Во името на Tурската агенција за координација и соработка (ТИКА), министерот за надворешни работи на Република Турција, Ахмет Давутоглу, на претседателот на Република Македонија, д-р Ѓорге Иванов му додели Плакета за успешната соработка и напорите за унапредување на односите помеѓу двете земји.

„Упатувам благодарност до сите кои ја дадоа својата помош и поддршка за реализирањето на активностите и проектите на ТИКА во Република Македонија. Меѓутоа, мојата благодарност, пред сè, ја упатувам до големиот пријател на Република Турција, почитуваниот претседател на Република Македонија, господинот Ѓорге Иванов,“ истакна турскиот министер Давутоглу, потсетувајќи дека од 2003 година наваму ТИКА го има помогнато развојот на Република Македонија со над 30 милиони американски долари.

Турскиот министер за надворешни работи нагласи дека Македонија ја доживува на исто ниво како и Турција, и целата помош и поддршка преку проектите на ТИКА спроведени во Скопје, Тетово, Гостивар, Битола, Радовиш и други градови, се знак на големото пријателство меѓу двете земји.

Претседателот Изванов во оваа свечена прилика оддаде признание за сите иницијативи на Tурската агенција за координација и соработка и истакна дека ТИКА е навистина мост кој ги зближува двете земји.

„Имаме големо заедничко минато, но пред сè, имаме и голема заедничка иднина. Верувам дека во иднина ќе бидеме и пообединети и поблиски, да си помагаме меѓу себе и да го негуваме сето она што е позитивно од заедничкиот живот што сме го имале со векови наназад,“ нагласи македонскиот претседател.

Тој воедно и посака на ТИКА да продолжи со ист интензитет да ги помага сите проекти во сферата на образованието, заштитата на културата, негувањето на сета онаа традиција која ни е оставена во наследство.

„Секојпат со гордост истакнувам дека во Македонија турската заедница е дел од севкупното наше општество во кое се негува мултиетничоста, мултирелигиозноста и мултијазичноста. И во оваа прилика, на припадниците на турската заедница им го честитам Денот на образованието на мајчин јазик и негувањето на турскиот јазик,“ посочи претседателот Иванов.

Во рамките на свеченоста беше организирана и изложба на тема „ТИКА и образованието во Македонија“ и „ТИКА – Гордост на Турција во светот“, како дел од активностите со кои се одбележуваат 20 години од воспоставувањето на дипломатските односи помеѓу Македонија и Турција.

За афирмација на македонската книжевност и култура во светот во петте децении од своето постоење и активност, претседателот на Република Македонија, д-р Ѓорге Иванов денеска на Македонскиот ПЕН-центар го додели високото признание „Повелба на Република Македонија“.

На церемонијата на врачување на признанието, на која присуствуваа академици и книжевници - членови на оваа асоцијација, претседателот Иванов истакна дека Македонскиот ПЕН центар во изминатите 50 години рамноправно создаваше и соработуваше со другите ПЕН центри во светот, здружени во Меѓународниот ПЕН центар.

Токму светскиот ПЕН центар, нагласи Претседателот, беше првата меѓународна асоцијација, воопшто, која на својот конгрес одржан во 1992 година усвои посебна Резолуција со која се признава правото на македонскиот народ на сопствено име, јазик и култура.

„За жал и по две децении од оваа Декларација, и по векови и децении творештво на македонски јазик, по безброј преводи, книги и списанија, сè уште се наоѓаат негатори на македонскиот јазик и на сето она што е создадено на македонски јазик. Негацијата на еден јазик е негација и на неговите говорители, на творците кои создаваат на тој јазик. Тоа е негација на основните вредности на човечката цивилизација,“ посочи претседателот Иванов по повод доделувањето на ова признание.

Македонскиот претседател уште и додаде дека со своите активности и дела, членовите на македонскиот ПЕН центар несомнено придонесоа тој да биде еден од најфреквентните мостови за поврзување на македонската книжевност и култура со европската и светската култура. 

Претседателот на Македонскиот ПЕН центар Ристо Лазаров се заблагодари на слухот на претседателот Иванов за влогот што го даде Македонскиот ПЕН центар сите овие 50 години во афирмацијата на македонскиот збор и литература.

„Признанието им припаѓа на сите генерации на Македонскиот ПЕН, од неговото формирање до новопримените членови од пред само еден месец,“ истакна Лазаров.
 
Македонскиот ПЕН центар е формиран на 20 декември 1962 година и од тогаш до денес низ неговите редови минале и свој влог оставиле голем број истакнати македонски книжевници и автори. Во својата пет децениска историја Македонскиот ПЕН објави повеќе антологии на македонската поезија и проза на англиски и француски јазик.

Добитникот на признанието „Најдобар млад научник“ д-р Трифче Сандев одржа предавање и пред студентите на Универзитетот „Гоце Делчев“ во Штип. Ова престижно признание што го доделува претседателот на Република Македонија, д-р Ѓорге Иванов, Сандев го доби за 2011 година.

Темата на предавањето од сферата на физиката и математичката физика, беше поврзана со истражувањето за кое Сандев се стекна со титулата „Најдобар млад научник“. На студентите им беа презентирани дел од неговите научни резултати на темата физичко моделирање за природните појави.

„Наградата беше добиена за физичко моделирање на некои природни појави. Најразлични дифузиони појави што се среќаваат во природата ги опишуваме со помош на равенка. За некои експериментални резултати што можат да се сретнат во научната литература се обидуваме да најдеме некој теориски модел и истите да ги опишеме,“ посочи Сандев.

Тој изрази надеж дека интересот за пријавување на млади научници и оваа година ќе биде голем. Истовремено, студентите Универзитетот „Гоце Делчев“ можеа да добијат повеќе информации околу условите за конкурсот за добивање за најпрестижната награда за наука во Република Македонија.

Конкурсот за избор на „Најдобар млад научник“ за тековната 2012 година е во тек, со краен рок за пријавување до 31 декември, и е отворен за сите млади луѓе до 30 години кои се бават со наука и во текот на годината постигнале одреден научен резултат, а кои имаат желба преку нивните научни истражувања да придонесат за позитивен развој на општеството и околината во која живеат и работат.

Претседателот Иванов ја воспостави практиката за доделување на ова признание, следејќи ја неговата програмска определба за поддршка на науката, научните установи и истражувања. Со благовремената поддршка на сите млади кои се занимаваат со наука и со верификација на нивните постигнувања, инвестираме во иднината и развојот на Република Македонија, смета претседателот Иванов.

Претседателот на Република Македонија, д-р Ѓорге Иванов и неговото семејство, во својот дом ги пречекаа 15-тината дечиња од Домот за деца без родители „11 Октомври“, на возраст од 3 до 11 години, и заедно со нив ја украсија новогодишната елка во претседателската резиденција „Вила Македонија“.

Во салонот на резиденцијата одекнаа детските гласови кои воодушевено ја пееја новогодишната песничка „Елко, елко“, а првата дама г-ѓа Маја, направи сè за децата да се чувствуваат како дома.

„Чинот на китење на новогодишната елка претставува радост како за секое дете, така и за нас возрасните. Тоа е чин којшто го обединува целото семејство во пресрет на новогодишните и на божиќните празници. Сакавме да го отвориме нашиот дом за оние деца на коишто судбината не им дозволила да ја почувствуваат родителската љубов и барем на миг да бидат дел од една таква пријатна и топла родителска атмосфера,“ истакна г-ѓа Иванова.

Првиот лампион на елката го закачи најмалиот од нив Максут, а го следеше неговата врсничка Габи, со помош на синот на Претседателот, Иван, кој ги подигна в раце за да ги достигнат највисоките гранки на новогодишната елка. Семејството Иванови изрази надеж дека со овој гест успеаја да исполнат барем една желба на децата без родители, и да им овозможат топла семејна атмосфера.

„Денешното доаѓање во нашиот дом јас го сметам за еден мал придонес во доближување на родителската љубов до овие деца, со цел тие да почувствуваат дека не се исфрлени од општеството, да почувствуваат дека некој се грижи за нив и во иднина да израснат во добри граѓани на оваа држава,“ нагласи Првата дама на Република Македонија, г-а Иванова.

Покрај дружбата и китењето на новогодишната елка, претседателот Иванов на своите гости им подари новогодишни пакетчиња. Дечињата имаа можност да се запознаат и да се дружат и со семејниот љубимец, шарпланинецот Алек. Тие уживаа и во веселата атмосфера која синот на Претседателот, Иван, ја дополни со својата гитара, свирејќи песни од Тоше Проески.

Добитникот на признанието „Најдобар млад научник“ за 2011 година, д-р Трифче Сандев, вечерва во Народната канцеларија на Претседателот во Скопје, одржа предавање од областа на физиката и математичката физика, односно како некои појави во природата, коишто се случуваат во комплексни системи, можат да се опишат со математичко-физички модели. Токму во таа сфера Сандев го спроведе истражувањето кое му го донесе престижното признание „Најдобар млад научник“, кое традиционално го доделува претседателот на Република Македонија, д-р Ѓорге Иванов.

Голем број млади истражувачи, од средните училишта и факултетите, кои пројавуваат интерес кон природните науки, електро-техниката, информатичките науки и компјутерското инженерство, имаа можност да се сретнат со Трифче Сандев и одблиску да се запознаат со неговата научно-истражувачка работа, а воедно и да ги согледаат критериумите кои треба да ги исполнува потенцијалниот добитник на признанието „Најдобар млад научник“.

Д-р Сандев е вработен во Дирекцијата за радијациона сигурност, преку конкурсот на Владата на Република Македонија во 2006 година за вработување на 100-те најдобри студенти во државата. Автор е на дваесеттина научни и стручни трудови од областа на математичката физика и статистичката физика, од кои повеќето се објавени во референтни меѓународни списанија со фактор на влијание. Резултатите од својата докторска дисертација Сандев досега ги презентирал во рамки на повеќе меѓународни конференции и семинари.

Конкурсот за избор на „Најдобар млад научник“ за тековната 2012 година е во тек, со краен рок за пријавување до 31 декември, и е отворен за сите млади луѓе до 30 години кои се бават со наука и во текот на годината постигнале одреден научен резултат, а кои имаат желба преку нивните научни истражувања да придонесат за позитивен развој на општеството и околината во која живеат и работат.

Признанието „Најдобар млад научник“ беше прв пат доделено од страна на претседателот Иванов во 2010 година, на 28-годишниот магистер Никола Златанов, докторант на Универзитетот на Британска Колумбија, Канада, додека во 2011 година оваа титула ја понесе д-р Трифче Сандев. Воведувањето на ова признание има за цел  да го поттикне развојот и да ги стимулира вложувањата во науката, да ги поддржи научните установи и младиот научен кадар, но и да ги награди врвните научни достигнувања.

Според претседателот Иванов, инвестицијата во образованието и науката е најдолготрајна и најисплатлива. Со благовремената поддршка на сите млади кои се занимаваат со наука и со верификација на нивните постигнувања, инвестираме во иднината и развојот на Република Македонија.  Затоа, треба да ги поттикнеме и да ги охрабриме младите научници во нашата земја да ја насочуваат својата креативност и интелигенција кон иновацијата и развојот на нови технологии, смета претседателот Иванов.

Претседателот на Република Македонија д-р Ѓорге Иванов, денеска го прими д-р Махмут Чевик, координатор на Tурската агенција за координација и соработка (ТИКА) во Република Македонија. 

Д-р Чевик и претставниците на ТИКА се заблагодарија за можноста да се сретнат со претседателот Иванов и да ги презентираат досега спроведените, како и тековните проекти на ТИКА, истакнувајќи дека поддршката од Претседателот, неговите идеи и заложби се од особена важност за нивното успешно имплементирање.

Како што нагласи д-р Чевик, во своето делување ТИКА ги зема предвид потребите и целите за развој на земјите и општествата во кои е присутна, и според тоа ги одредува полињата за соработка преку конкретни проекти и програми. Основната цел е да се даде суштински придонес во развојот и соработката во сферите на економијата, техниката, трговијата,  социјалната сфера, културата и образованието.

„ТИКА е еден од мостовите кои овозможуваат унапредување на односите и соработката меѓу двете пријателски земји – Македонија и Турција. Tурската агенција за координација и соработка придава особено значење на зближување на земјите преку конкретна техничка соработка,“ истакна координаторот на ТИКА, д-р Чевик.

Претседателот Иванов ги поздрави напорите на ТИКА за зајакнување на врските меѓу двете општества, како и успешноста на досега реализираните проекти во Република Македонија во областа на образованието, здравството, реставрацијата, развојот на земјоделството, финансиите, туризмот и индустријата.

Тој посочи дека искуствата на Република Турција се од големо значење за нашата земја, и изрази благодарност за техничката помош, образовните и советодавни активности на ТИКА во Република Македонија, кои, како што нагласи, дадоа значаен придонес во зајакнувањето на институциите, но и во одржувањето на блискоста на народите.

Претставниците на Tурската агенција за координација и соработка, изразија надеж дека оваа поддршка на највисоко ниво ќе придонесе кон натамошно успешно спроведување на целите и агендата на ТИКА, како и подготвеност за тесна и блиска соработка со сите институции во Република Македонија кои би имале придобивки од реализацијата на заедничките проекти.

Tурската агенција за координација и соработка (ТИКА) е дел од Претседателството на Владата на Република Турција, а во Република Македонија е присутна и функционира од 2005 година, со своја Канцеларија за програмска координација.