По повод 4 јули, националниот празник на Соединетите Американски Држави, Претседателот на Република Македонија д-р Ѓорге Иванов испрати писмо до Претседателот на САД, Барак Обама:

Дозволете ми, во мое лично име и во име на граѓаните на Република Македонија, да Ви посакам, Вам и на американскиот народ, најсреќен Четврти јули. Пред повеќе од две столетија, остварувањето на очигледната вистина „дека сите луѓе се создадени еднакви, дека на сите луѓе им се дадени, од нивниот Создател, својствени и неотуѓиви права... живот, слобода и потрага по среќа“, ги промени мислите и срцата на американскиот народ и оттогаш претставува инспирација за милиони луѓе, ширум целиот свет, да ги бараат и да ги остваруваат овие права. Пред две децении, македонскиот народ исто така донесе историска одлука за самостојност, независност и сувереност.

Господине Претседателe, задоволен сум од досегашното ниво на македонско-американски односи и соработка, и во овој свечен момент за Соединетите Американски Држави, би сакал да изразам очекување за натамошно продлабочување на пријателството меѓу нашите две држави.

Потсетувајќи се на мудроста на Џеферсон дека нам истовремено ни се дадени и живот и слобода, како и заветот кој Џон Адамс го остави за следните генерации дека „и покрај сите опасности, слободата мора да се брани“, би сакал да Ве уверам, господине Претседателe, дека Република Македонија и нејзиниот народ и натаму ќе ги поддржуваат американските обиди за одбрана на слободата, демократијата и човековите права во светот.

Силно посветени на партнерството со Вашата голема нација, нашите мировници остануваат рамо до рамо со Соединетите Американски Држави во стремежот за поголема безбедност, демократија и човекови права во светот. Инспирирани од овие споделени вредности, остануваме сосредоточени за постигнување на сонот на нашите предци - Македонија како рамноправна членка на европското и евроатлантското братство на народи. Ја користам оваа можност, господине Претседателе, да Ви се заблагодарам за континуираната поддршка за исполнување на нашите долгорочни стратешки цели. Уверен сум дека во периодот што следи нашето стратешко партнерство ќе биде унапредено и збогатено што ќе биде од заемна корист за нашите деца.

На самиот крај, со желби за Ваш личен, и на американскиот народ, успех и благосостојба, дозволете ми да Ви упатам, господине Претседателе, изрази на највисока почит.

Д-р Ѓорге Иванов
 

Признанието „Најмлад научник“ го доделува Претседателот на Република Македонија, како поттик на младата научна и истражувачка мисла во Република Македонија.

Јавниот повик ги опфаќа сите лица што во тековната календарска година навршиле 30 години, а кои во досегашната научна работа имаат постигнато научни резултати што придонесуваат за позитивен развој на општеството и околината во која живеат и работат.

Услови за конкурирање:

• добиена меѓународна награда за научно-истражувачка дејност,
• добиено меѓународно признание за научно-истражувачка дејност,
• добиено домашна награда за научно-истражувачка дејност,
• добиено домашно признание за научно-истражувачка дејност,
• објавени резултати од научно истражување во релевантно меѓународно списание,
• објавени резултати од научно истражување во релевантно домашно списание,
• применетост на резултатите од научното истражување.

Доказ за исполнување на еден или повеќе од условите:

• Биографија,
• Реализирани проекти во 2011 година со кои конкурираат,
• Доказ за државјанство на Република Македонија

Материјалите да се достават во еден печатен и еден електронски примерок (CD).

Право на учество имаат сите граѓани на Република Македонија кои ги исполнуваат условите за конкурирање.

Документите да се достават до Кабинетот на Претседателот на Република Македонија најдоцна до 31.12.2011 година, на адреса:

Кабинет на Претседателот на Република Македонија 
(Комисија за „Најмлад научник“)
„Вила Водно“
Ацо Караманов бб
МК-1000 Скопје
 

По повод смртта на д-р Ото фон Хабсбург, Претседателот на Република Македонија д-р Ѓорге Иванов денеска испрати писмо со сочувство до семејството Хабсбург.

Почитувани,

Со длабоко жалење ја примив веста за смртта на големиот Европеец и голем пријател на Република Македонија, д-р Ото фон Хабсбург.

Во меморијата на граѓаните на Република Македонија ќе останат врежани спомените за Фон Хабсбург, еден од визионерите и архитектите на проширувањето на Европската унија. Воден од темелната идеја на Паневропската унија - единство на сите европски народи во една силна Европа - тој никогаш не ја заборави Македонија, уверен дека „Европа нема да биде целосна без Македонија во неа“.

Република Македонија е неизмерно благодарна за неуморниот ангажман и воедно горда што го имаше за искрен пријател и поддржувач. Фон Хабсбург не задолжи сите нас, да го негуваме и продолжиме неговото дело чиј централен мотив беше идејата за слободна, демократска, просперитетна и обединета Европа.

Токму затоа, во мое лично име и во името на граѓаните на Република Македонија, Ве молам да ги примите изразите на искрено сочувство.

Д-р Ѓорге Иванов
 

Претседателот на Република Македонија и врховен командант на Вооружените сили на АРМ д-р Ѓорге Иванов денеска го прими Началникот на Генералштабот на Армијата на Република Македонија, генерал-потполковник Мирослав Стојановски.

На средбата, која е дел од завршните консултативни средби на Претседателот Иванов за избор на нов Началник на Генералштабот на АРМ, се разменија мислења за актуелните состојби во македонската Армија, како и за развојните и реформските процеси.

На средбата се разговараше за мисијата и задачите на АРМ, придонесот во мировните мисии, како и идните планови и цели на Армијата при што беше подвлечено дека АРМ е посветена на продолжување на транформациските процеси, со акцент на зголемување на интероперабилноста со НАТО и придонесот во здружените операции. На средбата беше повторен заклучокот дека Република Македонија ги постигна бараните реформи и го достигна нивото за полноправно членство во НАТО, а влезот во Северно-атлантската Алијанса останува врвен приоритет на македонската надворешна и безбедносна политика.

Консултациите на Претседателот на Република Македонија за именување на нов Началник на Генералштабот се во завршна фаза и изборот ќе биде објавен на 18 август - Денот на Армијата. Генерал-потполковник Стојановски ќе продолжи да ги извршува своите редовни обврски до 18 Август 2011 година, кога на свечен начин ќе се официјализира поставувањето на нов Началник на Генералштабот на АРМ. Претседателот Иванов изрази надеж дека именувањето на Началникот на Генералштабот на Денот на Армијата на Република Македонија ќе биде почеток на една традиција која ќе важи и за идните поставувања на нов Началник на ГШ на АРМ.

Со цел приближување на работата на Претседателот на Република Македонија до младите, а воедно и укажување на можност за стекнување на работно искуство со кое би можеле полесно да конкурираат на пазарот на трудот, Кабинетот на Претседателот овозможува волонтирање на заинтересираните, во Народните канцеларии во Скопје и Тетово.

Правата и обврските на лицата ангажирани во работата на Народните канцеларии ќе се регулираат согласно Законот за волонтерство („Службен весник на Република Македонија“ бр.85/07 и 161/08).

По завршување на волонтирањето, Кабинетот на Претседателот не превзема обврска за вработување на волонтерите.

Заинтересираните кандидати треба да достават:
• писмо за интерес;
• кратка биографија;
• доказ за завршено образование.

Документите да се достават до Кабинетот на Претседателот на Република Македонија најдоцна до 5.07.2011 година, на адреса:

Кабинет на Претседателот на Република Македонија  (Комисија за „Народни канцеларии“)
„Вила Водно“
Ацо Караманов бб
МК-1000 Скопје

Белешка: Огласот се распишува согласно Одлуката за организација и делокруг на работата на Кабинетот на Претседателот на Република Македонија („Службен весник на Република Македонија“ бр. 30/2000; 9/2001 и 41/2010) и Одлуката за формирање на Народни канцеларии бр: 07-434/1 од 15.03.2010 година.

 

Претседателот на Република Македонија д-р Ѓорге Иванов денеска го посети Министерството за надворешни работи на Република Македонија при што оствари средба со Министерот за надворешни работи Антонио Милошоски и одржа предавање на младите дипломати на тема “Дваесет години македонска независна дипломатија: резултати, состојби, предизвици’’.

Претседателот Иванов имајќи предвид дека МНР е институцијата со која Претседателот на Република Македонија и неговиот Кабинет остварува исклучително тесна и плодна соработка нагласи дека посетата на Министерството ќе прерасне во традиција и ќе се реализира најмалку еднаш годишно.

На средбата со Министерот Милошоски, Претседателот Иванов покрена иницијатива која се однесува на Одликувања за заслужни странски амбасадори по завршување на нивниот мандат во Република Македонија. Со оваа иницијатива на амбасадорите кои со исклучителниот ангажман за време на нивниот мандат дале значаен придонес во унапредувањето на билатералните односи, во економската и културната соработка, на еден симболичен но значаен гест ќе им се оддаде признание од земјата домаќин. Станува збор за сосема нов тип на одликување кое не е предвидено со постојните ордени и одликувања кои се третираат со Закон за одликувања и признанија и е надвор од надлежноста на Комисијата за одликувања и признанија на Претседателот на Репулика Македонија.

Претседателот Иванов покрена иницијатива која се однесува на македонските амбасадори и дипломати, поточно на де-бирократизација на македонската дипломатија. Во согласност со ставовите на Претседателот Иванов искажани при последната средба со македонските амбасадори, Претседателот апелираше за зголемување на слободата во делувањето на македонските амбасадори со паралелно зголемување на одговорностите по кои и ќе бидат оценувани. Претседателот Иванов најави поригорозна анализа и оценување на работата на амбасадорите по следниве критериуми:

1.    Јавна дипломатија - поголем ангажман и присуство на амбасадорите во јавната дипломатија, во медиумскиот и општествениот живот во земјата на акредитација
2.    Промоција на македонското стопанство и економската соработка
3.    Промоција на културните вредности на Република Македонија

Во предавањето пред младите дипломати, Претседателот Иванов направи рекапитулација на резултатите и постигнувањата на македонската дипломатија во пресрет на 20 годишнината од независноста. Ги посочи предизвиците со кои се соочува македонската дипломатија, слабостите и недостатоците. Претседателот Иванов го анализираше и ги запозна младите дипломати со влијанието на глобализацијата и информатичката револуција кои ги менуваат традиционалниот, елитистички и затворен концепт на дипломатија.