Претседателот на Република Македонија, д-р Ѓорге Иванов, на свечена церемонија во Бугарската академија на науките (БАН) во Софија е прогласен за „Почесен доктор на науки".

По тој повод, претседателот Иванов одржа предавање на тема „Миграциите и мигрантите: предизвици за третиот милениум".

Претседателот на Република Македонија, д-р Ѓорге Иванов, заедно со сопругата г-ѓа Маја Иванова, денеска ги примија учесниците на 46-то издание на фестивалот за детски песни „Златно славејче", што се одржува под негово покровителство.

Претседателот Иванов упати честитки за успешното реализирање на фестивалот, што се одржа по четириесет и шести пат, посакувајќи следната година уште многу нови детски хитови, коишто ќе бидат обележје за идните генерации.

Златните славејчиња низ песна се заблагодарија за денешниот прием како и за континуираната поддршка од македонскиот претседател. Директорот на фестивалот Бобан Јосифовски изрази задоволство што „Златно славејче" од година во година забележува се поуспешна реализација.

На годинешното издание на „Златно славејче" беа изведени 15 нови песни. Како и минатата, така и оваа година, на фестивалот учествуваа гости од соседните земји кои своите песни ги изведоа на македонски јазик.

Фестивалот „Златно славејче" е организиран од Советот за грижи и воспитување на децата на град Скопје и се одржува од 1970 година.
 

Признанието го доделува Претседателот на Република Македонија, како поттик на научната и истражувачката мисла на младите во Република Македонија.

Јавниот повик ги опфаќа сите лица кои што заклучно со 2016 година навршуваат 30 години, а кои во досегашната научна работа имаат постигнато значајни научни резултати.

Кандидатите кои се пријавуваат на огласот потребно е да достават доказ за исполнување на еден или повеќе од доленаведените услови:

• награда и или признание за научно истражувачка работа,
• објавени резултати од научно истражувачка работа
• применетост на резултатите од научното истражување за тековната 2016 година.

Горенаведените материјали заедно со биографија и уверение за државјанство на Република Македонија да се достават во еден печатен и еден електронски примерок (CD)

Право на учество имаат сите граѓани на Република Македонија кои ги исполнуваат условите за конкурирање

Документите да се достават до Кабинетот на Претседателот на Република Македонија најдоцна до 31.12.2016 година.

Кабинет на Претседателот на Република Македонија
(Комисија за „Најдобар млад научник")
„Вила Водно"
Ацо Караманов 33 А
МК-1000 Скопје

Претседателот на Република Македонија, д-р Ѓорге Иванов, во придружба на неговата сопруга г-ѓа Маја Иванова, вчеравечер го проследи концертот на Ансамблот на народни игри и песни на Македонија „Танец".

Концертот, кој е под покровителство на претседателот Иванов, се одржа во чест на доајените на македонската изворна песна, Васка Илиева, Никола Бадев, Александар Сариевски и Кочо Петровски.

За време на концертот беше промовирана и книгата „ Македонската песна на далечните меридијани со легендите Васка Илиева, Никола Бадев, Александар Сариевски, Кочо Петровски", од Роска Бадева.

Во Кабинетот на Претседателот на Република Македонија денеска се одржа церемонија на свечено менување на државното знаме. На церемонијата присуствуваа претседателот Иванов и ученици од ОУ „Љубен Лапе" и ООУ „Стив Наумов" од Скопје.

Промената на државното знаме на Република Македонија пред Кабинетот на Претседателот го изврши гардиската единица на Армијата на Република Македонија.

Церемонијата е со цел подигнување на чувството и почитта кон знамето на Република Македонија како репрезент и симбол на државноста на нашата земја.

Претседателот на Република Македонија, д-р Ѓорге Иванов, денеска оствари средба со амбасадорот на САД, г. Џес Бејли, на која го честиташе изборот на г. Доналд Трамп за Претседател на САД.

Македонскиот претседател изрази очекување дека ќе продолжи американската поддршка за надворешно политичките цели и приоритети на Република Македонија - интеграцијата во евроатлантските структури, добрососедските односи и регионалната соработка. На средбата се разговараше за билатералните односи меѓу Република Македонија и САД, за актуелните состојби во двете земји, како и за состојбите во поширокиот регион на југоисточна Европа.

Двајцата соговорници се согласија за натамошно зацврстување, збогатување и унапредување на стратегиското партнерство меѓу Република Македонија и САД.