Во тек е Јавниот повик за избор на „Најдобар млад научник" за 2015 година, признание што шеста година по ред го доделува Претседателот на Република Македонија, д-р Ѓорге Иванов.

Јавниот повик за избор на „Најдобар млад научник" за 2015 година е отворен до 31 декември за сите млади луѓе до 30 години, кои во досегашната научна работа имаат постигнато научни резултати што придонесуваат за позитивен развој на општеството и околината во која живеат и работат.

Услов за конкурирање на заинтересираните е да имаат добиена меѓународна награда, меѓународно или домашно признание за научно-истражувачка дејност, резултатите од научното истражување да биле објавени во релевантно домашно или меѓународно списание и да имаат своја применетост.

Проектот „Најдобар млад научник", инициран од страна на претседателот Иванов, има за цел да го поттикне развојот и да ги стимулира вложувањата во науката, да ги поддржи научните установи и младиот научен кадар, но и да ги награди врвните научни достигнувања.

„Нашето досегашно искуство покажува дека во Република Македонија постои голем потенцијал на млад науноистражувачки кадар, посветен на научната мисла и дејност. Оттаму, ги повикувам и охрабрувам сите млади истражувачи да аплицираат на јавниот повик, со цел нивниот успех да биде препознаен", вели проф. д-р Атанас Кочов, декан на Машинскиот факултет во Скопје и претседател на Комисијата за признанието „Најдобар млад научник".

Според Кочов, радува фактот што бројот на апликанти постојано се зголемува и изрази очекување трендот да се задржи и оваа година.

Признанието „Најдобар млад научник" беше прв пат доделено од страна на претседателот Иванов во 2010 година, на м-р Никола Златанов, докторант на Универзитетот на Британска Колумбија, Канада.

Во 2011 година признанието му беше доделено на д-р Трифче Сандев, кој своето високо образование го има стекнато на Институтот за физика, на Природно-математичкиот Факултет – Скопје, каде и ја одбрани неговата докторска теза.

Во 2012 година признанието „Најдобар млад научник" беше доделено на д-р Катерина Бачева, која своето високо образование го има стекнато на Институтот за хемија при Природно-математичкиот факултет.

Во 2013 година признанието го доби м-р Петар Стојанов, биоинформатичар кој во Броуд Инститјут, Бостон, САД се занимава со биоинформатичка анализа на генетските промени кај малигните заболувања.

Носител на признанието „Најдобар млад научник" за 2014 година е м-р Даниел Денковски, кој работи на полето на електротехника и информациски технологии.

Апликацијата за учество на јавниот повик треба да содржи биографија, реализирани проекти во 2015 година со кои се конкурира и доказ за државјанство на Република Македонија.

Заинтересираните своите документи треба да ги достават до Кабинетот на Претседателот на Република Македонија најдоцна до 31.12.2015 година.

Претседателот на Република Македонија, д-р Ѓорге Иванов денеска оствари средба со градоначалникот на Солун, г. Јанис Бутарис, со претставници на стопански комори од Република Македонија и Република Грција, со претставници на медиумите од двете земји и со универзитетски професори.

Средбите на претседателот Иванов следуваат по серија на успешни состаноци на претставници од различни сектори од двете земји на кои се разговараше за заеднички проекти од областа на промоцијата на инвестициите, економската соработка, универзитетската соработка и заеднички проекти од областа на екологијата.

Во поширокиот контекст на мерките за градење доверба помеѓу двете земји, претседателот Иванов истакна дека „заедничката соработка помеѓу двете општества е доказ дека се возможни решенија за предизвиците кои се пред нас, а нештата кои нè поврзуваат се побројни од оние кои нè разделуваат".

Претседателот на Република Македонија, д-р Ѓорге Иванов, денеска прими делегација од Република Турција по повод престојниот „ Ден на пријателство" на лицата со посебни потребни од Македонија и Турција.

На средбата, на која присуствуваше и г-ѓа Маја Иванова, се разговараше за досегашните ангажмани на невладините организации од Република Турција за полесно вклучување во секојдневниот живот на лицата со посебни потреби и можната соработка со претставници и здруженија од Република Македонија. При тоа, беше споменат значајниот ангажман во многу проекти и активности на г-ѓа Маја Иванова за помош на овие лица.

Претседателот Иванов порача дека лицата со посебни потреби заслужуваат посебно внимание со цел да им се овозможат неопходните услови за полесно интегрирање во секојдневните животни текови.

Делегацијата од Република Турција составена од амбасадорот во Република Македонија Н.Е. г.Омур Шолендил, г-ѓа Нимет Баш, поранешна министерка за образование, г-ѓа Тулај Кајнарџа, пратеничка, г. Локман Ајва, г-ѓа Ѓулај Далјан , г-ѓа Зехра Бетул Бајар и д-р Ајлин Чифтчи претставници на Здружението за лица со посебни потреби „Бејаз ај" и Ајше Бохурлер, колумнист, му се заблагодари на претседателот Иванов за досегашната поддршка на активностите за лицата со посебни потреби, потенцирајќи дека ваквите проекти се многу значајни за овие лица, а особено битно е креирањето на јавна свест преку организирање на кампањи за нивна поддршка.
 

Претседателот на Република Македонија, д-р Ѓорге Иванов денеска ги прими претставниците на македонската репрезентација во кик-бокс, по повод остварениот успех на 20. Светско првенство во Белград, одржано од 24 октомври до 1 ноември, на кое македонските репрезентативци освоија два златни и еден бронзен медал.

Македонскиот претседател упати честитки за постигнатиот голем успех на македонските репрезентативци и им порача и во иднина да продолжат достојно да ја претставуваат Република Македонија на големите спортски натпреварувања.

Претседателот на КБФМ, Александра Нелковска, тренерот Драган Атанасовски и кик-боксерите Ненад Манојловски, Димитар Ѓорѓиев и Стефани Тодорова се заблагодарија за приемот и укажаната чест од страна на претседателот Иванов и изјавија дека и во иднина ќе направат се достојно да ја презентираат Македонија во светот. Тие информираа за нивните тековни ангажмани и идни планови, изразувајќи надеж дека нашата земја и во блиска иднина ќе биде домаќин на некое врвно натпреварување од овој спорт како што беше случајот во 2011 кога нашата земја го организираше Светското првенство во кик-бокс.

На годинешното Светско првенство во кик-бокс нашите репрезентативци се закитија со уште две награди. Ненад Манојловски ја освои наградата „најдобар борец" на татами, додека Димитар Ѓорѓиев стана по трет пат шампион во категоријата кик-лајт.

Актуелните случува во регионот и Европа, како и можните перспективи за деблокирање на македонските европски и евроатлански интеграции, забрзана интеграција на балканските држави, беа темите на кои денеска во Париз разговараа македонскиот претседател, Ѓорге Иванов и словачкиот заменик-премиер и министер за надворешни и европски работи, Мирослав Лајчак.

На средбата беа констатирани одличните политичките односи меѓу Македонија и Словачката Република и изразена подготвеност за унапредување на севкупната меѓусебната соработка на билатерално и мултилатерално ниво.

Во разговорите беа разменети мислења околу политичката и безбедносната состојба во Република Македонија, во контекст на случувањата со бегалската криза, како и за најновиот извештај на Европската комисија за напредокот на Македонија.

Во однос на стратешките приоритети на Република Македонија, македонскиот претседател изрази очекување дека Словачка и во иднина ќе ги поддржува нашите аспирации за членство во ЕУ и НАТО, нагласувајќи дека е потребен посериозен ангажман од Европската унија и од Алијансата за деблокада на европските и евроатлантските интеграции и придвижување на Република Македонија.

Досегашниот пристап на Европската унија кон Република Македонија очигледно не даде резултати. А во одредена мера таквиот пристап влијаеше негативно на политичкиот амбиент во земјата. Затоа апелирам , после изборите конечно да биде деблокиран овој процес и Република Македонија да добие датум за почеток на преговори со ЕУ", истакна на средбата македонскиот претседател.‎

Во однос на престојниот НАТО самит, претседателот Иванов апелираше во носењето одлуки и креирањето политики, Алијансата и земјите-членки да не ги игнорираат пресудата од Хаг, Времената спогодба, геополитичките аспекти и предизвици во регионот на Југоисточна Европа.

Министерот Лајчак посочи дека Словачка добро ги разбира последиците од предолгата статус-кво состојба во интеграциите и дека како и досега Република Македонија може да смета на поддршката од неговата земја.

Со средбата со Лајчак, претседателот Иванов ја заокружи работната посета на Париз, каде учествуваше на лидерскиот форум по повод 70 години од основањето на УНЕСКО. Македонскиот претседател оствари повеќе билатерални средби со лидерите, учесници на форумот, како и со ГД на УНЕСКО, Ирина Бокова, и првиот човек на организацијата на Франкофонијата, Микаела Жан.

Претседателот на Република Македонија, д-р Ѓорге Иванов, го посети местото во близина на концертната сала „Батаклан" во Париз, каде во петокот беше извршен еден од терористичките напади. Во чест на загинатите жртви, претседателот Иванов запали свеќа и положи свежо цвеќе. Стотици граѓани на Париз секојдневно на ова место положуваат цвеќе во чест на загинатите жртви.

„Со самото наше присуство на овој Самит, укажуваме дека целта која што ја имале терористите не ја постигнаа, не не исплашија. Ние дојдовме тука да бидеме солидарни и со Парижаните и со Французите, и да се соочиме со оваа нова реалност, која создава психоза и создава страв кај граѓаните, кај луѓето. Како што кажав во една моја изјава, ова не е напад само на Париз и само на Франција, ова е напад врз целиот цивилизиран свет, уништување на сите придобивки кои се создадени со дијалог и со почитување меѓу луѓето", изјави претседателот Иванов.

Во терористичките напади во Париз вкупно 129 лица го загубија животот и 352 беа ранети. На местата каде беа извршени грозоморните чинови, во текот на целиот ден, спонтано се собираат илјадници граѓани, во знак на осуда на тероризмот и почит кон жртвите. Меѓу загинатите во терористичките напади, немаше македонски државјани. Претседателот Иванов оствари средба и со претставници на македонската дијаспора во Париз.

„На средбата со нив ми беше искажано сето она што се чувствува деновиве во Париз, но и нивната храброст да се соочат со сево ова што се случува. Имаме среќна околност што ниту еден од Македонските граѓани ниту е повреден, ниту бил дел од овие немили настани. Тие испраќаат пораки до сите свои роднини во Македонија, да не се грижат за нив, дека тие се веќе подолго време тука, ги знаат сите околности и се соочуваат со сите овие предизвици што постојат", рече претседателот Иванов.

Претседателот Иванов вчера во Париз се обрати на лидерскиот форум на 38. сесија на Генералната конференција на УНЕСКО на тема „70 години УНЕСКО - мир и одржлив развој во сложен свет", од каде порача дека повеќе од кога и да е порано, на светот денес му е потребно УНЕСКО и дека нема да дозволиме на терористите да ни ги одземат мирот, слободата и правдата.