Претседателот на Република Македонија, д-р Ѓорге Иванов, денеска ja прими г-а Виорика Данчила, претседател на Владата на Романија.

Двајцата соговорници констатираа дека односите меѓу двете земји ги карактеризира висок степен на пријателство, конструктивен и отворен политички дијалог.

На средбата беа разменети мислења за актуелните политички случувања во Република Македонија и во Романија и за предизвиците со кои се соочува регионот на Југоисточна Европа.  Претседателот Иванов потенцираше дека мирот, стабилноста и безбедноста на регионот се од клучно значење за целиот европски континент. За таа цел е неопходно јакнење на регионалната соработка и јакнење на меѓусебната доверба и поддршка, порача на средбата претседателот Иванов.

Двајцата соговорници разменија мислења за стратешките цели и надворешно политички приоритети на Република Македонија и изразија подготвеност за натамошно продлабочување на соработката на билатерален, регионален и мултилатерален план.

На средбата беа разменети мислења и информации во врска со можностите за натамошно продлабочување на билатералната соработка меѓу двете држави, во сите области од заемен интерес, а посебен акцент беше ставен на потребата од јакнење на економската соработка.

Претседателот на Република Македонија, д-р Ѓорге Иванов денеска во Вила Билјана во Охрид ги прими акредитивните писма на новоименуваните амбасадори на Обединетото Кралство на Велика Британија и Северна Ирска и на Кралството Саудиска Арабија во Република Македонија.

На предавањето на акредитивните писма од страна на новоименуваниот амбасадор на Обединетото Кралство на Велика Британија и Северна Ирска, Н.Е. г-а Рејчел Галовеј, претседателот Иванов оцени дека постои заеднички интерес за натамошно интензивирање на одличните билатерални односи меѓу Република Македонија и Обединетото Кралство и го потенцираше интересот на Република Македонија за интензивирање на економската соработка и размена.

„Оваа година, Република Македонија одбележува 25 години од воспоставување дипломатски односи со Вашата земја. Од 1993 година, Македонија и Обединетото Кралство во континуитет градат пријателски релации особено во контекст на британската поддршка и помош за Република Македонија и за нејзиниот пат кон Европската Унија и НАТО. Во оваа свечена пригода би сакал да истакнам дека граѓаните на Република Македонија се посебно благодарни за поддршката што Обединетото Кралство ја дава во остварувањето на македонските стратешки приоритети", рече претседателот Иванов.

Амбасадорката Галовеј истакна дека Обединетото Кралство е долгогодишен и искрен партнер на Република Македонија и поддржувач на апсирациите на земјата за членство во Европската Унија и во НАТО.

„Западниот Балкан е значаен регион за Обединетото Кралство, што го покажавме со неодамнешниот самит во Лондон на којшто нашиот премиер беше домаќин. Ние ја зголемуваме нашата поддршка и за Македонија и за регионот со цел да ги поддржиме вашите напори за градење просперитет во безбедно и стабилно соседство. Успехот во овие области ќе биде од корист за Обединетото Кралство и за Европа како целина", рече амбасадорката Галовеј.

На средбата со новоименуваниот амбасадор на Кралството Саудиска Арабија во Република Македонија, со седиште во Тирана, Н.Е. г. Абдулмомен бин Мохамед Шараф, македонскиот претседател го потенцираше интересот на Република Македонија за унапредување на севкупната соработка со Кралството Саудиска Арабија, особено во делот на економската соработка и трговската размена. Претседателот Иванов изрази уверување дека амбасадорот Шараф со своето дипломатско и професионално искуство ќе придонесе во развивањето на билатералните односи меѓу двете земји.

Претседателот Иванов на новоименуваните амбасадори им честита за функцијата и им посака успех во вршењето на одговорната дипломатска должност.

Почитуван Претседателе,

Со длабоко жалење ја примив веста за катастрофалните пожари кои го погодија регионот на Атина и предизвикаа вистинска трагедија во Вашата земја. Искрено жалам за загубените животи од оваа ужасна непогода.

Дозволете ми, во овие моменти на национална тага, во името на граѓаните на Република Македонија и во свое лично име, да Ви упатам изрази на длабоко сочувство.

Ве молам, Ваша Екселенцијо, изразите на сочувство да ги пренесете до роднините и блиските на трагично загинатите од оваа голема трагедија.

д-р Ѓорге Иванов

Претседателот на Република Македонија, д-р Ѓорге Иванов, денеска го прими г. Џанг Чингли, потпретседател на Националниот комитет на кинескиот политички и консултативен совет.

На средбата беа разменети мислења за севкупните билатарални односи меѓу Република Македонија и Народна Република Кина, во годината кога се одбележуваат 25 години од воспоставувањето на дипломатските односи.

Двајцата соговорници изразија задоволство од постигнатиот исклучителен напредок во севкупните билатерални односи, и беше констатирано дека постојат огромни потенцијали за натамошно продлабочување на соработката, особено на економски, културен и образовен план.

Претседателот Иванов на средбата посочи дека негувањето на долгогодишното пријателство, јакнењето и унапредувањето на искреното партнерство со Народна Република Кина е трајна определба на Република Македонија.

Македонскиот претседател ја повтори позицијата на Република Македонија за поддршка на политиката „Една Кина", како основа за натамошно продлабочување на пријателските односи меѓу двете земји.

На средбата претседателот Иванов изрази задоволство од успешниот политички дијалог во рамки на процесот на соработка на НР Кина и земјите од Централна и Источна Европа во форматот 16+1, посочувајќи дека Република Македонија има активна и конструктивна улога во процесот.

Претседателот Иванов посочи и на важноста од зајакнување на соработката на двете земји во рамки на иницијативата „Еден појас, еден пат", преку реализација на конкретни заеднички проекти во инфраструктурата и енергетиката.