Претседателот на Република Македонија д-р Ѓорге Иванов денеска ги прими сараевскиот надбискуп, кардиналот Винко Пулиќ, бискупот скопски и апостолски егзарх, д-р Киро Стојанов, сестра Марија Према, наследничка на редот на Мајка Тереза и отец Брајан Колодејчух од братството „Мисионери на љубовта.

На средбата, претседателот Иванов изрази задоволство што Папата Франциск назначи специјален папски кардинал за светата понтификална миса што вчера се одржа на плоштадот „Македонија", по повод прогласувањето за светица на Мајка Тереза.

Претседателот Иванов истакна дека скопјани се горди што имаат можност да живеат во родниот град на Мајка Тереза. Добрината, убавината и правдината, додаде претседателот Иванов, Мајка Тереза ги стекнала токму овде, каде што се негува традицијата на почит кон различниот, а почитувањето е повозвишена филозофија од толеранцијата.

Кардиналот Пулиќ истакна дека одбележувањето на канонизацијата на Мајка Тереза испраќа силна порака за Република Македонија, притоа изрази благодарност што претседателот Иванов бил покровител на настанот и додаде дека неговите позитивни впечатоци ќе ги пренесе кај Папата Франциск.

Претседателот на Република Македонија, д-р Ѓорге Иванов денеска го пречека познатиот спортист хуманист и светски рекордер Емил Илиќ кој придружуван од тројца млади маратонци, го заврши пешачкиот маратон во должина од 268 километри, што се реализираше по повод 25-годишниот јубилеј од независноста на Република Македонија.

Претседателот Иванов, честитајќи го успехот на маратонците, истакна дека на овој наш голем празник, ваквиот подвиг е поттик и позитивен пример за сите млади луѓе во Македонија.
Илиќ, на својата цел во Кабинетот на Претседателот, повика на обединување на граѓаните за напредок на нашата земја.

„Мислиме дека ова е добар пример за целиот македонски народ, особено за политичарите, како што се обединуваме ние спортистите и тие да се обединат, со цел напредок на Република Македонија, затоа што тоа го заслужува Македонија и македонскиот народ", истакна Илиќ.

Тој додаде дека патот што го изоделе бил исклучително тежок поради неповолните временски услови. Рече дека двајца од маратонците коишто го придружувале, биле приморани да се откажат поради повредите со кои што се здобиле.
Маратонот стартуваше од манастирот „Свето Преображение" во Крушево, додека маршрутата се одвиваше преку  Росоман, Градско, Велес и Скопје.

Илиќ на приемот во Вила Водно му врачи плакета на претседателот Иванов, како израз на благодарност, за неговата континуирана поддршка за развој и унапредување на спортот во Република Македонија.

Емил Илиќ во 2007 година се стекна со титулата светски рекордер во пешачки маратон, што му ја издаде Академијата за светски рекордери од Лондон, Велика Британија.

„Ние треба да сме горди затоа што имаме сограѓанка Светица. Треба да сме горди за нејзиното дело, на сето тоа што го направила. Ние кои живеееме на истиот простор истото да го направиме, да ја продолжиме таа енергија што ја имала целиот свој живот, со истиот интензитет и намера да се шири добрина, помош и утеха", порача претседателот д-р Ѓорге Иванов од Ватикан, по прогласувањето на Мајка Тереза за Светица.

Претседателот Иванов истакна дека тоа треба да го прават и сите наши соседи бидејќи на Балканот, како што рече, се потребни повеќе лица кои знаат тоа да го почитуваат, но и да го продолжуваат затоа што сета тајна, како што рече, е во давањето помош на тој што има потреба.

„Веројатно Мајка Тереза би била среќна да го славиме нејзиното дело, милосрдието и помошта, затоа што секој што сака да и оддаде почит треба да дава на тие што имаат потреба, да им понуди надеж и милосрдие на безнадежните", рече претседателот Иванов, додавајќи дека нејзината мисија, сето тоа што го научила во своето детство, во својот живот во Скопје, како микрокосмос на различни религии и идентитети, го спроведувала и промовирала насекаде.


За претседателот Иванов денешниот ден е историски, со историски настан, канонизација на Мајка Тереза за Светица, на кој присуствуваше македонската државно – црковна делегација заедно со другите делегации. „Ова е ден кога целиот свет слави, на плоштадот беа присутни луѓе од сите континенти, сите луѓе кои го продолжуваат делото на Мајка Тереза", рече претседателот Иванов.

Македонскиот претседател информира дека македонската делегација, која имаше почесно место на настанот, имала куса средба со Папата Франциск, кој му потврдил на македонскиот претседател дека ќе дојде во Македонија. „Јас знам дека ќе дојдам во Македонија", рекол Папата.

Во состав на македонската делегација, покрај претседателот Иванов, беа и премиерот Емил Димитриев, министрите за надворешни работи и за култура, Никола Попоски и Елизабета Канческа Милевска, лидерите на ВМРО-ДПМНЕ и СДСМ, Никола Груевски и Зоран Заев, претставници на Католичката црква во Република Македонија и на Македонската православна црква - Охридска архиепископија, како и претставник на фамилијата на Мајка Тереза.
 

Претседателот на Република Македонија, д-р Ѓорге Иванов, во „Вила Билјана" во Охрид, ја прими канадската поетеса Маргарет Елинор Атвуд, и организаторите на 55. издание на Струшките вечери на поезијата.

Претседателот Иванов на годинешниот лауреат Маргарет Елинор Атвуд и го честиташе признанието „Златен венец", како една од најпрестижните светски награди, но и како признание за нејзината целокупна поетска дејност.

На приемот македонскиот претседател упати честитки за успешната организација на оваа поетска манифестација и изрази очекување дека тоа ќе продолжи и во иднина, истакнувајќи дека Струшките вечери на поезијата имаат особено значење за презентација на македонското и светското поетско творештво, и за збогатувањето на македонската култура и за севкупната афирмација на Република Македонија во светот.

Годинешното 55-то издание на „Струшки вечери на поезијата" се одржа од 24 до 29 август, а на него учествуваа 32 поети од 30 земји.

Во 2011 година претседателот Иванов ја одликуваше манифестацијата „Струшки вечери на поезијата" со Орден за заслуги за Република Македонија.

„Никој неможе да ве спречи да се воздигнувате и да бидете подобри, поуспешни и поквалитетни. Секој од вас треба својот дом, своето семејство и својата држава да ги гради во височина. Ако се воздигнувате кон височината, никој нема да може да ви постави граници и лимити ", им порача вчеравечер претседателот на Република Македонија, д-р Ѓорге Иванов на учесниците на седмата по ред Школа за млади лидери што се одржа во Охрид.

На доделувањето на сертификатите за учество на оваа интензивна лидерска обука, македонскиот претседател посочи дека оваа Школа која за првпат беше организирана во 2010 година, досега ја посетиле речиси 300 млади луѓе од Македонија, дијаспората но и од странски држави.

„Преку овие предавачи на Школата за млади лидери, сите нивни искуства, сите нивни знаења и вештини, но и лични приказни, сакаме да ви ги пренесеме вам. Тие имаа само пофални зборови за вас учесниците. Среќни сме што во изминативе 7 години, речиси 300 млади луѓе од Република Македонија, од нашата дијаспора и од странки држави, стекнаа искуства, знаења и се запознава меѓу себе, " рече претседателот Иванов, порачувајќи им на младите лидери да го споделуваат своето знаење со останатите..

Тој изрази надеж дека пријалелството стекнато на оваа обука, ќе продолжи и преку Иванов Школата за Лидери - Алумни Асоцијацијата, каде што секој од учесниците може активно да се вклучи и да даде свој придонес.

"После завршувањето на оваа Школа, можете да се вклучите во иницијативи кои се хумани, кои се позитивни. Можете да иницирате било каква идеја или предлог, како што вашите бивши колеги своите идеи ги пренесоа во Алумни Асоцијацијата, а дел од нив и успешно ги остварија започнувајќи свои старт-апови, бизниси, школи и сл.

Претседателот Иванов уште им порача на учесниците секогаш да се стремат кон нешто што ќе ги исполнува.

„Бидете добри луѓе, добри родители и добри граѓани. Ширете ги вистината и позитивните идеи... Вие сте на некој начин првата генерација која ги користи новите технологии да може да комуницира со било кој, на било кое место на планетата, во реално време. Затоа овие придобивки користете ги разумно", рече меѓудругото македонскиот претседател

На годинешната школа учествуваат 45 млади лидери, кои имаат можност да чујат искуствата, знаењата и видувањата за лидерството на вкупно 28 реномирани предавачи од врвни образовни и професионални институции од Република Македонија, Европската унија, САД, Австралија и Египет.

Меѓу предавачите на седмата по ред Школа за млади лидери се поранешните претседатели на Латвија и на Бугарија, г-а Ваира Вике-Фреиберга и г.Петар Стојанов, градоначалникот на Солун, г. Јанис Бутарис, директорот на Евроконтрол г. Франк Бренер, истражувач на Вартон Школата при Универзитетот во Пенсилванија, д-р Ѓорѓија Петкоски, претседавачот на Извршниот комитет на Трилатералната комисија на Република Србија г. Јован Ковачиќ, како и еден од водечките светски бизнис предвидувачи и експерт за менаџмент и лидерство, г. Дејвид Голдсмит.

Во изминатите шест години на школата учествуваа над 140 предавачи меѓу кои генералниот секретар на ОН, г. Бан Ки-мун, поранешните претседатели на Чешката Република и на Република Србија, г. Вацлав Клаус и г. Борис Тадиќ, поранешните претседатели на Република Бугарија и на Република Албанија г. Георги Прванов и г. Бамир Топи, поранешниот потпретседател на Европската комисија и поранешен министер за надворешни работи на Италија, г. Франко Фратини, претседателите на Светската и Европската академија на науките и уметностите, г. Иво Шлаус и г. Феликс Унгер, како и многу амбасадори, функционери од Европската унија, директори на меѓународни институти и успешни бизнис компании и професори од реномирани светски универзитети.

Идејата на Претседателот Иванов е преку одржувањето на школата да им се овозможи на младите талентирани и амбициозни луѓе од Македонија да ги надградат и усовршат своите вештини, да ја развијат својата креативност и лидерски способности.

Учесниците на досегашните школи се организирани во Алумни асоцијација – ИСЛАА, регистрирана како посебно здружение, кое преку организација на семинари, панел дискусии, предавања, средби со амбасадори, учество во младински настани, продолжува со развојот на знаењата и вештините на досегашните учесници на школата.

Претседателот на Република Македонија, д-р Ѓорге Иванов и градоначалникот на Солун, г. Јанис Бутарис, денеска го посетија Крушево. На покана на Школата за младите лидери што се одржува под покровителство на претседателот Иванов по седми пат годинава, градоначалникот Бутарис е еден од предавачите на оваа меѓународна школа за млади лидери, што е повод за неговата посета на Република Македонија.

За време на посетата на Крушево, претседателот Иванов и градоначалникот Бутарис остварија работен ручек со градоначалникот на Крушево, г. Ѓорѓи Дамчевски. Воедно, градоначалниците на Крушево и на Солун посетија повеќе културно - историски знаменитости во градот.

Во поширокиот контекст на мерките за градење на доверба меѓу Република Македонија и Република Грција, претседателот Иванов во континуитет остварува средби со разни бизнис и академски делегации, а со цел воспоставување на мостови на соработка меѓу македонското и грчкото општество. Целта на овие средби е искористување на можностите за реализација на заеднички проекти од областа на инвестициите, екологијата, унапредување на економската и универзитетската соработка.

Претседателот Иванов и во ноември минатата година, оствари средба со солунскиот градоначалник Бутарис, на која присуствуваа претставници на стопанските комори од Република Македонија и Република Грција, претставници на медиумите од двете земји и универзитетски професори.„Заедничката соработка помеѓу двете општества е доказ дека се возможни решенија за предизвиците кои се пред нас, а нештата кои нè поврзуваат се побројни од оние кои нè разделуваат", изјави претседателот Иванов.

Во оваа насока, се и стипендиите за македонските студенти, за мастер студии на Универзитетот Шефилд при Сити Колеџот во Солун, што се доделуваат секоја година под покровителство на македонскиот претседател.

Градоначалникот Бутарис со огромна чест и задоволство ја прифати поканата годинава да биде предавач на Меѓународната Школа за млади лидери, која е основана на лична иницијатива на претседателот Иванов.