Претседателот на Република Македонија, д-р Ѓорге Иванов, денеска во проштална средба го прими амбасадорот на Државата Израел, Н.Е. Јозеф Амрани.

На средбата, претседателот Иванов изрази благодарноста за досегашниот ангажман на амбасадорот во унапредувањето на односите меѓу двете земји и му посака успех во натамошната кариера.

Двајцата соговорници изразија задоволство од постигнатиот висок степен на политичките односи и позитивниот тренд во соработката. Заедничка констатација беше дека во иднина двете земји треба да се фокусираат на унапредување на економската соработка.

„Сметам дека приоритет во односите меѓу двете земји во претстојниот период треба да биде натамошно унапредување на економската соработка, соработката во сферата на земјоделието, јакнење на трговската размена и зголемување на израелски инвестиции во Македонија", истакна претседателот Иванов на средбата, изразувајќи задоволство од постојаното јакнење и проширувањето на правната рамка меѓу Република Македонија и Државата Израел.

Во разговорите, претседателот Иванов ја поздрави и улогата на еврејската заедница во Република Македонија и изрази уверување дека таа и натаму ќе продолжи да го дава својот активен придонес за севкупниот развој на државата, како и во негувањето на добрите односи меѓу двете земји.

Воедно, на средбата беше изразено задоволство од одличната соработка меѓу Република Македонија и Државата Израел на мултилатерален план, и подготвеност за натамошно посеопфатно продлабочување на пријателските односи.