Почитувани извидници,
Драги гости,

Прекрасно е чувството да се биде на грандиозниот антички театар во Охрид заедно со стотина млади од Македонија и од Европа. Навистина имам особена чест да ве поздравам на отворањето на 11. извидничка смотра на Сојузот на извидници на Македонија. Со задоволство ја прифатив поканата да бидам покровител на овој настан. Верувам дека смотрата ќе придонесе во осмислувањето на времето на младите нудејќи можност за разонода, но и можност за учење и развој во рамките на неформалното образование.

Денеска, при посетата на кампот во Скребатно, се уверив дека во наредните неколку дена околу 450 учесници ќе имаат навистина извонредни услови за престој и работа. Морам да истакнам дека програмата на смотрата е богата со различни активности и настани кои ќе овозможат стекнување на знаење, искуства и вештини, но и дружење и забава. За да се подготви ваков настан, потребна е макотрпна работа и вложување многу труд, енергија и љубов. Несомнено во оваа пригода треба да им се оддаде признание на сите старешини, членови и волонтери на Сојузот на извидници на Македонија за постигнатото. Признанието оди и кај оние кои логистички и финансиски го помогнаа настанот.


Почитувани,

Сојузот на извидници на Македонија е една од најстарите и најреспектабилните младински организации и членка на престижната Светска скаутска мрежа. Со своите активности придонесува за исполнување и осмислување на слободното време на младите. Токму во годината кога прославувате значаен јубилеј – 60 години постоење, дозволете уште еднаш јавно да ја изразам мојата поддршка за вашите активности.


Почитувани учесници,

Му честитам на секој од вас кој е дел од оваа смотра, кој е дел од кампот во Скребатно, кој е дел од активностите и програмите на македонските извидници.

Не се сомневам дека ова ќе биде незаборавен настан за кој долго време ќе се раскажува. Ви посакувам да имате незаборавна смотра исполнета со градење на пријателства со останатите учесници, и стекнување нови вештини и знаења.

Со оглед дека кампот е веќе подготвен, учесниците се тука и сите нестрпливо очекуваат, јас нема да должам и формално ќе ја прогласам 11-тата извидничка смотра за отворена.


Ви благодарам.

Почитуван претседателе Пахор и драг пријателе Пахор,

Навистина задоволство е да се биде во присуство на спортисти, бизнисмени и да се промовира Евробаскетот во Словенија, во септември. Ние, воопшто, не се сомневаме во одличната организација на Евробаскетот во септември во Словенија. Знаеме какви домаќини сте.

Се надеваме дека Словенија ќе може да покаже како знаат спортистите да се натпреваруваат и да победуваат. И ние нема да Ви останеме должни. И ние ќе знаеме да се покажеме во најдобро светло. Ако важеа спортски правила во Европската унија, досега ќе бевме членка на Унијата.

Ви честитам за организацијата, за тоа што ќе бидете домаќини на Евробаскетот и да се покаже како можат сите Европејци да играат и да се натпреваруваат. Замислете Европа да има свој тим и Европа да учествува на олимпијада, колку медали би добила. Така што, она што го прават спортистите, се надеваме дека ќе го прават и политичарите – ќе ги обединуваат луѓето и ќе им носат многу радости, ќе им носат многу просперитет и убави моменти.

Уште еднаш, Ви честитам, и Ви посакувам сè најдобро и навистина да се покажете како добри домаќини.

Почитувани вљубеници во уметноста,
Ценети екселенции,
Дами и господа,
Драги пријатели,

Ми претставува особено задоволство да ве поздравам вечерва во Охрид. Во амбиент каде минатото и сегашноста се испреплетени, овозможувајќи ни барем за миг да го почувствуваме безвременото. Тој миг трае веќе 53 години. Тој миг е нашето „Охридско лето".


Ценети присутни,

Велат, уметноста е одраз на човековата душа. И додека човекот го користи огледалото за да го види сопствениот физички одраз, ја користи уметноста за да ѕирне во душата.

Фестивалот „Охридско лето" е токму она големо културно и духовно огледало што ни помага да проникнеме во длабоката уметничка душа на Македонија, Европа и светот. Ни помага да уживаме во ариите на Верди, Бизе и Глинка, во мислите на Молиер, Шекспир и Достоевски. Ни овозможува да се збогатиме со старите, докажани, но и врвните современи музичко-сценски и драмски остварувања.

Како домаќин на десетина илјади учесници од повеќе од 50 земји, „Охридско лето" е фестивал на отвореност, поврзување и споделување. Отвореност на Република Македонија кон уметничкото, различното и несекојдневното. Поврзување на Македонија и светот, на врвните уметници и верната публика. Споделување на љубовта кон музиката, драмата и танцот.

Токму затоа, вистинска чест е, како претседател на Република Македонија, да бидам и покровител на фестивалот што е најзначаен израз, афирматор и промотор на македонската посветеност кон овие универзални вредности.


Драги вљубеници во уметноста,

„Музиката е универзалниот јазик на човештвото." Таа зборува, онаму каде што и зборот потфрлува. Со таа мисла, на самиот крај, во исчекување на изведбата на познатиот руски баритон Дмитриј Хворостовски и хорот и оркестарот на Македонската опера и балет, го прогласувам годинешниот фестивал „Охридско лето" за отворен!


Ви благодарам.

Почитувани присутни,
Драги пријатели,


Вистинска чест е да ви се обратам вечерва, на отворањето на Европското јуниорско првенство во борење во женска и во машка конкуренција. Му честитам на секој еден од вас што успеал со својата посветеност, сила и вештина да се избори за учество на ова првенство. Првенство кое е симбол за човековата борба и стремеж кон подобро и поуспешно.


Почитувани,

Спортот има две основи улоги. Преку дисциплината, издржливоста и посветеноста, да создава здрави и одговорни поединци и генерации. Втората, универзална улога е да ги брише границите, да ги поврзува народите и да ги сплотува спортистите и нивните верни навивачи. Во ова Европско првенство се обединети двете улоги на спортот.

Навистина се гордеам што Република Македонија е домаќин на овој значаен спортски настан. Како длабока традиција, македонското борење е нашиот најтрофеен спорт на меѓународен план. Но, уште поважна е можноста што ви се дава вам, борачите што учествувате на ова јуниорско првенство. Вие сте сегашноста, но и иднината на европското борење. Вам ви ја даваме сета поддршка за и натаму да продолжете со врвни резултати во овој спорт.

Ја користам оваа пригода да им се заблагодарам на европската и на светската боречка федерација за укажаната можност да бидеме домаќини на овој настан. И благодарам и на нашата боречка федерација за сите активности и подготовки околу реализацијата на ова првенство. Не се сомневам дека ова ќе биде успех за кој долго време ќе се зборува.


Почитувани учесници,

Верувам дека на душекот ќе го дадете својот максимум и ќе ги импресионирате гледачите. Ви посакувам да имате незаборавно првенство исполнето со највисоки спортски достигнувања, но и градење на пријателства со останатите учесници.

Не заборавајте. Во спортот, како и во животот, разликата меѓу невозможното и возможното лежи во човековата упорноста. Само најупорните стигнуваат до крајот. Со таа мисла, го прогласувам првенството за отворено.


Ви благодарам.

Почитувани присутни,
Дами и господа,
Драги пријатели,

Со големо задоволство ја прифатив поканата да присуствувам на отворањето на летната школа на Меѓународниот семинар за македонски јазик, литература и култура. Семинар што го организира мојот матичен универзитет „Св. Кирил и Методиј“ од Скопје. Семинар кој секоја година ни носи многу нови почитувачи и вљубеници во културата, јазикот и литературата во Република Македонија.

Додека лани, семинарот го одбележа историскиот, 45-годишен јубилеј, би можело да се каже дека годинава го прославува својот духовен јубилеј. Годинава, одбележуваме 1150 години од Моравската мисија на сесловенските светители и просветители Кирил и Методиј. Мисија во која тие се бореа за правото на секој народ да зборува, да чита и да пишува на сопствениот, мајчин јазик.

Составувајќи ја глаголицата и преведувајќи го Светото писмо, тие го засадија семето од кое никна големото, богато и разгрането стебло на словенските јазици. Денес, тука, во нашата древна духовна и културна престолнина Охрид, ги собираме плодовите од стеблото што солунските браќа го засадија пред речиси дванаесет века во срцето на Европа.

Ценети присутни,
 
Зборовите изговорени на јазик што човекот го разбира, допираат до неговиот ум. Зборовите, пак, изговорени на неговиот мајчин јазик допираат до неговото срце. Нашите срца се преполни со радост кога ве слушаме како зборувате македонски, а за тоа има добра причина.

Македонскиот јазик е срцето на Македонија. Како што рече Блаже Конески, нашиот јазик е нашата единствена комплетна татковина. Ќе се согласите дека во оваа кратка мисла одекнуваат зборовите на Крсте Петков-Мисирков, кој пред 110 години, во делото „За македонцките работи“, меѓу другото, напиша:

„Милоста кон народниот јазик е наш долг и наше право. Ние сме должни да го милуваме нашиот јазик, зашто тој е наш исто така како што е наша татковината. Првите гласови што ги имаме чуено се гласовите на нашите татковци и мајки, гласовите и зборовите на нивниот народен јазик. Преку нив ние ја добивме нашата прва духовна храна, зашто со нив се осмислуваше сè што гледавме со нашите очи. Со народниот јазик ние ја освојуваме психологијата на нашите татковци и предедовци и стануваме нивни духовни наследници, како што сме со снагата нивни телесни продолжувачи.“Дами и господа,

Во јазикот се препознава минатото, сегашноста и иднината на еден народ. Преку јазикот гледаме какво е неговото историско искуство, каде се наоѓа и кон каде се стреми.

Според некои процени, во богатата европска лингвистичка градина денес има околу 230 живи јазици, а македонскиот јазик е еден од нив. Крсте Петков-Мисирков пишуваше во време кога постоеја обиди македонскиот јазик, како неразделив дел од македонскиот идентитет, да биде трајно искорнат од европската многујазична градина. Период кога некои држави се обиделе делови од градината да  сведат на еднокултурна плантажа.

Но, како што вели Петре М. Андреевски: „Племето наше е пиреј и не го ништи ни една војска. Ама ти колку сакаш кошкај ја, корни ја, куби ја, таа пак не умира. Само малку да се допре до земјата, и пак ќе се фати, ќе оживи, ќе потера. Ништо не ја ништи таа трева“. Денешниот собир доволно зборува за нивниот неуспех.

Со самото тоа што денес македонскиот јазик го зборуваат неколку милиони Македонци во Република Македонија и надвор од неа, иднината е обезбедена и сигурна. Но, токму преку вас, славистите од целиот свет, македонскиот јазик, како и македонската култура и литература, се здобиваат со најдобрите амбасадори на светските меридијани.  Најискрено ви благодарам за сиот ваш труд и посветеност.

Со таа мисла, на самиот крај, ви посакувам успешна работа во летната школа и пријатен престој во Република Македонија.

Ви благодарам.

Почитувани присутни,
Ценети екселенции,
Дами и господа,

Вистинска чест и задоволство е да се биде на овој значаен самит, тука во Братислава, во срцето на Европа. На просторот каде пред речиси дванаесет века, сесловенските просветители и светители Кирил и Методиј предлагаа Европа да биде заснована на два принципи. Принципи што ги вклучуваат сите религии и народи: цивилизацијата на љубовта и носталгијата по единството. Му благодарам на претседателот Гашпарович за срдечното гостопримство и за предизвикувачката тема.

Ценети екселенции,

Живееме во ера на глобални промени. Ера во која се менува светот каков што го знаевме. Симптомите се економски, но причините се пред сè политички. Тоа особено се чувствува на нашиот континент.

Денес има околу 26 милиони невработени во земјите на Европската унија. Има високо ниво на инфлација и стагнација на инвестициите. За некои европски земји ова може да биде изгубена деценија. А, секоја изгубена деценија истовремено значи и изгубена генерација.

Глобалната економска и финансиска криза си го зема својот данок и во мојот регион - Југоисточна Европа. Повеќето земји од регионот минатата година забележаа реален пад на бруто-домашниот производ, а некои остварија забавување на стапките на раст. Кризата ги намали можностите за економски развој на речиси целиот регион. Дури и фондовите на Европската унија за развојот и техничката поддршка се под притисок. Според последниот извештај на Светската банка, просекот на странски директни инвестиции по глава на жител во регионот е само 285 долари. Од предизвиците не е одмината ниту Република Македонија.

Но, и во вакви услови, македонската економија е стабилна и одржлива. Имаме буџетски дефицит од 3,5% од бруто-домашниот производ. Имаме стабилен банкарски систем. Во однос на јавниот долг, со стапка на задолженост од 34,1%, Република Македонија е меѓу најниско задолжените земји во Европа. Според индексот за економска слобода во светот за 2012 година, се наоѓаме на 43-то место, пред дури седум земји од нашиот регион. Според рангирањето на Светската банка за 2013 година, Република Македонија се наоѓа на високото 5. место според поволноста за започнување бизнис. Четврти сме според олеснувањето на даноците за 2012 година. Ние сме трети најдобри реформатори во светот.

Почитувани присутни,

Сите ние сме дел од бродот наречен Европа. Пред неколку години, нашиот европски брод беше зафатен од глобалната економска, кредитна и финансиска бура. Сакам да верувам дека наскоро ќе влеземе во помирни води. До тогаш, ние треба да знаеме кои делови од бродот ќе треба да се заменат, кои да се санираат, а кои да се зајакнат. Она што сега е најважно е да не го изгубиме компасот. Тоа е и целта на стратегијата за раст за посткризното закрепнување, кон која сите ние можеме да придонесеме.

Европската унија е создадена како мировен проект и беспрекорно функционираше во услови на економски просперитет на континентот. Но, се појави кризата, и, Унијата покажа слабост.

Ги цениме напорите на сите вклучени во изнаоѓањето решенија, но е потребно да се размисли за подобрување на системот, со цел да биде поотпорен на економските кризи. Неспорно е дека одговорноста на секоја членка е битна, но, во едно семејство ако се запали куќата, не е важно кој член на семејството го предизвикал пожарот. Важно е да се спаси, а потоа и да се поправи куќата.

Верувам дека дел од одговорот е во натамошна европска интеграција. Ќе го земам за пример нашиот денешен состанок, кој има два тима. Во првата група се земјите-членки на Европската унија, а во втората, оние кои не се, но сакаат тоа да бидат. Република Македонија е во втората група. Сите знаеме каде лежи победата. И покрај предизвиците со кои се соочува во поглед на нејзината економија, управување и одговорност, Европа е фаворитот.

Веќе од идниот месец, тимот на Европската унија ќе се зајакне со еден член повеќе од регионот на Југоисточна Европа. Со тоа, овој наш ценет форум ќе добие уште една земја-членка на Унијата, а Унијата ќе се збогати со уште една земја-членка од форумот. Со проширувањето на Европската унија, сите ние добиваме, а особено Унијата.

Почитувани присутни,

Европската унија без нашиот регион, без секоја од нашите земји, вклучително и Република Македонија, е незавршен проект. Веројатно повеќето меѓу нас се сеќаваат на зборовите што нашиот ценет колега, претседателот Наполитано, ги кажа во Варшава, на вечерата со претседателот Обама. Европската унија не е Европа, ниту пак Европа е само Европската унија. Јас целосно се согласувам со неговиот став. Европската унија треба уште да работи и да се проширува за да може да зборува во името на Европа. За две недели ќе се отвори уште една можност за да се намалат разликите меѓу Европската унија и Европа. Уште една можност Унијата да се приближи кон Европа.

Во очекување сме на Европскиот совет, каде очекуваме и се надеваме дека секоја земја од регионот ќе направи чекор напред. Република Македонија и Република Србија да добијат датум за преговори. Црна Гора успешно да напредува во преговорите до нивното завршување. Република Турција да продолжи со преговорите. Република Албанија да стане кандидат. Босна и Херцеговина, Република Молдова и Косово да напредуваат на европската агенда.

Ценети присутни,

Со приближувањето кон европското семејство, ние, кои сакаме да сме дел од клубот, ги движиме општествата кон слободниот проток на луѓе, капитал, стоки и услуги. Тоа нè поттикнува и нè фокусира на реформите. Нè навикнува на поголема економска и фискална дисциплина. Ни помага на европски начин да ги затвораме отворените прашања.

Регионот на Југоисточна Европа полека, но сигурно закрепнува од периодите на изолација, поделби и конфликти што ја обележаа последната деценија на 20 век. Регионот повторно се обединува и се интегрира кон нашиот заеднички дом – Европа. Се градат транспортни, инфраструктурни и енергетски коридори. Се развиваат индустриски капацитети. Се разгранува и се продлабочува протокот на луѓето, стоките, капиталот и услугите. Се градат мостови на разбирање.

Охрабрува и тоа што Југоисточна Европа е собрана тука, во Централна Европа. За жал, по се изгледа дека земјите од Југоисточна Европа немаат проблем да се состануваат надвор од сопствениот терен, од сопствениот регион. Се надевам дека и тој предизвик ќе биде надминат.

Инспирирани од „Европа 2020: Стратегија за мудар, одржлив и инклузивен раст", работиме на заедничка стратегија на Југоисточна Европа за економски раст. Раст што треба да го достигнеме до 2020, за помалку од 7 години. Тоа е голем предизвик, но и голема историска можност за секоја од нашите држави, за нашите граѓани, за нашите деца. Република Македонија е особено посветена на развојот на оваа регионална стратегија, која треба да биде хармонизирана и со стратегијата за која денес зборуваме.

Дами и господа,

Се вели дека кога дуваат ветровите на промените, некои луѓе градат засолништа, додека други градат ветерници. Дали промената ќе ни биде пријател или непријател, зависи од нашиот пристап. Ако бегаме од неа, ни станува непријател. Ако се соочиме со промената, ако се обидеме да научиме нешто од неа, станува наш најверен сојузник.

Ви благодарам.