Началникот на Генералшабот на Армијата на Република Македонија генерал-потполковник Методија Величковски, денеска пред претседателот на Република Македонија и врховен командант на вооружените сили, д-р Ѓорге Иванов, реферирше за борбената готовност на АРМ во 2015 година.

На реферирањето присуствуваа министерот за одбрана, г. Зоран Јолевски, заменикот на министерот за одбрана, г. Иљми Селами, заменик претседателот на комисијата за одбрана и безбедност во Собранието на Република Македонија, г. Сашо Аќимоски, претставници од кабинетот на Претседателот на РМ, раководители во Министерството за одбрана и ГШ на АРМ.

Претседателот Иванов беше информиран за реализацијата на плановите и задачите во 2015 година, согласно функционалните области на АРМ. Во текот на своето излагање генералот Величковски ги истакна активностите кои ја одбележаа 2015 година - ангажирањето на дел од единиците на АРМ за поддршка на Министерството за внатрешни работи во справување со мигрантската криза, учеството на армијата во справување со елементарните непогоди, успешно извршување на меѓународните мисии надвор од Република Македонија и редовната обука и вежби на единиците на АРМ.

Беше заклучено дека и покрај сите предизвици со кои АРМ се соочи во текот на изминатата година, сите задачи се потполно и квалитетно извршени со максимално залагање на персоналот на сите нивоа.

Претседателот Иванов изрази признание на припадниците на Армијата на Република Македонија за нивната несебична посветеност при извршувањето на мисијата и задачите на АРМ потенцирајќи дека АРМ ја има најголемата доверба во општеството. Претседателот Иванов ја истакна улогата на АРМ во справувањето со мигрантската криза и укажа на потребата за донесување на нова стратегија на одбраната која ќе претставува основа за изработка на Планот за одбрана со цел ефикасно справување со модерните безбедносни закани.

Министерот за одбрана, Зоран Јолевски истакна дека во 2016 година приоритет ќе биде подобрување на условите за живот и работа на припадниците на АРМ, модернизацијата, опремувањето како максимална поддршка за подигнување на борбената готовност за успешното извршување на нејзините функционални надлежности.

Пред почетокот на реферирањето беше извршена презентација на публикации изработени во Командата за обука и доктрини, кои ќе бидат подлога за квалитетна и суштинска подготовка, образование на кадрите за одбрана и безбедноста, Воената академија и останатите универзитети во државата.

Претседателот на Република Македонија, д-р Ѓорге Иванов во Народната канцеларија во Битола оствари средба со граѓани на која што се запозна со нивните ставови и мислења околу општествените состојби во Република Македонија и во градот Битола.

Битолчани го информираа македонскиот претседател за нивните предизвици од секојдневниот живот и го запознаа со идеи и предлози, како и нивни размислувања во насока на надминување на тие предизвици.

Претседателот Иванов истакна дека , како и досега така и во иднина, преку сите механизми во негова надлежност ќе се залага за надминување нa предизвиците со коишто се соочуват граѓаните на Република Македонија

На вториот ден од приемот за членовите на дипломатскиот кор акредитирани во Република Македонија, претседателот Иванов и членовите на дипломатскиот кор го посетија инфо – центарот „Пелистер", каде беше одржана презентација за природните и туристичките карактеристики на Националниот парк Пелистер. Потоа, во хотелот „Молика" се одржа презентација за инвестициските можности на општина Битола, од страна на градоначалникот на Општина Битола, г. Владимир Талески.

- Оваа средба е прекрасна бидејќи има многу повеќе амбасадори отколку на вообичаените средби во Скопје. Паркот е прекрасен и ги потврдува своите можности за развој на различни спортови и посебно планинарењето кое е се попопуларно во Европа. Сакам да потсетам дека токму тука на оваа планина пред 100 години, во јануари 1916 година, се водеа војни, и ова е момент да се одбележи годишнината од потпишувањето на Елисејскиот договор и да се порача дека не треба да има поделби и, напротив, заеднички да гледаме во иднината и Македонија да биде дел од Европа, посочи француската амбасадорка Лоренс Оер.

За убавините на Пелистер говореше и американскиот амбасадор Џес Бејли кој рече дека повеќепати доаѓал во Националниот парк „Пелистер".

- Пелистер е голем ресурс. Минатата година се одморав на Пелистер и пак сум тука. Американскиот народ има голема традиција за планинарењето и затоа ќе иницирам пешачење на една поголема планинарска тура која ќе биде од оваа, до другата страна на планината, односно до Преспа, изјави амбасадорот Бејли.

За дипломатскиот кор во Република Македонија, градоначалникот на општина Битола Владимир Талески и претседателот на Регионалната стопанска комора Мирко Велковски приредија презентација за економскиот потенцијал и инвестициски можности што ги нуди овој град.

- Очекувам наскоро да почне изградба на фабриките во индустриската зона „Жабени", односно две турски и три италијански компании. Амбасадорите ги информирав дека во 2016 година очекуваме и други инвестиции за што како општина нудиме целосна поддршка. Довербата е изградена и почнуваме процес за позитивното живеење на граѓаните отворајќи нови работни места. Мислам дека успешно ја искористивме приликата да ги презентираме нашите потенцијали и можности на градот пред највисоките претставници на разни држави, односно дипломатскиот кор во Република Македонија, нагласи градоначалникот Талески.

Изминатите години, покрај Битола, дипломатскиот прием беше приреден и во Крушево, Гевгелија и во Берово.

Претседателот на Република Македонија д-р Ѓорге Иванов денеска присуствуваше на одбележувањето на големиот христијански празник Богојавление – Водици во Кичево.

Претседателот Иванов присуствуваше на богослужбата во Соборниот храм „Св. Апостоли Петар и Павле" и на церемонијата на положување на светиот крст. Дејан Момироски беше најсреќниот меѓу верниците и го фати светиот крст на денешното одбележување на Водици во Кичево, а од претседателот Иванов на подарок доби филигрански крст.

Претседателот на Република Македонија, д-р Ѓорге Иванов, оствари работна вечера со амбасадорот на Француската Република во Република Македонија, Н.Е. Лоренс Оер, како и со амбасадорите на Француската Република во земјите од регионот на Југоисточна Европа.

На средбата присуствуваа амбасадорите на Француската Република во Р. Бугарија, Р. Србија, Р. Хрватска, Црна Гора, Босна и Херцеговина, Р. Словенија, Унгарија, Р. Косово, и Р. Албанија, како и специјалниот пратеник на Француската Република за Балканот и претставници од француското Министерството за надворешни работи.

Целта на средбата е подготовка за Париската конференција за Југоисточна Европа 2016. По конференциите во Берлин 2014 и Виена 2015, ова е трета конференција по ред, со цел реализација на значајни политички и инфраструктирни проекти кои го засегаат регионот на ЈИЕ, а кои се дефинирани од страна на лидерите на Процесот „ Брдо Бриони".

Во разговорите со амбасадорите беа разменети мислења за актуелните состојби во нашиот регион, безбедносните предизвици, бегалската и мигрантската криза, состојбата во евроатлантските интегративни процеси, регионалната соработка, добрососедските односи, и улогата на Француската Република во регионот на ЈИЕ.

Претседателот Иванов ја потврди заложбата на Република Македонија за интензивирање на регионалната соработка во сите области на заемен интерес и истакна дека со оглед на актуелните предизвици со кои се соочува целиот регионот повеќе од било кога е неопходна засилена соработка меѓу државите, како на политички и економски, така и на безбедносен план.

На средбата, претседателот Иванов ги реафирмираше надворешно политичките приоритети на Република Македонија, истакнувајќи дека земјата цврсто останува на своите заложби за целосна интеграција во ЕУ и НАТО. Во тој контекст беше истакнато дека треба што поскоро да се надмине политичката криза и земјата целосно да се фокусира на европските и евроатланските процеси

Претседателот на Република Македонија, д-р Ѓорге Иванов денеска го врачи мандатот за состав на Влада на Република Македонија на г. Емил Димитриев.