По повод празникот 8 Септември, Денот на независноста на Република Македонија и 20-годишнината од создавањето на суверена и самостојна држава, голем број шефови на држави од светот испратија честитки до претседателот Ѓорге Иванов. Ги пренесуваме пораките добиени до овој момент.

Претседателот на Соединетите Американски Држави, Барак Обама во својата порака испраќа честитки до граѓаните на Република Македонија, нагласувајќи дека 8 Септември е ден кога можеме да се осврнеме на значајниот напредок кој Македонија го постигна во изминатите 20 години и да ги засилиме напорите за зајакнување на мултиетничките и демократските инстиутции во Македонија. Соединетите Американски Држави го ценат силното партнерство и остануваат посветени на соработката во поддршка на нашите заедничките цели, наведува во писмото претседателот Обама.

Германскиот претседател, Кристјан Вулф, во својата честитка по повод 8 Септември упатена до претседателот Иванов порачува – Патот на Вашата земја во правец кон членство во Европската унија и НАТО бара смелост, реформи и далкувидост. Бидете уверени дека притоа Германија и понатаму ќе биде на страната на Вашата земја како партнер. Вам и на Вашиот народ Ви посакувам среќа и благосостојба во мир и слобода.

Претседателот на Република Франција, Никола Саркози, во своето писмо наведува дека посебно го радува квалитетот на односите меѓу двете земји и посакува истите да бидат поинтензивни, а соработката да се унапредува не само на билатерален план, туку и во рамки на приближување на земјата кон Европа. – Посакувам со Ваш поттик, земјата да постигне напредок за решавање на спорот за името со Грција, забрзувајќи го притоа процесот на евроатлантска интеграција. Тоа ќе претставува за вашата земја, но и за целиот регион, гаранција за мир и за просперитет“.

Пал Шмит, претседателот на Република Унгарија, го изразува своето задоволство што во последните години односите меѓу двете земји се развиваа многу интензивно. – Сметам дека Вашата официјална посета на Будимпешта, во април годинава, е значителен чекор во овој процес. Во остварувањето на напорите за придружување на Македонија во НАТО и во Европската унија, Република Македонија и понатаму, како и досега, без никакви промени, може да смета на мојата поддршка. Искрено посакувам вашите напори во остварувањето на задачите кои ви претстојат, што поскоро да бидат крунисани со успех.

Во името на сите Канаѓани, своите најискрени честитки ги сподели и генералниот гувернер на Канада, Дејвид Л. Џонстон, нагласувајќи дека врските меѓу Канада и Македонија постојано растеа во текот на годините, и ќе продолжат да растат врз основа на споделената посветеност на вредностите како просперитет, мир и добро управување. – Аплаудирам на напредокот кој Вашата земја го постигна на својот пат кон евроатлантското интегрирање и $ посакувам на Македонија континуиран успех во остварување на оваа цел. Бидете сигурни во непоколебливата поддршка од страна на Канада, во напорите на Македонија да ги надмине предизвиците кои $ претстојат.

Г-ѓата Квентин Брајс, генерален гувернер на Комонвелтот на Австралија, во своето писмо со честитки, воедно, нагласува дека ги поддржува зголемените заемни посети на парламентарци од двете земји, кои ги потенцираат блиските врски меѓу луѓето и културите на двете нации. – Особено задоволство ми беше што на парламентарните избори во јуни 2011, три места беа резервирани за дијаспората и што австралискиот кандидат, Мики Додевски, беше избран да ја претставува зедницата во Австралија и Азија.

Претседателот на Народна Република Кина, Ху Џинтао, во својата празнична честитка до претседателот Иванов и пријателскиот народ на Република Македонија, го споделува своето видување дека кинеско-македонските односи се развиваат стабилно и дека соработката во различни области постигнува позитивни резултати. – Подготвен сум заедно со Вас, да вложиме заеднички напори во духот на принципите на заемно почитување, рамноправност и заемна корист, континуирано да ги промовираме кинеско-македонските односи.

Романскиот претседател, Трајан Басеску, во својата честитка вели: Се присетувам со задоволство на конструктивните разговори кои ги имав со вас г. Претседателе за време на мојата посета на Скопје во 2010 година и сакам да ве уверам во идната цврста поддршка на Романија за достигнување на стратешките определби на Република Македонија за влез во Европската унија и НАТО.

Иван Гашпарович, претседателот на Словачката Република на сите граѓани на Република Македонија им посакува стабилност, просперитет, севкупен напредок и европска иднина на земјата. – Убеден сум дека пријателските односи и соработка меѓу Република Словачка и Република Македонија и понатаму ќе се развиваат во полза на двете нации.

Г-ѓата Мишелин Калми Реј, претседател на Швајцарската Конфедерација во своето писмо споделува искрени честитки до претседателот, владата и граѓаните на Македонија, изразувајќи надеж дека односите на пријателство и соработка меѓу двете земји ќе продолжат со несмален интензитет.

Неговото кралско височество, јапонскиот император Акихито, по повод независноста на Македонија испрати срдечни честитки и искрени желби за среќа и напредок на македонскиот народ.

Искрени честитки по повод 20-годишнината од независноста на Република Македонија испратија и шведскиот крал, Карл XVI Густав, и холандската кралица, Беатрикс.

Срдечни честитки и надеж за натамошно успешно развивање на билатералните односи, прогрес и просперитет, испрати и претседателот на Народна Република Алжир, Абделазиз Бутефлика.
 

Претседателот на Република Македонија, д-р Ѓорге Иванов, денес ги прими акредитивните писма на новоименуваниот амбасадор на Аргентинската Република во Република Македонија, со седиште во Софија, Н.Е. г. Гујермо Салвадор Азрак.

Претседателот Иванов нагласи дека и покрај географската оддалеченост на двете држави, постои заедничка желба и голем потенцијал за уште посеопфатно и посодржинско развивање и унапредување на меѓусебните односи и соработката, во сите сфери од заемен интерес, подеднакво на билатерален и на мултилатерален план.

Претседателот Иванов го изрази интересот од македонска страна за интензивирање и балансирање на економската соработка и трговската размена, информирајќи го новиот амбасадор за напорите на земјата постојано да создава поволен амбиент за странски инвестиции - слободните економски зони и поволностите кои ги нудат, ниските даноци, договорите за слободна трговија со бројни држави. Тој ја нагласи можноста Република Македонија да претставува и влезна врата на аргентинските стоки во регионот на Југоисточна Европа, со поволности кои бизнис-заедницата на Аргентинската Република би можела да ги искористи.

Амбасадорот Азрак, во овој контекст истакна дека ќе направи сè за да придонесе кон зајакнување на економските врски помеѓу Македонија и Аргентина, заложувајќи се да ја поттикнува аргентинската бизнис заедница и активно да ги претставува можностите за инвестирање во Република Македонија. Тој исто така нагласи дека ќе вложи напори за понатамошно промовирање и зајакнување на односите и размената во сферата на културата меѓу двете земји.

Претседателот Иванов и амбасадорот Азрак ја истакнаа целосната подготвеност и на двете држави за натамошно интензивирање на билатералните односи и надградување на соработката со нови содржини.
 

Претседателот на Република Македонија, д-р Ѓорге Иванов, денес ги прими акредитивните писма од новоименуваниот апостолски нунциј на Светиот престол, со седиште во Софија, Н.Е. надбискуп Јануш Болонек.

Претседателот Иванов истакна дека Република Македонија и Светиот престол негуваат односи исполнети со заемно разбирање и поддршка, и нашата земја во континуитет придава посебно значење на развојот на односите и соработката со Светиот престол. Политиката што ја води Светиот престол и залагањата на меѓународен план, афирмирајќи ги врвните морални вредности, се совпаѓаат со надворешно-политичките  ориентации на нашата држава. Република Македонија е мултинационална, мултикултурна и мултиконфесионална држава каде дијалогот, толеранцијата, почитувањето на различноста се вековна традиција. Нашиот модел  на соживот е нашата најсилна легитимација во меѓународното општество. Тоа е и нашиот влог кон регионалната стабилност и просперитет, рече претседателот Иванов.

Новоименуваниот апостолски нунциј на Светиот престол, надбискупот Јануш Болонек искажа висока почит и восхит за етничката хармонија и за религизоната толеранција по која се препознава Република Македонија. Тоа е клучниот фактор за мир, стабилност и социјален прогрес, секаде. Потенцираше дека како апостолски нунциј ќе се залага за натамошна промоција на разбирањето и солидарноста меѓу луѓето и дека ќе направи сè што е во негова моќ за натамошен развој и за продлабочување на традиционално добрите билатерални односи меѓу Светиот престол и Република Македонија.

Надбискупот Јануш Болонек пренесе поздрави од Неговата светост - Папата до граѓаните на Република Македонија. Македонскиот претседател ја реафирмираше поканата и го искажа интересот за реализација на посета на папата Бенедикт XVI на Република Македонија.
 

Претседателот на Република Македонија, д-р Ѓорге Иванов, денес ги прими акредитивните писма на новоименуваниот амбасадор на Народна Република Кина во Република Македонија, Н.Е. Цуј Џивеи.

Претседателот Иванов изразувајќи задоволство од високото ниво на односите меѓу Република Македонија и Народна Република Кина, подвлече дека Македонија високо ја цени независната мирољубива надворешна политика што ја води Кина и нејзината позитивна улога во Азија и во светот. Република Македонија останува цврсто и принципиелно на ставот за постоење на една Кина. Ова е став на граѓаните на Република Македонија и овој став никогаш нема да биде доведен во прашање, без разлика која политичка гарнитура е на власт, рече претседателот Иванов. Македонскиот претседател истакна дека ние никогаш нема да ја заборавиме поддршката од Народна Република Кина уште од најраните денови на нашата независност, а особено принципиелната употреба и ставот кон нашето уставно име.

Претседателот Иванов го изрази интересот од македонска страна за зголемување и унапредување на економската соработка, за динамизирање на можностите за презентација на стопанските потенцијали на Република Македонија за привлекување кинески инвестиции.

Амбасадорот Цуј Џивеи подвлече дека Народна Република Кина високо ја цени позитивната улога на Република Македонија во регионот, и ги почитува и поддржува патот и изборот на стратешките цели на земјата. Изрази задоволство од континуираниот политички дијалог на највисоко ниво и нагласи дека економската соработка меѓу двете земји во последните години бележи нагорен тренд. Продлабочување и интензивирање на оваа соработка ќе биде највисоко во неговата агенда за време на неговиот мандат.

Претседателот Иванов и амбасадорот Џивеи ја истакнаа и потврдија досегашната одлична соработка на мултилатерален план.
 

Претседателот на Република Македонија д-р Ѓорге Иванов денеска во Белград, воочи Деветтиот УНЕСКО регионален самит на шефови на држави од Југоисточн​а Европа, оствари билатерална средба со Претседателот на Република Србија Борис Тадиќ.

Претседателите констатираа позитивна динамика во билатералната соработка меѓу Македонија и Србија во сите сфери, изразувајќи заемно задоволство што отвореноста со која и двајцата пристапија кон соработка, како и нивните чести средби, позитивно се одразуваат во односите меѓу двете земји и придонесуваат за подобро разбирање.

На средбата беа разменети мислења за ЕУ-интегративните процеси на двете земји, како и заедничката констатација дека интеграцијата на целиот регион во Европската унија е без алтернатива.

Иванов и Тадиќ дискутираа и за регионалните прашања, првенствено за Косово, при што беа потврдени позициите на двете држави. Заемната констатација од сите досегашни средби е дека различните позиции во однос на некои прашања, како што е статусот на Косово, или црковното прашање, не смеат и не се пречка за развој на севкупната соработка помеѓу Република Македонија и Република Србија.

Двајцата претседатели воедно разговараа и за значењето на инфраструктурното поврзување, со акцент на неопходноста и заемната корист од Коридорот 10, при што се согласија дека секоја од земјите треба да вложи напори да го заврши својот дел од коридорот.

Претседателот Иванов изрази задоволство од третманот и односот на Република Србија кон македонското национално малцинство. Двајцата претседатели заемно констатираа дека зачувувањето, негувањето и афирмацијата на националните културни идентитети е прашање од врвен интерес за двете земји.

Попладнево претседателот Иванов оствари средба со претставниците на македонската заедница во Србија, кои го информираа за нивните напори во пресрет на претстојниот попис на населението, преку кампањи да го поттикнат слободното изразување на националната припадност кај Македонците. Истакнато беше дека пописниот образец е преведен на македонски јазик. Претседателот Иванов на средбата ја искористи можноста да ги повика сите Македонци кои живеат во Република Србија слободно да ја изразат својата национална припадност на претстојниот попис.

Македонските иселеници изразија задоволство што во рок од две години, по третпат имаат средба со претседателот Иванов. Тие го информираа дека, согласно разговорите поттикнати од Претседателот Иванов пред две години во Нови Сад, Сојузот на македонски организации во кој се обединети 30 македонски здруженија и Демократската партија на Македонците денес се здружени во неформален сојуз - МАКОС (Македонски обединети сили).

Во остварувањето на своите малцински права, македонскиот сојуз најголем резултат годинава постигнал во областа на образованието, со официјалното воведување на македонски јазик во прво одделение во населеното место Јабука, како и со објавувањето Буквар на македонски јазик со елементи на национална култура. Во Јабука се поставени и двојазични табли на улиците.

Претседателот Иванов нагласи дека има голем напредок во регионот во изминатата деценија во однос на почитувањето на малцинските права и дека очекува Македонците во другите земји да имаат ист третман како и малцинствата во Македонија.

По повод државниот празник Рамазан-бајрам, претседателот на Република Македонија, д-р Ѓорге Иванов упати честитка до поглаварот на Исламската верска заедница во Република Македонија, Реис ул улема Хаџи Сулејман ефенди Реџепи, до Ријасетот на ИВЗ, како и до сите верници од исламска вероисповед во Република Македонија.

Почитуван Реис ул улема Хаџи Сулејман ефенди Реџепи,

Чест ми е во мое лично име, и во име на граѓаните на Република Македонија, Вам лично, како и на сите верници од исламска вероисповед да Ви го честитам празникот Рамазан-бајрам и завршувањето на рамазанските пости.

Посакувам празничните денови да ги минете во среќа, радост и добро здравје, во кругот на семејството и на најблиските. Цврстите семејни и пријателски врски остануваат темел на личната среќа и успех во заедницата и затоа овие празнични денови се особено важни бидејќи овозможуваат и покрај секојдневните обврски да се одвои време и за домот и за семејството.

Сакам да укажам дека нашето општество повторно покажа колку ги почитува старите и проверени традиции на заеднички живот и пријателство, при што припадниците на различните верски заедници со заемно почитување ги уважуваат меѓусебните празници. Бев почестен од поканите што ги примив, за присуство на неколку срдечни, заеднички одбележувања на овој светол период. Бројните примери на заедничко одбележување на рамазанските пости на кои присустуваат и граѓани кои не се припадници на исламската заедница, повторно покажаа дека Македонија е општество во кое се негуваат и почитуваат високи хуманистички традиции на кои можеме да бидеме горди.

Почитуван Реис ул улема Хаџи Сулејман ефенди Реџепи, честитајќи Ви го уште еднаш Рамазан-бајрам дозволете ми Вам лично, на членовите на Ријасетот и на сите припадници на исламската вероисповед во Република Македонија да Ви посакам здравје, среќа, добро расположение и духовен мир.