Претседателот на Република Македонија д-р Ѓорге Иванов денеска во рамките на официјалната посета на Република Албанија, оствари средба со претставниците на македонското национално малцинство во Република Албанија.

Претседателот Иванов ги повика Македонците од Албанија и раководството на политичката партија ,,Македонска алијанса за европска интеграција - МАЕИ’’ да бидат обединети за да можат да ги остварат малцинските права и да го подобрат својот живот во оваа соседна земја, каде што во мај ќе има локални избори, а во ноември попис на населението.

Претставници од Мала Преспа, Голо Брдо и од Гора, каде што има најмногу македонско население од целата територија на Албанија, на Претседателот Иванов му ги пренесоа своите проблеми и искажаа задоволство што првпат за нив се разговара на највисоко ниво.

За нас е важно доаѓањето на претседателот на Македонија и тоа што почна да се зборува отворено и јавно со премиерот и претседателот на Албанија за проблемите на овдешните Македонци, кои тука се признати само во Мала Преспа, во општина Пустец, а секој што е надвор од ова место не се води како Македонец и не ужива права. Се надеваме дека со овие билатерални средби, конечно ќе се реши тој проблем и Македонците во Голо Брдо и Гора да бидат признати како Македонци од официјалните власти во Албанија и да ги имаат правата на Македонците во Мала Преспа, изјави по средбата Едмонд Темелко, претседател на МАЕИ и градоначалник на Пустец.


Васил Стерјовски, директор на ТВ Кристал од Корча рече дека  претседателот апелирал Македонците во Албанија да бидат здружени и обединети околу својата партија, бидејќи само така ќе дојдат до своите права. Само преку нашето политичко ангажирање во Албанија ќе успееме да се интегрираме во институциите на системот, преку освојување на локалната власт и пратенички места, и да ги покренуваме нашите прашања, не само на економски, туку и на национален план, изјави Стерјовски. Тој е задоволен и од  тоа што за малцинското прашање прв пат јавно се произнесол и албанскиот претседател Бамир Топи. Претседателот Топи прв пат се произнесе за пописот во Албанија и тоа го сметаме како охрабрување за сите малцинства. Тие тоа го коментираат позитивно зашто Топи ги осуди ултранационалистите кои секојдневно протестираат и не сакаат да има попис со етничка графа во формуларот, не само за Македонци, туку и за други малцинства, и се плашат Албанија да не излезе мултиетничка држава, рече Стерјовски.
На средбата беше отворено и прашањето за граничниот премин Џепиште - Требиште кај Голо Брдо и изградба на патот што ќе им овозможи пристап на жителите кои поради нерешената инфраструктура во зима се целосно изолирани. Проблемот е доминантно на страна на Албанија зашто се работи за пат од 20 километри. Од македонска страна делницата е многу помала, а Македонија веќе ја исполни обврската. Со тоа, жителите од страна на Албанија во Македонија ќе бидат за само три километри, наместо да патуваат околу 80 км до најблискиот граничен премин. Условите се многу тешки зашто немаме инфраструктура во делот на Голо Брдо и затоа македонското население од таму се има преселено во градовите низ Албанија. Затоа најважен сега ни е граничниот премин Џепиште - Требиште, со кој сите маки во тој регион ќе завршат, рече  Едмонд Османи, потпретседател на МАЕИ и одговорен за огранокот на партијата во Голо Брдо.


Патната инфраструктура како проблем беше посочена и на вчерашните разговори на Претседателот Иванов со државниот врв, зашто од тоа зависи слободниот проток на луѓе, стоки и услуги и продорот на албанскиот пазар каде што има многу малку македонски производи. Македонците од Албанија се задоволни и од иницијативата за прераснување на Лекторатот по македонски јазик во Катедра на Тиранскиот универзитет, за што Претседателот Иванов доби ветување од премиерот Бериша. Лекторката Валентина Нестор рече дека тоа ќе биде од интерес за Македонците и зачувувањето на јазикот како најважна одлика на нивниот идентитет. Лекторатот постои 15 години и во моментов има 73 студенти кои изучуваат македонски јазик како изборен предмет.

Претседателот на Република Македонија д-р Ѓорге Иванов престојува во дводневна официјална посета на Република Албанија, на покана на албанскиот Претседател Бамир Топи.

Добрите политички односи меѓу Македонија и Албанија треба да бидат проследени и со поинтензивна соработка на економски план која засега заостанува. Искористувањето на потенцијалите се иден приоритет, а предуслов за тоа е добра инфраструктура што ќе овозможи слободно движење на луѓе, стоки и услуги, оценија денеска во Тирана Претседателот Иванов и Претседателот Топи.

Во контекст на инфраструктурата беше потенцирано значењето на Коридорот 8 и потребата за повеќе работа на тој план. За граничниот премин кај Голо Брдо, Претседателот Иванов рече дека од македонска страна обврската е завршена, додека за доцнењето од страна на Република Албанија, каде што патот не е асфалтиран 20 км до границата, Претседателот Топи изјави дека прашањето е само техничко.


Двајцата претседатели разговараа и за прашањето за малцинствата и добрососедските односи. Претседателот Топи изјави дека македонското малцинство во Албанија се смета за интегрирано и ги ужива сите права според Уставот и меѓународните конвенции и дека земјата е позитивно оценета од Советот на Европа. Албанскиот народ и институците се целосно претпазливи во овој процес и ќе ги охрабрат луѓето слободно да се изјаснат. Нема да дозволиме ниеден ултранационалист од каде и да доаѓа да го деформира овој процес, изјави Претседателот Топи.

Претседателот Иванов истакна дека заедниците од двете земји треба да бидат мост на поврзување и дека Македонија е исклучителен пример за почитување на правата на етничките заедници во регионот. Би се радувал ако принципите од Рамковниот договор се почитуваат во сите земји од нашиот регион. Сите претендираме кон Европа, но Европа треба да ја создадеме кај нас, рече Претседателот Иванов, порачувајќи им на политичарите да се однесуваат европски, а не балкански. Во врска со унапредувањето на правата на малцинствата, Претседателот Иванов го отвори прашањето Лекторатот по македонски јазик да прерасне во Катедра за македонски јазик на Тиранскиот универзитет.


Претседателите Иванов и Топи ги нагласија и заедничките интереси за ЕУ и НАТО интеграцијата. Претседателот Иванов и се заблагодари на Албанија која е членка на Алијансата за заложбите и Македонија да ја оствари таа цел. За соработка и поддршка на патот кон ЕУ, двете земји денеска потпишаа и спогодба.


Претседателот Иванов оствари средба и со премиерот на република Албанија Сали Бериша на која беа констатирани добрите политички односи и потребата за интензивирање на економските.

Дваесет и осумгодишниот магистер Никола Златанов, докторант на Универзитетот на Британска Колумбија, е добитник на признанието „Најмлад научник“ за 2010 година што Претседателот на Република Македонија д-р Ѓорге Иванов ја доделува за врвни научни достигнувања.

Инвестицијата во образованието и науката е најдолготрајна и најисплатлива. Иднината на нашата наука лежи во благовремената поддршка на сите млади кои се занимаваат со наука и во верификација на нивните постигнувања. Затоа, како Претседател на Република Македонија преку процесот на избор и доделување на признанието „Најмлад научник“ сакам да дадам придонес кон поддршката за развој на младата научна мисла, рече на доделувањето на признанието Претседателот на Република Македонија д-р Ѓорге Иванов.


Претседателот подвлече дека науката, новите идеи се можност за нашите граѓани рамноправно да се натпреваруваат со остатокот од светот, бидејќи тие не познаваат граници, за што сведочи и добитникот на признанието. За идеите не постојат ограничувања, помали или поголеми земји, развиени или помалку развиени економии, побогати или посиромашни, помоќни или послаби. Природното право на слободна и креативна мисла никој не може да го ограничи или одземе. Оттука, нашите граѓани може рамноправно да се натпреваруваат во умешност, знаење, креативност и иновативност со остатокот од светот, изјави македонскиот Претседател. Претседателот Иванов истакна дека радува фактот што Златанов се определил со својата работа да продолжи во Македонија откако ќе докторира во Канада и изрази надеж дека тој пример ќе го следат и останатите млади научници и ќе се одлучат, како што рече, да творат под македонско сонце.


Никола Златанов по добивањето на признанието истакна дека посакува во Македонија да се отвори академски фронт со зголемување на бројот на научни публикации во реномирани списанија што заедно со развојот на научната мисла ќе го подигне нивото на развиеност на македонското општество. Кога една страна, дали академската или општествената, ќе почне да ја стимулира другата ќе се развие еден повратен процес со меѓусебно стимулирање и надополнување. Но, некој мора да почне, или општеството со понуда на квалитетни услови за истражувања, или истражувачите кои преку својот ентузијазам ќе бидат иницијална каписла за забрзан општествен развој, рече Златанов.



Проектот „Најмлад научник“ се реализира со цел  да се даде што поголема поддршка на науката, научните установи и младиот научен кадар, како и за изнаоѓање на начини за стимулирање на вложувањата во науката. Идејата е преку овој проект да се воспостави традиција за избор на најмлад научник и во наредните години, се со цел поттик на младата научна и истражувачка мисла во Република Македонија. На објавениот повик за учество се јавија 17 млади научници со 20-тина научни трудови.


Никола Златанов е роден 1983 година. Дипломирал во 2007, а магистрирал во 2010 година на Факултетот за електротехника и информациски технологии при Универзитетот Свети Кирил и Методиј. Од ноември 2008 до јуни 2010 година бил вработен во МАНУ, а од септември 2010 е докторант и асистент истражувач на одделот за електротехника и компјутерско инженерство на Факултетот на Британска Колумбија во Ванкувер, Канада каде ја добива најпрестижната награда што се доделува за докторанти. Неговите сегашни истражувачки интереси припаѓаат во генералното поле на бежичните телекомуникации.

Претседателот на Република Македонија д-р Ѓорге Иванов денеска оствари работна посета на општина Боговиње. Во рамки на посетата Претседателот Иванов оствари средба со градоначалникот на општината, Хазби Идризи и со дел од општинската администрација, го посети стопанскиот објект „Фриготехна“, една од поголемите приватни компании во оваа општина, и присуствуваше на Денот на албанскиот наставник - 7 Март што се одбележа во ОУ „Сабедин Бајрами“ во селото Камењане.

Претседателот Иванов на средбите со соговорниците разговараше за темите од интерес на Општината, можноста за вложување и развојот на индустриските зони кои се во склоп на Боговиње. Претседателот Иванов по посетата изјави дека e импресиониран од она што го прави приватната иницијатива и потенцијалите што се нудат од страна на оваа општина.


На новинарско прашање за можноста од предвремени избори, Претседателот Иванов изјави дека 2011-та требаше да биде година на сериозни одлуки кои ќе придонесат за раздвижување на процесот на евроатлантската интеграција на Македонија, меѓутоа сега кога е создадена состојба од одредени политички актери дека мора да се оди на избори, сметам дека на изборите треба да учествуваат сите бидејќи изборите се моментот кога граѓаните ја предаваат власта. Очекувам одговорно однесување од секој политички актер во Македонија и апелирам до сите, кога и да се изборите, да се однесуваат одговорно, затоа што во последно време слушаме лица со помрачени умови ни продуцираат мрачни сценарија за изборите. Изборите се период кога мора одговорно да се однесуваме сите, а веќе покажавме дека можеме да организираме избори според сите стандарди, изјави Претседателот Иванов.


Во врска со пописот и неговото можно одложување, Претседателот Иванов изјави дека доколку биде донесена одлука за предвремени избори, одлуката за одложување на пописот треба да биде донесена од надлежните институции, меѓутоа е невообичаено и двете активности да се спроведат истовремено.

Околу предлогот за гувернер на Народна банка на Република Македонија, Претседателот Иванов рече  дека е во интензивни консултации со претставници од коморите, наставниот кадар и професорите на соодветните универзитети и факултети, како и со банкарите, најавувајќи оти деновиве ќе го предложи својот кандидат до Собранието на Република Македонија.

Претседателот на Република Македонија д-р Ѓорге Иванов денеска во Ротимље присуствуваше на одбележувањето на седумгодишнината од смртта на Претседателот Борис Трајковски, кој заедно со своите соработници и членови на екипажот загина во авионска несреќа во близина на Мостар.

Со смртта на Трајковски не загуби само Македонија. Регионот загуби атипичен државник и лидер. Претседател кој беше почитуван од сите негови колеги и државници не само во регионот, туку и многу пошироко, истакна Претседателот на Република Македонија д-р Ѓорге Иванов во своето обраќање на одбележувањето на годишнината од трагичното загинување на Претседателот Борис Трајковски.


Претседателот Иванов подвлече дека Претседателот Трајковски ја водеше земјата низ еден многу турбулентен период во регионот кој се уште живееше во знакот на поделбите и конфликтите, и со своето лидерство придонесе Македонија и нејзините граѓани побезболно да минат низ најтешкото премрежје од независноста на државата. Напуштајќи го овој свет Борис Трајковски ни остави и завет. Да продолжиме по неговиот пат во градењето на демократска и европска Македонија. И ќе продолжиме по тој пат. Тоа му го должиме нему, на македонскиот народ и на Македонија. Верувам дека само така ќе ја оствариме неговата визија за подобра Македонија, додаде претседателот Иванов, кој ја предводеше делегацијата што му оддаде почит на Претседателот Трајковски и на осуммината загинати членови на Кабинетот и на авионскиот екипаж, во месноста Ротимље, близу Мостар.

На церемонијата, освен Претседателот Иванов, свое обраќање имаа градоначалникот на Мостар Љубо Бешлиќ и премиерот на Херцеговско-неретванската жупанија Среќко Борас, по што беа положени и венци на спомен обележјето поставено во чест на трагично загинатите. Тие во своите говори нагласија дека трагично загинатиот македонски претседател бил драг и почитуван пријател на БиХ и на Мостар, кој во текот на своето политичко работење градеше мостови на соработка кои ги поврзуваа народите врз темелите на почитување на мирот и толеранцијата.

По завршувањето на церемонијата во изјава за медиумите Претседателот Иванов рече дека истрагата за несреќата близу Мостар во која загина Претседателот Трајковски не е завршена за македонските власти. Формирана е комисија која ги собира сите можни документи и соработува со сите фактори - изјави Претседателот Иванов во Ротимље.

Претседателот на Република Македонија д-р Ѓорге Иванов престојува во дводневна работна посета на Босна и Херцеговина по повод одбележувањето на седумгодишнината од трагичната смрт на Претседателот Борис Трајковски кој заедно со своите соработници и членови на екипажот загина во авионска несреќа во близина на Мостар.


Македонскиот претседател д-р Ѓорге Иванов денеска во Мостар оствари билатерални средби со Претседателот на Република Хрватска, Иво Јосиповиќ и со претседавачот на Претседателството на БиХ, Небојша Радмановиќ.



За време на двете средби доминираа темите од внатрешно-политичките и економските состојби. Тројцата соговорници констатираа дека бавната евроатлантска интеграција на целиот регион и последиците од глобалната економска криза се причините за актуелната состојба на политички и економски план во повеќе земји од регионот. На средбите беше истакната дека балканските земји мора да ја зајакнуваат економската соработка и да се користат бенифитите од ЦЕФТА договорот. Заеднички заклучок и на двете средби беше дека „единствената алатка која може да ги придвижи општествата кон прогрес е брза евроатлантска интегрција на целиот регион“.



Претседателот Иванов на средбата со Претседателот Јосиповиќ, разговараше за желбата и интересот на Македонија да стане полноправна членка на Јадранско-јонската иницијатива, каде освен Хрватска, членуваат и Грција, Италија, Словенија, Црна Гора, Албанија и Србија. Ова е иницијатива, која годинава се очекува да биде поддржана од Европскиот совет и тоа со обезбедување финансиски средства за конкретни проекти кои се однесуваат на животната средина, за пристапот кон пристаништата, и слично.




Претседателот Иванов на  манифестацијата на весникот „Вечерњи лист“, која се одржува под мотото „Печат за Европа“ , доби посебно признание за придонес во стабилизацијата на односите во регионот и за неговата улога во развојот на регионалната соработка.