Поради искрениот и длабок хуманизам, уметничките дострели и обединувалчката енергија, претседателот Ѓорге Иванов  постхумно му додели Орден за заслуги за Македонија на Тоше Проески. Орденот на свеченост во претседателската резиденција го прими внукот на Тоше, Кристијан Ристески.

- Орденот е признание за неговите овоземни заслуги, но и израз на нашата љубов и почит кон човекот кој не сакаше сите. Со овој чин, Македонија свечено се обврзува да продолжи да го негува сеќавањето за својот голем син, да ја негува неговата уметност и хуманост со која не збогати, рече Иванов.

Претседателот истакна дека доделувањето на Орденот е симболичен и најскромен, додека посветеноста кон негувањето на добрата мисла, намера и дело, е вистинскиот дар кој можеме да му го дадеме на Тоше.

- Тоше ја афирмираше Република Македонија и покажа дека таа е храбра и достојна, дека треба да веруваме во неа, да ја сакаме, чуваме и промовираме со достоинство. Со своите несебични заложби Тоше Проески уште еднаш не направи горди на своето минато и решителни за својата иднина, рече Иванов.

На доделувањето на Орденот за заслуги за Македонија на Тоше Проески, присуствуваа поранешниот претседател Киро Глигоров, вицепремиерот задолжен за европски прашања Васко Наумовски, министерката за култура Елизабета Канческа-Милевска, ректорот на Универзитетот „Св. Кирил и Методиј“-Скопје Велимир Стојковски, градоначалникот на општина Крушево, членови на семејството на Проески и претставници од фондaцијаta „Тоше Проески“.

По повод 20 годишнината од формирањето на Редакцијата на влашки јазик во Македонската радио телевизија, Претседателот на Република Македонија д-р Ѓорге Иванов го упати следното писмо со честитки -
Денес со гордост го одбележуваме 20 годишниот јубилеј од постоењето и работењето на Редакцијата на влашки јазик при Македонската радио телевизија. Во текот на изминативе две децении, Редакцијата им овозможи на припадниците на влашката заедница преку малите екрани да го негуваат својот јазик, својата култура, своите традиции и вредности, чувствувајќи ја притоа Македонија како својот вистински дом.
Република Македонија е особено горда на влашката заедница која со својата трудољубивост и богата култура претставува нераскинлив дел од историјата на постоењето на нашата држава. Власите се пример на одговорни и посветени граѓани, успешни во сите полиња на општествениот живот. Од борци за слобода и револуционери, па се до хуманисти и уметници со светска слава.
Водена од аманетот кој на Власите им го остави Константин Белемаче: „Целата радост и светлина во домот, за оној што мајчиниот јазик не го заборава!“, Редакцијата доследно ја остварува својата мисија. Мисија која подразбира негување, промовирање и унапредување на влашкиот јазик како суштинска одлика на еден народ. Македонската телевизија беше и сеуште е единствената национална телевизија во светот која емитува програма на влашки јазик.
Со увереност дека Редакцијата ќе продолжи да ја збогатува влашката, а со тоа и македонската културна матрица со нови содржини, емисии и репортажи, и посакувам уште многу децении исполнети со плодна работа.

Обраќање на Претседателот на Република Македонија д-р Ѓорге Иванов на свеченоста по повод одликувањето на Н.Е. д-р Ото фон Хабсбург со ,,Орден за заслуги за Македонија’’ за исклучителен придонес во јакнењето на меѓународната положба и углед на Република Македонија и за промоција на европската иднина на земјата со личен ангажман како претседател на Паневропската Унија и член на Европскиот парламент. Во името на Н.Е. д-р Ото фон Хабсбург, Орденот за заслуги за Македонија го прими неговиот син Н.Е. Георг фон Хабсбург, Амбасадор за европски прашања во Владата на Република Унгарија.

Почитувани,

Денес сме собрани да му оддадеме призание на големиот Европеец, на големиот пријател на Македонија, д-р Ото фон Хабсбург.

На конференцијата на Меѓународната Паневропска унија во Охрид во 2007 година, фон Хабсбург изјави: „За пет години ќе имам сто години, и сакам дотогаш Македонија да влезе во Европската унија“. Денес, тој има деведесет и девет години, и неговата желба, за жал, се уште не е исполнета. Македонија се уште не е членка на Европската унија и не ги има отпочнато пристапните преговори за кои е подготвена. Дозволете ми, да ја искористам оваа свечена прилика, да му  посакам многу здравје и уште многу години живот и што поскоро да му се исполни желбата да ја посети Македонија како полноправна членка на Европската унија.


Во духот на неговите славни предци, кои немерливо ја задолжија европската циливизација, Ото фон Хабсбург се стави во служба на идејата за слободна, демократска и просперитетна Европа. Европа обединета во различностите.


По Втората светска војна, Ото фон Хабсбург останува доследен противник на тоталитаризмот. За време на Студената војна, како пратеник во Европскиот парламент и претседател на Интернационалната Паневропска унија, Ото фон Хабсбург го носеше факелот кој им го осветлуваше патот кон слободата на сите оние народи кои се наоѓаа заробени зад железната завеса. Македонија и нејзините граѓани,  се благодарни за посветеноста со која Ото фон Хабсбург, неговото семејство и блиските соработници се посветија на надминување на идеолошката поделба на Европа. По паѓањето на Берлинскиот ѕид, негов основен мотив беше истите да ги внесе во европското семејство на слободни и демократски нации.

Д-р Ото фон Хабсбург е еден од визионерите и архитектите на проширувањето на Европската унија. Воден од темелната идеја на Паневропската унија, единство на сите европски народи во една силна Европа, тој никогаш не ја заборави Македонија, и секогаш и секаде се зазема за таа, како што честопати вели, „мала, но многу заслужна за Европа и притоа стратегиски важна земја.“ „Европа нема да биде целосна без Македонија во неа“, беа зборовите на Ото фон Хабсбург.


Почитувани,

Секогаш кога Македонија се наоѓаше на распаќе, токму Ото фон Хабсбург со својот авторитет ги потсетуваше носителите на одлуки во европските престолнини дека е „европски интерес да се преземе се за да дојде овој народ до мир и да го најде своето место во заедницата на демократските нации.“

Од мугрите на нашата независност, ние се соочивме со меѓународна изолација бидејќи ни беше оспорено правото на сопствено име. Вратите на многу меѓународни организации со години ни беа затворени. Но, тоа не беше случајот со Паневропската унија. Благодарение на д-р Ото фон Хабсбург, Паневропската унија на Македонија беше примена во Меѓународната Паневропска унија за помалку од четири месеци, иако периодот неопходен за полноправно членство е две години. Тој ни ги отвораше вратите и не застапуваше онаму каде не можевме да влеземе. Овој орден е своевидна благодарност и за македонските активисти и поддржувачи на Паневропското движење кои веднаш ја препознаа природната припадност на Република Македонија во ова движење.

Почитувани,

Македонија во д-р Ото фон Хабсбург, гледа голем пријател, докажан и искрен лобист.
Жалам што тој не е во можност и лично да ни се придружи денес, на ова достојно одбележување на неговите заслуги за Република Македонија. Денес ја имаме честа со нас да биде неговиот помлад син Георг Хабсбург-Лотринген од Унгарија, кој е наш голем пријател. Во Австрија не поддржува неговиот постар син Карл, како претседател на Паневропската унија на Австрија. Во Шведскиот парламент, како докажан пријател на нашата земја, интересите на Република Македонија ги брани неговата ќерка Валбурга.

Токму затоа, Македонија е неизмерно благодарна за неуморниот ангажман на д-р Ото фон Хабсбург и воедно горда што го има за искрен пријател и поддржувач. Затоа, во знак на нашата длабока почит кон него лично и кон неговото семејство, имам особена чест да му доделам „Орден за заслуги за Македонија“, кој, во негово име ќе го прими неговиот син Георг.

Ви благодарам.

Обраќање на Претседателот на Република Македонија д-р Ѓорге Иванов на годишниот прием за претставниците на дипломатскиот кор во Република Македонија.

Ценети екселенции,
Дами и господа,

На самиот почеток, дозволете ми вам и на вашите семејства, да ви ја честитам новата 2011 година и да ви посакам многу здравје, среќа и натамошни лични и професионални успеси.

Почитувани,

Овој традиционален собир, е убава можност да се присетиме на успесите и предизвиците од минатата година и со добра мисла и да ја отвораме вратата на новата година.

На внатрешен план, годината беше одбележана со спроведување на суштински реформи во сите општествени сфери, согласно заедничките европски вредности и стандарди, со што Македонија покажа дека чекори на вистинскиот пат. Вие сте сведоци дека Република Македонија постојано го унапредува своето општество кое почива врз владеењето на правото, врз почитувањето на човековите права, врз уникатниот модел на мултиетнички соживот. Тој пат не е без проблеми и предизвици. Најголемите предизвици сепак остануваат во економската сфера. Верувам дека 2011та ќе биде година на подобрување на состојбите во оваа област, дека полека но сигурно ќе излеземе и ќе ги надминеме последиците што ги остави кризата. Оптимизмот го темелам на реалните показатели, но пред се на силната посветеност на државата и на нашата бизнис заедница и асоцијации.


Почитувани,

На надворешен план, имавме исклучително успешна година во која продолжи афирмацијата на  Република Македонија на  меѓународен план.
Изминатата година ќе ја памтиме и по успешното Македонско претседавање со Комитетот на Министри на Советот на Европа, и тоа во време кога започнаа клучни реформи за организацијата.
Можам да констатирам дека имаме напредок во односите со сите наши соседи, како од непосредното, така и од поширокото соседство, а особено сме горди на постигнатите резултати на полето на регионалната соработка. Верувам дека и оваа година ќе биде одбележана со нови иницијативи кои ќе значат и сеопшт регионален напредок во насока на заедничката европска иднина.

2010та беше година на интензивна меѓународна активност со која многумина од вас можат да посведочат, односите со многу пријателски држави ги издигнавме на повисоко ниво, ги јакневме постојните традиционални врски со многу држави, создававме нови пријателства, ја интензивиравме соработката, се запознававме и отворавме нови перспективи и можности. Со уште поголем интензитет истото ќе продолжиме да го правиме и во Новата 2011 година.

Дами и господа,

Новата година е момент на оптимизам, на нова енергија и на нова сила. 2011та за Македонија е година на јубилеи. Одбележуваме 70 години од борбата против фашизмот, 20 години од независноста, и 10 години од потпишувањето на Охридскиот рамковен договор, нашиот модел на инклузивна демократија кој ќе продолжиме да го унапредуваме и промовираме. Оваа година ќе се присетиме и на трагедијата на Холокаустот, и со отворањето на Меморијалниот центар, ќе одадеме почит на македонските Евреи кои беа жртви на нетолеранцијата и омразата кон различностите. Тој ќе претставува културен центар посветен на промовирање на меѓурелигиското и меѓуетничкото разбирање. Овие јубилеи очекувам да ни го дадат потребниот оптимизам кој ќе нé насочува храбро да бараме решенија на предизвиците.


Сакам да знаете дека за нас, за целото македонско општество, како и за поширокиот регион, европските и евроатланските интеграции продолжуваат да бидат главна движечка сила и фактор на обединување и соработка. Не постои одржлива алтернатива ниту за регионот, ниту за Македонија освен евро-атлантските интеграции. Затоа, бидете уверени, Република Македонија останува посветена на европските и евроатланските интеграции. Затоа 2011та ќе биде година на продолжување на суштинските реформи, на имплементација на вредностите и критериумите, кои ќе не приближуваат до посакуваната цел, но уште позначајно, ќе одговорат на реалните потреби на моите сограѓани.

Од овој аспект, благодарни сме што унгарското претседавање, високо во своите приоритети го постави проширувањето. Верувам дека и пријателска Полска ќе ја следи визијата на основачите на заедничкиот европски дом, и дека 2011та ќе биде година во која Република Македонија и целиот регион ќе оди чекор понатаму во интеграциите.

Почитувани,

Сите вие сте свесни дека, за жал, нашиот пат кон највисоката стратешка цел, полноправно членство во Европската унија и во НАТО е попречен. Жално е што поради ирационална причина, на генерации и генерации македонски граѓани им е отежнат патот до прогресот и благосостојбата. Македонија е подготвена на европски начин да ги премости разликите со соседна Грција. Македонија е европска земја и очекува со неа да се однесуваат европски. Верувам дека низ дијалог, со зајакната доверба и со подобро разбирање, ќе дојдеме до заемно прифатливо решение. Компромис во кој ќе нема победници и поразени. Верувам дека не е далеку денот кога ќе биде отстранета оваа единствена пречка за моите сограѓани да можат да ги уживаат правата и благодетите од членството во европското и евроатланското семејство.


Драги гости,

Сакам да нагласам дека политиката на отвореност кон сите, политиката на интензивни контакти и соработка, на дијалог и зголемено разбирање и доверба, политиката на присутност и реален придонес на Република Македонија на сите форуми и теми од заеднички, регионален и глобален интерес, ќе продолжи да биде највисоко во мојата агенда, и оваа, и следните години.

Верувам дека во сите овие поставени цели го имаме разбирањето и поддршката од нашите пријатели и сојузници.

На самиот крај, би сакал да ви се заблагодарам за севкупната поддршка што Вие и земјите и организациите кои ги претставувате, досега и ја дававте на Република Македонија. Ви посакувам среќна и успешна година.

Благодарам.

Обраќање на Претседателот на Република Македонија д-р Ѓорге Иванов на свеченото доделување на стипендиите “Борис Трајковски” на 20 најдобри студенти за вонредни, двегодишни постдипломски студии на Програмата за бизнис администрација на Факултетот за меѓународни студии од Сити колеџот во Солун, дел од Универзитетот Шефилд од Велика Британија.

Почитувана госпоѓа Вилма Трајковска,
Почитуван министер Тодоров,
Почитувани стипендисти,
Дами и господа,

Ми претставува големо задоволство да ги врачам стипендиите кои го носат името на покојниот претседател Трајковски, човекот кој својот живот го посвети на градењето мостови на разбирање меѓу луѓето. Преку стипендииве го продолжуваме неговото дело, градење на мостови на соработка.

Задоволството е дотолку поголемо бидејќи стипендиите ви ги доделуваме токму вам, најдобрите. При селекцијата вие ги исполнивте нашите високи критериуми. Затоа, сакам да знаете дека сите ние имаме високи очекувања од вас, за кои верувам дека ќе ги исполните доколку работите посветено, со искрена желба и цврста волја.


Почитувани,


Свесни сме дека човековиот ум е наш најзначаен ресурс. Затоа, градењето на квалитетни, високо образувани кадри секогаш е најисплатлива инвестиција. Денес, повеќе од кога било, на Македонија и се потребни лидери во областа на бизнис администрацијата, менаџментот, маркетингот и финансиите. Поради тоа, инвестираме во вас со цврсто уверување дека ќе бидете добри претприемачи и менаџери, со успешна кариера, но и со одговорност кон општеството. Вашите идни успеси ќе бидат добар знак за успешноста на целото македонско општество.

Сакам да нагласам дека ви се дава одлична можност знаењето, вештините и идеите да ги надградите на еден престижен универзитет, СИТИ Колеџот од Солун при Универзитетот Шефилд од Велика Британија.

На вас останува, водени од јасни визии, да превземате иницијативи и посветено да работите на нивно остварување.

Завршувајќи со оваа мисла, дозволете ми сега да ви ги врачам стипендиите, како наш влог во заедничкото подобро утре.

Обраќање на Претседателот на Република Македонија д-р Ѓорге Иванов по повод доделувањето на Големата годишна награда за архитектура.

Почитувани,

Ми претставува особено задоволство да ви се обратам како покровител на оваа традиционална манифестација, вечерва, кога еден од вас ќе биде прогласен за најуспешен архитект за тековната година. Вредноста на ова признание е дотолку поголема што доаѓа токму од колегите архитекти кои најдобро умеат да ја проценат важноста на архитектонското дело.

За некои архитектурата е визуелна уметност, други пак мислат дека е занает. Независно од одговорот на оваа дилема, верувам дека сите се согласуваме околу суштина на архитектурата - да создава, да гради и надградува. Да го спојува корисното со убавото, прагматичното со естетското.

Сите добро знаеме дека архитектурата е огледало на еден народ, на неговите вековни традиции, постојани вредности и идни стремежи. Но, и дејност која им дава слобода на поединците да стават индивидуален печат на своето време.

Токму затоа, македонската архитектура може да се сфати и како куќа чии цврсти темели ги удрија македонските народни неимари. Куќа во која се вградени архитектонските решенија и форми од различните периоди и цивилизации кои низ вековите ја обликувале нашата култура. Додавајќи нови катови, секоја епоха ја доградува и надградува оваа македонска куќа. Секоја генерација има обврска да ја чува но и усовршува нашата куќа, за на следната генерација да и ја предаде побогата и поцелосна.



Централното место во овој голем градителски потфат секако ви припаѓа вам, архитектите. На вас е да го освојувате но и да го обогатувате просторот, изнаоѓајќи нови решенија и форми. Сликата на едно општество е неговата архитектура, а вие, со вашиот творечки дух, вашата имагинација и знаење ја создавате таа слика. Голема е честа, довербата и одговорноста која ви се пружа, да ги препознаете потребите на граѓаните, да имате чувство за современите текови. Да проектирате цврсти, функционални, складни градби во кои луѓето ќе живеат, работат и ќе го минуваат своето време. Да градите зданија чија идеја и конструкција ќе го издржат тестот на времето и ќе остават траен белег во македонската архитектура.

Завршувајќи со оваа мисла, дозволете ми сега да го прогласам и поздравам добитникот на Големата годишна награда за архитектура за најуспешно реализирано архитектонско дело во 2010 година.