Претседателот на Република Македонија д-р Ѓорге Иванов денеска престојуваше во работна посета на општина Кочани, на која оствари средба со градоначалникот Ратко Димитровски кој го информираше за реализацијата на актуелните проекти во општината.

Претседателот Иванов го посети подрачното ОУ „Раде Кратовче“ во село Нивичани, Кочанско, кое неодамна беше реновирано и во кое наставата во оваа учебна година ја следат 36 ученика. Присуствуваше и на донирањето на 1.000 лектирни изданија што градоначалникот Ратко Димитровски ги подари на училишната библиотека.

Македонскиот Претседател го посети и манастирскиот комплекс „Свети Пантелејмон“ во село Пантелеј, граден во 1871 година со богат фонд на икони и фрескоживопис работени од зографот Димитрија Андонов Папрадишки.

Во рамките на посетата на Кочани, Претседателот Иванов одржа предавање пред студентите на Правниот факултет во овој град, а потоа во библиотеката „Искра“ ја посети изложбата под наслов „Кочанските стари згради го чуваат минатото“, организирана во рамките на манифестацијата „Денови на кочанскиот ориз 2010“.