На одделни средби со најстариот и најмладиот брачен пар кои растеле во дом без родителска грижа и потоа основале семејство, Претседателот Иванов денес се запозна со проблемите со кои се соочуваат овие семејства, како и со нивното барање да ги откупат становите  во кои живеат. Никола Богоески, кој со сопругата добил социјален стан 25 години по заминувањето од Домот, го информираше Претседателот Иванов за  неговиот досегашен опстанок под кирија и за очекувањата за иднината.
- Работам во Центарот за рециклажа, а со примањата можеме да ги платиме сметките за струја за вода и другите давачки. Станот сакаме да го откупиме. Го запознаваме претседателот Иванов со ова барање за кое има некои регулативи со оглед дека изградбата е и со пари од донации - изјави Богоески.
Тој наскоро треба да го добие имотниот лист за станот кој му беше доделен пред два месеци преку распределбата на 102-та таканаречени социјални станови во населбата Јурија, што ја организираше Министерството за транспорт и врски.
Според Илија Јовановиќ, Претседател на Здружението на деца и младинци без родители од детските домови и дом семејства на Македонија - Градиме иднина - Скопје, Иванов е првиот македонски Претседател кој се заинтересирал за проблемите на децата без родителска грижа.

Во Катланово денес се одржа неформалната средба на претседателот Ѓорге Иванов со лидерите на поголемите политички партии во Македонија. На средбата со шефот на државата присуствуваа претседателите на ВМРО-ДПМНЕ Никола Груевски, на СДСМ Бранко Црвенковски и на ДУИ Али Ахмети. Лидерите на ДПА Мендух Тачи и на Нова Демократија Имер Селмани, иако поканети, не дојдоа на средбата.

Безбедносните структури во Македонија добро си ја работат работата и затоа нема потреба од свикување на Советот за безбедност на државата - изјави претседателот Ѓорге Иванов по средбата во Катланово. Иванов, коментирајќи ги последните заплени на поголемо количество оружје кај Блаце и Радуша, рече дека некои структури упорно се обидуваат да го прекршат законот и за нив ќе следат соодветни санкции.

Освен за безбедносната ситуација во земјата, на неформалната средба станало збор и за состојбата во регионот, прашањето за човековите права, малцинските права, како и за интересите на политичките партии. Иванов истакна дека ваквите средби се корисни за продолжување на политичкиот дијалог во земјата.

Во Кабинетот на Претседателот Иванов во тек е пријавување за учесници на проектот Школа за лидери. Обуката е наменета за млади луѓе кои го завршиле високото образование. Предавачи на Школата, покрај Претседателот, се истакнати професори и професионалци од разни области на општествениот живот. Школата ќе се одржи во Охрид, во периодот од 16 до 27 август. Наставата се одвива на македонски и на англиски јазик.

Право да се пријават имаат граѓани на Република Македонија, како и деца на македонски иселеници што живеат во странство. Просекот од високото образование на кандидатите треба да биде еднаков или поголем од 8,5. (или еквивалентно доколку се работи за диплома од странство). Работното искуство, како и магистратура, ќе се сметаат за предност.

Кандидатите треба да достават две препораки од компанија во која работат, факултетот каде што студирале или организација во која се активни. Потребна е потврда за одлично познавање на англискиот јазик, копија од Уверение за положени испити, биографија и кратко мотивационо писмо.

Заинтересираните кандидати може да се пријават, по пишан пат, на адресата - Кабинет на Претседателот на Република Македонија, Комисија за Школа за лидери, улица Ацо Караманов ББ, 1.000 Скопје.

Пријавите треба да бидат испратени најдоцна до 1 јуни 2010 година.

Трошоците за сместување со полн пансион ќе бидат покриени од страна на Кабинетот на Претседателот Иванов.

Претседателот на Република Македонија д-р Ѓорге Иванов денеска го прими Помошникот државен секретар за европски и евроазиски прашања на Соединетите Американски Држави д-р Филип Гордон.

На средбата, Претседателот Иванов подвлече дека Македонија високо го цени ангажманот на Соединетите Американски Држави за надминување на единствената пречка за интеграцијата на Република Македонија во евро-атлантските структури.

Претседателот Иванов ги искажа македонските ставови во врска со разликата околу името со нашиот јужен сосед и потенцираше дека Република Македонија е подготвена за взаемно прифатливо решение во рамките на Повелбата, резолуциите на Обединетите Нации и на меѓународното право.

Имајќи ги предвид ефектите од опстојувањето на Република Македонија надвор од овие структури, кои се одразуваат и на економскиот и на вкупниот политички и општествен живот, Претседателот Иванов нагласи дека Република Македонија е таа што е најзаинтересирана за решение до кое може да се дојде само со почитување на рамката во која се водат разговорите и со искрена политичка волја меѓу двете страни.

Помошникот државен секретар за европски и евроазиски прашања на Соединетите Американски Држави д-р Филип Гордон изрази надеж дека со искрена политичка волја од двете страни може да се дојде до взаемно прифатливо решение. Гордон нагласи дека САД и понатаму сметаат на партнерството и пријателството на Република Македонија и дека ќе продолжат да ја поддржуваат Република Македонија во нејзините евро-атлантски аспирации. 

На средбата стана збор и за состојбите во регионот и учеството на македонските војници во мисијата ИСАФ во Авганистан.

Граѓаните на Република Македонија денеска имаа можност директно да се запознаат со Претседателот д-р Ѓорѓе Иванов и во неговиот Кабинет непосредно да поразговараат со него за прашањата за кои се интересираат или да достават некои предлози до него. Групите граѓани беа пречекувани од членовите на Кабинетот на Претседателот и водени низ дворот на вилата „Водно“. Притоа им беше појаснет начинот на кој Претседателот Иванов ги пречекува неговите гости.

На кусата средба во претседателскиот кабинет граѓаните најмногу се интересираа за проблемот со името, за економската состојба во Македонија, а некои изнесуваа и свои предлози.

Граѓанин од Велес на претседателот Иванов му посочи дека во близина на Велес непосредно до фабриката за вештачко ѓубриво постои големо наоѓалиште на минералот лапорец и му предложи на Претседателот да се заинтересира да се спроведе испитување на квалитетот на минералот. Тоа, како што кажа, ќе придонесе за отворање на дури три фабрики за цемент во кои ќе може да се вработат околу 2,000 луѓе.

Граѓанин на Скопје го праша Претседателот Иванов што прави за решавање на проблемот со името и до каде може Македонија да оди со отстапките. Претседателот Иванов му одговори дека Македонија направила се што е во нејзина моќ за да ги исполни критериумите за НАТО и ЕУ, а тоа, како што рече, било потврдено во Букурешт кога Македонија само заради името не доби покана за НАТО, како и со последниот Извештај на Европската Комисија каде беше оценето дека Македонија ги исполнила сите услови за почеток на преговори. Претседателот посочи дека доколку Грција не беше во економската состојба во каква што е, новиот грчкиот Премиер Папандреу ќе направел нешто за да се помести позицијата на Грција на подобро.

- Аргументите за името, идентитетот и јазикот се на наша страна, но моќта е на грчка страна. Правото не познава оспорување на име на држава како што е случајот со Грција поради што ние не можеме да се повикаме на друг сличен случај. Референцата поранешна југословенска Република Македонија под која бевме примени во Обединетите нации првично беше само за употреба во ОН, а со Времената спогодба се прошири и на сите меѓународни институции. Нелогично е тоа што го бара Грција од нас и мислам дека ниту еден политичар во Македонија нема да се согласи да се менува името на државата, Уставот, јазикот и нацијата за внатрешна употреба. Сметам дека треба да се преговара само за промена на срамната референца под која Македонија е примена во ОН. Доколку економската ситуација во Грција беше подобра, Премиерот Папандреу мислам дека ќе направеше нешто за да се помести позицијата на Грција на подобро, рече Претседателот Иванов во одговорот и додаде дека останати детали за неговиот став не може да каже бидејќи станува збор за прашање од особен интерес за државата.

Друг граѓанин се интересираше за економската состојба во Македонија и за тоа дали постои можност грчката криза да се прелее кај нас. На тоа Претседателот Иванов му одговори дека Македонија е многу помалку погодена од кризата од останатите бидејќи е мала држава и може лесно да се менаџира со нејзе. Тој ја пофали Владата за чекорите кои ги презема за заштита од економската криза и додаде дека при престојот во Москва на одбележувањето на 65-годишнината од победата над фашизмот сите претседатели искажале вознемиреност од економската криза и падот на еврото, но нагласи дека се надева оти таа нема да се прелее во Македонија иако, како што кажа, не е добро ако е лошо кај комшијата.

- Со Грција можеби имаме проблем со името, но Грција е наш економски партнер и затоа не е добро доколку има проблеми, рече Иванов.

Македонскиот претседател Ѓорге Иванов ја посвети првата година од мандатот на изградбата на позитивен амбиент за Македонија, на исполнување на ветеното пред изборите. Политиката што ја води е исправна. Како и секој човек и тој може да згреши, но своите грешки ги признава и се обидува да ги исправи, сметаат поддржувачите на неговата кандидатира за Претседател, со кои тој денеска имаше средба по повод едногодишнината од неговата инаугурација.

- Првата година од неговиот мандат ќе ја паметам по неговата активност на неколку полиња, пред се она што е во негова надлежност меѓународната политика, практично во креирањето амбиент за градење на позитивна слика за Македонија. Она што мене лично најмногу ми се допладна е што тој има две работи кои ги поседува, а се значајни за човек на така висока позиција. Од една страна цврсто стои на иденетитетот македонски, не заборава, кои сме ние и тука има многу информации и е едуциран, а од друга страна се залага за отвореност и за позитивна слика за Македонија, истакна по средбата Златко Жоглев, ректор на Универзитетот „Свети Климент Охридски“.

Драматургот Братислав Димитров смета дека и покрај функцијата што ја извршува претседателот Иванов воопшто не се променил, дека работи чесно и напрно, што како што вели, ќе даде резултати.

- Во кампањата му предложив да биде тоа што е, дека заради тоа го поддржуваме и оти поради тоа ќе ги добие изборите. Познатата теза дека власта расипува, не држи, туку важи онаа дека таа ги демаскира луѓето. А јас со задоволство може да кажам дека и покрај високата фукција, претседателот Иванов ги задржа своите човечки вредности и ставови. Тој можеби не делува атрактивно и ефектно во правата година, но е вреден и многу работи. Тој начин на работа кога тогаш ќе донесе добри резултати во неговиот мандат, рече Димитров.

Ставовите за чесноста, работливоста и посветеноста на претседателот Иванов ги дели и оперската пејачка Славица Галиќ Петровска, која како што рече, е задоволна од она што го работи претседателот и смета дека она што го ветувал пред изборите го исполнува. - Претседателот Иванов може и да погреши, но забелешките за тоа ги прифаќа и се труди грешките да ги поправи, рече Галиќ Петровска.

На денешната средба, меѓудругите, присуствуваа академиците Цветан Грозданов, Ѓорги Ефремов, Томе Башевски, оперските пејачки Славица Галиќ Петровска, Весна Димовска Илиќ, Раде Силјан И Веле Смислевски од Друштвото на писателите на Македонија, ректорите Саша Митрев од штипскиот и Златко Жоглев од битолскиот универзитет, Мане Јаковлески и други.