На маргините на Самитот на НАТО во Чикаго претседателот Иванов се сретна и со Камерон, Оланд, Алиев, Орбан, Клаус, Басеску, Грубаускаите, Плевнелиев и Бериша

Претседателот на Република Македонија д-р Ѓорге Иванов денеска побара од американскиот претседател Барак Обама натамошна поддршка за деблокада на интеграциите во НАТО и помош за надминување на прашањето за името.

Во краткиот разговор со Обама на маргините на НАТО Самитот во Чикаго, претседателот Иванов со апел до американскиот претседател да го искористи своето влијание за Грција да почне одговорно и конструктивно да учествува во процесот и да се придржува до рамката во која се водат разговорите, што е и предуслов за заемно прифатливо решение.

Македонскиот претседател денеска оствари средби и со претседателите на Бугарија, Росен Плевнелиев, на Чешка Вацлав Клаус, на Романија Трајан Басеску, и на Литванија, Далиа Грубаискаите, како и со премиерите на Велика Британија и на Албанија, Дејвид Камерон и Сали Бериша.

На средбата со Камерон се разговараше за состојбата во која се наоѓаат разговорите за името со Грција, при што претседателот Иванов истакна дека Грција ниту разговара, ниту има волја да разговара веќе подолго време, а кога тоа го прави излегува од рамката. - „Грција не е подготвена ниту да ја почитува Времената спогодба, ниту пресудата,“ потенцира претседателот Иванов.

Британскиот премиер Камерон истакнал дека неговата земја ќе направи сé што е можно за да помогне.

На маргините на Самитот на НАТО во Чикаго, претседателот Ѓорге Иванов имаше кратки средби и со претседателите на Франција, Франсоа Оланд, и на Азербејџан, Илхан Алиев, како и со унгарскиот премиер Виктор Орбан.

Претседателот Иванов имаше можност на францускиот претседател Оланд лично да му го честита изборот, изразувајќи надеж дека во наредниот период билатералните односи и соработката меѓу двете земји ќе имаат натамошен позитивен развој.

На средбата со унгарскиот премиер Орбан, претседателот Иванов се заблагодари за поддршката искажана од Унгарија на вчерашните состаноци во рамки на Самитот. Премиерот Орбан изрази уверување дека Македонија и понатаму може да смета на поддршката од Унгарија за членството во НАТО и во ЕУ.

Заемна подготвеност за унапредување на билатералните односи и соработка беше изразена и на средбата на Иванов со претседателот на Азербејџан Илхан Алиев, како и задоволство од претстојната посета и учество на македонскиот претседател на форумот Кран Монтана во Баку.

Со благослов од митрополитот американско-канадски Методиј, денеска во црквата „Св. Кирил и Методиј“ во Хенсдејл, Чикаго, САД, во присуство на претседателот на Република Македонија д-р Ѓорге Иванов и министерот за одбрана Фатмир Бесими, беше отворено училиште во кое младите ќе можат да го изучуваат македонскиот јазик, културата, традициите и веронауката.

Поздравувајќи го овој исклучително значаен чекор, претседателот Иванов нагласи дека отворањето на новите две училници во пресрет на патрониот празник на македонските просветители Кирил и Методиј, меѓу другото, значи дека идните генерации ќе можат да учат за сето она што нè прави многу поразлични, но и многу блиски и сплотени со другите.

„Младите треба да знаат дека потекнуваат од една земја Македонија. Бидете горди и достојни претставници на сите поколенија кои ни оставиле завет да бидеме Македонци,“ им порача претседателот Иванов на присутните од македонската дијаспора денеска во црквата „Св. Кирил и Методиј“ во Хенсдејл, Чикаго.

Шефот на државата, во рамките на својот престој во Чикаго оствари средба и со претставници од Албанско - Американсата заедница во Чикаго (ААЗ). Претставниците на ААЗ искажаа благодарност за укажаната можност за средба, како исклучителна прилика за средба со највисок претставник од Република Македонија.

Инаку, ова е нивна прва средба со претседател на Република Македонија. ААЗ основана во 1903 година, вклучува државјани на Република Македонија и САД со албанско потекло, активисти, кои имаат за цел да помагаат за подобрување на состојбите во Македонија на политички и финансиски план, за сите македонски граѓани.

ААЗ силно ги поддржуваат стратешките цели и реформските процеси во македонското општество, каде претседателот Иванов би ја имал главната улога и би ги амортизирал  грубите политики. Претседателот, сметаат од ААЗ, треба да продолжи да ги вложува своите напори за негување на македонскиот модел на мултиетничка демократија.

Претседателот Иванов нагласи дека Македонија е горда на иселениците и благодарна за помошта и поддршката која ја даваат, дека земјава е уникатен пример на функционална мултиетничка демократија каде различностите се почитуваат. Тоа е најголемата сила на Република Македонија и дека тој модел е стабилен, истакна Претседателот.

Тој денес ја посети и црквата „Свети Кирил и Методиј“, каде имаше неколку часовна средба со македонската дијаспора.

Пред почетокот на Самитот на Алијансата, во Чикаго претседателот Иванов продолжува со лобирање и напори да обезбеди што е можно подобра позиција во комуникето за Република Македонија, зашто одлука на самит може да биде променета само со одлука на друг самит. Донесеното комунике во Чикаго ќе биде во сила до следниот самит на НАТО што ќе се одржи по две години. Претседателот Иванов е во постојан контакт со пријателските земји чии претставници учествуваат во драфтирање на документот.

На маргините на Самитот, македонскиот претседател оствари билатерални средби со претседателот на Република Турција, Абдфула Ѓул и со словенечкиот премиер, Јанез Јанша. На средбите беа разменети мислења и информации за НАТО самитот и за начините како пресудата од Хаг да се одрази на прашањето за Република Македонија и во финалните заклучоци. Турскиот претседател Ѓул вети дека, како и досега, така и за време на Самитот, но и потоа, Македонија може да смета на безрезервна поддршка, како и дека Турција ќе направи сé што е во нејзина моќ да и помогне на Македонија.

Словенечкиот премиер Јанша нагласи дека Словенија апсолутно ја разбира позицијата и е свесна за сите аргументи на Република Македонија, поради што и претходно и сега Македонија ужива целосна поддршка. Јанша потврди дека Македонија може да смета на поддршката на Словенија и на овој Самит и дека во рамките на нивните можности ќе се залагаат за правилно вреднување на македонските очекувања и аргументи.

Сплотени со една желба - европска и евроатлантска Македонија, успешно ги преживеавме сите предизвици со кои се соочи нашата татковина во минатото и сплотени ќе го надминеме и сегашниот предизвик - е пораката што синоќа ја упати претседателот на Република Макеоднија д-р Ѓорге Иванов, на гала вечерата приредена во негова чест од страна на Обединетата македонска дијаспора, на маргините на Самитот на НАТО што денеска и утре ќе се одржува во Чикаго, САД.

Претседателот Иванов истакна дека Република Македонија ги исполни критериумите и со право очекува да го добие заслуженото членство во НАТО. Досега, укажа тој, бевме спречени да ја оствариме врвната стратегиска цел поради една ирационална причина.

„Грчките блокади нема да нè дефокусираат од партнерството со НАТО и од визијата за побезбеден и посигурен свет за нашите деца. Од Македонија да создадеме земја отворена за странски инвестиции, земја на напредни технологии, претприемништво и иновации. Земја во која економскиот развој и успехот се темелат врз лична одговорност, професионалност и посветеност во работата. Сакам да знаете дека вие сте причината поради која не се откажуваме. Вашиот успех, ентузијазам и оптимизам за иднината на Македонија е мотивирачки и обврзувачки. И покрај сите препреки, и покрај сите предизвици, ќе продолжиме уште поохрабрени да го бараме нашето заслужено место во европското и евроатлантското семејство на народи, заедно со вас,“ истакна претседателот на Република Македонија.

Тој се осврна и на пресудата на Меѓународниот суд за правдата, која, како што потенцира, бара нов пристап од сите земји-членки на НАТО, пристап кој значи почитување на пресудата и на меѓународното право. Пристап кој подразбира дека земјите-членки на НАТО треба да ги преиспитаат своите позиции во однос на членството на Македонија во НАТО.

Според претседателот Иванов, постојат два начина да ја реализираме целта. Првиот е Грција одговорно да ја почитува Времената спогодба и пресудата, онака како што се очекува од една земја-членка на НАТО и на Европската унија. Вториот начин е да дојдеме до заемно прифатливо решение за спорот кој ние не го сакавме, спор кој ни беше наметнат.

„Без разлика на исходот, остануваме посветени на остварувањето на нашите стратегиски цели – членство во НАТО и во ЕУ, а дотогаш, продолжуваме со сите сили да ја реформираме Република Македонија, да ги спроведуваме стандардите, вредностите и критериумите, бидејќи тие ни се поважни од членска карта за клубовите во кои сакаме да припаѓаме,“ нагласи Претседателот пред големиот број иселеници во Чикаго. Тој изрази уверување дека целите ќе се реализираат на начин на кој идентитетот, јазикот, името, традицијата и вредностите нема да бидат засегнати.

„Успехот на Република Македонија во голема мера се должи и на посветеноста на успешните иселеници ширум светот,“ им порача македонскиот претседател на претставниците на дијаспората, кои на Гала вечерата во негова чест му доделија и високо признание за целиот негов придонес во развојот и напредокот на Република Македонија.

Македонскиот претседател од Чикаго и упати порака на Грција дека Македонија сака да биде повеќе од сосед, да биде партнер, сојузник и пријател, за да можеме заедно да ја градиме сегашноста и иднината.

„Република Македонија е балканска, европска и светска реалност. Реалност која не може да се негира, туку само да се прифати. Таа реалност постоела, постои и ќе постои. За прашањата како што се нашите врвни вредности – идентитетот, јазикот, културата и уставот, воопшто, не сакаме и нема потреба да разговараме. Никој на овој свет нема право овие врвни вредности да ги оспори на друг. Тоа се вредности што може само да се констатираат и почитуваат,“ нагласи претседателот Иванов, додавајќи дека никогаш нема да прифатиме уцени ниту да потклекнеме пред ултиматуми.

„За нас прашањето никогаш не било дали Македонија ќе стане членка на НАТО, туку кога. И, што поскоро, тоа подобро. А до тогаш ние самите, сплотени ќе ја создаваме нашата успешна европска и евроатлантска иднина. Ќе ги реализираме целите. Ќе имаме членство и во Европската унија и во НАТО. И таму ќе бидеме тоа што сме. Друга опција не постои,“ посочи претседателот Иванов.

ОМД им додели и ордени „Гоце Делчев“ на шефот на дипломатијата на Турција, Ахмет Давутоглу и на премиерот на Словенија, Јанез Јанша.

Турскиот министер за надворешни работи истакна дека го прима ова признание во името на 75 милиони Турци - пријатели на Македонија. Давитоглу потенцира дека каде и да е во светот Турција ќе ги брани интересите на Македонија и правото на избор на македонскиот народ. Тој го повтори ставот на Турција дека Република Македонија треба да биде членка на Алијансата под нејзиното уставно име. Министерот Давутоглу воедно укажа дека што и да се случи на меѓународната сцена, Турција, во наредниот век, во наредниот милениум, ќе го користи уставното име на Македонија, а нашето пријателство, истакна ќе продолжи засекогаш.

„Не само што сум голем и искрен пријател на Македонија, туку и се чувствувам Македонец,“ рече меѓудругото Давутоглу, пред бројната дијаспора, што предизвика силни емоции кај присутните. Потенцирајќи го исклучително блиското пријателство со македонскиот претседател, шефот на турската диломатија посочи дека Иванов не само што е голем државник, туку е уште поголем интелект.

Во Чикаго во текот на денот, шефот на државата имаше средба со неговиот турски колега, Абдула Ѓул, на која беа разменети мислења и информации за НАТО самитот и за начините како пресудата од Хаг да се одрази на прашањето за Република Македонија и во финалните заклучоци. Претседателот Иванов ги истакна нашите аргументи и очекувања, а турскиот претседател Ѓул вети дека како и досега, така и за време на Самитот, но и потоа, може да смета на безрезервна поддршка и оти Турција ќе направи сé што е во нејзина моќ да и помогне на Македонија.

Шефот на државата денес се сретна и со словенечкиот премиер Јанез Јанша, кој нагласи дека Словенија апсолутно ја разбира позицијата и е свесна за сите аргументи на Република Македонија, поради што и претходно и сега Македонија ужива целосна поддршка. Јанша потврди дека Македонија може да смета на поддршката на Словенија и на овој Самит и дека во рамките на нивните можности ќе се залагаат за правилно вреднување на македонските очекувања и аргументи. а средбата беа разменети мислења и за евро-интегративните процеси на Македонија и за напорите и очекувањата за деблокда на интеграцијата во пресрет на јунскиот Совет на ЕУ.

Претседателот на Република Македонија д-р Ѓорге Иванов, денеска оствари средба со Ханс Ван Баален, претседател на асоцијацијата на либерални партии на светско ниво и европратеник.

Претседателот Иванов на средбата истакна дека во овој клучен период, пред состанокот на Европскиот совет во јуни и НАТО Самитот во Чикаго, поддршката од земјите членки на ЕУ и НАТО, пријатели на Македонија, е од исклучително значење.  Напорите на македонската дипломатија во изминатиот период, беа насочени кон промовирање и валоризирање на новонастанатата реалност по хашката пресуда, а во насока на конечно деблокирање на македонските евро-интегративни процеси.

Република Македонија, нагласи претседателот, одамна заслужи покана за членство во НАТО и датум за отпочнување на преговорите со ЕУ. Фактот што земјата е кандидат од 2005 година со три последователни препораки од Европската комисија за отпочнување на преговорите, е најдобар показател за успешно реализираните реформски процеси, посочи Претседателот и додаде дека неодамнешното отпочнување на Пристапниот дијалог на високо ниво е мост кон, но не и замена, за очекуваниот датум за отпочнување преговори.

Двајцата соговорници се согласија дека позитивните примери на паралелно движење во интеграцијата и надминување на билатералните преговори, како што беше случајот меѓу Хрватска и Словенија, ја потврдија функционалноста на таа формула.

Холандскиот либерал Ван Баален изрази поддршка за стратешките приоритети на Република Македонија, членство во ЕУ и НАТО, нагласувајќи ја воедно неговата цврста посветеност на политиката на проширување.

Заеднички заклучок од средбата беше дека Република Македониа и Кралството Холандија развиваат добри билатерални односи и соработка, особено во сферата на турзимот.

Претседателот на Република Македонија д-р Ѓорге Иванов денеска го посети Министерството за надворешни работи каде со ресорниот министер Никола Попоски разговараше за стратешките определби на Република Македонија во доменот на надворешната политика, сфери во кои споделуваат заеднички надлежности.

При посетата која традиционално се одржува еднаш годишно, претседателот Иванов беше информиран за состојбите во регионот и Европската унија, за претстојното преземање од страна на Македонија на претседавањето со Процесот за соработка во Југоисточна Европа што ќе се случи во јуни. На средбата со министерот за надворешни работи и политичките директори се разговараше и за прашања кои бараат особено внимание, вклучувајќи го и влијанието на економската криза која се случува на глобален план, но се чувствува и во регионот и во земјава, и се одразува на надворешната политика.

„Оваа соработка која ја остваруваме со МНР веќе дава видливи резултати и затоа искажав голема благодарност и на министерот и на Министерството што при сите надворешно-политички активности градиме заеднички ставови и се усогласуваме за оние прашања за кои како држава треба да имаме единствен став,“ истакна претседателот Иванов.

Запрашан дали ја разгледувале можноста за редефинирање на амбасадорскиот состав, шефот на државата изјави дека тоа е тековна активност со оглед на тоа што на некои амбасадори им истекува мандатот, а други се поставуваат за дипломатски претставници на земјата.

„Тоа е процедура која се одвива во текот на неколку месеци, се знае кога завршува мандатот на амбасадорите и кога почнува таа постапка. Како одговорна земја ние се однесуваме согласно меѓународните стандарди и принципи. Виенската конвенција за дипломатија забранува истакнување на било кое име пред да се предадат акредитивите. Така што сите имиња кои циркулираат во јавноста сеуште можете да ги сметате на ниво на шпекулации или можеби како лични најави. И јас лично и МНР секогаш настојуваме имињата да не се објавуваат се додека не се добие позитивен одговор од земјите каде се испраќаат амбасадорите,“ посочи Претседателот.

Во однос на актуелните случувања во земјата и најавените протести поврзани со случајот „Монструм“и петкратното убиство кај Смиљковци, претседателот Иванов нагласи дека протестот е демократско право, но за прашања кои се однесуваат на работата на судот не може да се искажува став низ таква форма.

„Потребно е судот да се остави да донесе непристрасни одлуки согласно законите,“ нагласи претседателот Иванов.

Тој оцени дека надлежните институции ги спроведуваат своите активности во рамки на своите надлежности, воедно упатувајќи апел протестите да се во граница на јавна пристојност.

„Има прашања за кои не може да се искажува таков револт и став, а тоа е работата на судот. Кога имаме едно грозоморно убиство треба да го оставиме судот да донесе одлука непристрасно, согласно законите, што е практика во секоја земја кога има таков чин. Затоа апелот е секој да го искаже својот став, меѓутоа прашања кои се од наш интерес, кога како држава и како кандидат и за ЕУ и за НАТО мора да покажеме сериозност и капацитет, и институционално да се справиме со ваквите проблеми,“ изјави претседателот Иванов, одговорајќи на новинарско прашање по денешната посета на Министерството за надворешни работи.

Претседателот на Република Македонија д-р Ѓорге Иванов, го посети селото Чалакли во валандовско, каде присуствуваше на свеченото отворање на традиционалниот фестивал на пролетни веселби Хид-Бах-Сент Фест.

Фестивалот, кој се одржува секоја година на почетокот на мај, е воспоставен во 1992 година и опфаќа бројни активности - фолклор, изложби на ракотворби и фотографии, концерти, театарски претстави, традиционално пеливанско борење и фудбалски турнир.

Оваа манифестација, како дел од традицијата на турското население, претставува прослава на пролетните празници, воедно промовирајќи ги турската култура и обичаи. Фестивалот го одбележува празникот Хидерлез кој го означува почетокот на новиот циклус во природата и нејзината обнова, и претставува славење на животот, од каде потекнува и мотото на фестивалот. На фестивалот Хид-Бах настапија повеќе уметнички друштва од Македонија, Турција, Бугарија, Романија и Грција.

Оддавајќи почит кон турската култура и обичаи, претседателот нагласи дека Република Македонија е татковина на мноштво култури кои со својата посебност и карактеристики придонесуваат кон разноликото културно наследство на земјата. Турското население, кое живее на овие простори со векови, е неодвоив дел од македонската традиција на соживот и почитување, придонесувајќи кон богатиот културниот колорит.