Претседателот на Република Македонија, д-р Ѓорге Иванов, по повод 11 Октомври - Денот на народното востание во Република Македонија упати честитка до граѓаните на Република Македонија.

Почитувани граѓани,

Нека ни е честит 11 Октомври, Денот на народното востание. На овој историски ден во 1941 со нападите на прилепскиот партизански одред „Гоце Делчев" врз полициската станица и затворот во Прилеп започна востанието против фашистичката окупација и беше најавена организираната народно ослободителна борба.

Преку оваа борба нашиот народ на најдобар можен начин го докажа својот државотворен капацитет и право на изградба на самостојна, суверена и слободна држава. Токму со 11 октомври и НОБ застанавме на страната на антифашистичката коалиција. Македонските граѓани знаеја да го изберат доброто наспроти злото, правдата наспроти неправдата и да застанат против фашизмот како едно од најголемите зла во човечката историја.

Денес после 73 години не бледнее споменот на 11 октомври и на народно ослободителната борба, живо е сеќавањето на сите оние кои застанаа наспроти моќната фашистичка армада и го положија својот живот на олтарот на татковината. Победата беше извојувана со невиден хероизам, смелост, непоколебливост и саможртвување. Наследството кое ни го оставија македонските борци - слобода и мир нема да дозволиме никогаш да ни биде одземено и загрозено.

На овој голем празник уште еднаш да се потсетиме дека Македонија, била, е и секогаш ќе биде на страната на прогресот, демократијата и слободата.

Нека ни е честит и вековит 11 Октомври!
Да живее Република Македонија!


д-р Ѓорге Иванов

Претседателот на Република Македонија, д-р Ѓорге Иванов, денеска го прими амбасадорот Аиво Орав, Шеф на Делегацијата на Европската унија во Република Македонија.

На средбата, амбасадорот Орав на претседателот Иванов му го врачи Извештајот за напредокот на Република Македонија за 2014 година и го информираше за клучните оценки содржани во извештајот, подготвен од Европската комисија.

Претседателот Иванов изрази задоволство од потврдената препорака за подготвеноста на Република Македонија за почеток на пристапните преговори со ЕУ, додавајќи дека Извештајот на Европската комисија и оваа година дава објективна слика на сето она што е сработено и постигнато во земјата, како и насоки за предизвиците на кои во наредниот период треба да се посвети нашата држава.

Амбасадорот Орав изрази надеж дека Република Македонија ќе продолжи со реформските процеси и што поскоро ќе ги почне преговорите за членство во Европската Унија.

Претседателот Иванов подвлече дека европската интеграција е наша стратешка цел и дека е потребно Република Македонија да го добие заслуженото - да ги почне долго очекуваните преговори кои ќе дадат дополнителен стимул за да се забрзаат реформските процеси во земјата. Македонскиот претседател изрази надеж дека на следниот Европски совет членките на ЕУ позитивно ќе одговорат на препораката од ЕК.

„Моменталната статус кво состојба со македонските евроатлантски интеграции, за која многупати до сега укажував, во голема мера придонесе за наведените оценки во Извештајот на Европската комисија. Република Македонија е прва земја од регионот што го потпиша Договорот за стабилизација и асоцијација со Европската Унија, од 2005 година е кандидат за членство, а од 2009 година комисијата дава препораки за почеток на пристапните преговори. Сметам дека Европскиот совет конечно треба да ги согледа последиците од предолгото чекање и да даде зелено светло за датум за почнување на преговорите", рече претседателот Иванов.

Македонскиот претседател истакна дека сите политички и општествени фактори во земјава е неопходно да се фокусираат кон вложување на дополнителни напори со цел оставарување на реформската агенда.

„Сите заедно, посветено и одговорно да работиме за остварување на нашите стратешки цели. Без оглед на забелешките нотирани во извештајот, наша примарна цел секогаш треба да биде напредокот на Република Македонија", рече претседателот Иванов.

Претседателот на Република Македонија, д-р Ѓорге Иванов денеска во Стар Дојран оствари средба со д-р Нуман Куртулмуш, заменик претседател на Владата на Република Турција.

Претседателот Иванов и вицепремиерот Куртулмуш констатираа одлични билатерални односи меѓу Република Македонија и Република Турција и искажаа подготвеност за натамошно интензивирање на соработката во сите области од взаемен интерес.

„Република Македонија и Република Турција имаат односи на стратешко партнерство и Република Турција е еден од најзначајните и најгласните промотори на интеграцијата на Република Македонија во НАТО. Поддршката од Република Турција е секогаш добредојдена и високо ја цениме", рече претседателот Иванов.

На средбата беше истакнат взаемен интерес за поинтензивна економска соработка, и беа разгледани можностите за инвестиции во повеќе области.

Претседателот Иванов и вицепремиерот Куртулмуш разменија мислења и за можностите во областа на туризмот, културата, образованието и други области од взаемен интерес.

Македонскиот претседател искажа благодарност за поддршката од Владата на Република Турција и Турската агенција за соработка и координација – ТИКА преку реализацијата на бројни проекти во Република Македонија. Претседателот Иванов изрази посебна благодарност за поддршката за отворање на првиот Ургентен центар на Универзитетската клиника за детски болести во Република Македонија, што се спроведе под покровителство на неговата сопруга, г-ѓа Маја Иванова, како и за отворањето на Спомен-куќата на семејството на Кемал Ататурк во с. Коџаџик. Беа разгледани можностите за реализација на други проекти во наредниот период.

По средбата, претседателот Иванов и вицепремиерот Куртулмуш, заедно со претставници на ТИКА, присуствуваа на отворањето на обновениот плоштад во селото Дедели, општина Валандово.

Претседателот на Република Македонија д-р Ѓорге Иванов, денеска оствари средба со членовите на Парламентот на Обединетото Кралство г. Марк Причард и г. Брајан Бинли.

На средбата со британските пратеници, беше разговарано за билатералните односи меѓу двете земји, како и за европските и евроатлантските интеграции на Република Македонија.

Претседателот Иванов изрази задоволство од принципиелната поддршка од страна на Обединетото Кралство за македонските стратешки цели, оценувајќи ги позитивно досегашните севкупни билатерални односи. Во тој контекст македонскиот претседател поздравувајќи ја соработката меѓу двата парламента, изрази подготвеност за натамошно унапредување на соработката помеѓу двете земји во сите сфери од заеднички интерес, како и за одржување на континуитет во политичкиот дијалог на сите нивоа.

Во однос на нашите евроатлантски интеграции, македонскиот претседател, истакна дека нашата држава останува целосно посветена на спроведување на реформите за членство во ЕУ и во НАТО, дополнувајќи дека поддршката од Обединетото Кралство е од особено значење.

Пратениците Причард и Бинли, искажаа поддршка во однос на македонските аспирации за членство во Европската Унија и во НАТО, и се заблагодарија за придонесот што Македонија го дава со учеството во мировните мисии, дополнувајќи дека членството на Македонија во НАТО ќе претставува значаен чекор за стабилноста на регионот.

На средбата беа разменети и мислења и информации поврзани со актуелните состојби и предизвици во регионот на ЈИЕ.

Претседателот на Република Македонија д-р Ѓорге Иванов, упати честитки до претседателот на Сојузна Република Германија, Н.Е. г. Јоахим Гаук, по повод Националниот празник на Сојузна Република Германија.

Ваша Екселенцијо,

Ми претставува особена чест и задоволство да Ви упатам честитки по повод Националниот празник на Сојузна Република Германија и најискрени желби за напредок и просперитет на Вашата земја и пријателскиот германски народ.
Дозволете ми во оваа свечена пригода да го реафирмирам интересот на Република Македонија за натамошно унапредување на блиските односи со пријателска Германија, како и својата лична подготвеност за соработка со Вас во насока на интензивирање на политичкиот дијалог во периодот што следи.
Почитуван господине Гаук, поддршката од Сојузна Република Германија во процесот на интеграцијата на Република Македонија во Европската унија и НАТО има посебно значење, а соработката со Вашата земја, во сите области од заемен интерес, во континуитет останува еден од нашите главни приоритети. Се надевам дека Сојузна Република Германија ќе ги има предвид нашите аргументи, заложби и постигнувања и дека поддршката во исполнувањето на нашите цели ќе продолжи и во наредниот, исклучително значаен, период. Во овој контекст, сакам да Ве уверам дека Република Македонија ќе го продолжи реформскиот процес со цел достигнување на европските стандарди и критериуми, и ќе продолжи да придонесува во регионалната соработка, во одржувањето на стабилноста и просперитетот на регионот на Југоисточна Европа.
Со такво уверување, и со надеж дека ќе можам да ве поздравам во Република Македонија, честитајќи Ви го уште еднаш Денот на германското обединување, Ве молам, Ваша Екселенцијо, да ги примите изразите на моето највисоко почитување.

д-р Ѓорге Иванов

Претседателот на Република Македонија д-р Ѓорге Иванов по повод верскиот празник Курбан-бајрам упати честитка до Поглаварот на Исламската верска заедница реис-ул-улема ефенди Сулејман Реџепи.

Почитуван реис-ул-улема ефенди Сулејман Реџепи,

Дозволете ми, Вам лично, на членовите на Ријасетот на Исламската верска заедница и на сите граѓани со исламска вероисповед во земјава да Ви го честитам големиот празник Курбан-бајрам.

Прославувањето на овој празник нека Ви донесе мир, радост и благосостојба, но и нека ја пренесе пораката за големината на овој празник, а тоа е споделувањето со ближните и сиромашните. Вредностите како милосрдието и простувањето се симболи на човечноста, почитувањето и толеранцијата, кои можеме заеднички да ги градиме преку дијалог и меѓусебна доверба.

Честитајќи Ви го Курбан-бајрам Ве повикувам заеднички да им подадеме рака на оние на кои тоа им е најпотребно. Овој празник во муслиманското верување значи обединување, споделување и отвореност. Тоа се вредностите кои нè обврзуваат сите заедно без разлика на нашата вероисповед и верување, вредности кои нè спојуваат и нè прават човечни и хумани.

Нека Ви е честит Курбан-бајрам.

д-р Ѓорге Иванов