Претседателот на Република Македонија, д-р Ѓорге Иванов упати честитка до г. Јенс Столтенберг по повод превземањето на функцијата Генерален секретар на НАТО.

Ваша Екселенцијо,

Mи претставува особена чест и големо задоволство да Ви го честитам преземањето на функцијата генерален секретар на НАТО и да Ви упатам најискрени желби за успешно извршување на оваа одговорна функција.

Почитуван господине Столтенберг, јасно е дека оваа одговорна должност ја преземате во време на сериозни предизвици за Алијансата, но и за меѓународната заедница, воопшто. Сакам да Ве уверам дека во Република Македонија и во мене, лично, секогаш можете да имате доверлив партнер и секогаш можете да сметате на нашата поддршка во вршењето на Вашата должност. Република Македонија е решителна и одлучна во исполнувањето на поставената стратешка цел, членство во НАТО. Република Македонија одамна ги има исполнето сите критериуми за членство во Алијансата, и предолго чека да го заземе местото кое ѝ припаѓа и кое го заслужува. Република Македонија е соочена со блокада на членството во Алијансата, и тоа блокада која е нелегална. Нашите аргументи за симнување на нелегалната блокада на нашето членство, нашите барања и очекувања се базираат на она што всушност е неминовна потреба на денешницата, потреба која ќе нè води кон посигурен и попредвидлив свет. А тоа се почитување на меѓународното право, почитување на меѓународните договори и обврски кои произлегуваат од нив, почитување на пресудите на Меѓународниот суд на правдата. Членството на Република Македонија во НАТО не е придобивка само за нас, туку и за Алијансата и за нашиот регион. Искрено се надевам дека како прв човек на Алијансата, ќе дадете свој придонес и дека ќе се ангажирате во насока на отстранување на блокадата со која се соочуваме.

Очекувајќи блиска и отворена соработка во наредниот период, Ви ги испраќам искрените поздрави од Република Македонија и Ви ги упатувам изразите на моето највисоко почитување.

д-р Ѓорге Иванов

Претседателот на Република Македонија д-р Ѓорге Иванов, упати честитка до Н.Е. г. Си Џинпинг, претседател на Народна Република Кина, по повод одбележувањето на Националниот празник на Народна Република Кина.

Почитуван господине Претседател,

Ми претставува особена чест и големо задоволство, во мое име и во име на граѓаните на Република Македонија, да Ви го честитам Националниот празник на Народна Република Кина, со најискрени желби за Вашата земја да продолжи да се развива на патот кон просперитетот, стабилноста, мирот и благосостојбата, и да продолжи, како досега, да дава драгоцен придонес кон севкупниот мир и напредок на светот.

Дозволете ми по повод оваа свечена пригода, да ги изразам нашата искрена подготвеност и посветеност да продолжиме да ги негуваме искреното пријателство и одличните односи меѓу Република Македонија и Народна Република Кина, што ги краси заемна доверба и разбирање.

Почитуван господине Претседателе, сакам уште еднаш да ги искажам личната благодарност и благодарноста на граѓаните на Република Македонија за принципиелната и континуираната поддршка и помош од Народна Република Кина. Во таа насока сакам да ја пренесам цврстата определба за односите меѓу нашите пријателски земји и во иднина да бележат позитивен развој и зголемена динамика во градењето на пријателството и партнерството.

Со најискрени желби за Ваша натамошна успешна работа, добро здравје и лична среќа, Ви ги упатувам изразите на моето највисоко почитување.

д-р Ѓорге Иванов

Денеска, 30.09.2014 година – вторник, во Кабинетот на Претседателот на Република Македонија се одржа конститутивна седница на Советот за безбедност на Република Македонија.

На седницата, Советот за безбедност ги утврди активностите поврзани со прашањата за безбедноста и одбраната на Републиката за наредниот период, со цел да се дадат соодветни предлози до Собранието и Владата, како и мислења по определени акти од областа на безбедноста и одбраната кои ги донесува Претседателот на Републиката, согласно Уставот и законите.

Советот за безбедност констатира дека субјектите на системот за национална безбедност успешно ги исполнуваат должностите од делокругот на своите надлежности, дека функционираат на највисоко можно ниво и дека постои координација и соработка меѓу субјектите во насока на натамошно јакнење на националните безбедносни капацитети.

Советот за безбедност на седницата заклучи, субјектите на системот за национална безбедност да ги зајакнат активностите во насока на обезбедување, навремено предупредување за евентуални закани и ризици по националната безбедност, а со цел подобрување и развој на системот за рано предупредување, превенција и контрамерки по евентуална утврдена закана и ризик.

Членовите на Советот за безбедност разменија информации и мислења во врска со актуелните случувања во Сирија и Ирак, и рефлектирањето на тие состојби во нашиот регион и во Република Македонија. Посебен акцент беше ставен на состојбата со присуство и регрутирање на граѓани од нашиот регион и од Република Македонија во тие кризни региони.

Претседателот на Република Македонија, д-р Ѓорге Иванов, по повод 28 Септември, Меѓународниот ден на Бошњаците упати честитка до припадниците на Бошњачката етничка заедница во Република Македонија.

Почитувани сограѓани,

Во мое лично име и во името на сите граѓани на Република Македонија, би сакал најсрдечно да ви го честитам 28 Септември, Меѓународниот ден на Бошњаците, и да ви посакам празникот да го минете во убаво расположение и добро здравје.

Нашата заедничка татковина Република Македонија, како врвен приоритет го има поставено негувањето на различните културни специфики и традиции и во неа има место за секоја етничка заедница. Во нашиот богат и единствен мултикултурен мозаик неизбришливо е приуството на Бошњачката заедница која со својата традиција и култура го збогатува нашето секојдневие и разноликост.

Дозволете уште еднаш токму на денот на Бошњаците да потврдам дека како држава остануваме посветени на развивањето и унапредувањето на бошњачката култура и традиција, со цврста определба за нивна натамошна промоција, негување и заштита.

Бошњаците како и другите етнички заедници секојдневно и безрезервно го даваат својот придонес во сите сфери на животот во Република Македонија со што придонесуваат за економски развој и благосостојба на државата. Да продолжиме и понатаму заедно да градиме хармонија, просперитет и благодет за нас и за нашите потомци.

Нека ви е честит големиот празник.

д-р Ѓорге Иванов

Претседателот на Република Македонија, д-р Ѓорге Иванов, по повод одбележувањето на Рош Хашана еврејската Нова Година, упати честитка до г-ѓа Берта Романо Николиќ, претседател на Еврејска заедница во Република Македонија, и до членовите и припадниците на Еврејската заедница во Република Македонија.

Почитувана г-ѓо Николиќ,

Ми претставува чест и задоволство, Вам и на сите припадници на Еврејската заедница во нашата земја да Ви упатам искрени честитки по повод одбележувањето на Рош Хашана.

Прославувајќи ја eврејската Нова година, во претстојните денови Ви посакувам година на среќа, благосостојба и меѓусебно почитување. Почитувајќи ги културните и религиските разлики да продолжиме и понатаму заеднички да ја градиме нашата држава.

Славејќи ја годината што следи, според еврејскиот обичај, се слави вистината и добрите дела, затоа повикувам сите заедно да ги славиме позитивните вредности кои нè зближуваат и нè поврзуваат. Верувам дека и во иднина, како и досега, припадниците на Еврејската заедница ќе даваат активен придонес во напредокот на нашата земја.

Честитајќи Ви го прославувањето на Новата година, Ви посакувам празничните денови да Ви бидат исполнети со благодат, среќа и радост, а на сите припадници на Еврејската заедница им посакувам мир, спокој и меѓусебна доверба и пријателство.

Шана Това

д-р Ѓорге Иванов

Почитуван Претседателе,

Пред се сакам да истакнам дека чувствувам големо задоволство од тоа што Вашата Екселенција, претставувајќи ја Република Македонија присуствуваше на свеченоста на Примопредавање на Претседателската должност на 28 Август 2014 година. Исто така ви благодарам на упатената љубезна порака по повод мојот избор за Претседател на Република Турција.

Целосно сум убеден дека постојните пријателски односи помеѓу Турција и Македонија, кои се засноваат на силните историски, меѓучовечки врски и заеднички вредности, во наредниот период ќе се зацврстат уште повеќе и ќе продолжат да бидат придонес кон стабилноста на Балканот. Обостраните средби и соработката искажана на меѓународните средби, кои што со задоволство увидувам дека се интензивираат, ќе ги унапреди уште повеќе нашите односи кои се базираат на здрави темели. Сакам посебно да истакнам дека ќе продолжи поддршката на Турција кон процесот на интегрирање на Македонија во Евро Атлантските институции, пред се за нејзиното членство во НАТО.

Ја користам оваа можност да ги изразам моите најискрени желби за лично здравје и среќа на Вашата Екселенција и просперитет на пријателскиот и братски народ на Македонија.

Реџеп Таип Ердоган
Претседател на Република Турција