Претседателот на Република Македонија, д-р Ѓорге Иванов, придружуван од неговата сопруга, г-ѓа Маја Иванова, во рамки на официјалната посета на Арапската Република Египет, денеска ја посети Александриската Библиотека.

Македонскиот претседател се сретна со директорот на Александриската библиотека Исмаил Серагелдин и се запиша во Книгата на впечатоци.

Александриската библиотека била најголема и најпозната во античкиот свет. Во 3 век п.н.е ја основал Птоломеј Први Сотер, била центар на древната наука и уметност. Имала неколку десетици илјади дела напишани на околу 600.000 свитоци папирус на сите тогаш познати јазици. Низ историјата била уништувана од разни освојувачи, а денес се наоѓа во модерен објект.

Претседателот Иванов претходните два дена престојуваше во престолнината Каиро каде што имаше средба со египетскиот претседател Абдел Фатах Ал Сиси, а вчера се обрати на бизнис-форум на кој беа презентирани можностите за инвестирање во Македонија.

Со посетата на Библиотеката во Александрија, град кој е главно египетско пристаниште на Средоземното Море, претседателот Иванов ја заврши официјалната посета на Египет.

Бегалската криза, борбата против тероризмот и заживување на економската соработка беа теми на кои денеска разговараа претседателите на Република Македонија и на Арапска Република Египет, д-р Ѓорге Иванов и г. Абдел Фатах Ал Сиси во Каиро, каде што претседателот Иванов е во официјална посета - прва на македонски претседател на оваа северноафриканска земја во 20-те години дипломатски односи.

Тие по средбата во претседателската палата Тахадеа соопштија дека размениле информации за мигрантската криза која ги засега двете држави, зашто со неа се соочуваат и земјите од Северна Африка, а заклучиле и дека е неопходна соработка на безбедносните служби во борбата против тероризмот и придонес во мултилатералниот простор односно во меѓународните организации.

- Разговаравме за проблемите на кризата на Блискиот Исток, за важноста од обезбедување меѓународна поддршка за земјите кои прифаќаат бегалци и се согласивме за важноста за почитување на толеранцијата и спроведување на вредностите на дијалогот помеѓу културите, рече египетскиот претседател Ал Сиси.

Претседателот Иванов ја нагласи важноста на Египет зошто, како што рече, земјата е лидер и гарант на стабилноста во регионот на Северна Африка. Бил информиран за бројот на бегалци кои ги има Египет и за начинот на кој се справува со нив, а разговарале и за улогата која Македонија ја има во справувањето со бегалската криза во европски контекст. Тема биле и заканите од тероризмот, насилниот екстремизам и радикализам.

- Сакам да упатам честитка за решителната борба на Египет против тероризмот. Република Македонија како активен партнер во антитерористичката коалиција ќе продолжи да придонесува во меѓународната заедница со својата улога. Заклучивме дека е потребна заедничка соработка на ова поле преку безбедносните служби, зашто тоа е предизвик со кој се соочуваме и е наша реалност, истакна претседателот Иванов.

Шефот на македонската држава искажа задоволство што го посетува Египет, а честа е уште поголема, како што рече, затоа што посетата е прва офцијална. Нејзината цел е да им се даде нов импулс на пријателските односи меѓу двете земји. А колку е Египет значаен за Македонија, рече претседателот Иванов, показател е и тоа што токму во престолнината Каиро е единствената амбасада на Република Македонија во Африка.

Египет и Македонија најавија и нов период во своите пријателски односи, како и поинтензивна соработка во областите за кои има потенцијали и тие биле идентификувани на денешната средба. Во таа насока е утрешниот бизнис-форум во Каиро, а основа за продлабочување на врските во економијата е и Договорот за соработка во земјоделството што беше потпшан денеска.

Претседателот Иванов очекува позитивна реакција на египетските стопанственици од утрешниот бизнис-форум на кој ќе бидат претставени поволностите што ги нуди Македонија.

- Македонија може да биде порта на Египет кон европскиот пазар, додаде претседателот Иванов.

Македонскиот претседател го посети и Меморијалниот центар и положи цвеќе пред спомениците на незнаен борец и на третиот претседател на Египет - Анвар Садат. Го посети и Парламентот на Египет каде што имаше средба со неговиот претседател Али Абдел-Ал.

Во Египет претседателот Иванов е придружуван од неговата сопруга г-ѓа Маја Иванова, за која е организирана паралелна агенда со сопругата на египетскиот претседател, и тоа е првпат да има посебен дамски протокол во двегодишното владеење на Ал Сиси.

Инаку, Абдел Фатах Ал Сиси е шести претседател на Арапска Република Египет, кој на должноста стапи во јуни 2014 откако по масовни демонстрации во земјата од власт беше симнат исламистичкиот претседател Мохамед Морси. Ал Сиси е поранешен врховен командант на египетските вооружени сили.

Претседателот на Република Македонија, д-р Ѓорге Иванов, денеска го прими министерот за култура на Црна Гора, г. Павле Горановиќ, кој престојува во посета на Република Македонија.

На средбата беа разменети мислења за севкупните билатерални односи меѓу Република Македонија и Црна Гора, со фокус на соработката на кулурен план.

Двајцата соговорници констатираа традиционално добра соработка во областа на културата и го поздравија денешното потпишување на Програмата за културна соработка меѓу министерствата за култура од двете земји.

На средбата со министерот Горановиќ, претседателот Иванов изрази поддршка на сите активности и иницијативи насочени кон воспоставување културна размена и дијалог, како и натамошно зајакнување на соработката на културен план меѓу двете земји, преку поттикнување на уметничка размена, промоција на театарската, музичко-сценската дејност, негување на културните вредности на македонската заедница во Црна Гора и на црногорската заедница во Република Македонија.

На претседателот на Република Македонија, д-р Ѓорге Иванов, вчера во Баку му беше доделено признанието Почесен доктор на науки на Академијата за јавна администрација на Азербејџан, највисоката образовна и научна институција за образување на кадри и раководители во државната и јавната администрација.

По тој повод, претседателот Иванов пред присутните професори и студенти одржа предавање за Балканот, Кавказот и Блискиот Исток, предизвиците со кои овие региони се соочуваат, и нивните односи со Европската унија.

Посочувајќи на македонскиот модел на почитување на различноста како пример, претседателот Иванов преку приказ на историскиот развој на државата како концепт, се до денешницата, го објасни концептот на „интеграција без асимилација".

Почесниот докторат за претседателот Иванов на Академијата за јавна администрација на Азербејџан е дел од низата признанија што македонскиот претседател ги има добиено од бројни високообразовни институции во светот. Претседателот Иванов претходно е прогласен за Почесен професор на Московскиот универзитет „Ломоносов" и на „Југозападниот универзитет за финансии и економија" во Ченгду, НР Кина, а почесни докторати има добиено на Истанбулскиот Универзитет, на Универзитетот „Хаџи Бекташи Вели" во Невшехир, на „ТОББ Универзитетот за економија и технологија" во Анкара, Република Турција, на Христијанскиот универзитет „Димитрие Кантемир" во Букурешт, Романија и е прогласен за член во Светската академија на науките и уметностите и за Почесен протектор на „Европската академија на науките и уметностите" во Салцбург, Република Австрија.

Во однос на реакциите на германската влада по изјавите на претседателот Иванов дадени во интервјуто за весникот „Билд":

Претседателот на Република Македонија, д-р Ѓорге Иванов, цврсто останува на своите ставови изнесени во интервјуто за германскиот весник „Билд", дека државните институции на Република Македонија немаат добиено никакви финансиски средства од Европската унија за справување со бегалската криза, односно помошта на ЕУ за буџетот на Република Македонија изнесува 0 евра.

Ја повикуваме германската влада да прецизира и јасно и точно да наведе, на кого, кога и за која цел, биле дадени споменатите средства од 52 милиони евра.

Со цел да не се манипулира јавноста и доведува во заблуда, информираме дека споменатите средства од 664 милиони евра за периодот од 2014 до 2020 година, се дел од ИПА фондовите и се наменети за спроведување на европските реформи, а не за справување со бегалската криза и дополнителните трошоци на институциите во кризна состојба. Посетуваме, дека сите држави кои се инволвирани во бегалската и мигрантската криза и се справуваат со неа, добија посебна финансиска помош од ЕУ.

Во однос на тврдењата дека Република Македонија разменува податоци од безбедносен аспект, ја информираме јавноста дека Република Македонија беше одбиена да добие пристап до дата базите на ЕУ, до дата базите на Шенген, и ЕУРОДАК, под образложение дека е трета држава и има правни бирократски пречки и ограничувања.