Претседателот на Република Македонија д-р Ѓорге Иванов испрати писмо со изрази на сочувство до Бронислав Коморовски, Маршалек на Сејмот - Вршител на должност Претседател на Република Полска, по повод огромната трагедија што се случи во Смоленск во која животот го загуби Претседателот Качински и високи претставници на државната елита на Република Полска.

Во писмото, Претседателот Иванов во име на граѓаните на Република Македонија и во свое лично име изрази најдлабоко сочувство до полскиот народ, до семејството на Претседателот Качински и до семејствата на трагично настраданите во несреќата.

- Република Македонија ја почувствува болката и знае како е на ваков трагичен начин да загуби лидер и државник. Се уште во нашите мисли и спомени живее ликот и делото на Претседателот Трајковски. Сигурен сум дека името на Претседателот Качински ќе остане длабоко врежано во меморијата на полскиот народ. Нашите срца и мисли се со Вас, пишува во писмото од Претседателот Иванов.

Претседателот на Република Македонија д-р Ѓорге Иванов се потпиша во книгата на жалост во Амбасадата на Република Полска, по повод авионската несреќа во Смоленск, Русија во која животот го загуби Претседателот Качински и високи претставници на државната елита на Република Полска.

Претседателот на Република Македонија д-р Ѓорге Иванов испрати писмо со сочувство до Претседателот на САД Барак Обама, по повод изгубените животи предизвикани од силната експлозија која се случи во рудникот за јаглен во сојузната американска држава Западна Вирџинија.

Претседателот на Република Македонија д-р Ѓорге Иванов денеска со “Орден за заслуги за Македонија“ ја одликува Есма Реџепова - Теодосиевска. Орденот за заслуги Реџепова Теодосиевска го добива за исклучителните резултати во нејзината долгогодишна професионална музичка дејност со што даде исклучителен придонес во промовирањето и збогатувањето на музичкото творештво, како и за нејзините хуманитарни активности, а со тоа и афирмација на Република Македонија во светот.

Честитка на Претседателот на Република Македонија д-р Ѓорге Иванов до припадниците на еврејската заедница во Република Македонија по повод празникот Песах

Почитувани,

Дозволете ми да во мое лично име и во името на граѓаните на Република Македонија, Вам лично и на припадниците на еврејската заедница во Република Македонија да ви го честитам празникот Песах, кој е  симбол на непокорноста и желбата за слобода на еврејскиот народ.

Посакувајќи овие празнични денови да ги поминете во мир, среќа и радост би сакал да истакнам дека како Претседател на Република Македонија го ценам големиот придонес на еврејската заедница кон продлабочувањето и унапредувањето на меѓуетничките, интеркултурните и меѓурелигиозните односи во Република Македонија.

Длабоко сум убеден дека, како и досега и во иднина, еврејската заедница ќе продолжи да го дава својот активен придонес за севкупниот развој на Република Македонија, како и за негувањето и продлабочување на добрите и пријателски односи што Република Македонија ги има со Државата Израел.

Честитајќи ви го уште еднаш овој голем празник примете ги моите најискрени желби за мир и благосостојба.


Д-р Ѓорге Иванов

Претседателот на Република Македонија д-р Ѓорге Иванов донесе указ за поставување на г-дин Дарко Ангелов на должноста вонреден и ополномоштен амбасадор на Република Македонија во Република Унгарија, со седиште во Будимпешта.