Претседателот на Република Македонија, д-р Ѓорге Иванов, денеска во рамки на церемонијата на свечено менување на државното знаме ја врачи првата македонска офицерска сабја на Командантот на Баталјонот за почести, потполковник Иван Атанасоски.

Промоцијата на првата македонска офицерска сабја за почести е по повод одбележувањето на 75 годишнината од Денот на баталјонот за почести во АРМ. Со првата македонска офицерска сабја за почести, гардиската единица на АРМ денеска го изврши свечениот чин на промена на државното знаме во Кабинетот на Претседателот на Република Македонија.

Автор на првата македонска офицерска сабја за почести е Командантот на Баталјонот за почести, потполковник Иван Атанасоски, а сабјата е дизајнирана од страна на хералдичкиот уметник Стојанче Величковски.

Армиски претставник од Баталјонот за почести во АРМ, истакна дека сабјата ќе има церемонијално значење при пречекот на високи гости, на министри за одбрана, началници на генералштаби и во склоп на церемониите што ги организира АРМ.

„Во рок од 6/7 месеци финализираше изработката на првата македонска офицерска сабја за почести. Работната група ги консултираше Воениот музеј, Архивот на МПЦ и на ИВЗ, соработувавме со Хералдичкото друштво и со хералдичарот кој го изработи дизајнот на сабјата. Соработувавме со Институтот по хемија при Природно математичкиот факултет каде што ни го доверија минералот лорандит да го вградиме во сабјата и со г. Чкартов кој ни даде еден примерок од рубинот кој е исто така вграден во рачката на сабјата. Сите елементи кога ги вклопивме и завршивме, резултираа со денешната прослава за промовирање на сабјата пред претседателот Иванов", рече тој.

Хералдичкиот уметник Стојанче Величковски, дизајнер на првата македонска офицерска сабја, рече дека идејата за вакво дело датира многу одамна и дека тој повеќе од 3 децении врши истражувања во областа на хералдиката.

„Направивме тим кој подолго време работеше на истражување на сите симболи што значат нешто за македонската историја, традиција и култура. Ја имав честа да го креирам симболот на војничката чест и да ги сублимираме во една визуелизација сите наши симболи. Пред се тука мислам на нашиот флорален симбол Quercus macedonica, којшто е аплициран во рачката и симболот на бесконечноста којшто е земен од златната маска од Требеништа. Целата таа композиција е адаптирана да ги претставува македонската историја, култура и традиција, затоа што самиот даб е симбол кој што покажува цврстина, доблест, традиција и истрајност, а сите тие атрибути прилегаат на нашиот македонски народ да бидат ставени во ваков симбол кој што денеска беше промовиран на свеченоста во Кабинетот на Претседателот на Република Македонија" рече г. Величковски.

Церемонијалната сабја е украсена со уникатен македонски рубин и реткиот минерал на лорандитот од рудникот Алшар. Декоративен орнамент на сабјата е златна ракавица, што по својата форма е во вид на преплет и претставува симбол на бесконечност, а во кружните форми што се образуваат последователно се јавува сонцето како симбол. Формата на штитникот на рачката е инспириран од македонскиот даб, додека неговите транспарентни сегменти ја симболизираат подготвеноста и стремежот на граѓаните на Република Македонија да изградат модерна и транспарентна армија која ќе го штити суверенитетот и интегритетот на Република Македонија.

Во рамки на свеченото менување на државното знаме, на претседателот Иванов му беше подарена првата книга „Почесна гарда на АРМ" посветена на сите припадници на почесната гарда, чиј автор е потколковник м-р Иван Атанасоски, а чија промоција е по повод одбележувањето на Денот на баталјонот за почести и опслужување во АРМ.

На церемонијата при свечената промена на државното знаме во Кабинетот на Претседателот присуствуваа ученици од четири основни училишта од Скопје, ОУ „Јохан Хајнрих Песталоци", ОУ "Кузман Шапкарев", ОУ „Ѓорѓија Пулевски" и од ОУ „Браќа Миладиновци", како и деца од градинката „Cool Kids".

Наставничката Анета Велковска, од ОУ „Браќа Миладиновци" од Скопје, потенцираше дека присуството на овој настан е од големо значење и практична примена по предметот Државно уредување на Република Македонија, додавајќи дека се обидуваат на учениците да им пренесат негување на свеста за љубов кон својата татковина, почит кон симболите на нашата држава, Република Македонија.

Манифестацијата на промена на државното знаме е со цел подигнување на чувството и почитта кон знамето на Република Македонија како репрезент и симбол на државноста на нашата земја, Република Македонија.

Претседателот на Република Македонија, д-р Ѓорге Иванов, заедно со сопругата г-ѓа Маја Иванова, на покана на турскиот претседател, г. Реџеп Таип Ердоган, денеска присуствуваше на свеченото отворање на новиот аеродром во Истанбул.

На свеченото отворање присуствуваа над 50 високи функционери од светот, меѓу кои и претседателот на Република Србија, г. Александар Вучиќ, претседателот на Република Косово, г. Хашим Тачи, претседателот на Република Албанија, г. Илир Мета и премиерот на Република Бугарија, г. Бојко Борисов.

За почеток, новиот аеродром ќе опслужува 90 милиони патници годишно. Со комплетирањето на другите фази до 2028 година, новиот Истанбулски аеродром ќе биде најфреквентниот аеродром во светот, со капацитет од 200 милиони патници годишно.

Претседателот на Република Македонија, д-р Ѓорге Иванов, на вториот ден од официјалната посета на Чешката Република, оствари средби со претседателот на чешката Влада, г. Андреј Бабиш и со претседателите на Сенатот и на Долниот Дом на чешкиот парламент г. Милан Штех и г. Радек Вондрачек.

На средбата со претседателот на чешката Влада, г. Андреј Бабиш, двајцата соговорници ја потврдија подготвеноста за унапредување на меѓусебното пријателство и поддршка на билатерален и мултилатерален план.

Македонскиот претседател истакна дека Република Македонија особено ја цени конзистентната и принципиелна поддршка од Чешка за нашите врвни стратешки цели - членство во НАТО и ЕУ, како и принципиелната употреба на нашето уставно име.

Претседателот Иванов уште еднаш изрази задоволство од севкупната соработка и поддршка од Чешка за време на бегалската и мигрантската криза.

„Посебно ја цениме соработката меѓу Македонија и Чешка поврзана со мигрантската криза и благодарни сме за доделената помош на македонската полиција за нејзино успешно менаџирање. Ваквата соработка претставува потврда дека Чешка е вистински пријател на Македонија" истакна на средбата претседателот Иванов.

Претседателот Иванов и премиерот Бабиш на средбата разменија информации и мислења во однос на бегалската и мигрантската криза.

Претседателот на Сенатот на Парламентот на Чешката Република, г. Милан Штех и претседателот на Долниот Дом на Парламентот на Чешката Република, г. Радек Вондрачек, на средбите со македонскиот претседател изразија задоволство од развојот на билатералните односи и дадоа поддршка за остварување на македонските стратешки цели, членството во ЕУ и НАТО.

Првите луѓе на чешкиот парламент изразија подготвеноста за јакнење на соработката меѓу парламентите на двете земји со цел унапредување на законската легислатива во областа на миграциите, како и размена на податоци и искуства во справувањето со мигрантската и бегалската криза.

На средбите беше искажана подготвеноста за продолжување на помошта од Чешка за Република Македонија на нашата јужна граница.

Со денешните активности Иванов ја заврши дводневната официјална посета на Чешката Република. Вчера во Прага македонскиот претседател оствари средба со чешкиот претседател Милош Земан, од каде беа испратени пораки за актуелната политичка состојба во Македонија.

Ако е многу ниска излезноста на референдумот тоа може да значи три работи: бојкот, незаинтересираност или лошо поставено прашање. Кое од овие три работи важи за Македонија тоа треба самите да си одговорат, порача претседателот на Чешката Република, г. Милош Земан, на заедничката прес конференција со претседателот на Република Македонија, д-р Ѓорге Иванов, кој престојува во дводневна официјална посета на Чешката Република.

Претседателот Иванов истакна дека не можеме слободно да ги интерпретираме Уставот и законите, а тие јасно кажуваат што е успешен, а што неуспешен референдум.

- Фактот е дека ние имаме неуспешен референдум. Која и да е друга интерпретација не може да ги промени бројките кои се фиксни и се знаат. Затоа јас повикав на одговорност. На сите што ја посетија Македонија, а имавме многу странски претставници кои во изминатиов период ја посетија Македонија, им укажував дека до ова ќе дојде. Затоа што не може Европската Унија и НАТО да биде алиби за лош и штетен договор. Не можете да прифаќате договор во кој постои одредба дека ќе се оди на референдум, а вие да не обезбедите национален консензус во државата.  Не можете да прифатите промена на Уставот, без да обезбедите дво-третинско мнозинство во Парламентот. Затоа посочив дека за ова треба некој да одговара, а одговорноста се знае чија е. Што побргу дојдеме до одговорност, толку полесно можеме да го продолжиме овој процес кој е многу чувствителен, многу комплексен и кој ја држи Македонија веќе 27 години заложена од ирационални барања на нејзиниот јужен сосед, изјави македонскиот претседател.

Во однос на членството во НАТО и ЕУ, претседателот Иванов истакна дека Македонија е жртва на двојни стандарди и дека Договорот со Грција не содржи гаранции дека истиот ќе се почитува од грчка страна и воедно потсети дека Грција не ја испочитува ниту Времената спогодба, ниту пак пресудата од Хаг.

- Во договорот нема гаранции. Тој договор е правен лично од премиерот, без да знае претседателот на државата. Ние како државен врв во Македонија сме изградиле национален консензус во изминатите години. Тоа било став и на претходните претседатели и во Собранието е донесена декларација во 2008-та. Ние прифаќаме решение, но никојпат не сме прифатиле промена на Уставот на Република Македонија за промена на уставното име,  изјави претседателот Иванов на новинарско прашање.

Запрашан за коментар за Договорот со Грција, претседателот Земан изјави дека не сака да се меша во внатрешните работи на Македонија, но ги повика двете страни да продолжат со преговорите. - Тоа може да трае долго, но се надеваме дека овој спор ќе успеете да го решите, изјави Земан на прес конференцијата.

Двајцата претседатели разговарале и за можностите за продлабочување на соработката во сферата на безбедноста, при што Иванов се заблагодари за поддршката и помошта од Чешка за време на мигрантската и бегалската криза.

- Тоа е во интерес и на Чешката Република. Имајте во предвид дека одбраната на границата е важна не само за мигрантите кои минуваат. Денес веќе никој не одрекува дека меѓу мигрантите има и џихадисти и надворешни војници кои се враќаат во Европа.  Јас го поддржувам правото на Македонија да си ги штити границите. Тие не се само нејзини граници, туку се граници на цела цивилизирана Европа, изјави чешкиот претседател г. Милош Земан.

Двајцата претседатели на средбата разговараа и за унапредување на економската соработка меѓу Република Македонија и Чешката Република.

Претседателот на Република Македонија, д-р Ѓорге Иванов, во рамки на учеството на 73. Генерално Собрание на Обединетите Нации, во Њујорк оствари средба со Генералниот секретар на Обединетите Нации, г. Антонио Гутереш.

На средбата се разговараше за активностите на Република Македонија во рамките на Обединетите Нации.

Претседателот Иванов ја реафирмираше силната посветеност на Република Македонија за зајакнување на улогата на Обединетите Нации во справувањето со глобалните предизвици.

Глобалните предизвици бараат глобален, координиран и унифициран одговор, за што ни требаат силна и ефективна Организација на Обединетите Нации, потенцираше претседателот Иванов на средбата.

На средбата беа разменети мислења за актуелната внатреполитичка состојба на Република Македонија. Во однос на Договорот од Преспа, претседателот Иванов го повтори својот став дека ЕУ и НАТО не смеат да бидат алиби за лош договор со кој се отвораат многу повеќе прашања, одошто се затвораат.

Генералниот секретар на ОН, Гутереш, во однос на претстојниот референдум рече дека македонскиот народ треба сам да ја донесе одлуката и дека таа одлука ние ќе ја почитуваме.

Претседателот на Република Македонија, д-р Ѓорге Иванов, вчера во Њујорк присуствуваше на отворањето на генералната дебата на 73. Генерално собрание на Обединетите Нации, кое годинава е на тема: „Да ги направиме Обединетите нации релевантни за сите луѓе: Глобално лидерство и заедничка одговорност за мирни, рамноправни и одржливи општества".

Во рамки на учеството на Генералното Собрание на ОН, македонскиот претседател одржа и билатерални средби со јорданскиот крал Абдула Втори, со Владимир Воронков, заменик-генерален секретар на ОН задолжен за контра-тероризам и со надбискуп Пол Ричард Галагер, секретар за надворешни работи на Ватикан.

На средбата со јорданскиот крал Абдула Втори беа разменети мислења за севкупните билатералните односи меѓу Република Македонија и Кралството Јордан, при што беше заемно констатирано дека двете земји негуваат пријателски и партнерски односи, без отворени прашања.

Претседателот Иванов посочи на интересот на Република Македонија за натамошно унапредување на билатералните контакти со средби на повисоко ниво, како и потребата од реализирање почести контакти и размена на делегации од двете земји на различни нивоа.

На средбата претседателот Иванов истакна дека Република Македонија со внимание ги следи настаните во регионот и ги поддржува напорите за постигнување на траен мир на Блискиот Исток.

Двајцата соговорници разменија мислења и за внатрешно-политичките состојби и регионалните состојби и приоритети на двете земји.

Претседателот Иванов го истакна интересот на Република Македонија за унапредување на економската соработка и проширување на обемот на трговската размена во сите полиња, за што, како што беше посочено на средбата, е потребна институционална поддршка од двете страни за воспоставување контакти и размена на информации меѓу бизнис секторот.

На средбата двајцата соговорници изразија подготвеност за натамошна соработка и поддршка на мултилатерален план.

На средбата со потсекретарот Воронков беа разменети мислења и информации за улогата на Македонија во борбата против меѓународниот тероризам, постојаните и директни закани од терористичките мрежи.

Претседателот Иванов на средбата го пренесе интересот на Република Македонија за учество на цивилен и воен персонал во телата на Обединетите Нации кои креираат политики за справување со глобалните закани.

Потсекретарот Воронков се заблагодари за учеството на Република Македонија за придонесот во сеопфатната стратегија за борба против тероризам и борба против насилен екстремизам потенцирајќи дека во нареден период ќе предложи соодветен пакет за институционално зајакнување на државите од Балканот и учество во проекти за поголема безбедност.

На средбата со надбискупот Галагер беа разменети мислења за севкупните билатерални односи меѓу Република Македонија и Светиот Престол и беше изразено задоволството од зголемената динамика на средби и посети на високо ниво.

Двајцата соговорници разменија мислења за тековните иницијативи во насока на продлабочување на меѓусебната соработка.

Надбискупот Галагер го поздрави фактот дека, иако католичката заедница во Република Македонија е бројно мала, сепак е високо почитувана, оценувајќи го како потврда за македонскиот модел на меѓурелигиски соживот.

Истакнувајќи дека Република Македонија има длабока традиција на почитување на различните верски чувства, претседателот Иванов ја истакна конструктивната улога на Католичката црква како важен столб на меѓуетнички и меѓурелигиски соживот.

Претседателот Иванов изрази надеж дека Папата Франциск ќе ја прифати отворената поканата за посета на Република Македонија, што би било од огромно значење за унапредувањето на билатералните односи, за католичката заедница во Република Македонија и воопшто за сите христијански верници.

Претседателот Иванов е предвидено да се обрати на 73. Генерално Собрание на Обединетите Нации во четврток.