Претседателот на Република Македонија д-р Ѓорге Иванов денеска го прими шефот на набљудувачката мисија на ОБСЕ во Република Македонија амбасадорот Хозе Луис Хереро.

На средбата, Претседателот Иванов беше информиран за активностите и ангажманот на Мисијата на ОБСЕ во земјата, како и за заедничките проекти кои се спроведуваат со учество на ОБСЕ.

На средбата беа разменети мислења и информации во однос на внатрешно политичките актуелности од изминатиот период. Беше констатирано дека активностите на Мисијата на ОБСЕ се одвиваат во сосема променети околности денес во однос на периодот на отворањето на мисијата, и беа разменети мислења и информации за идните ангажмани на ОБСЕ.

Амбасадорот Хереро го изнесе ставот со кој настапува пред сите политички релевантни фактори од Република Македонија и меѓународната заедница дека ништо не може да ја оправда употребата на насилство за било какви барања и потреби од било која природа.

Двајцата соговорници заклучија дека Република Македонија е на стадиум од демократскиот развој кога институциите работат со полн капацитет и сите барања и потреби од било каква природа треба да имаат свој институционален тек.

Претседателот на Република Македонија д-р Ѓорге Иванов денес (25 мај) го прими Заменик-Претседателот на Владата на Република Македонија д-р Васко Наумовски. На средбата, Наумовски го информираше Претседателот Иванов за активностите кои ги презема Владата на Република Македонија за исполнување на забелешките од последниот Извештај за напредокот подготвен од страна на Европската Комисија. Заменик-Претседателот на Владата Наумовски воедно ги претстави приоритетите во работата на Секретаријатот за Европски Прашања во идниот период.
Претседателот Иванов на средбата го подвлече значењето на евро-атланските интеграции за просперитетот на Република Македонија, како земја која со своите вредности во целост припаѓа во европската заедница на држави и народи.

Претседателот на Република Македонија д-р Ѓорге Иванов на сите православни верници и на сите граѓани на Република Македонија им го честита денешниот државен празник, 24 мај, Денот на македонските и сесловенските просветители и учители Светите браќа Кирил и Методиј:

Почитувани граѓани. Дозволете ми да ви го честитам 24 Мај, Денот на Светите Браќа Кирил и Методиј. Овој празник е особено важен за Македонија, но и целиот словенски свет. Делото на светите браќа Кирил и Методиј, прогласени за заштитници на Европа од страна на Неговата Светост, Папата Јован Павле Втори, се трајно и неизбришливо сведоштво за силата на човековиот дух и за неговата бескрајна добродетел. Светите браќа се спротиставија на затвореното и тесно сфаќање на нивните соперници, кои сакаа да го ограничат знаењето и науката на само неколку тогашни јазици. Нивната голема победа за рамноправноста на народите, за човечката слобода и за ширењето на писменоста и науката, овозможи европското знаење да се прошири до најдалечните краишта на светот.
Ви посакувам благословени празнични денови

По повод 23 мај, Националниот ден на Власите, Претседателот на Република Македонија д-р Ѓорге Иванов ја испрати следната честитка до сите припадници на влашката заедница во Република Македонија.

Почитувани,
Дозволете во мое лично име и во име на граѓаните на Република Македонија да ви го честитам националниот ден на Власите, 23 Мај.
Празнувањето на денот кога пред 105 години турскиот султан Абдул Хамид Втори донесе посебен документ со кој го призна постоење на влашкиот народ како посебен етнички, јазичен и културен субјект  е од особено значење за Влашката заедница, но и за целата македонска држава.
Како нераскинлив дел од македонскиот мултиетнички мозаик вие сте посветени граѓани на својата држава и на својата заедница, успешни во сите полиња на општествениот живот. Благосостојбата и просперитетот на  Република Македонија, како наш заеднички дом, зависи од сите нас и Власите секако имаат пособен придонес кон таа цел.
Со искрени желби за натамошни успеси во негувањето и ширењето на влашката традиција и култура во државава и во светот, уште еднаш од се срце  ви го честитам 23 Мај.

Претседателот на Република Македонија д-р Ѓорге Иванов денес ја прими Клер Биргин нерезидентен Амбасадор на Комонвелтот Австралија. На срдечната средба Претседателот Иванов и се заблагодараи на Н.Е. Биргин за нејзиниот придонес кон градењето на блиски и пријателски односи меѓу двете земји. Претседателот Иванов оцени дека големата и бројна македонска заедница која живее и е интегрирана во Австралија е голема предност за развивањето на односи и за продлабочувањето на пријателството. Претседателот воедно оцени дека одлука на Австралија да пристапи кон употреба на уставното име на Република Македонија во билатералните односи дополнително би ги зацврснала односите на двете земји.
На средбата, од двете страни беше истакнато задоволството од интензивните средби и контакти, имено посетата на Претседателот на Владата на Република Македонија Никола Груевски на Австралија, и посетата на Спикерот на Претставничкиот Дом на Парламентот на Австралија Хари Џенкинс на Македонија. Како следен чекор во развојот на односите на двете земји, Претседателот Иванов изрази надеж дека ќе дојде до отворање на амбасада на Комонвелтот Австралија во Македонија.

Претседателот на Република Македонија д-р Ѓорге Иванов денес ги прими Министерот во Владата на Република Македонија г-дин Хади Незир, Претседателот на Демократската Партија на Турците во Македонија и пратеник во македонскотот Собрание г-дин Кенан Хасипи и Кадир Сали, генерален секретар на партијата.
На срдечната средба беше разгледана положбата на значајната труска заедница во Република Македонија, и придонесот кој го дава во развојот на македонското општество. Беше истакнато задоволство од извонредните односи меѓу Република Македонија и Република Турција, за што несомнено свој придонес го дава и турската заедница во Македонија, како и поединците, етнички Турци, на истакнати позиции во македонската држава. Претседателот Иванов изрази очекување дека одличните односи на политички план проследени со голем број на посети меѓу Македонија и Турција ќе се преточат во еднакво добри економски односи, за што веќе се во тек поголем број на значајни, конкретни иницијативи.