Претседателот на Република Македонија, д-р Ѓорге Иванов, денеска ги прими учесниците на Работилницата „Заштита од тероризам, подобрување на отпорноста на демократските институции и владеењето на правото", која што е поддржана од програмата на НАТО, „Наука за мир и безбедност".

На приемот на кој присуствуваа професори и истражувачи од Република Македонија, Обединетото Кралство, Германија, Белгија, Италија, Бугарија, Албанија, претседателот Иванов посакувајќи им добредојде во Република Македонија, порача дека учесниците на работилницата се занимаваат со актуелни и на некој начин непредвидливи теми.

„Ова што се случува денес во Сирија како да потсетува дека мирот е исклучок, а конфликтите и војните како да се некоја нормалност", рече претседателот Иванов.

Во своето обраќање, македонскиот претседател нагласи дека кога еден регион живее на отворен простор, тогаш настапува мир, додавајќи дека отворениот простор создава луѓе со отворен ум кои немаат предрасуди, стравови и се воспоставува комуникација, а според него кој комуницира, тој се интегрира.

„Со комуникацијата и интеграцијата луѓето добиваат заеднички јазик и почнуваат да се разбираат меѓу себе. Тоа им овозможува да обезбедат единствен пазар со една валута. Единствена сила што може повторно да го отвори просторот на Балканот се вика Европска Унија. Нема друга сила која може да овозможи повторно сите што живеат на Балканот да живеат на отворен простор", истакна македонскиот претседател.

Според претседателот Иванов предизвиците од мигрантската и бегалската криза која го зафати регионот на Балканот во 2015 и 2016 година, покажува колку е потребна комуникација меѓу државите.

„Како никогаш досега ни е неопходна комуникација и размена на податоци. Тоа го видовме во 2015 година со мигрантската криза. Се додека секој сам се снаоѓаше со мигрантите немавме успех. Кога почнавме да ги разменуваме податоците, да стекнуваме доверба, најдовме начин како да се соочиме со тој предизвик", рече македонскиот претседател.

Претседателот Иванов во својот говор се осврна и на денешните предизвици и закани за НАТО кои според него се од дигитализирање на криминалот, односно можноста преку интернет да се вршат разни криминални дејствија кои во минатото не можеле, додавајќи и дека бирократските процедури во Алијансата треба да се прилагодат на состојбите и предизвиците од 21 век.

Истражувачката работилница „Заштита од тероризам, подобрување на отпорноста на демократските институции и владеењето на правото", поддржана од програмата на НАТО, „Наука за мир и безбедност", се одржа од 11 до 14 април во Скопје. Програмата на НАТО има за цел да го промовира дијалогот и практичната соработка меѓу земјите-членки на НАТО и партнерските земји врз основа на научни истражувања, технолошки иновации и размена на знаења.

Во 2012 година со турскиот државен врв направивме преглед на нашите билатерални односи и заклучивме дека политичките односи се на одлично ниво, но сепак она што недостасуваше беше економската соработка. Затоа, си поставивме една цел – а тоа е годишната трговска размена да ја покачиме на една милијарда долари, порача претседателот Иванов во своето обраќање пред турските стопанственици, во Истанбул.

На бизнис вечерата, на кој присуствуваше делегација на Стопанската комора на Македонија, раководството на Унијата на комори и берзи на Турција (ТОББ) и стопанственици од Турција, македонскиот претседател говореше за унапредување на економските односи меѓу двете земји преку зголемување на трговската размена и на инвестициите.

„Нас не радува перманентниот економски развој и економските успеси на Република Турција. Од друга страна, пак, Република Македонија нуди огромен број можности и прилики. Едно е јасно, можеме многу повеќе и во инвестициите и во трговската размена", рече претседателот Иванов.

Тој истакна дека како држави и институции се прави се за да се олесни патот кон целта, а, за тоа, како што вели помогнале и географската близина, добрата инфраструктурна повразност и директните авионски линии меѓу Македонија и Турција.

„Како што македонската и турската држава си ги почитуваат ветувањата, така и турските и македонските стопанственици знаат да го испочитуваат зборот што ќе си го дадат едни на други. И со тоа, вие, стопанствениците градите доверба која потоа се пренесува на граѓаните, на потрошувачите. Македонските граѓани имаат доверба во турските производи кои по ништо не заостануваат зад европските брендови", им порача македонскиот претседател на присутните стопанственици.

Претседателот Иванов во својот говор нагласи и дека се подобрува договорната состојба меѓу Македонија и Турција, и потсети дека историските корени на македонската економија се токму во турските чаршии и турските пазари во кои функционирале еснафите.

Членот на управниот одбор на Унијата на комори и берзи на Турција (ТОББ), г. Џенгиз Гунај, потсети дека претседателот Иванов е многу значаен за ТОББ и побара негова поддршка за нивелирање на царините меѓу двете земји.

„Македонија е во срцето на Југоисточна Европа и е порта кон 650 милиони потрошувачи. Околу 100 турски компании веќе инвестирале 1 милијарда и 500 милиони долари и отвориле 5000 работни места во Македонија." рече г. Гунај.

Претседателот на Република Македонија, д-р Ѓорге Иванов, се обрати на свеченото отворање на 21. Евроазиски економски самит, што се одржува во Истанбул, во организација на фондацијата Мармара.

Претседателот Иванов истакна дека фактот што Евроазискиот економски самит трае веќе 21 година е знак за неговото влиание и успех. Токму затоа, идеите кои се опфаќаат на самитот се земаат предвид не само во Република Турција, туку во целиот евроазиски регион", нагласи Иванов. „Преку интернетот и новите технологии, знаењето од целиот свет ни е на дофат. Потребно ни е образование што ќе создава луѓе за третиот милениум", порача шефот на државата на свеченото отворање на Самитот.

Темата на годинешниот самит е „Дилемата на нашиот век: Технологија наспроти политика". „Ќе дискутираме за сето она што ги очекува нашите држави и општества. А, тоа е влијанието на дигиталната трансформација врз политиката, државите, економијата, енергетиката. Ќе зборуваме за пресоздавањето на градовите од старомодни во паметни градови, подвлече претседателот Иванов.

На свеченото отворање на 21. Евроазиски економски самит, претседателот на Владата на Република Турција, г. Бинали Јилдирим му додели награда на претседателот Иванов за неговото 10-годишно учество на Евроазискиот економски самит.

Во рамки на учеството на Самитот, претседателот Иванов, ќе оствари средба со претставници на Стопанската комора на Република Македонија и со турски бизнисмени, каде што ќе има свое обраќање заедно со претседателот на Coјузот на стопански комори и берзи на Република Турција, г. Рифат Хисарџиклиоглу.

Во рамки на работната посета на Турција, претседателот Иванов оствари средба со Вселенскиот Патријарх Вартоломеј I.

Претседателот на Република Македонија, д-р Ѓорге Иванов, во Истанбул оствари средба со Вселенскиот Патријарх Вартоломеј I.

Претседателот Иванов, упатувајќи честитки по повод големиот христијански празник Воскресение Христово – Велигден, ги поздрави активностите и напорите на Вселенскиот Патријарх за обезбедување поголемо единство во православната екумена и за помирување на христијанството со другите религии.

„Во време кога светот се соочува со тешки предизвици, потребна е заедничка посветеност и заложба во одбраната на христијанските вредности и принципи, кои настојуваме да ги споделуваме во духот на дијалогот и меѓусебната почит", истакна македонскиот претседател.

На средбата беа разменети мислења за повеќе актуелни теми од заемен интерес‎.

Двајцата соговорници разговараа за прашања поврзани со статусот на Македонската православна црква - Охридска Архиепископија. Претседателот Иванов истакна дека МПЦ-ОА е жива црква, додека Вселенскиот Патријарх изрази надеж дека прашањето ќе се реши. Претседателот Иванов упати покана до Вселенскиот Патријарх да ја посети Република Македонија, по повод одбележувањето на големиот јубилеј - 1000 години од формирањето на Охридската архиепископија.

Претседателот Иванов престојува во работна посета на Република Турција, по повод учеството на 21. Евроазиски економски самит.

Претседателот на Република Македонија, д-р Ѓорге Иванов, со сопругата г-ѓа Маја Иванова и синот Иван, присуствуваа на Светата Златоустова литургија во Соборниот храм „Св.Климент Охридски" во Скопје, по повод празникот Воскресение Христово – Велигден.

По Светата Златоустова литургија македонскиот претседател на сите православни верници им го честиташе најголемиот христијански празник Воскресение Христово – Велигден, со желби за многу здравје, радост и среќа.

„Празниците се за славење, но и за потсетување за сето она што го поминале нашите предци, за нивното опстојување, за вредностите што ни ги пренеле нам и што ние треба да ги сочуваме за нашите потомци", рече претседателот Иванов, додавајќи дека овој Велигден не потсетува и на 1000 години од основањето на Охридската архиепископија.

„Посакуваме нашата црква да биде дел од православната екумена и посакувам како што сме сплотени и единствени за време на празниците, така да бидеме во текот на годината, да си помагаме меѓусебе, да сме солидарни, и тогаш ќе бидеме успешни. Посакувам многу повеќе да си ја сакаме, да си ја почитуваме, да си ја чуваме Република Македонија“, рече македонскиот претседател.

По Светата Златоустова литургија, претседателот Иванов и сопругата г-ѓа Маја беа примени од Поглаварот на Македонската Православна Црква – Охридска Архиепископија, г.г. Стефан.

Претседателот на Република Македонија, д-р Ѓорге Иванов, упати честитка по повод одбележувањето на  8 Aприл – Меѓународниот ден на Ромите.

Почитувани сограѓани,

Осми април е меѓународен ден посветен на културата и на историјата на Ромите што во Република Македонија се прославува на највисоко ниво. Ромската заедница е нераскинлив дел од македонското мултиетничко, мултирелигиско и мултијазично општество. Она што го држи нашето општество заедно е уникатниот модел на соживот и почитувањето на различноста.

Република Македонија е онолку успешна колку што се успешни сите нејзини граѓани. Затоа, постојано се работи за да се унапреди социоекономската, политичката, културната и позицијата на Ромите во општеството. Учеството во локалната самоуправа, законодавната и извршната власт, наставата и емисиите на ромски јазик се само дел од стекнатите права на ромската заедница, кои никој нема право да ги доведува во прашање.

Свесни сме дека претстои уште многу работа бидејќи сè уште постојат стереотипи, предрасуди, но и наследени нерамномерни економски односи коишто се пречка за остварување на целосниот потенцијал на ромската заедница. Треба уште многу работа за да ја постигнеме посакуваната цел – еднакви можности и права како предуслов за достоинствен живот за секој припадник на ромската заедница во Република Македонија.

Честитајќи ви го денешниот празник, уверен сум дека и во иднина заедно ќе работиме за доброто на нашата држава и на нашите сограѓани, почитувајќи го принципот на еднаквост, недискриминација и владеење на правото.

Ви посакувам убаво празнично расположение, многу здравје, радост и благосостојба.

Нека е честит празникот!

д-р Ѓорге Иванов