Обраќање на претседателот на Република Македонија д-р Ѓорге Иванов на четвртиот Глобален форум на Алијансата на цивилизациите на Обединетите нации во Доха, Катар:
 

Ваше Височество, шеик Хамад бин Калифа ал Тани,
Почитувани Екселенции,
Драги гости,

Дозволете ми најпрвин да се заблагодарам на нашиот љубезен домаќин, неговото Височество, шеикот Хамад бин Калифа ал Тани. Височество, високо ги цениме Вашата храброст и визионерство во пристапувањето кон унапредување на светот во кој живееме, a живееме во времиња на големи промени. Искрено Ви честитам за иницијативата да седнеме на заедничка маса, луѓе од различни земји, од различни религии, кои зборуваме различни јазици, но сите посветени да обезбедиме подобра иднина за нашите граѓани, држави, а со тоа за човештвото во целина. Воедно, ја поздравувам иницијативата и му честитам на претседателот Фишер кој ќе биде следниот домаќин на Самитот во рамките на Алијансата на цивилизациите во 2013 година.

Почитувани,

Денес повеќе од кога било, неопходно е да организираме средби на највисоко ниво, на кои ќе можеме да ги спознаеме вредностите на нашите култури, но и предизвиците со кои се соочуваат. Алијансата на цивилизациите, Дијалогот меѓу цивилизациите, се токму оние нешта кои предолго ни недостасуваа. Затоа, мојата земја, Република Македонија, свесна за својата уникатна реалност, подготвена e да ги сподели своите драгоцени искуства во овие области и е толку активно и посветено вклучена во овие иницијативи.

Со подобро меѓусебно запознавање полесно ќе увидиме дека принципите по кои се води секој човек се исти, независно од тоа од каде потекнува. Тоа се желбата за слобода, еднаквоста, почитувањето, достоинството. Верувам дека заедништвото на луѓето ќе надвладее.

Ниту една голема култура или цивилизација не се развила во изолација, туку низ постојана соработка, натпревар но, за жал, честопати и низ конфронтирање со други култури и цивилизации. Историјата исто така сведочи дека постојат две основни причини за опаѓањето и пропаста на културите и цивилизациите. Прво, пресекувањето на културните врски со другите цивилизации и, второ, исцрпувачките судири кои секогаш водат кон уништување, жртви и духовни рани на кои им е потребно долго време да зараснат. Причината за ваквиот судир е, секако, отсуството на дијалог, разбирање и заемно почитување. Наспроти тоа, соработката и прифаќањето на светот на различностите секојпат продуцирале трајни вредности и суштински знаења.

Нашите цивилизации со векови и милениуми се преклопувале и меѓусебно се збогатувале, благодарение на духовната енергија која струела низ повеќенасочните цивилизациски и културни коридори. Нашата цел е, овде и денес, да ја реафирмираме потребата од градење на нови блиски односи со другите религии и цивилизации.

Драги гости,

Пред нас е ново време кое бара нова парадигма. Како што геополитиката им отстапува место на геокултурата и геопрофитот, така, наместо судир, потребна ни е соработка меѓу цивилизациите. Услови за соработка меѓу цивилизациите постојат, само треба да се искористат. Тоа е алката која недостасува. Тоа е алката која културата ќе ја стави во функција на развојот. Тоа е алката од која сите повеќекратно ќе имаме корист. Но, до тоа нема да се дојде без акција, ангажман и посветеност. Напротив, испуштеното во минатото кога разни региони низ светот се стремеа кон сопствена консолидација, денес, треба со засилен интензитет да го надоместиме.

Верувам дека овој форум ќе ни овозможи да најдеме решенија на дел од овие суштински предизвици.

Ви благодарам.

Претседателот на Република Македонија д-р Ѓорге Иванов и Министерот за образование, Панче Кралев, на свечена церемноија ги доделија стипендиите „Борис Трајковски“ за вонредни постдипломски студии во рамки на Програмата за бизнис-администрација - МБА, за учебната година 2011/2012. Оваа програма за стипендирање, иницирана од покојниот претседател Борис Трајковски, на 20 талентирани македонски студенти ќе им овозможи да го продолжат своето високо образование на Сити Колеџот на Универзитетот Шефилд и да се здобијат со диплома за завршени постдипломски студии од оваа престижна институција.


Почитуван министер за образование на Република Македонија,  г. Панче Кралев,
Почитуван г. Џорџ Ефтатијадис, претставник на Универзитетот „Шефилд“,
Почитувани студенти, драги гости,

Добрата соработка, која ние во Македонија ја одржуваме со Сити колеџот при Универзитетот „Шефилд“ во Солун, продолжува да дава резултати. Драго ми е што денес можеме да испратиме нова група млади луѓе, кои од студиите во Грција ќе се вратат со нови знаења и вештини, применливи за нивно лично добро, за доброто на Македонија, и ќе ја надградат соработката меѓу нашите две земји. Македонија е свесна дека мора многу да работи за да го надомести пропуштеното во градењето  економија заснована на знаење. Квалитетни млади луѓе, кои имаат добро образование стекнато во реномирани образовни институции, се неопходни за економскиот развој и за напредокот на една држава. Ние сметаме дека најскапоцениот ресурс кој го имаме како држава се квалитетните луѓе, подготвени да се соочат со предизвиците на основање и водење бизнис, истражување на потребите на пазарот, правилно и економично распределување на трудот и ресурсите. Ова се вештините кои можете да ги стекнете благодарение на стипендиите за постдипломските студии на Сити колеџот. Сфатете ја оваа денешна можност, која Ви се нуди, како голема одговорност и обврска. Во целост да ја искористите дадената можност и да бидете успешни граѓани, за Ваше добро и за доброто на општеството во целина.

Почитувани студенти,

Сметајте дека за Вас, дополнителна обврска е тоа што стипендиите се доделуваат во чест на претседателот Борис Трајковски. Како претседател, Трајковски работеше и ја препознаваше потребата од градење на квалитетен образовен систем, кој ќе ни овозможи да се издигнеме над потребата од голо преживување, и ќе ја насочи нашата држава

кон просперитет, благосостојба и напредок. Претседателот Трајковски, воедно, во целост разбираше дека преку размена на студенти во образовните институции на Македонија и соседните држави, можеме засекогаш да ги разбиеме стереотипите и предрасудите, кои за жал сè уште знаат да доминираат во меѓусебните односи. Генерации на политичари, стопанственици, вработени професионалци, кои добро ги познаваат своите колеги од соседните држави, кои слободно соработуваат со соседството, се основа за градењето на еден нов Балкан. Во програмата во Солун учествуваат студенти од сите држави во регионот. Тоа е извонредна можност за градење на идната елита на нашиот регион, за градење на мостови на соработка засновани врз знаење, врз труд и искуство, и особено, засновани врз пријателство и соработка со соседите. Ние копнееме кон тоа, нашиот регион да биде отворен од вештачките стеги и наметнатите проблеми. Да отвориме простор во кој успешните ќе можат да просперираат и напредуваат, водејќи ги своите општества напред.

Затоа, драги студенти, уште еднаш Ви честитам, и Ви посакувам многу успех во студиите, и понатаму, во примена на наученото.

Благодарам.
 

На официјалното отворање на Неделата на претприемништво претседателот на Република Македонија д-р Ѓорге Иванов им се обрати на присутните преку видео-порака, нагласувајќи ја потребата државата да создаде неопходни услови за развој на претприемништвото, квалитетно и применливо образование кое ќе го поттикне претприемачкиот дух и ќе ги зајакне претприемачките вештини кај младите:   

Драги пријатели,

Како Претседател на Република Македонија навистина сум горд што претставувам држава во која се почитуваат принципите кои овозможуваат развој на економијата и искористување на потенцијалот на поединците. Тука пред се мислам на почитувањето на правото секој да ужива во плодовите на својот труд; почитување на правото на приватна сопственост; одржување на рамка на безбедност во која секој може слободно да работи и да напредува. Овие вредности кои се основа на просперитетот на секоја нација се длабоко вкоренети и во македонските граѓани. Но, почитувањето на овие принципи не е секогаш лесно. И независна и демократска Македонија мораше да помине низ долг и тежок реформски процес за да изгради модерна правна рамка во областа на економијата. Но, ние сме свесни дека приватната економска иницијатива е главниот двигател на развојот. Дека таа има моќ да издигне поединци и семејства, градови и цели држави од состојбата на сиромаштија.

Претприемништвото не може да опстои без демократија. Единствено политичко уредување кое овозможува брз и стабилен економски развој е уредување кое ги почитува индивидуалните човекови права и слободи, како во политичката така и во економската сфера. Затоа, поддршката на претприемништвото има своја хумана мисија. Општество чии граѓани живеат од својот труд, чии граѓани, инвестираат, вработуваат луѓе, работат за унапредувањето на својата положба - такво општество е стабилно, демократско и напредно. Такво општество им нуди иднина на своите граѓани, а и самото ќе има иднина и просперитет.

Деновиве сме соочени со сериозна криза, со тешки предизвици за економскиот поредок. Доколку нешто добро произлезе од состојбата во која се наоѓа голем дел од најразвиените земји во светот, тоа ќе биде едно потсетување на вредностите и принципите кои стојат во срцевината на напредокот. Мораме да се присетиме дека економските слободи, слободниот и отворен пазар, почитувањето на трудот и работливоста, не се дадени еднаш за секогаш, туку дека тоа се вредности кои мора да се чуваат. Со независни контролни институции, со здраворазумски економски политики, но и со иницијативи како оваа кои придонесуваат кон промовирањето на културата на претприемништвото кај младите.

Од наша страна, како држави, мораме да ги создадеме неопходните услови за развој на претприемништвото. Солидна инфраструктура, квалитетно и применливо образование, здрава правна рамка и предвидливост во постапувањето на регулаторните институции. Мораме да бидеме отворени кон повиците за реформи во државните институции, со цел тие да бидат посветени на потребите на граѓаните, и на промоција на нивните деловни проекти и планови. Македонија помина голем пат и се соочи со важни реформски зафати, во модернизирање и подобрување на работата на судството, во намалување на регулативите во јавната администрација и во легализацијата на незаконски изградените објекти. Ние се гордееме со модерен даночен систем кој се покажа успешен во обезбедување на средства за легитимните потреби на државните институции, без да го задуши стопанството. Го модернизираме државното образование со цел нашите најмлади да ги вооружиме со вештини и знаења кои ќе им бидат од полза во животот. Нашите реформи не минуваат незабележани, и Македонија бележи значителен економски развој и успева да одолее на предизвиците на економската криза. Но, предизвиците пред нас се значителни, а загубеното време мора да се надомести. Затоа, ја поздравувам иницијативата да се одбележи недела на претприемништвото, со надеж дека секој ден ќе биде посветен на ослободувањето на човечката енергија и иницијатива.

Претседателот на Република Македонија, д-р Ѓорге Иванов денес се обрати на стручниот собир „Едукација, превенција и етика во сообраќајот“, што се одржа под негово покровителство, а во организација на Републичкиот совет за безбедноста на сообраќајот на патиштата. Со овој настан започнува јавната кампања за остварување на Националната стратегија за нула деца - жртви во сообраќајот.

Почитувани учесници на овој собир,
Драги гости,
Дами и господа,


Безбедноста во сообраќајот е прашање од огромна важност за секого и неопходност којашто постојано треба да се унапредува и актуелизира. Причината, за нашето присуство денеска овде, е да ги утврдиме начините како да обезбедиме сигурност и безбедност во сообраќајот за оние кои се изложени на најголеми ризици – децата. Со други зборови – како поефикасно да ги заштитиме од секојдневните закани во урбаниот сообраќаен метеж.

Секој човечки живот е скапоцен. Секој изгубен млад живот е трагедија, не само за семејствата, туку и за целото општество. За да ги избегнеме несаканите трагедии, мора да ги вложиме сите наши напори во подучување и едукација на децата за соодветно безбедно однесување во сообраќајот од најрана возраст. Таа едукација започнува, пред сè, во семејството и ги вклучува родителите, но не застанува тука.

Денешниов собир, во организација на Републичкиот совет за безбедноста на сообраќајот на патиштата, е обид да се нагласи значењето на поединецот – како учесник во сообраќајот, како возач на моторни возила, како пешак, мотоциклист, велосипедист.  Секој активен учесник во сообраќајот носи одговорност за својата, но и за безбедноста на останатите. Подигнувањето на општата јавна свест за низата одговорности на секој поединец во сообраќајот, е врвна задача исправена пред сите нас, која бара вклучување на сите релевантни фактори – државните институции, професионалните и невладините организации, приватниот сектор, родителите, градинките, училиштата...

Почитувани,

Со донесувањето на Националната стратегија на Република Македонија за унапредување на безбедноста во сообраќајот 2009 – 2014 година, започна првиот координиран мултисекторски пристап кон намалување на бројот на сообраќајни незгоди и последиците од нив. Овој документ претставува солидна основа за активностите кои треба да бидат преземени од страна на државните органи и останатите институции, но и голем предизвик и сериозна задача. Главната цел зацртана во оваа стратегија е преполовување на бројот на жртви во сообраќајот, и најважно – комплетно елиминарање на бројот на деца-жртви во сообраќајни незгоди. Поставените цели се високи, но уште повисока е цената која ние како општество ќе ја платиме, доколку не ги ангажираме сите сили и капацитети да ја достигнеме таа цел.

Во 2010 година, 162 лица, од кои 6 деца, го загубија животот во сообраќајни незгоди. Од почетокот на имплементација на стратегијата, бројот на жртвите во сообраќајот покажува тенденција на опаѓање. Овој податок треба да претставува поттик за сите нас, да продолжиме засилено да дејствуваме во остварување на зацртаните цели – подобрена инфраструктура и сообраќајна сигнализација, зголемена јавна свест, подобрена едукација на децата и на младите, координирана и фокусирана акција за намалување на сообраќајните незгоди и загубените човечки животи.

Дами и господа,

Децата се нашето најголемо богатство, нашата инвестиција во иднината. А нашата најголема обврска денес е да ги подготвиме и оспособиме младите, правилно и безбедно да се однесуваат во сообраќајот како пешаци, велосипедисти, при детските игри надвор од домот и во близина на улиците.

Целта на денешниот собир е да се оформи и утврди таков систем за едукација на децата - почнувајќи од детските градинки, па преку основното и средното образование -  кој ќе ја подигне на повисоко ниво нивната свест за последиците од неодговорниот однос и непочитувањето на правилата во сообраќајот, како и за потребата од поголемо внимание и претпазливост. Во Македонија треба да растат генерации деца кои ќе бидат комплетно свесни за етиката во сообраќајот, но и за опасностите. Нивното идно однесување како возачи и учесници во сообраќајот, ќе зависи од цврстите навики кои ќе им ги овозможиме во раната возраст.

Паралелно со нашите напори да ги едуцираме младите за безбедноста во сообраќајот и ние како возачи мораме да ја оствариме нашата задача. Апелирам до сите возачи да бидат внимателни и да покажат трпение, зашто најмалите во суштина се помалку свесни за потенцијалните опасности на патот. Одговорното возење е првиот предуслов за намалување на сообраќајните незгоди и поштедувањето на човечките животи.

Почитувани,

Пред нас е декадата за безбедност во сообраќајот за периодот 2011 - 2020 година, прогласена од Генералното собрание на Обединетите нации. Во овој период во целиот свет, на национално и на глобално ниво, ќе бидат интензивирани напорите за намалување на растечкиот тренд на жртви и повреди во сообраќајни незгоди.

И во Република Македонија е време за акција!  Време е да пристапиме кон овие предизвици со сериозност и истрајност, да ги преземеме сите потребни чекори, да покренеме широка јавна кампања за зголемување на јавната свест, да го дадеме својот индивидуален придонес и во едуцирањето на децата, но и во нашето секојдневно однесување зад воланот. Апелирам до сите засегнати страни – родителите, учителите, наставниците, полицајците, новинарите, институциите и здруженијата, да се приклучат кон оваа иницијатива за нула деца-жртви во сообраќајот.

Време е и да ја зајакнеме институционалната рамка со подготовка на нова стратегија за безбедност во сообраќајот, за периодот до 2020 година, како што тоа го прават сите членки на ЕУ, во која уште поцврсто ќе се постават мерките и активностите за постигнување на високо поставените цели.

За крај, сакам да ја искажам мојата благодарност и безрезервната поддршка за напорите на Републичкиот совет за безбедноста на сообраќајот на патиштата, во остварување на зацртаните цели. Се надевам дека со денешнава средба ќе бидеме чекор поблиску до создавање функционален систем за едукација на децата во Република Македонија за информирано, одговорно и безбедно функционирање во сообраќајот.

Ви благодарам.
 

Претседателот на Република Македонија д-р Ѓорге Иванов, се обрати на Конференцијата на тема „Претприемништвото во образовниот процес во Република Македонија“ која се одржа денес под негово покровителство, а со цел да се зајакне претприемачкото образование и да се придонесе кон развојот на претприемачките капацитети и свесноста за претприемништвото.

Почитувани професори,
Екселенции,
Министри,
Дами и господа,

Најнапред би сакал да се заблагодарам и да изразам задоволство за укажаната чест, да бидам покровител на еден ваков собир, на кој ќе се дискутира за значењето на претприемништвото во образовниот процес. Верувам дека со овој собир и со сите други активности кои се реализираат во оваа традиционална недела на претприемништвото,  полека, но сигурно се гради новата генерација  македонски претприемачи врз кои ќе се темели македонската економија.

Ценети присутни,

Особено сме среќни и горди што оваа година како држава почнуваме да ги чувствуваме резултатите од континуираната економска политика, на мерките коишто владата ги презема за подобрување на бизнис-климата и на условите за работа. Како држава веќе имаме долгогодишна макроекономска стабилност со ниска инфлација која во просек изнесува 2% во последните 10 години. Имаме избалансирани јавни финансии со низок буџетски дефицит, стабилен девизен курс и низок јавен долг кој изнесува помалку од 26% од бруто-домашниот производ.

Нашите заложби беа потврдени и во последниот извештај на Светската банка „Дуинг бизнис 2012“, каде што Македонија беше рангирана на 22. место и беше посочена меѓу трите економии со забрзана стапка на развој оваа година. Оваа година исто така достигнавме висок годишен раст на бруто-домашниот производ од 5.3%.

Моторот на економскиот раст е приватниот сектор, додека столб и двигател  на приватниот сектор се претприемачите. Но, за да имаме одржлив економски раст, потребно е да создадеме иновативно и претприемачко општество. Претприемачкото  општество е општество кое се базира на креативност, иновативност и преземање ризик, кој води кон имплементација на нови и храбри идеи. Имплементацијата на овие идеи ќе отвори патишта за нови индустрии, ќе ја зголеми технолошката продуктивност, и со тоа ќе генерира одржлив и долгорочен економски раст.

Ако навистина сакаме да создадеме успешни инвестиции и да ги поттикнеме иновациите во економијата, треба да внесеме претприемничко образование во главните текови на наставата и учењето. За да го сториме тоа, треба да промовираме дизајн на нови пристапи кон образованието во дваесет и првиот век.  Треба да посветиме поголемо внимание на подобрувањето на создавање и градење човеков капитал.   

Почитувани,

Време е да создадеме иднина за младите, но и млади за иднината. Сметам дека знаењето, иновацијата и претприемништвото се трите столба врз кои треба да ги градиме и иднината и младите. Време е да едуцираме млади, полни со иновативна енергија, коишто ќе бидат способни од таа енергија да креираат нови идеи и нив да ги применат во практиката.

Време е да ги подготвиме младите за да бидат способни да се соочат со трите предизвици на претприемништвото: соочување со ризикот, стресот и сопственото его.  Време е да подготвиме самоуверени  лидери,  со јасна визија за иднината и способни да се соочат со конкуренцијата, да се успешни во бизнис- претприемништвото. Само со една ваква образована младина може да се сочува динамиката на општеството, чиј извор се претприемачите и претприемништвото.

Одговорите на нашите проблеми и желби се наоѓаат во нашата непосредна близина. Тие постојат во нашите лаборатории и нашите универзитети, во нашите полиња и во нашите фабрики, во имагинацијата на нашите претприемачи и гордоста на вредните работници. Поради овие причини иновативниот и претприемачкиот дух треба да се поттикне од најраната возраст, да се гради во текот на средното образование и да се усовршува во високото образование. Нашите образовни институции треба да бидат во центарот на нашето општество и економија. Тие, покрај образовната и научната компонента, треба да бидат и извор на претприемништвото, да бидат компатибилни со трендовите на пазарот на трудот и да ја помогнат економијата на државата.

Ценети присутни,

Основниот принцип за да се биде успешен претприемач, НЕ Е поентата „да се знае сè и сешто“, туку волјата „стекнатото знаење да се примени“. Она што ги прави претприемачите успешни е нивната способност, потешкотиите да ги надминат со леснотија, бескрајната љубопитност, постојаната желба за истражувања, упорноста во потрагата по иновации, како и  нивната самоувереност.  Како што и Гете (Goethe) рекол, претприемачот знае дека: „Ако тој верува во себе, и другите ќе веруваат во него“.

Претприемачите го отелотворуваат ветувањето на иднината, спознанието дека, ако имате добра идеја и доколку сте подготвени да работите напорно за да ја видите таа идеја остварена, може да успеете во оваа земја. Во исполнувањето на ова ветување, претприемачите играат клучна улога во проширувањето на нашата економија и во создавањето нови работни места.

За крај, сакам да Ви го цитирам првиот член од „Уставот  на претприемништвото“. Ова е изрека од непоколебливиот претприемач, големиот Микеланџело, и тоа на 87-годишна возраст: „Ancora Imparo“ односно  „Сè уште учам“.  Токму оваа изрека треба да нè води во нашиот живот. Нашиот формален   образовен систем треба да се потпира на оваа поента. Учење во сите фази од животот. Токму оваа филозофија ќе го отвори патот на претприемничкото учење во Македонија.

Ви благодарам.
 

Почитуван Декан на Правниот факултет, Проф д-р Борче Давитковски,
Почитувани присутни, дами и господа,

Шест децении по основањето на Правниот факултет „Јустинијан Први“ имаме многу причини да бидеме горди.

Денес во овој јубилеј се сублимираат шеесет години континуирани правни студии, илијадници студенти ангажирани во опсежни истражувања и стремежи кон нови знаења, обединет интелектуален напор на бројни дипломци, магистри и доктори на науки, многу вложен труд, многу награди и признанија, многу индивидуални и заеднички достигнувања.

Во текот на сите тие години низ ходниците на оваа институција се креираше значаен дел од македонската интелектуална сила, се сведочеше за историјата, со енергичност и ентузијазам се дискутираше за предизвиците исправени пред сите нас.

Правниот факултет е централното место каде секоја нова генерација ја канализираше младоста и енергијата, ги вообличуваше своите соништа и аспирации, го трасираше патот на сопствената и иднината на нашата држава. Токму овој факултет, кој ги обединува правните, политичките и студиите по новинарство, создаде кадри кои ја градеа и надградуваа македонската академска сцена, но и индивидуи кои во даден моментум и услови преземаа врз себе одговорност да бидат челници и предводници на крупни општествени и политички движења.

Дами и господа,

Со доделувањето Орден за заслуги за Македонија, оддаваме признание и почит за големата улога која Правниот факултет ја имаше и ја има во македонското општество - за артикулацијата на исклучително вредната научно-истражувачка дејност, за придонесот во зајакнувањето на правната држава и владеењето на правото, за достојното претставување на Македонија како земја во која квалитетното образование е меѓу највисоките вредности и идеали.

Но, да не заборавиме - заслугите за Македонија кои несомнено ги признаваме и вреднуваме, за никого не се завршен процес, туку поттик и мотивација за неуморно продолжување на напорите за нови достигнувања и уште поголеми успеси. Во денешните услови на глобална поврзаност, секоја институција која едуцира и просветлува треба да го заснова своето дејствување врз принципот на отвореност.  Правниот факултет покажа и докажа дека има капацитет да ги следи светските трендови, да се модернизира, кога е потребно да се коригира, и да создава трајни релации на соработка и размена со бројни високо-образовни институции од Европа и светот, со еднаков фокус и кон Западот и кон Истокот.

Почитувани,

И јас бев студент, а и професор на оваа институција – времиња во кои ги поминав најубавите години од мојот живот; години на создавање и откривање, но и години исполнети со предизвици, со потребата за борба и истрајност. Од таа перспектива можам да кажам дека растењето, унапредувањето и успешноста на една високо-образовна институција никогаш не застанува. За да обезбедиме просперитетна иднина, не смееме да ги ограничиме своите погледи и интереси само во еден правец или во рамките на една догма. Потребна ни е визија за проучување и на другите региони, и на растечките светски сили кои се подалеку од нашиот традиционален опсег, како и апсорбирање на знаењата, позитивните практики и искуства од сите оние кои се во можност да ги понудат.

Потребна е уште посилна врска со практичните проблеми на денешницата за кои треба да се најдат решенија. Неопходно е да ја бараме инспирацијата во реалноста, сегашноста, да ги идентификуваме конкретните проблеми кои бараат иновативни пристапи. Да црпиме од праксата на најдобрите, да ги преиспитуваме востановените норми и принципи, да гледаме јасно кон иднината.

И она што е најсуштествено: да се ослободиме од апсолутни авторитети и да ги отвориме ширум очите и ушите кон оние кои за прв пат влегуваат во овие предавални и амфитеатри – студентите. Мораме и понатаму цврсто и непоколебливо да им овозможуваме услови и слобода да делуваат, да истражуваат, да се искажуваат. Да работиме на одржување интерактивен и динамичен однос на професорите и студентите. Да ја поттикнуваме нивната мисла и креативност, да ја поддржиме студентската и академската мобилност и размена. Зашто токму тие, студентите, се столбот на свежата критичка мисла во општеството и нашето ветување за иднината. Колку што денес ние ќе инвестираме во студентите, толку Македонија ќе добие за возврат.

Правниот факултет „Јустинијан Први“ свесно, одговорно и континуирано работи на овие полиња и е на добар пат во остварување на овие постулати. Среќен сум што, и покрај многубројните предизвици низ децениите, Правниот факултет и понатаму останува да биде носител на когнитивниот и прогресивниот дел од општествениот апарат.

Горд сум што денес, сосем заслужено, Правниот факултет „Јустинијан Први“ го добива ова високо одликување – Орден за заслуги за Македонија.

Ви благодарам.