Претседателот на Република Македонија д-р Ѓорге Иванов денеска прими претставници на Сојузот на борците од НОАВМ, по повод 11 Октомври - Денот на вооруженото востание во Република Македонија.

На средбата се разговараше за значењето на овој празник кој претставува темелник во историјата на нашата држава.

Претседателот Иванов, честитајќи го големиот празник на претставниците на Сојузот на борците од НОАВМ, ја истакна важноста секогаш да се потсетуваме на изворните идеи содржани во Декларацијата за човекови права на граѓанинот донесена на заседанието на АСНОМ. Со тие одредби Македонија покажа дека припаѓа во заедницата на слободни, суверени и демократски земји и дека нашето членство во НАТО и во ЕУ ќе биде круната на долгиот пат на нашиот народ, подвлече Претседателот Иванов.

Заблагодарувајќи се на приемот, претставниците на Сојузот на борците од НОАВМ рекоа дека прославата на 11 октомври е уште една можност да се присетиме и да се заблагодариме на сите херои кои без колебање ги дадоа своите животи за граѓаните на Република Македонија денес да живеат слободно и да можат да ја градат својата иднина и просперитет.

Соговорниците истакнаа дека 11 Октомври треба да претставува поттик за сегашните и идни генерации да продолжат и понатаму по истиот пат во градењето на Република Македонија како рамноправен член на големото светско семејство на држави и народи, како држава во која и понатаму ќе владее безбедноста, солидарноста, праведноста и добрите меѓучовечки односи.

Претседателот на Република Македонија д-р Ѓорге Иванов денеска оствари работна посета на Италијанската Република. Во Рим, Претседателот Иванов оствари средби со италијанскиот претседател Џорџо Наполитано, со претседателот на италијанскиот Сенат Ренато Скифани и со главниот обвинител за римското апелациско подрачје Луиџи Кампони.

Претседателот Иванов побара од Претседателот Наполитано да иницира во македонско-грчкиот спор да се примени хрватско-словенечкото искуство. На Претседателот Наполитано му укажав дека во последно време е создадена позитивна атмосфера, и враќањето на довербата меѓу Македонија и Грција овозможува да се дојде до решение кое би било взаемно прифатливо, изјави Претседателот Иванов по средбата со италијанскиот претседател. Во таа насока, подвлече Претседателот Иванов, беше и заложбата упатена до италијанскиот претседател да иницира во нашиот случај да се примени хрватско-словенечкото искуство кога двата процеса - на евроинтеграции и на изнаоѓање решение на билатералниот проблем, се одвиваат паралелно. На средбата е разговарано и за продлабочувањето на македонско-италијанскиот политички дијалог, како и за состојбите во Македонија и во регионот.

Македонија во Италија може да гледа искрен пријател и поддржувач на ЕУ и НАТО интеграциите, му порача на денешната средба претседателот на италијанскиот Сенат Ренато Скифани на македонскиот претседател. Тој и оддаде признание на Македонија за улогата во регионални рамки, како и за реформите кои ги спроведува за реализација на нејзините стратегиски цели. Изразувајќи благодарност за силната поддршка во евроинтегративните процеси, Претседателот Иванов го информира претседателот на италијанскиот Сенат за активностите во процесот кој се води во ОН за разликите околу името со Грција. Двајцата соговорници на средбата констатираа дека во рамките на севкупната соработка, парламентарната соработка ќе продолжи да се развива и унапредува.

Претседателот Иванов оствари средба и со Луиџи Кампони, главен обвинител на римското апелациско подрачје. На покана на македонскиот претседател Луиџи Кампони ќе дојде во Македонија да воспостави соработка со Академијата за судии и јавни обвинители и со Државното јавно обвинителство, бидејќи реформите во македонското судство се темелат токму на италијанското искуство.

По повод Националниот празник на Сојузна Република Германија, Претседателот на Република Македонија д-р Ѓорге Иванов испрати честитка до Претседателот на Сојузна Република Германија Кристијан Вулф.

Почитуван господине Претседател,

По повод Националниот празник на Сојузна Република Германија, имам особена чест и задоволство, во името на граѓаните на Република Македонија и во свое име, да Ви упатам срдечни честитки и искрени желби за просперитет на Вашата земја и благосостојба на пријателскиот германски народ.

Дозволете ми, во овој свечен момент, да ја изразам својата увереност дека односите и соработката меѓу нашите две земји, и во иднина ќе бележат позитивен развој во сите сфери од заемен интерес.

Ја користам можноста да изразам благодарност за досегашната поддршка на Република Македонија во процесот на нејзиното интегрирање во европските и евроатланските структури. Имајќи ги предвид заедничките заложби и визии за обединета, демократска и просперитетна Европа, убеден сум дека поддршката од Сојузна Република Геманија ќе ја имаме и во периодот што претстои.

Со најискрени желби за Ваша натамошна успешна работа, добро здравје и лична среќа, Ви ги упатувам, господине Претседател, изразите на моето највисоко почитување.

д-р Ѓорге Иванов

Претседателот на Република Македонија д-р Ѓорге Иванов денеска ја прими делегацијата на Специјална олимпијада на Македонија, која учествуваше на Европските Летни Игри на Специјална Олимпијада одржани од18-24 септемви во Варшава, Полска.

Повод за средбата беа неодамна завршените Европски Летни Олимписки Игри на кои македонските спортисти имаа извонреден настап постигнувајќи голем успех со освојувањето четири златни, три сребрени и две бронзени медали и тоа во неколку спортови: атлетика, бадмингтон и пинг понг.

На средбата, Претседателот Иванов го пренесе своето високо почитување за работата на Специјалната Олимпијада на Македонија истакнувајќи дека тој лично особено ги подржува активностите поврзани со  лицата со посебни потреби. Токму спортот е еден од најуспешните начини за интеграција и социјализација на лицата со посебни потреби. Оттука активностите на Специјалната олимпијада и настапите на меѓународните спортски манифестации се од особено значење. Благодарение на успесите на спортистите на Специјалната олимпијада Македонија се промовира и нашата земја и нашата култура, истакна претседателот Иванов.

Претставниците на Специјалната Олимпијада го информираа Претседателот Иванов за перманентните успешни резултати на меѓународните натпревари. Исто така тие информираа и за настаните што ќе следат, пред се Летната Светска Олимпијада која ќе се одржи наредното лето во Грција.

Претседателот на Република Македонија д-р Ѓорге Иванов по повод Меѓународниот ден на Бошњаците ја упати следната честитка до припадниците на бошњачката етничка заедница во Република Македонија.

Почитувани припадници на Бошњачката етничка заедница,

Дозволете ми во мое лично име и во името на сите граѓани на Република Македонија да Ви го честитам 28 септември, Меѓународниот ден на Бошњаците.

Историското присуство на бошњачката заедница во Република Македонија, како и секојдневниот придонес што Бошњаците го даваат во сите сфери на животот, се значаен сегмент во физиономијата на Република Македонија како мултиетничко општество во кое толеранцијата и дијалогот како универзални вредности имаат длабока традиција.

Како држава остануваме посветени на целта да го овозможиме развивањето и унапредувањето на бошњачката култура и традиција, како и на сите култури и традиции во Република Македонија. Посветени сме и на целта сите наши граѓани, Бошњаците и припадниците на сите други етнички заедници, да можат во Македонија да гледаат како на место во кое можат лично да напредуваат и успеат. На овој ден, можеме да кажеме дека заедно чекориме водејќи ги нашите идни генерации кон иднина на просперитет и мир.

Нека Ви е честит големиот празник.

Македонскиот Претседател Ѓорге Иванов во Њујорк учествуваше и имаше обраќање на Годишниот Балкански лидерски самит, што го организира Федерацијата на Балканско-Американската асоцијација (ФЕБА).
- Во овој момент сите држави на Баканот имаат демократски избрани влади и ние имаме потреба за мир кој јас го нарекувам Пакс Еуропеана. Единствено отворениот простор создава луѓе со отворен ум. Отворениот простор создава единствен пазар. Тоа денес го може единствено Европската унија, таа може да го отвори просторот на Балканот, да почнат луѓето да размислуваат за идните поколенија, да им остават мир. Мирот е неопходен на Балканот. Единствено европската идеја може да го обезбеди нашиот мир - порача Претседателот Иванов.
Тој истакна дека присуството на бизнисмени од Балканот на Форумот покажува дека луѓето кои имаат свој интерес знаат како тоа да го остварат, Балканот да има нова инфраструктура, нови комуникации, отворен простор каде сите проблеми ќе се решаваат со дијалог.