Претседателот на Република Македонија д-р Ѓорге Иванов, заедно со сопругата, г-ѓа Маја Иванова и синот Иван, денеска присуствуваа на централното одбележување на Рождеството Христово - Божик во Соборниот храм „Св. Климент Охридски", во Скопје, каде поглаварот на Македонската православна црква - Охридска архиепископија, г.г. Стефан чиноначалствуваше Архиерејска Златоустова литургија.

По завршувањето на литургијата претседателот Иванов на граѓаните со православна вероисповед им го честита големиот христијански празник Божиќ, посакувајќи им многу здравје, радост, среќа, но и сплотеност, како за празниците така во текот на целата година.

„Празниците не се само за празување туку и за потсетување, да не потсетат на сето она што ни овозможило да опстојуваме низ вековите. Да не потсетуваат дека треба да го сакаме, почитуваме и чуваме, тоа што го имаме, а не тоа што го немаме. Затоа, да си ја чуваме, почитуваме и сакаме Република Македонија, бидејќи неа ја имаме", рече претседателот Иванов.

На Бадник, во пресрет на големиот христијански празник Божиќ, денеска домот на претседателот на Република Македонија, д-р Ѓорге Иванов, го посетија децата од Центарот за едукација на македонски фолклор „МИТЕВИ" од Скопје, кои ја донесоа Божиќната литија и со песната „Вечниот Бог" го најавија Христовото раѓање

Сопругата на македонскиот претседател, г-ѓа Маја Иванова, од името на семејството Иванови на сите православни христијани им посака да имаат благословена, тивка и света бадникова вечер.

„Една голема мудрост вели дека секој од нас има лице од кое што треба да дава насмевки. Има усна од која што треба да изговори добри зборови, да прави добри дела и очи да ги види добрите работи кај луѓето околу нас. Или, како што рекол Св. Климент, веќе не само за овие празници, туку и секој ден треба да шириме насмевки, да кажуваме добри зборови, да правиме добри дела. Да се натпреваруваме во добрина" истакна г-ѓа Иванова и додаде дека честитајќи го Божиќ посакува Христовата светлина да влезе во секој христијански дом и да го осветлува патот на слогата, на радоста, на љубовта и на успесите.

Сопругата на претседател на Република Македонија, г-ѓа Иванова, изјави дека семејните вредности и традиции и оваа година традиционално ги отвориле вратите на нивниот дом.

„Среќа, радост, песна, насмевки од нашите денешни гости, денешните бадникари, кои со песната „Вечниот бог" ни го навестија Христовото раѓање, ни го навестија раѓањето на Богомладенецот", рече г-ѓа Маја Иванова.

Децата учесници во бадникарските поворки ја пеат песната „Вечниот Бог" и носат пригодно изработени пештери на кои е претставено Рождеството Христово и ѕвезди што ја симболизираат ѕвездата која ги водела тројцата мудреци до местото каде што бил роден Исус. Со божиќната каланда (песна) „Вечниот Бог" се објавува доаѓањето на Спасителот во тело. Песната е древна, води корени уште од некогашното Римско царство, што културолошки продолжи да живее кај православните народи кои се негово духовно и цивилизациско наследство. Иницијативата за возобновувањето на старата православна традиција да се слави Бадник со пеење на „Вечниот Бог" потекна од свештенството на МПЦ-ОА. Според Црквата, радува будењето на оваа стара православна традиција, која од година во година зафаќа се поголем број градови и повторно навлегува во нашето секојдневие.

Претседателот на Република Македонија и Врховен командант на вооружените сили, д-р Ѓорге Иванов, денеска, на првиот ден од Новата година, ги посети припадниците на АРМ во касарната „Чеде Филиповски-Даме" во Кичево.

Претседателот Иванов на припадниците на АРМ кои извршуваат должност за време на новогодишните празници им ја честита Новата 2019 година, посакувајќи им многу здравје, среќа и радост, како и исполнување на сите нивни очекувања.

„Очекуваме оваа година да биде успешна за Армијата, односно Армијата да го добие тоа што и припаѓа, конечно да станеме членка на НАТО, да ја добиеме поканата и Македонија конечно да биде членка на НАТО", истакна претседателот Иванов.

Македонскиот претседател имаше заеднички ручек со припадниците на АРМ во касарната „Чеде Филиповски-Даме", а новогодишните празници, преку видео-конференциска врска, им ги честиташе и на припадниците распоредени на јужната граница како и на учесниците во мисиите во Авганистан, во Либан и во Босна и Херцеговина, на кои им посака успешно завршување на мисиите и враќање во своите домови.

Претседателот Иванов по повод новогодишните празници упати честитки и до сите граѓани на Република Македонија, посакувајќи им како што се сплотени, радосни и среќни за време на празниците, така да бидат и во текот на целата година.

„Живееме во време кога се случуваат огромни промени, како кај нас така и во регионот и во светот, и во овој период на големи промени, пред се треба да останеме луѓе, да се почитуваме меѓусебе, да си веруваме и да се насочиме кон иднината, да обезбедиме посигурна иднина за сите наши поколенија", рече македонскиот претседател.

Претседателот на Република Македонија д-р Ѓорге Иванов, денеска приреди прием за студентите од додипломски, постдипломски и докторски студии, коишто во рамки на проектот „Ден со македонските водечки извршни директори", беа избрани да поминат еден работен ден со менаџери на успешни компании во Република Македонија.

Проектот по втор пат се реализира под покровителство на Претседателот на Република Македонија, д-р Ѓорге Иванов, во организација на Советот на странски инвеститори при Стопанската комора на Македонија.

Програмата ќе се реализира во периодот од декември 2018 година до март 2019 година, а меѓу успешните менаџери кои ќе ја спроведуваат обуката се Штефан Петер од ЕВН Македонија, Илина Јакимовска од „Комфи ангел", Волфганг Марингер од „Арчелор митал", Ајхан Узун, „Рамстор" и Алпер Ерсој „ТАВ Македонија".

Главна цел на проектот е избраните студенти непосредно да се запознаат со работниот ден на еден врвен менаџер, да навлезат во процесите на водењето на компанија, да стекнат нови знаења, практични искуства и вештини кои ќе придонесат за развој на нивниот претприемачки дух.

КОНКУРС ЗА УЧЕСТВО ВО МЕЃУНАРОДНА ОБУКА ЗА МЛАДИ ЛИДЕРИ
Од 11 до 24 февруари 2019 година

Инспирирање и развој на исклучителни млади лидери
Inspiring and Developing Exceptional Young Leaders

П О К Р О В И Т Е Л
Претседател на Република Македонија,
Н.Е. д-р Ѓорге Иванов

Програмата е намената за млади луѓе со завршено високо образование кои имаат желба преку нивните лидерски вештини да придонесат за позитивен развој на општеството и околината во која живеат и работат.

Програмата опфаќа предавања и практични вежби за лидерство, со еминентни предавачи од земјата и од странство, фокусирани на искуствата и знаењата кои би ги поттикнале учесниците да креираат заеднички решенија за предизвиците од 4-та индустриска револуција.

Наставата ќе се одвива на македонски и англиски јазик. Бројот на учесници е ограничен. Право на учество имаат сите млади од Република Македонија и наши иселеници што живеат во странство. Трошоците за сместување и програмските активности ќе бидат покриени од страна на организаторите.

Услови за конкурирање:
• Одлично познавање на англиски јазик
• Просек од високо образование (додипломски студии) еднаков на или поголем од 8,5 (или еквивалентно според македонскиот систем за оценување, доколку се работи за диплома од странство), ќе се смета за предност
• Работно искуство од минимум една година ќе се смета за предност

Потребни документи за аплицирање:
• Две препораки од вашата организација, компанија или факултет
• Потврда за напреден степен на познавање на англиски јазик
• Копија од уверение за положени испити, од каде може да се види просекот
• Биографија
• Кратко мотивационо писмо

Комплетната апликација да се испрати по пошта најдоцна до 24 декември 2018 год. на адреса:

Кабинет на Претседател на Република Македонија
„Вила Водно"
(Комисија за „Меѓународна обука за млади лидери")
Ул: Ацо Караманов 33А
1000 Скопје, Македонија

Претседателот на Република Македонија, д-р Ѓорге Иванов, денеска го прими началникот на Генералштабот на Војската на Црна Гора, бригаден генерал, Драгутин Дакиќ.

На средбата беа разменети мислења за билатералните односи меѓу двете земји и во тој контекст двајцата соговорници изразија задоволство од одржувањето на дијалогот на високо ниво, во сите сфери од заемен интерес, што укажува на традиционално пријателските односи меѓу Република Македонија и Црна Гора.

Во однос на стратешките цели и интеграциските процеси, македонскиот претседател истакна дека членството на Република Македонија во ЕУ и НАТО е од клучно значење за стабилноста и просперитетот на земјава, но и на целиот регион, нагласувајќи го интересот за натамошно унапредување на соработката со Црна Гора, особено во сферата на одбраната и воено-образовната област.

Претседателот Иванов и генералот Дакиќ разговараа за трансформациските процеси во АРМ, како и за искуствата од интегративните процеси на Црна Гора по полноправното членство во НАТО. Македонскиот претседател подвлече дека реформите и мерките кои се преземаат во Република Македонија за унапредување на стандардите во сферата на одбраната ја потврдуваат нашата стратешка определба за членство во Алијансата.

Претседателот Иванов на средбата со генерал Дакиќ изрази благодарност за поддршката што Црна Гора ја дава за евроатлантските интеграции на Република Македонија, како и очекување дека истата ќе продолжи и во наредниот период.