Претседателот на Република Македонија д-р Ѓорге Иванов и амбасадорот на Европската унија во Македонија Аиво Орав, денеска во претседателскиот кабинет Вила Водно, симболично ги разменија знамињата на Република Македонија и на ЕУ во рамки на одбележувањето на Европскиот ден на знамето.

И двете знамиња, планинарите со марш ќе ги однесат на врвот на Водно, што како што истакна Претседателот, укажува на патот кон Европа кој Македонија треба да го помине за да стане дел од европското семејство.

„Се надеваме дека еден ден и нашето знаме ќе биде заедно со сите знамиња на европското семејство и нашите граѓани ќе ги уживаат сите придобивки што ги имаат и европските,“ нагласи претседателот Иванов, изразувајќи надеж дека оваа манифестација ќе ги поттикне сите да целат кон врвот, и да ги достигнат вредностите и придобивките на останатите граѓани на Европа.

На церемонијата на размена на знамињата претседателот Иванов му порача на шефот на делегацијата на ЕУ дека местото на македонското знаме е заедно со другите знамиња во Европа, таму каде што приородно и припаѓа.

„Ние како земја сме географски дел од Европа, и вредносно и културно и во секој поглед и припаѓаме на Европа,“ потенцира македонскиот претседател Иванов.

Евроамбасадорот Орав изрази надеж дека со овој симболичен настан ќе се покаже дека Македонија наскоро ќе се придружи на европското семејство.

Со низа културни, спортски и образовни манифестации во Скопје и низ други градови во Македонија се одбележува Денот на Европа-9 мај, се прославува заедништвото и обединувањето.

Планинарскиот марш, кој тргна од пред канцеларијата на ЕУ во Скопје и преку Кабинетот на Претседателот продолжи кон врвот на Водно, е во организација на Европското движење на Република Македонија и Делегацијата на Европската унија.

 

Претседателот на Република Македонија д-р Ѓорге Иванов денес во својот Кабинет ги прими студентите со највисок просечен успех од втора година на студиите на факултетите по општествени науки на Универзитетот на Југоисточна Европа.

Претседателот Иванов истакна дека постојаното унапредување на квалитетот на образованието е од исклучително значење, и за таа цел неопходно е да се земат превид мислењата и сугестиите на студентите, идните академски граѓани на Република Македонија, од кои директно зависи иднината и развојот на нашето општество и држава.

За време на дво-часовната средба со Претседателот, 20-мината најдобри студенти од општествените науки ги изложија своите видувања, проблемите и предизвиците со кои се соочуваат, како и предлозите за подобрување на одредени процеси и состојби во високото образование.

Лиридона Велиу, која студира политички науки, посочи дека младината е голем ресурс на една држава, но во недостиг на добра перспектива може да биде и голем проблем за неа.

„Сметам дека ваквите средби со Претседателот се навистина позитивни и се добра можност тој да се запознае со нашите проблеми, очекувања и тоа што сакаме да бидеме во иднина. Ова е добра можност да се запознаеме со луѓето кои само ги гледаме преку екран,“ истакна Велиу.

Меѓу основните забелешки презентирани од страна на студентите е адаптацијата на Болоњскиот процес во македонскиот образовен систем – кредит трансфер системот, размената и мобилноста на студентите. На средбата со претседателот, студентите се интересираа  и за можностите за стипендирање, продолжување и усовршување на своето образование во европските научни центри, што би им овозможило нивните искуствата од светот потоа да ги пренесат во нашата држава.

„Не ги гледаме нашите перспективи само во Македонија, туку и надвор, да видиме што можеме да научиме и да придонесеме за нашата држава,“ посочи студентката Аријета Реџепи. Таа додаде дека нивната средба со претседателот Иванов е добра можност да разговараат за начините за решавање на проблемите.

Според студентите на УЈИЕ, општествените науки во нашата држава генерално се потценети со ограничена перспектива за вработување, што отвара дополнителни прашања за нивната иднина по дипломирањето. Претседателот Иванов им порача да не губат надеж и со своето знаење да се пробиваат низ општествената хиерархија, затоа што квалитетот секогаш излегува на површина. Со самото тоа што вие сте меѓу најдобрите студенти имате основа да бидете успешни во животот, рече претседателот Иванов.

Од интерес на студентите е, исто така, да имаат поголеми можности за пракса и практично усовршување. Тие акцентот го ставија на квалитетот на задолжителната пракса и забележаа дека практичните настави кои ги организираат факултетите се често неефикасни. Студентите посочија на потребата од назначување на ментор во рамки на компанијата или институцијата каде се одвива праксата, кој ќе ги води низ практичните искуства.

Претседателот Иванов им честита на студентите за нивниот досегашен постигнат успех, истакнувајќи дека го радува фактот што отворено зборуваат за проблемите и предизвиците, што укажува на нивната подготвеност да придонесат кон унапредување на севкупниот образовен систем.

„Вие сте генерација на аудио-визуелни медиуми, и во такви услови пристапот до информациите и знаењето е голем. Преку интернет можете да најдете информации за стипендии и други можности за студирање и доусовршување. Владата на Република Македонија, исто така доделува околу 200 стипендии годишно за студирање во странство,“ истакна Претседателот и ги охрабри студентите да аплицираат.

Студентите беа едногласни во ставот дека за нив е голема чест што Претседателот покажа интерес и грижа за нивното студентско секојдневие и наставната програма по која што го надоградуваат своето знаeње, и изразија поддршка и за идни средби од овој вид. Тие исто така изразија благодарност до претседателот Иванов за доделувањето Орден за заслуги на УЈИЕ, по повод 10-годишнината од основањето на Универзитетот.

Доколку се почитува меѓународното право и превземните обврски, можно е Македонија да постигне напредок на престојниот совет на ЕУ во јуни, изјави денеска во Вилнус македонскиот претседател д-р Ѓорге Иванов, по средбата со шефот на литванската држава, г-а Далиа Грубаускаите.

„Оваа подрршка од балтичките држави за нас е суштествена, бидејќи се повикуваат на позитивен пример кој е веќе применет во проширувањето. Така што доколку се почитуваат преземените обврски меѓу нас, доколку се почитуваат позитивните примери и правната рамка, можен е почеток на претпристапните преговори. Ние се надеваме дека е можно да се најде решение но останува да видеме како ќе реаграат другите членки на Унијата,“ истакна претседателот Иванов во однос на прашањето дали има реални шанси до европскиот совет во јуни да се излобира поддршка и Македонија да добие датум за преговори.

Трите балтички земји, Литванија, Летонија и Естонија со заедничка изјава побраа од данското претседателство Македонија да се најде на агедната во јуни и на земјата да и се одреди датум за почеток на преговори за членство. Сепак, спорот со името останува клучна бариера во македонските интеграцаии. Литванскиот претседател оцени дека компромис може да изнајдат единствено Македонија и Грција, но доколку и двете страни имаат волја да се реши прашањето. Притоа потенцираше дека без решение за името, политички е невозможно членството на Македонија во ЕУ.

„Секаде во Европа, односите и понатаму се многу чуствителни, без разлика дали во вашиот, или во нашиот случај. Но сакам да ви кажам, никој освен вие лично не може да најде компромис и решение со вашиот сосед. Никој во ваше име нема да го живее вашиот живот и да го открие решението. Во Европа сите земји живеат на основа на наоѓање компромис во односите. И двете страни треба да пристапат кон компромис, но и двете земји треба да имаат волја да постигнат компромис и волја да се реши прашањето. Ако нема волја за решавање на било кое прашање, ќе нема ниту решение. Никого не можам конкретно да го советувам, како да постапи конкретно, тоа е во рацете на вашата и на грчката влада, како вие во иднина ќе живеете заедно. Но, за да се живее во ЕУ треба да се најде компромисно решение со Грција. Без такво решение, политички, практично ќе биде невозможно да се размислува за членство,“ оцени претседателката на Литванија Далиа Грубаускаите, нагласувајќи дека и Литванија била во слична ситуација и дека нивните соседи не секогаш имале разбирање.

По летонскиот претседател Берзинс, денеска и првиот човек на литванската држава изрази отворена поддршка за македонските интеграции.

„Литванија е поддржувач на Македонија и македонските подготовки за пристапување кон ЕУ и НАТО. Литванија ја подржува Македонија во приближувањето кон овие две институции. Обучуваме македонски државни служнбенци и се обидуваме да бидеме од корист на патот кон ЕУ. Имаме многу работи кои може да ги споделиме со вас и има потреба да го направиме тоа,“ истакна Грубаускаите.

Претседателот Иванов се заблагодари за досегашната помош и принципиелната поддршка од Литванија на планот на евроинтегрцаиите, изрази надеж дека односите меѓу двете земји ќе се продлабочат и во други области, истакнувајки дека Балтикот е позитивен пример и очекува успехот на овој регион да го доживее и Балканот.

Двајцата претседатели се навратија и на кошкаркарскиот успех кој токму во Вилнус го доживеа македонската репрезентација, што беше дополнителен повод и причина Литванија подобро да ја запознае Македонија. Иванов и Грубаускаите изразија очекување односите меѓу двете земји во полето на спортот да продолжат да се унапредуваат.

Прашани за коментар дали ќе присуствуваат на Самитот на шефови на држави и влади на земјите од Централна и ЈИ Европа кој ќе се оддржи во Јалта, имајќи предвид дека еден дел од ЕУ претседателите не го прифатија учеството поради тензиите во Украина, претседателот Иванов изјави дека ја добиле поканата и ја профатиле, но дека Македонија внимателно ја следи состојбата и ќе постапи согласно сопствените интереси. Претседателката на Литванија, пак одговори дека тие однапред се согласиле за учество, притоа посочувајки дека Украина сепак треба да се однесува согласно демократските начела и да ги почитува човековите права, бидејќи земјата ќе напредува во интеграциите само доколку има поддршка од другите земји.

Во рамки на посетата на македонската делегација на Литванија, замениците министри за култура на двете земји, потпишаа билатерален договор за соработка меѓу двете влади во областа на културата, како чекор кон продлабочување на односите меѓу двете земји.

Со денешната средба со литванскиот претседател, претседателот Иванов ја заврши балтичката турнеја. Засилентите дипломатски активности на македонскиот државен врв имаат цел засилено лобирање во пресрет на самитот на НАТО во Чикаго и претстојниот јунски совет на ЕУ.

 

Преговорите околу билатералниот спор за името и евроинтеграциите на Република Македонија треба да се одвиваат како два паралелни процеси, оценува парламентот на Република Литванија. По денешната средба со македонскиот претседател Ѓорге Иванов, кој е во работна посета на Литванија, потпретседателот на литванското собрание и Претседавач со комитетот за европски прашања, Чесловас Станкевичиус, изјави дека спорот со името не смее да го попречува евроинтеграцискиот процес на Македонија, туку преговорите под покровителство на ООН  и претпристапните преговори за членство на Македонија во ЕУ,  да  се одвиваат паралелно.

Овој став во форма на заедничка изјава на Претседавачите со Комитетите за европски прашања на Литванија, Латвија и Естонија, е доставен до нивниот дански колега, Ева Кјер Хансен, а потоа и на состанокот на комитетите за европски прашања на националните парламенти на земјите членки на ЕУ (COSAC), кој се одржа во Копенхаген.

Трите балтички земји во заедничкото писмо го повикуваат данското претседателство  на следниот Совет на Европската Унија, во јуни, да го постави на агендата прашањето за почеток на претпристапните преговори со Македонија, како и да се побара позитивна одлука од Советот.

„Заедно со другите земји, пред сè со двете останати балтички држави, ја изразивме нашата поддршка за почеток на претпристапните преговори со Македонија. Неодамна потпишавме посебна изјава, сите балтички држави, и ја доставивме  на конференцијата на COSAC во Копенхаген.  Силно го поддржуваме членството на Македонија во ЕУ, и од секој аспект сметаме дека прашањето за името треба да се решава паралелно, без да го попречува процесот на интеграции,“ изјави по средбата со Иванов, потпретседателот на литванското собрание, Чесловас Станкевичиус.

Во заедничката изјава, балтичките земји потенцираат  дека билатералниот спор треба да се реши во рамки на постојните релевантни договори.

Веруваме дека постојните разлики меѓу страните околу името на земјата кандидат, не треба да ги попречуваат, ниту да влијаат на почетокот на претпристапните преговори со ЕУ, и да се решат со одвоени преговори, со добра волја согласно  резолуцијата 817 (1993) на ООН, како и Времената Спогодба од 13 септември 1995. Секое заеднички прифатливо решение за прашањето за името, под покровителство на ООН, треба да биде поддржано и прифатено, стои во писмото.

Во заедничкиот заклучок се истакнува  дека  институциите на ЕУ во неколку наврати го поздравиле напредокот на Македонија во клучните реформски области и дека земјата ги исполнува превземените обврски од Договорот за асоцијација и стабилизација.

Воедно потписниците ја подвлекуваат препораката од Европската Комисија за почеток на преговори со Македонија, како и заклучокот на Советот од 5 ти декември 2011, во кој стои дека Советот е подготвен да се наврати на ова прашање во текот на следното претседателство.

На средбата, македонскиот претседател Иванов и потпретседателот на литванското собрание Станкевичиус, изразија задоволство од отпочната соработка на параламентарно ниво и интерес за јакнење на политичкиот дијалог и соработка во сите сфери од заемен интерес. Литванија, меѓу другото изрази подготвеност за пренесување на нивното искуство и експертиза.

Иванов денеска во Вилнус се сретна и со министерот за надворешни работи на Литванија Аудрониус Ажубалис и со претседателот на литванското собрание, Ирена Дегутиен. Прашањето за името, напорите за деблокада на интеграциите, пресудата на МСП, биле дел од темите на разговор, а претседателот Иванов изрази благодарност за досегашната поддршка.

Со утрешната средба со претседателот на Република Литванија, Далија Грубаускаите, претседателот Иванов ја заокружува балтичката турнеја. Во рамки на посетата, замениците министри за култура на Македонија и Литванија ќе потпишат и билатерален договор за соработка меѓу двете влади во полето на културата.

Засилените дипломатски активности на македонскиот државен врв имаат за цел лобирање поддршка за Македонија во пресрет на Самитот на НАТО во Чикаго и претстојниот европски совет во Брисел.

Латвија е пријателска земја која се труди да помогне во македонските европски и евроатлантски интегрaции, бидејќи има чувство и разбирање за потребите на нашиот регион. Ова е генералниот заклучок на претседателот Иванов по дводневната официјална посета на Латвија.

„Латвија и Литванија се земји од кои можеме многу да научиме, од аспект на нивното искуство во евро и евроатлантските интеграции, но и од тоа како се снаоѓаат во овој период на услови на глобална економска криза. Онаа очекувана поддршка од нив веќе ни е укажана и имаме можност да престојуваме во пријателски земји кои сакаат да помогнат, бидејки тие ги чуствуваат потребите во нивниот регион, но и можноста да помогнат на нашиот регион. Значи станува збор за регионална соработка, размена на искуство на регионален план, но и поддршка и помош во сите наши заложби да бидеме дел од европскиото семејство”, истакна претседателот Иванов на крајот од посетата на Латвија, додавајќи дека Македонија по подолг период отсуство, го обновува политичкиот дијалог на највиско ниво кој го отпочна претседателот Борис Трајковски пред 12 години.

Поддршката за македонското членство во НАТО вчера експлицитно ја потврди првиот човек на латвиската држава, претседателот Берзинс, потенцирајки дека меѓудругото, Латвија го става на располагање и сето искуство во доменот на евроинтегрцаиите.

После подолг период стагнација во билатералните односи меѓу Латвија и Македонија, посетата на македонскиот претседател отвора можност за почеток на интензивна владина соработка и збогатување на трговската размена меѓу двете земји.

Претседателот Иванов денеска оствари средба и со претседателот на Собранието на Република Латвија, Солвита Аболтина, на која беа потврдени заложбите на двете страни за натамошно проширување на меѓупарламентарната соработка.

Покрај интензивирање на економската соработка, која засега е на симболично ниво, Латвија и Македонија заеднички се заложија за проширување на соработката во сферите на образованието, културата, здравството. По вчерашното потпишување на договорот за меѓународен патен сообраќај, денеска македонската страна иницираше потпишување на меѓудржавен договор и во сферата на културата. За ова подетално делегациите разговараа на работниот ручек кој го приреди латвискиот министер за култура, Жанета Јаунземе-Гренде.

Од Латвија, Иванов заминува во работна посета на Литванија, со што ја заокружува неговата балтичка турнеја, чија главна цел е засилено лобирање во пресрет на претстојниот НАТО самит во Чикаго.

 

Латвија ќе го поддржи македонското членство во НАТО на престојаниот Самит во Чикаго, и целосно го става на располагање своето искуство за евроинтеграциониот пат на Република Македонија. Ова на денешната заедничка прес-конференција во Рига, го истакна претседателот на Република Летонија Андрис Берзинс, по средбата со  шефот на македонската држава д-р Ѓорге Иванов, кој е во прва официјална посета на оваа балтичка земја.

„Латвија е подготвена да го поддржи приклучувањето на Македонија во НАТО поради тоа што нејзиниот придонес, особено како дел од меѓународните мировни сили, е огромен и јас лично го истакнав ова за време на мојата посета на Авганистан во една од болниците, каде се сретнав со медицински персонал од Македонија. Тие играат значајна улога во Авганистан и во процесите коишто се одвиваат таму од 2002 година,“ истакна шефот на латвиската држава, одговарајќи на новинарското прашање - дали Латвија е подготвена да го постави прашањето за Македонија на Самитот во Чикаго, имајќи ја предвид пресудата од Меѓународниот суд на правдата, која е во корист на Македонија.

На средбата двајцата претседатели разговараа за продлабочување и унапредување на билатералните односи, за европските и евроатланските интеграции на Македонија, како и за наметнатиот спор од Република Грција за уставното име на Македонија.

„Разговаравме за тоа како за една пречка за нашето интегрирање и во НАТО и во ЕУ. Очекуваме поддршка и помош од секој наш пријател на претстојниот Самит во поглед на тоа, ако се отвори прашањето за проширувањето или зачленувањето на Македонија.  Се надевам дека оваа посета ќе биде прилог кон добрите билатерални односи и дека нашите влади ќе почнат интензивно да соработуваат, ќе ја затвориме правната рамка и ќе се потпишат потребните спогодби за да можат нашите граѓани, бизнисмени, нашите студенти, професори, да најдат интерес за взаемна соработка, сè со цел нашите земји да напредуваат и да го користат потенцијалот кој го поседуваат,“ истакна претседателот Иванов заблагодарувајќи се за досегашната поддршката од страна на Латвија.

На прашање од латвиски новинар дали има напредок во решавање на спорот со името, претседателот Иванов истакна дека наспроти иницијативите од македонската страна,  од Грција нема оптимистички најави дека е можно брзо решение на спорот.

„Има многу иницијативи од наша страна, бидејќи ние сме засегнати. За жал, од другата страна немаме некои оптимистички најави дека може да се дојде до решение. Преставникот од ОН, медијаторот Нимиц, ги посети нашите две земји и иницираше средби на највисоко ниво. Но, поради актуелната ситуација во Грција и претстојните избори не очекуваме дека ќе  добиеме некој позитивен и потврден  одговор,“ посочи претседателот Иванов.

Латвискиот претседател Берзинс оцени дека Македонија, од независноста до денес, има стекнато доволно искуство и капацитет да ги отпочне преговорите за членство во Унијата.

„Што се однесува до нас, ние би биле навистина среќни доколку можеме да ви помогнеме. Нашето искуство може да биде многу корисно за вас, за да ги избегнете грешките кои ние ги направивме,“ нагласи претседателот Берзинс, истакнувајќи ја сличноста меѓу двете земји.

Во фокусот на разговорите на двајцата претседатели беше и економата соработка, пред сè, можноста за нејзино продлабочување. Претседателите се согласија дека од заеднички интерес за двете држави е изнаоѓање нови можности за економска соработка, преку размена  на искуство, приближување на компаниите и заеднички инвестиции.

„За жал, досегашната економска соработка меѓу двете земји е на симболично ниво. Затоа е потребно да се остави простор на бизнисмените да дадат придонес во зголемување на трговската соработка, а производите од двете земји да  се најдат на нашите пазари,“ посочи претседателот Иванов додавајќи дека, меѓу другото, со неговиот латвиски колега разговарале и за соработка во  сферата на културата и образованието.

На првата официјална посета на Република Латвија, претседателот Иванов беше пречекан со највисоки државни и воени почести, а неговиот дочек во Палатата Рига латвиската национална телевизија го пренесуваше во живо.

Денеска шефот на македонска држава оствари работен ручек со латвискиот премиер Валдис Домбровскис, кој изрази целосна подготвеност за интензивирање на соработка со македонската Влада на сите нивоа, вклучувајќи ја соработката во економијата,  образованието, културата, здравството и на полето на правдата. Премиерот Домбровскис изрази  подготвеност и за размена на латвиските искуства  во однос на пристапните преговори за членство во ЕУ и користењето на европските фондови.

Претседателот Иванов побара принципиелната поддршка од  Латвија за членството на Македонија во НАТО и ЕУ и натаму да продолжи и да се интензивира со цел деблокада на македонските евроатлантски интеграции во претстојниот значаен период. На средбата стана збор и за  билатералниот спор со Грција во однос на уставното име на Република Македонија,  како и за нашите очекувања од НАТО Самитот и од Европскиот совет во јуни.

Претседателот Иванов и премиерот Домбровскис, исто така изразија заемно задоволство што по подолг период, повторно се обновува политичката и економската соработка меѓу двете земји.

Во делегацијата, предводена од претседателот Иванов, е и министерот за транспорт и врски Миле Јанакиески, кој денеска заедно со неговиот латвиски колега потпишаа Договор за меѓународен патен сообраќај со кој се воведува либерализација на билатералниот и транзитниот превоз на стоки меѓу двете земји и тој ќе се одвива без транспортни дозволи.

Претседателот Иванов утре во Рига ќе се сретне и со претседателот на Собранието на Република Латвија, по заминува во работна посета на Литванија, како дел од неговата балтичка турнеја.