Претседателот на Република Македонија, д-р Ѓорге Иванов, по повод Националниот празник на Република Македонија - 2 Август прими честитки од повеќе државници.
Изразувајќи срдечни честитки по повод Националниот празник на Република Македонија, претседателот на Италијанската Република, г. Серџо Матарела во писмото истакнува дека процесот на евро-атлантска интеграција на земјите од западен Балкан преставува основен услов кој гарантира се поголема стабилност на регионот и Европа.
„Италија убедливо го поддржува напредокот на реформите и зајакнувањето на дијалогот меѓу балканските земји и народи, свесни дека се основен предуслов за продолжувањето по патот за пристапување кон ЕУ и НАТО", се вели во честитката од италијанскиот претседател Матарела.
Во честитката од претседателот на Руската Федерација, г. Владимир Путин, се наведува дека руско-македонските односи кои се базираат на добрите традиции на пријателство и духовна блискост, се развиваат во позитивна насока.
„Убеден сум, дека со заеднички ангажман ќе постигнеме натамошно проширување на заемно полезната билатерална соработка за доброто на граѓаните на нашите земји, а во интерес на зацврстување на регионалната стабилност и безбедност", се вели во честитката од рускиот претседател Путин.
Австрискиот сојузен Претседател, г. Хајнц Фишер во својата честитка до македонскиот претседател вели: „По повод Националниот ден на Република Македонија задоволство ми е да Ви ги пренесам моите најсрдечни честитки. Ја користам оваа прилика да ви посакам добро здравје и среќна иднина на македонските граѓани".
Најискрени честитки до претседателот Иванов, во име на полскиот народ и во свое име упати и претседателот на Република Полска, г. Бронислав Коморовски.
„Драго ми е што односите меѓу нашите земји успешно се развиваат. Нашите разговори, како и за времето на мојата посета на Скопје во септември 2013 година, така и тие од мултилатералните средби ги чувам во убаво сеќавање. Се надевам дека оваа добра соработка ќе продолжи. Ја потврдувам постојаната полска поддршка за европските и евроатланските аспирации на Македонија, како и подготвеност за споделување на искуството од интеграцијата", стои во соопштението на полскиот претседател.
Во честитката од претседателот на Република Бугарија, г. Росен Плевнелиев се вели: „Се надевам дека Република Македонија ќе го искористи сегашниот круцијален момент за да направи витални реформи и дека ќе ја покаже приврзаноста кон основните принципи на Европската унија, меѓу кои важно место заземаат добрососедските односи".
Во името на словенечкиот народ и во негово лично име желби за сестран напредок и благосостојба упати претседателот на Република Словенија, г. Борут Пахор кој изрази увереност дека сеопфатната соработка меѓу двете земји и натаму ќе се развива.
„Со задоволство констатирам дека Република Словенија и Република Македонија успеаја да изградат цврсти пријателски односи, што е најдобар пат за нашата заедничка билатерална како и регионална соработка и во иднина. Меѓусебната почит и доверба се важна основа за сите нови резултати, за кои верувам дека ќе бидат во корист на двете држави, ќе придонесат за консолидација на стабилноста и развојот на соработката во регионот, се вели во честитката на претседателот на Република Словенија, Борут Пахор.
„Дозволете ми, во свое име и во име на хрватскиот народ, да ви упатам Вам и на Вашиот народ најсрдечни честитки по повод националниот празник на Република Македонија, како и искрени честитки за подобрување и нови успеси на Вашата држава и пријателскиот македонски народ. Двете наши држави ги поврзува цврсто пријателство втемелено врз историски, културни и економски врски. Уверена сум дека и во престојниот период ќе продолжиме да ги развиваме и зацврстуваме нашите односи преку сестрана соработкаво разни области од заеднички интерес", се вели во честитката од претседателот на Република Хрватска, Колинда Грабар- Китаровиќ.
Срдечни честитки по повод Националниот празник Илинден упати и црногорскиот претседател г. Филип Вујановиќ кој оценувајќи дека односите помеѓу Црна Гора и Македонија традиционално се срдечни и пријателски, изрази уверување дека во иднина ќе се продолжи со негување на соработката.
„Уверен сум дека со заеднички напори и понатаму ќе ги развиваме и унапредуваме билатералните односи меѓу Србија и Македонија и така ќе придонесеме за просперитетот на граѓаните на нашите земји", се вели во честитката на претседателот на Република Србија, г. Томислав Николиќ до македонскиот претседател.
Срдечни честитки по повод Националниот празник на Република Македонија упати г. Драган Човиќ, претседавач со претседателството на Босна и Херцеговина, кој изрази задоволство од блиските и традиционално пријателските односи меѓу Босна и Херцеговина и Република Македонија.
Просперитет на Република Македонија со желби за благосостојба во својата честитка изрази претседателот на Република Литванија, г-ѓа Далиа Грибаускаите, истакнувајќи дека годинава се одбележува 20. годишнина од воспоставувањето на дипломатските односи помеѓу двете земји.
„Литванија останува силен поддржувач на евроатланските аспирации на македонскиот народ. Моја голема желба е, заедничките иницијативи развиени од граѓаните на нашите земји од областа на политиката, безбедноста, трговијата, науката и културата, да бидат зајакнати со билатерален дијалог за битни прашања и да обезбедат добросостојба за сите граѓани, истакна претседателот на Република Литванија, Грибаускаите.
„Ја користам оваа можност, претседателе, да ги пренесам желбите за личен успех, и за благосостојба и просперитет на овој пријателски народ", се наведува во честитката која што претседателот Иванов ја прими од Кралот на Шпанија, Фелипе VI.
„Ваша Екселенцијо ја користам оваа можност да ви посакам многу здравје и среќа, а на пријателскиот македонски народ понатамошен развој и просперитет", се вели во честитката на Емирот на Катар, Тамим бин Хамад Ал-тани, кој додава дека врските на пријателство меѓу двете земји во иднина дополнително ќе се заврстуваат.
Честитајќи го Националниот празник на Република Македонија – 2. Август на претседателот Иванов и македонските граѓани, Генералниот секретар на Обединетите нации, г. Бан Ки Мун изрази уверување дека земјава ќе продолжи да го дава својот придонес за остварување на заедничката кауза со што ќе се постигнат заеднички цели од областа на мирот, развојот и човековите права.
По повод Националниот празник на Република Македонија - 2 Август, претседателот Иванов прими честитки и од премиерот на Катар, Абдула бин Насер бин Калифа Ал-тани, од поглаварот на Римокатоличката црква папата Франциск, како и од Генералниот директор на ФАО, Хозе Грацијано да Силва
На средбата со новоименуваниот амбасадор на Босна и Херцеговина, Н.Е. г-ѓа Лепа Бабиќ, беше разменето мислење за актуелните случувања во регионот и изразена подготвеноста за натамошна соработката меѓу двете земји во евроатланските интеграциски процеси. Претседателот Иванов ја истакна потребата од поттикнување и развој на економските односи.
