Почитувани припадници на Армијата на Република Македонија,
Почитувани граѓани на Република Македонија,
Ценети присутни,
Дами и господа,

Како врховен командант на вооружените сили на Република Македонија, ми претставува вистинска чест да ве поздравам денес, на свеченото дефиле на единиците на Армијата на Република Македонија по повод 9 мај – Денот на Европа и Денот на победата над фашизмот.

Денеска е ден кога Европа ја одбележува 64-годишнината од Декларацијата на Роберт Шуман, со која беа поставени темелите на Европската унија, еден од најуспешните мировни проекти во историјата, но и ден кога одбележуваме 69-годишнина од победата над фашизмот.

Денот на победата значеше и градење на нов демократски свет, на нови вредности и нови односи. Се формираа Обединетите нации, НАТО Алијансата, Европската унија. Кој можеше да поверува дека од урнатините на разрушената и раскрвавена Европа ќе се создаде политички и економски моќна Европската унија, дека ќе се оствари сонот за обединета Европа. Овој мировен проект е сè уште недовршен и не треба да се чека за конечно да се оствари целосното обединување на Европа.

Почитувани,

Република Македонија со гордост ги одбележува овие два светли датума од историјата. Во годината кога ја славиме 70-годишнината од првото заседание на АСНОМ, се сеќаваме и на големиот придонес на нашиот народ во победата над фашизмот. Момент што придонесе за траен мир на европскиот континент.

Македонските партизани станаа дел од големата и праведна сојузничка коалиција, која се бореше против злото на фашизмот и нацизмот.

За многу европски држави, антифашистичката борба беше идеолошка борба против фашизмот и нацизмот како најголеми зла на 20 век. За македонскиот народ, пак, антифашистичката војна беше воедно и борба за национално ослободување на Македонија.

Учесниците во Народноослободителната борба себеси се гледаа како продолжувачи на делото на илинденците, како дејственици во остварувањето на нивниот сон. Сон за слободна и за независна Македонија. Затоа ќе им бидеме вечно благодарни.

Почитувани,

Денес, нашата генерација има своја исто така праведна мисија, заедно, сплотени да ја градиме Република Македонија, како демократска и економски напредна држава во која ќе се негуваат вредностите на сите кои живеат на овој простор. Наша мисија е Република Македонија да ја внесеме во големото европско и евроатлантско семејство на држави, со сето достоинство што ни следува.

Вие, припадниците на Армијата на Република Македонија, кои се истакнувате по својата професионалност, посветеност и постигнати резултати, и постојано ги надминувате нашите очекувања и очекувањата на нашите партнери и сојузници, треба што поскоро да го заземете вашето заслужено место во НАТО Алијансата. Со еднаква одговорност, како и во бројните успешни ротации во мировните мисии ИСАФ, ЕУЛЕКС и УНИФИЛ.

Тоа е стремеж што ги сплотува сите наши граѓани, независно од етничката, верската или која било друга припадност.

Денешниот настан е само уште една потврда дека Армијата на Република Македонија и натаму останува подготвена да го заземе своето место во НАТО Алијансата. Затоа што и натаму стоиме на вредностите, што пред речиси седум децении, доведоа до пад на фашизмот и до создавање на предуслови за обединување на европскиот континент.

Избирајќи го вистинскиот пат, онака како што тоа беше направено во Втората светска војна, оваа генерација заслужува да биде дел од Европа и дел од прогресивниот и напреден свет, како земја со демократски и економски просперитет. Сите пречки, кои се од несуштинска природа и кои немаат ништо заедничко со вредностите над кои е изграден современиот демократски свет, нема да нè спречат да дојдеме до нашата цел.

Драги пријатели,

На самиот крај, уште еднаш, ви го честитам 9 мај, длабоко уверен дека ќе продолжите да работите според трите вредности кои ги одбележаа овие децении: патриотизам, постојаност и професионализам. Вредности, кои се предуслов за нашата слобода, правда и достоинство.

Да е вечен 9 мај, Денот на победата.
Да живее Армијата на Република Македонија!
Да живее Република Македонија!

Почитувани гости,

Дами и господа,


Ми претставува чест и задоволство да ви се обратам по повод доделувањето на признанието „Најдобар млад научник" со кое се вреднуваат врвни научни достигнувања во една календарска година.

Ова признание успешно ја остварува целта – стимулирање на македонската наука и на младите македонски научници до 30-годишна возраст. Како еден од проектите на почетокот на мојот мандат, верувам дека наградата ги оправда очекувањата, давајќи охрабрување и поддршка на младата македонска научна мисла.

Секоја година, Комисијата се соочува со предизвикот, меѓу дваесетина пријавени кандидати со вонреден квалитет да го избере најдобриот меѓу најдобрите. Им благодарам на сите членови на Комисијата за ангажманот во изборот на носителот на признанието „Најдобар млад научник". Им благодарам и на рецензентите, кои заедно со Комисијата завршија голема работа.

Почитувани,

Со изборот на најдобриот млад научник, веќе 4 години по ред, придонесуваме кон развојот на младата македонска научна мисла. Република Македонија има голем потенцијал во сите научни области. Но, во потенцијалот треба да се инвестира. Оттука, треба да направиме сè младите научници да ги заземат своите места во образованието, институциите, компаниите, во кои ќе можат најмногу да придонесат со својата научна работа.

Годинава, наградата „Најдобар млад научник" ја доделуваме на досега најмладиот добитник, Петар Стојанов, кој има неполни 26 години. Пред него се години и години научна работа. Со самото тоа што своето образование и професионалната кариера Стојанов ја минува во САД, покажува дека за квалитетот и за отворениот ум не постојат граници и бариери. Се надевам дека покрај интернационалната кариера ќе имаме можност да го гледаме многу повеќе и во неговата матична земја, Република Македонија.

Нашите млади научници можат да се натпреваруваат со знаење и со креативност насекаде и со секого. Токму меѓусебната соработка на нашите научници, кои работат во странство, со оние што живеат и создаваат во Република Македонија ќе донесе вредност повеќе за нив самите, за македонската наука и за севкупното македонско општество. Во денешниот глобален и меѓузависен свет сите научници, без разлика од каде доаѓаат и каде работат, имаат можност за рамноправна промоција и презентација.

Полето на кое работи и истражува Петар Стојанов – биоинформатиката е извонредно значајна научна дисциплина. Таа е на врвот на приоритетите на истражувањата во областа на биомедицинските науки во напредните земји, и како таква интензивно ќе се развива и ќе се надградува. Оттука, верувам дека допрва ќе слушаме уште повеќе за научните достигнувања на Стојанов.

Дозволете на крајот, на Петар Стојанов, но и на сите други млади научници, кои беa дел од Конкурсот за избор на најдобар млад научник за 2013, да им посакам многу успех и долгогодишна плодна научна работа.

Ви благодарам.

Претседателот на Република Македонија д-р Ѓорге Иванов, по повод одбележувањето на 20 годишнината од воспоставувањето на дипломатските односи меѓу Република Македонија и Република Словачка, денеска присуствуваше на промоција на книгата „Прогласот" на Константин Филозоф Св. Кирил.

На промоцијата се обратија амбасадорот на Република Словачка, Н.Е. г. Мартин Безак, министерот за надворешни работи на Република Македонија, г. Никола Попоски и министерот за култура на Република Македонија, г-ѓа Елизабета Канческа Милевска.

Во рамки на настанот беше отворена и изложбата „1150 години од доаѓањето на Константин и Методиј на словачка територија".

Покровител на промоцијата беше претседателот Иванов кој имаше свое обраќање пред присутните.

Почитувани присутни,

Денес, во нашиот древен Охрид со оваа промоција на симболичен начин одбележуваме две децении од воспоставувањето на дипломатските односи меѓу Република Македонија и Република Словачка. Се сеќаваме и на длабоките корени на македонско-словачкото пријателство.

Јазикот е клучот за разбирањето на културата, традицијата и светогледот на еден народ, на неговото минато, сегашност и иднина. Јазикот е душата на народот. Но, додека кажаното некогаш се заборава, пишаниот збор останува. Преку писмото, ние на автентичен начин им го пренесуваме на идните генерации она што сме го наследиле од нашите претци.

Дами и господа,

Читајќи го „Прогласот" на Константин Филозоф до Словените, сфаќаме зошто тој и неговиот брат Методиј се стекнале со епитетот словенски апостоли. „Без книга сите народи се голи", порачува Константин Филозоф. Без писмо, народите се ранливи, незаштитени, изложени на бурите на историјата. Народите без сопствена писменост отсекогаш биле лесен плен на оние што сакаат да ги поделат, покорат и претопат. Пред 12 века, словенските народи беа исправени пред тој предизвик.

Прогласот ги буди народите за да им ја подари најголемата сила, најголемата моќ – знаењето. Создавајќи ја и проширувајќи ја глаголицата од Македонија, Кирил и Методиј ни дадоа духовна и творечка слобода. Создадоа пишан јазик на кој е преведено Светото писмо и на кој христијанството се прошири меѓу Словените.

Ценети присутни,

„Битката на светите Кирил и Методиј беше да им се овозможи на словенските народи сами да го спознаваат Божјото слово, сами да ја создаваат и пренесуваат својата култура, традиција, сами да ја пишуваат својата историја. Правото на сопствен јазик, на образование, на самоидентификација и денес се основни универзални и европски човечки вредности.

Битката на нашата генерација е да го негуваме и афирмираме нивното наследство, благодарение на кое ние денес имаме наш светоглед, наша посебност и идентитет.

Кирил и Методиј ни оставија комуникациски код што поврзува не само генерации, туку и цели народи и држави. Низ кодот на писменоста ние продолжуваме да ги градиме и унапредуваме одличните билатерлни односи меѓу Република Македонија и Република Словачка, онака, како што им доликува на пријателски држави и народи",порача во обраќањето македонскиот претседател.

Ви благодарам.

Почитуван претседател на Владата на Република Македонија,
Почитувани министри,
Почитуван началник на Генералштабот на Армијата на Република Македонија,
Почитувани припадници на Армијата на Република Македонија,
Ценети екселенции,
Почитувани претставници на медиумите,
Дами и господа,

Вистинска чест е да се биде на отворањето на Центарот за обука на пилоти за потребите на Армијата и за потребите на другите државни институции во Република Македонија. Центар што ќе овозможи континуиран тренинг на кандидати за пилоти и веќе произведени пилоти. Пилоти за домашни потреби на институциите надлежни за одбраната, безбедноста и кризниот менаџмент во согласност со предизвиците со кои се соочуваме. Центар во кој ќе се надградуваат сегашните и ќе се обучуваат идните пилоти, нашите чувари на македонското небо.

Постојано велам дека треба да ја градиме Македонија во височина. Пилотите што се обучуваат во овој центар и во буквална смисла ќе ја носат Македонија во височина.

Република Македонија има и волја и капацитет и опрема. Како Претседател и како врховен командат, горд сум што Република Македонија добива најсовремен центар за обука со најсофистицирана опрема во Југоисточна Европа и пошироко. Особено двата симулатори за летање на хеликоптерите Ми-17 и Ми-24, кои по својот квалитет и можностите што ги нудат, спаѓаат во самиот светски врв на производи за оваа намена.

Со ова се потврдува посветеноста на државниот врв за постојано вложување во модернизацијата и едукацијата на припадниците на Армијата на Република Македонија и на другите безбедносни структури. Очекувам ваквата соработка да продолжи. Очекувам долгорочниот план за развој на одбраната кој минатата година беше усвоен од страна на Владата на Република Македонија да започне со имплементација оваа година.

Дами и господа,

Многумина во своето детство сонувале да бидат пилоти, но само неколкумина остануваат истрајни во својот сон. Отсега, па натаму, најистрајните, најквалитетните и најпосветените ќе можат да го остварат својот сон тука, во Република Македонија, во овој Центар за обука за пилоти. Институција што веќе ги дава и првите плодови. Наскоро ќе бидат промовирани и првите македонски пилоти кои се обучени во Република Македонија, токму на врвните модули и најсофистицираната опрема што ја нуди овој центар. Во меѓувреме траат и конкурси за пријавување на кандидати за пилоти. Уверен сум дека, со новиот приод во селектирањето, ќе бидат избрани најдобрите од најдобрите.

Од пилотите што од денес, па натаму ќе се обучуваат, ќе се очекува најпрофесионално да ја чуваат сувереноста на македонското небо, да ги чуваат мирот и поредокот на државата, да ги заштитуваат и да ги спасуваат македонските граѓани од предизвиците на природата.

Ценети присутни,

Вложувајќи во сопствената безбедност, Република Македонија вложува и во безбедноста на НАТО-алијансата и во својата евроатлантска иднина. Капацитетите на Центарот веќе беа презентирани пред Комитетот на НАТО за противвоздушна одбрана во Брисел. Верувам дека нашите партнери и сојузници ќе ги препознаат одличните можности што ги нудиме, во согласност со нивните потреби. Верувам дека овој центар ќе прерасне во регионален Центар за обука на пилоти кој ќе може да го користи и НАТО.

Дами и господа,

Луѓето кон небото гледаат со надеж и сигурност. Надеж за иднината и сигурност во сегашноста. Пилотите што ќе се обучуваат во овој центар ќе ја даваат сигурноста во сегашноста.

Ви благодарам.

Почитувани присутни,
Драги пријатели,

Со тага во срцето и со болка во душата стојам на ова место. Место, каде пред точно 10 години загина мојот голем претходник, претседателот Борис Трајковски заедно со осумте негови соработници, Димка, Ристо, Анита, Миле, Борис, Аце, Марко и Бранко.

Тој кобен 26 февруари, сите ние загубивме дел од нас.
Ближните загубија сакан сопруг, татко, син, брат, роднина, пријател...
Македонија загуби голем државник и визионер со европска и евроатлантска стратегија.
Регионот загуби миротворец посветен на дијалогот, градењето доверба и меѓусебно разбирање и почитување.
Светот, пак, загуби човек со големо срце кој, со својата добра мисла, ги поврзуваше луѓето каде и да одеше. Преку него, Македонија стекна нови и цврсти пријателства насекаде во светот.

Драги пријатели,

Борис Трајковски беше светлина за Македонија, но и за регионот, тогаш кога ни беше најнеопходно.

Беше на чело на Република Македонија во време на најтешкото премрежје од независноста на државата. Во време кога минувавме низ најголемата бура, Трајковски управуваше со кормилото на нашата татковина и успешно нè извлече од немирните води.

Свесен дека мирот треба постојано да се чува, гради и унапредува, во една пригода Борис рече:„Сите сме гости на овој свет. За сè има време, но сега е време на исцелителство и мир".

Секогаш доследен на своите вредности, тој сакаше благодатта од мирот и стабилноста да ја почувствува целиот регион што сè уште закрепнуваше од траумите на поделбите, изолацијата и конфликтите.

Потсетувајќи на големата вистина дека „луѓето и нациите се однесуваат мудро откако ќе ги искористат сите алтернативи", Борис Трајковски го вложи сиот свој авторитет на ценет државник и политичар, за да му понуди на регионот еден нов светоглед. Светоглед на дијалогот како предуслов за градење доверба и заедништво меѓу луѓето, државите и народите. Со таа увереност, тој го започна Форумот на дијалогот меѓу цивилизациите, чии плодови ги жнееме и ден-денес.

Неговата визија за Македонија, но и за регионот, ја отслика во едно од неговите последни јавни обраќања, кога рече дека не постои друг пат, освен патот на дијалогот за доаѓање до прифатливи решенија. Дека треба да се почитува меѓународното право, недоразбирањата да се решаваат по мирен пат, да се почитуваат постојните граници, да се избегнува секаква употреба на сила и мешање во внатрешните работи на другите земји. Визија што најдобро ги отслика вистинските европски и евроатлантски вредности.

Драги пријатели,

Воден од верата во Бога, тој веруваше во иднината, во разумот, во Македонија. Последниот документ врз кој Борис Трајковски го стави својот потпис беше апликацијата за членство на Република Македонија во Европската унија. Наредниот ден тој замина во вечноста.

Денес, десет години подоцна, сè уште чекаме да се исполни визијата на Борис Трајковски за европска Република Македонија. Уверен сум дека неговиот сон и сонот на секој македонски граѓанин за Македонија, како полноправна членка на Европската унија и на НАТО, ќе биде остварен.

Во овие тажни мигови кога се сеќаваме на неговиот краток живот и на животите на осумте соработници, кога се сеќаваме на неговото големо дело и на неговиот завет што обврзува, си споменуваме и на ветувањето што беше негова утеха и водилка низ животот:

„Блажени се милостивите, затоа што тие ќе бидат помилувани.
Блажени се чистите по срце, зашто тие ќе го видат Бога.
Блажени се миротворците, бидејќи тие ќе се наречат синови Божји."

Вечна им слава.

Почитувани претставници на медиумите,
Драги сограѓани,

Пред крајот на мојот мандат како Претседател на Република Македонија, чувствувам потреба но и обврска да ви се заблагодарам вам, на граѓаните на Република Македонија за вашата досегашна поддршка, и да ви ја соопштам одлуката која ја донесов за периодот кој следи.

Во текот на целиот изминат период, врвна цел за мене беше одговорно, чесно и посветено да го бранам достоинството и интересите на Македонија и македонските граѓани, да останам посветен и доследен на програмата со која ја добив вашата доверба, а на чија реализација посветено работев, фокусиран на нашите заеднички вредности во кои сите веруваме и за кои работиме заедно.

Работев напорно имајќи ја пред себе целата одговорност и товар на тоа што значи да одлучуваш за иднината на сопствената земја, но исто така имајќи ја пред себе и обврската која ја чувствувам кон сите наши граѓани за да ги реализирам нивните потреби и интереси и кои во целиот изминат период со нивните очекувања беа дел од моето секојдневие.

Се трудев најдобро што знам, дадов максимум од себе, затоа што бев свесен колкави се очекувањата, но и одговорноста од мене и што значи во едни вакви времиња да се биде на оваа одговорна функција. Поминавме исклучително сложени моменти, многу предизвици, посебно на меѓународен план, имавме и предизвици и разочарувања, но и постигнавме многу резултати, успеси, подобрувања, но што е најважно во суштинските моменти дејствуваме заеднички и обединето, цврсто и со збиени редови, секогаш водејќи се од интересот и потребите на граѓаните.

Водев одговорна и принципиелна надворешна политика заснована врз нашите стратешки определби, и врз нашите национални и државни интереси. Политика на отвореност кон сите. Бев активен и во економската и јавната дипломатија, свесен за потребата од промоција и афирмација на државата во еден глобализиран свет, но и од неопходноста за обезбедување на нови работни места во нашата земја и привлекување на инвестиции, нешто на што заедно со владата работевме.

Секогаш се водев од интересите на граѓаните и зацртаните стратешки цели. Истовремено, секогаш бев меѓу својот народ, иако некои понекогаш со иронија и потсмев гледаа на таа моја блискост со народот. Јас знам од каде произлегувам, и од каде ја црпам мојата сила, од народот, и за мене секогаш ќе биде гордост и чест да бидам со мојот народ.

Верувам дека постигнавме добри резултати, исто како што верувам дека секогаш може да се продолжи да се направи уште повеќе и да се постигнуваат натамошни достигнувања. Пред нас доаѓаат години на уште поголеми достигнувања. Не чека уште многу работа која треба да донесе напредок и просперитет за сите наши сограѓани.

Патот е трасиран.

Деновиве во јавноста се појави иницијатива за моја повторна кандидатура за Претседател на Република Македонија, на која поддршка дадоа врвни интелектуалци и професионалци во своите области, јавни личности од општествениот живот на Република Македонија, луѓе со резултати, со достигнувања, со кредибилитет. Кон иницијативата се приклучија и ја подржаа и еминентни лица од политичкиот живот, со кои во изминатиот период соработував согласно ингеренциите и должностите во решавање на предизвици и реализација на проекти и активности кои носат подобри услови и можности за граѓаните.
Дозволете ми во оваа прилика искрено да им се заблагодарам на потписниците и подржувачите на иницијативата за поддршката за моја втора кандидатура за функцијата претседател на Република Македонија. Им благодарам и на сите што деновиве постојано се обраќаат во Кабинетот и Народните Канцеларии и бараат и тие да ја дадат својата поддршка или потпис.

Почитувани граѓани,

Со чест и со задоволство, имајќи ги во предвид сите предизвици и перспективи со кои се соочуваме, со посветеност и одговорен пристап, со желба за постигнување на натамошни успеси за нашата татковина, кои ќе бидат од интерес за сите граѓани, сакам да изјавам дека донесов одлука да ја прифатам иницијативата за мое кандидирање за Претседател на Република Македонија и дека ќе ја поднесам мојата кандидатура на Конвенцијата на ВМРО-ДПМНЕ за избор на кандидат за Претседател на Република Македонија.

Во животот има моменти кои ги одредуваат нашите натамошни активности и ги определуваат натамошните заеднички достигнувања. Во таквите мигови треба да се носат правилни одлуки кои се резултат на верба во вредностите. Самиот успех е резултат на правилен избор на одлуки.

Јас цврсто верувам дека сите ние заедно, граѓаните на Република Македонија, Македонците, Албанците, Турците, Србите, Ромите, Власите,Бошњаците, и другите, христијаните, муслиманите, Евреите и атеистите, имаме потенцијал и капацитет да носиме мудри одлуки и тоа сме го покажале. Горд сум на тоа што, заедно со вас, мои сограѓани, го направивме за нашата татковина. Да продолжиме заедно да ја градиме нашата заедничка иднина, да ја градиме државата, да го развиваме соживотот, да ги негуваме вредностите и да ги промовираме националните и државните интереси на Република Македонија. Да се биде Претседател на Република Македонија значи секогаш да бидеш чесен кон своите сограѓани, да се држиш до зборот и до достоинството и да си секогаш на страната на заедништвото, демократијата, единството и патриотизмот.

Да продолжиме заедно по тој пат, да продолжиме да се бориме заедно еден до друг, рамо до рамо за секој еден граѓанин на нашата земја и да се стремиме да го подобриме нивниот живот.

Ви благодарам на сите.