република, г. Милош Земан.

Претседателот на Република Македонија, д-р Ѓорге Иванов, денеска го прими министерот за надворешни работи на Република Србија, г. Иван Мркиќ.

На средбата беа потврдени одличните билатерални односи, карактеризирани со континуиран политички дијалог и чести средби на сите нивоа. Претседателот Иванов и министерот Мркиќ се согласија дека постојат огромен број на прашања кои ги поврзуваат двете земји, наспроти малиот број на прашања за кои постојат разлики, и воедно изразија задоволство што тие прашања на ниеден начин не влијаат на соработката во сите сфери од заемен интерес, кои се во постојана позитивна динамика.

Во разговорите беше истакнато дека соработката меѓу двете земји, во иднина треба да се фокусира на натамошното продлабочување на економската и трговската соработка.

Во насока на исполнување на заедничката стратешка цел, интегрирање во Европската унија, претседателот Иванов го поздрави потпишувањето на Спогодбата за соработка во европските интеграции, како основа за меѓусебна соработка, помош и поддршка на патот кон ЕУ.

Во интерес на безбедната, стабилноста и просперитетот на регионот, македонскиот претседател ја потенцираше потребата од градење на добрососедски односи и посветеност на сите земји на регионалната соработка. Во таа насока, Претседателот го запозна српскиот министер за надворешни работи со целите на македонското претседавање со Процесот на соработка во Југоисточна Европа.