Претседателот на Република Македонија, д-р Ѓорге Иванов, денеска го прими Претседателот на Големото Национално Собрание на Република Турција, Џемил Чичек.

Двајцата соговорници изразија задоволство од континуираниот развој на билатералните односи и од позитивниот тренд на севкупна соработка. Посебно внимание беше посветено на парламентарната соработка како исклучително значаен сегмент, а беше искажано задоволство и од постојаната позитивна динамика во економската соработка. Претседателот Иванов истакна дека односот меѓу двете земји во повеќе сегменти достигнува степен на стратешко партнерство, а честите средби на највисоко ниво се само потврда и сигнал за натамошно унапредување на пријателските релации.

На средбата беа разменети мислења за прашањата од регионален интерес, како и за перспективите на македонските евроатлантски интеграции, низ призма на можностите за нивно што поскоро деблокирање.

Претседателот Иванов се заблагодари за досегашната конструктивна и принципиелна поддршка од Република Турција во Северно-атлантскиот сојуз, која е особено значајна во пресрет на Самитот во Чикаго. Македонија недвосмислено ги исполнува критериумите за влез во НАТО, а нејзиниот придонес во мировните мисиите е меѓународно признаен и високо ценет, потенцираше претседателот Иванов и дополни дека новонастанатата правна состојба по пресудата од Хаг, ја наметнува потребата од редифинирање на заклучокот од Букурешт, кој е резултат на  противправното однесување на Република Грција.

Претседателот на турското Собрание Чичек изрази целосна поддршка за македонските евроатлантски аспирации, и го сподели мислењето дека блокадите на интеграциските процеси на Република Македонија се неразбирливи и неразумни. Турција и натаму ќе се залага процесот на проширување да остане високо на НАТО агендата, а Македонија може и понатаму да смета на безрезервна поддршка од Република Турција, истакна Чичек.

Двете страни изразија подготвеност за натамошна соработка на регионален и мултилатерален план, при што посебно беше нагласена успешната соработка во рамките на Алијансата на цивилизациите.

Претседателот на Република Македонија, д-р Ѓорге Иванов, денеска го прими Министерот за европски прашања на Кралството Данска, Николај Вамен.

Клучни теми на разговор меѓу двајцата соговорници беа претстојниот Европски совет во јуни и можноста за деблокада на ЕУ интеграциите преку добивање на датум за почеток на преговори за членство во Европската Унија, како и перспективите за продлабочување на билатералните односи и соработка меѓу Република Македонија и Кралството Данска.

Потенцирајќи дека дијалогот на високо ниво не е замена за преговорите за членство, претседателот Иванов изрази очекување дека Данска како актуелен претседавач со Европската Унија, на Советот во јуни ќе го отвори прашањето за Македонија и ќе го поддржи одредувањето на датум за почеток на претпристапните преговори за членство. Претседателот Иванов изрази надеж дека преку целосно почитување на Времената спогодба, пресудата од Хаг,  како и позитивните примери од регионот на паралелно движење во интеграцијата и надминувањето на билатералните разлики, до деблокада на европските и евроатлантските интеграции е можно да се дојде. Воедно, претседателот Иванов ја нагласи подготвеноста на Република Македонија низ дијалог, со конструктивен пристап и со целосно почитување на рамката во која се водат разговорите, да се дојде до заемно прифатливо решение за наметнатиот спор, за што е неопходен идентичен пристап и од нашиот сосед.

Министерот Вамен, изрази задоволство од текот на реформските процеси во земјава,  и упати честитки за отпочнувањето и постигнувањата од дијалогот на високо ниво со Европската Унија. Тој нагласи дека Данска, и во својство на претседавач, но и билатерално, останува силен поддржувач на проширувањето и дека во рамките на можностите прави напори сите земји од регионот на Западен Балкан, вклучително и Република Македонија, да направат исчекор во интеграциите. Министерот Вамен истакна дека нерешениот спор за името со Република Грција останува пречка на македонскиот пат кон ЕУ и дека Данска ги охрабрува и посакува  двете страни низ дијалог да изнајдат заемно прифатливо решение.

Двајцата соговорници искажаа интерес за зајакнување на севкупната билатерална соработка меѓу двете земји и за интензивирање на контактите, со оглед на фактот дека досега немало средба на највисоко ниво.

Инспирирање и развој на исклучителни млади лидери
20 -31 август 2012 година

ПОКРОВИТЕЛ: Претседател на Република Македонија, д-р Ѓорге Иванов

Програмата е намената за млади луѓе со завршено високо образование кои имаат желба преку нивните лидерски вештини да придонесат за позитивен развој на општеството и околината во која живеат и работат.

Програмата опфаќа предавања од лидерството и менаџментот со еминентни  предавачи и гости од земјата и странство, менаџмент симулации и практични вежби. Наставата ќе се одвива на македонски и англиски јазик. Бројот на учесниците е ограничен.

Право на учество имаат сите млади од Република Македонија и деца на наши иселеници што живеат во странство. Трошоците за сместување со полн пансион, ќе бидат покриени од страна на Претседателот на Република Македонија, како покровител на оваа програма.

Услови за конкурирање:

• Одлично познавање на англиски јазик
• Просек од високо образование да биде еднаков или поголем од 8.5 (или еквивалентно доколку се работи за диплома од странство)
• Работно искуство од една до пет години како и магистратура од соодветната област ќе се смета за предност.

Потребни документи за Апликација:

• Две препораки од вашата организација, компанија или факултет. 
• Потврда за одлично познавање на англиски јазик.
• Копија од Уверение за положени испити.
• Биографија
• Кратко мотивациско писмо

Комплетната апликација да се испрати по пошта најдоцна до 23 мај 2012 година, на следнава адреса:

Кабинет на Претседателот на Република Македонија 
(Комисија за „Школа за млади лидери“)
„Вила Водно“
Ацо Караманов, 33А
МК-1000 Скопје

Почитуван господине Претседателе,
Ми претставува особено задоволство, по повод 9 мај, Денот на Европа, во име на граѓаните на Република Македонија, како и во мое лично име, да Ве поздравам и да Ви упатам срдечни честитки и искрени желби за напредокот на Европската унија и нашиот заеднички дом - Европа.

Одбележувајќи ја 20-годишнината од потпишувањето на Договорот за Европската унија, верувам дека треба да се присетиме на ветувањата врежани во историскиот договор од Мастрихт. Пред две децении, европското лидерство ја потврди својата “приврзаност кон принципите на слобода, демократија и почитување на човековите права и фундаменталните слободи и владеењето на правото“, во исто време “сакајќи да ја продлабочи солидарноста меѓу народите истовремено почитувајќи ја нивната историја, нивната култура и нивните традиции“. Во изминатите децении, овие идеали донесоа мир, надеж и единство на нашиот континент, на регионот на Југоисточна Европа и на Република Македонија и нејзиното мулти-етничко, мулти-религиско и мулти-јазично општество.

Имајќи ја предвид моќта на европската идеја да помирува и да обединува, ја користам оваа свечена пригода да ја искажам нашата благодарност за поддршката и насоките што Европската унија и ги даде на Република Македонија на нејзиниот евроинтегративен пат. „Оваа Европа останува отворена за сите држави. Длабоко се надеваме дека други држави ќе ни се приклучат во нашиот заеднички напори,“ се вели во Декларацијата за Европа потпишана од основачите на Обединета Европа во 1951 година. Би сакал да Ве уверам, Господине Претседателе, дека, и покрај бројните и неправедни пречки, македонските граѓани остануваат посветени на остварувањето на сонот за членство во напредното Европско семејство на народи. Очекувам да го видам денот кога мојата земја ќе стане полноправна членка на Европската унија, со споделени права и обврски. Силно верувам дека во наредниот период ќе можеме да ги започнеме преговорите за членство во Европската унија. Во овој процес, ние не сакаме привилегии, туку истите критериуми кои се применуваа за другите земји-членки на Унијата. Од ова секако бенефит ќе имаат не само мојата земја, туку и регионот и Европа.

Со такво уверување и со најискрени желби за Ваша натамошна успешна работа, добро здравје и лична среќа, Ви ги упатувам изразите на моето највисоко почитување.

д-р Ѓорге Иванов

Претседателот на Република Македонија д-р Ѓорге Иванов упати честитка до новоизбраниот претседател на Француската Република, Франсоа Оланд:

Почитуван господине Оланд,

Ми претставува особена чест и задоволство, во свое име и во име на граѓаните на Република Македонија, да Ви упатам најискрени честитки за Вашиот избор за претседател на Француската Република. Ви упатувам искрени желби за успешно извршување на високата и одговорна функција, за многу здравје и лична среќа.

Дозволете ми, да ја искористам оваа свечена прилика да изразам задоволство од досегашниот развој на односите кои се развиваат и надградуваат во духот на заедничките заложби за демократска, стабилна, обединета и просперитетна Европа. Воедно, би сакал да го изразам своето уверување дека со заеднички ангажман ќе дадеме свој придонес за натамошно унапредување на односите меѓу нашите пријателски земји во сите области од заемен интерес, како на билатерален, така и на мултилатерален план.

Сакам да Ве уверам, господине Претседателе, дека Република Македонија и нејзините граѓани остануваат посветени за исполнување на вековниот сон за европска и евроатлантска Македонија. Исправноста на нашите желби и напори беше потврдена и со пресудата на Меѓународниот суд на правдата од 5 декември 2011 година, која нуди нова, правна димензија и бара нов пристап од сите земји-членки на НАТО. Се надевам дека ќе ја имаме Вашата и поддршката на Француската Република во нашите напори за деблокирање на европските и евроатлантските интеграции на Република Македонија. Искрено се надевам на Вашата поддршка во претстојниот исклучително значаен период, особено пред и за време на Самитот на НАТО во Чикаго, како и на претстојниот состанок на Европскиот совет.

Со такво уверување, Ви ги упатувам изразите на моето највисоко почитување.

д-р Ѓорге Иванов

Претседателот на Република Македонија д-р Ѓорге Иванов упати честитка до Владимир Путин, новиот претседател на руската Федерација, за преземањето на функцијата:

Почитуван господине Претседателе,

Ми претставува особена чест и задоволство, да Ви упатам најискрени честитки за преземањето на функцијата претседател на Руската Федерација. Воедно, Ви упатувам искрени желби за успешно извршување на високата и одговорна функција, за многу здравје и лична среќа.

Ја користам оваа свечена прилика да го изразам задоволството од висoкиот степен на традиционално пријателските односи меѓу Република Македонија и Руската Федерација. Верувам дека ќе се согласите со оцената дека веќе подолг период се чувствува позитивната динамика во односите меѓу нашите земји. Политичкиот дијалог на високо и највиско ниво претставува гаранција за натамошно унапредување и продлабочување на плодната соработка во сите сфери од заемен интерес, особено на економски, енергетски, културен и научно-образовен план. Очекувам ваквата соработка и достигнатото ниво на политички односи со заемен ангажман да продолжи во периодот што следи.

Со такво уверување и со најискрени желби за Ваша натамошна успешна работа, добро здравје и лична среќа, Ви ги упатувам изразите на моето највисоко почитување.

д-р Ѓорге Иванов