Претседателот на Република Македонија д-р Ѓорге Иванов присуствуваше на отворањето на саемот на книгата во Матица Македонска.
Саемот ќе трае до 20 февруари, а во предвидениот период, љубителите на добриот збор ќе имаа можност да купуваат книги по значително намалени цени. На свеченото отворање присуствуваше и министерката за култура Елизабета Канческа-Милевска.
Претседателот Иванов ја истакна важноста од ваквите случувања, ставајќи акцент на фактот дека читањето и пишувањето книги нему му е професија.
- Ова е извонредна продукција на наслови и можат многу нешта да се научат за времето во кое живееме, за светот во кој живееме, за настани од минатото кои се повторуваат и во денешно време на многу поинаков начин. Едноставно книгата ни отвора очи - истакна Претседателот Иванов.
Министерката за култура говореше зошто саемот на книгата е значаен и упати апел истиот да се посети.
- Овие акции се една одлична можност читателите да бидат поблиску до интелектуалните образовни трендови, да имаат можност да купат книги кои навистина сакаат да ги прочитаат. Јас сум голем љубител на книгата и препорачувам секој да чита што повеќе книги - изјави министерката Канческа-Милевска.
Министерката истакна дека Министерството за култура стои зад издавачката дејност со максимална поддршка и ја истакна важноста од почесто случување на вакви настани.

Претседателот на Република Македонија д-р Ѓорге Иванов, придружуван од амбасадорот за европски прашања на Унгарија Георг фон Хабсбург, присуствуваше на свеченото празнување на Богојавление – Водици во Велес.

Пред илјадниците собрани Велешани, Митрополитот Вардардски Агатангел ги освети водите на реката Вардар. Од десетиците Велешани кои скокнаа во Вардар, најуспешен беше Зоран Миладинов, на кого ова му е втор пат да го фати светиот крст, кој се верува дека ќе му донесе среќа во текот на годината.

Претседателот Иванов и Амбасадорот Хабсбург воедно имаа средба со владиката Агатангел, градоначалникот Горан Петров и пратеници од Велес.

По повод празнувањето на „Св. Стефан“ и трет ден Божик, Поглаварот на Македонската православна црква г.г Стефан, денеска организираше традиционален божиќен ручек за државниот врв на Република Македонија. На божиќната трпеза присуствуваа Претседателот на Република Македонија д-р Ѓорге Иванов, Претседателот на Собранието на Република Македонија Трајко Вељаноски и Претседателот на Владата на Република Македонија Никола Груевски. Божиќниот ручек се одржа во резиденцијата на Архиепископот Охридски и Македонски г.г. Стефан.

Претседателот на Република Македонија д-р Ѓорге Иванов денеска присуствуваше на централното одбележување на Рождеството Христово - Божик во Соборниот храм „Свети Климент Охридски“ во Скопје, каде Архиепископот Охридски и Македонски г.г. Стефан богослужеше со Златоустовата литургија.


Претседателот Иванов по завршувањето на литургијата на граѓаните од православна вероисповед им го честита Божик и им посака здравје, среќа, успех и спокојство. На сите граѓани на Република Македонија кои го слават Христовото раѓање - Божик им посакувам многу среќа, радост и успех во животот.

Овие се моменти кога сите си посакуваме да бидеме многу посложни, многу сплотени, како што вели нашата традиција, тогаш во тие моменти можно е да се исполнат сите наши цели што сме ги поставиле пред нас. Сакам на сите православни христијани со традиционалниот поздрав „Христос се роди“ да им посакам многу среќа и радост во животот, изјави Претседателот Иванов по завршувањето на литургијата.


На централното одбележување на Рождеството Христово - Божик во Соборниот храм „Свети Климент Охридски“ присуствуваа и Претседателот на Собранието Трајко Вељаноски, Претседателот на Владата Никола Груевски, вицепремиерот Васко Наумовски, директорот на Комисијата за односи со верски заедници и религиозни групи Валентина Божиновска, градоначалникот на Град Скопје Коце Трајановски и други личности од јавниот живот во Република Македонија.

Триесетина деца од СОС Детското село Скопје денеска по повод бадник и коледарските обичаи го посетија домот на семејството Иванови. Со коледарската песна, пред вратата на претседателската резиденција децата го најавија нивното пристигнување. На влезот ги пречекаа Претседателот Иванов, неговата сопруга Маја и синот Иван. Откако ја слушнаа "Коледе леде", домаќините ги поканија децата во нивниот дом каде што им поделија бадникарски пакетчиња, полни со костени, ореви, бонбони, овошје и со парички. Децата од СОС Детското село се запознаа и дружеа и со шарпланинецот Алек, домашниот миленик на семејството Иванови.

Генералниот секретар на Кабинетот на Претседателот на Република Македонија, Борис Јосифовски денеска по повод новогодишните празници ги посети членовите на македонскиот разгранок на меѓународната организација Специјална Олимпијада.

Генералниот секретар особено ја поздрави работата на волонтерите кои се посветени на овозможување на спортските активности на членовите на Олимпијадата и ја искористи можноста да им посака среќна и успешна Нова година на учесниците на Специјалната Олимпијада, со желби и во 2011 година да бидат одлични претставници на Македонија и наша заедничка гордост.

На средбата, Генералниот секретар го истакна високо почитување на Претседателот на Република Македонија за работата на Специјалната Олимпијада Македонија, истакнувајќи дека Претседателот Иванов лично особено ги подржува активностите поврзани со  лицата со посебни потреби. Борис Јосифовски истакна дека, како покровител на активностите на македонскиот разгранок на Специјалната олимпијада, Кабинетот на Претседателот ќе продолжи да ја укажува секоја можна поддршка.