Претседателот на Република Македонија, д-р Ѓорге Иванов, денеска оствари средба со министерот за надворешни работи на Црна Гора, г. Срѓан Дармановиќ.

Двајцата соговорници изразија интерес за унапредување на севкупните билатерални односи меѓу двете земји и го поздравија континуираниот политички дијалог што укажува на традиционално пријателските односи меѓу Република Македонија и Црна Гора.

Претседателот Иванов и министерот Дармановиќ се согласија дека двете земји имаат идентични надворешно-политички цели и треба да се фокусираат на нивна реализација преку интензивна меѓусебна соработка на билатерален и регионален план.

Во однос на европската перспектива, претседателот Иванов посочи дека членството на Република Македонија во ЕУ и НАТО е од клучно значење за стабилноста и просперитетот на целиот регион и го нагласи интересот за интензивирање на политичко-безбедносната соработка со Црна Гора во контекст на НАТО.

„Евроинтеграцијата на државите од Западен Балкан е од суштинско значење за регионалната стабилност и развој. Потребна е јасна перспектива за приклучување кон ЕУ и силна поддршка за забрзување на НАТО интеграцијата на Република Македонија", порача на средбата претседателот Иванов.

Во тој контекст претседателот Иванов го поздрави позитивниот извештај на Европската комисија и охрабрувачките пораки од високи претставници на ЕУ во однос на лојалноста на Црна Гора во зачувувањето на заедничките европски вредности.

Министерот за надворешни работи, г. Срѓан Дармановиќ, истакна дека еден од приоритетите на Црна Гора, како иден претседавач со Јадранската Повелба, ќе биде поддршка за НАТО интеграциите на Република Македонија.

Претседателот Иванов и министерот за надворешни работи разменија мислења за актуелните политички случувања во Република Македонија и Црна Гора, како и за состојбите во регионот и Европа.

Двајцата соговорници го потврдија интересот за продолжување на тесната соработка во рамки на регионалните иницијативи и разменија информации за претстојниот Самит на Процесот Брдо-Бриони, чиј домаќин идната година е Република Македонија. Со цел унапредување на регионалната и економската соработка, беше потенцирана потребата од зголемени инвестиции во инфраструктурно поврзување на земјите од регионот.

Претседателот на Република Македонија, д-р Ѓорге Иванов, по повод одбележувањето на државниот празник 23 Октомври - Денот на Mакедонската револуционерна борба, упати честитка до граѓаните на Република Македонија.

Почитувани граѓани на Република Македонија,

Одбележувањето на празникот на македонската револуционерна борба е симбол на долговековниот непокор и борба на македонскиот народ за слобода, државност и независност.

Корените на македонската револуционерна борба започнуваат со формирањето на Македонската револуционерна организација, на 23 Октомври 1893 година, кога шестемина македонски дејци ги обедини една визија за исполнување на вековниот сон – слободна Македонија. Патот до слободата беше исполнет со предизвици, но нивната сплотеност и решителност за остварување на своите идеали им даде сила да истраат пред тешкотиите.

Пламенот што го разгореа револуционерите го презедоа илинденците, борците во Народноослободителната и антифашистичка борба и АСНОМ-ците кои го остварија стремежот за слободна македонска држава. Без 23 октомври 1893-та не ќе беа можни ниту трите светли Илиндени од 1903-та, 1944-та и 1991-та.

Наша должност е да им оддадеме почит на нашите борци за слобода и независност, следејќи го нивниот пат. Како следбеници на нашите предци, почитувајќи ја историската реалност, треба да создадеме иднина за нашите потомци.

Почитувани сограѓани, нека ни е честит празникот!

Да живее Република Македонија!

д-р Ѓорге Иванов

Претседателот на Република Македонија, д-р Ѓорге Иванов денеска оствари проштална средба со амбасадорот на Словачката Република, Н.Е. д-р Мартин Безак.

Претседателот Иванов изрази благодарност за личниот ангажман и посветеноста на амбасадорот Безак во унапредување на севкупните билатерални односи на Словачката Република со Република Македонија. и изрази уверување за натамошно продлабочување на политичкиот дијалог меѓу двете земји и проширување на соработката во сите сфери од заемен интерес.

Македонскиот претседател изрази благодарност за целокупната помош и поддршка која Република Македонија ја доби од Словачката Република во справувањето со мигрантската и бегалската криза, потенцирајќи го нивниот значаен придонес преку присуството на словачките полициски сили и опрема, со цел надзор и поефикасна заштита на нашата граница.

„Високо го ценам вашиот активен придонес во позитивниот развој на односите и соработката меѓу Република Македонија и Словачката Република и во успешната соработка во однос на мигрантската и бегалската криза", нагласи претседателот Иванов, посакувајќи му успех во идните ангажмани.

Во однос на реализацијата на македонските стратешки надворешно-политички цели, претседателот Иванов изрази уверување дека Словачката Република како докажан и принципиелен пријател и партнер ќе продолжи отворено да ја поддржува Република Македонија во аспирациите за членство во Европската Унија и во НАТО.

Претседателот на Република Македонија, д-р Ѓорге Иванов денеска ги прими акредитивните писма на новоименуваните амбасадори на Кралството Шпанија, на Чешката Република и на Државата Кувајт за Република Македонија.

На средбата со новоименуваниот амбасадор на Кралството Шпанија во Република Македонија, Н.Е. г. Емилио Лоренсо Сера, претседателот Иванов изрази задоволство од развојот на билатералните односи меѓу Република Македонија и Кралството Шпанија, коишто претставуваат одраз на меѓусебното разбирање и искрена почит. Македонскиот претседател изрази благодарност за поддршката од Шпанија за реализација на европската и евроатлантската перспектива на Република Македонија, како и очекување, дека ваквата поддршка ќе продолжи со поголем интензитет во периодот којшто следува. Претседателот Иванов на церемонијата на предавање на акредитивите, рече дека изминатиот период со големо внимание, но и загриженост ги следи настаните во Шпанија. „Во оваа прилика, би сакал да ја нагласам мојата увереност дека Шпанија ќе најде сили и ќе ги надмине политичките премрежја, од кои ќе излезе уште посилна и посплотена", истакна претседателот Иванов. Осврнувајќи се на бегалската криза што го зафати европскиот континент, на јакнењето на радикализмот и порастот на терористичките напади, како тие што неодамна се случија во Барселона и Камбрилс, македонскиот претседател ја нагласи потребата од поблиска соработка во областа на безбедноста. „Само со заеднички настап и поголема сплотеност и солидарност на демократскиот свет, ќе може да се одговори на современите безбедносни предизвици", рече претседателот Иванов.

На средбата со Н.Е. Мирослав Томан, новоименуван амбасадор на Чешката Република во Република Македонија, претседателот Иванов го поздрави воспоставениот плоден политички дијалог на сите нивоа и достигнатото високо ниво на односите меѓу двете држави, додавајќи дека Република Македонија придава посебно значење на градењето на блиски и пријателски односи со Чешката Република, со која нė врзуваат силни историски и културни врски. „Чешката Република е еден од нашите најзначајни пријатели, партнери и поддржувачи во реализацијата на нашите стратегиски цели. Би сакал и во оваа пригода да изразам благодарност за сета досегашна поддршка од Вашата земја, а особено за принципиелната, конзистентна и отворена поддршка на Европските и евроатлантските аспирации на Република Македонија", истакна претседателот Иванов, истовремено изразувајќи благодарност и за чешката поддршка и помош во справувањето со последиците од бегалската и мигрантската криза.

На средбата со H.E. г. Јакуб Алтеги, новоименуван aмбасадор на Државата Кувајт за Република Македонија, со седиште во Софија, претседателот Иванов изрази подготвеност за продлабочување на политичката, а особено економската соработка меѓу двете држави. „Ценам дека постои заедничка желба посеопфатно и посодржински да ги развиваме и да ги унапредуваме меѓусебните односи за доброто на нашите пријателски земји", истакна претседателот Иванов.

Претседателот Иванов на новоименуваните амбасадори им посака успех во вршењето на одговорната дипломатска должност.

Претседателот на Република Македонија, д-р Ѓорге Иванов, денеска оствари средба со претседателот на Владата на Црна Гора, г. Душко Марковиќ.

Двајцата соговорници изразија задоволство од севкупните билатерални односи меѓу двете земји кои континуирано бележат позитивен и нагорен тренд, како и од традиционално блиските односи и одличниот политички дијалог.

Заемна констатација на средбата беше дека меѓу Република Македонија и Црна Гора нема отворени прашања и дека двете земји се посветени на идентични надворешно-политички цели и интензивна регионална соработка.

Во однос на европската перспектива на нашата земја, претседателот Иванов посочи дека членството на Република Македонија во ЕУ и НАТО е од клучно значење за стабилноста и просперитетот на целиот регион, и го нагласи интересот за интензивирање на политичко-безбедносната соработка со Црна Гора во контекст на НАТО, како и унапредување на соработката меѓу безбедносните служби на двете земји.

„Очекувам проширувањето на Унијата и на Алијансата, не само да продолжи, туку и да се забрза. Само на тој начин Европа може да биде посилна и поотпорна на предизвиците со кои се соочува, истакна претседателот Иванов изразувајќи очекување за поддршка од Црна Гора во однос на македонските евроатлански перспективи.

На средбата беше реафирмиран интересот за унапредување на економската соработка меѓу двете земји и потребата од подобро инфраструктурно поврзување како предуслов за развој на економијата и трговската размена.

Претседателот Иванов и премиерот Марковиќ разменија мислења за актуелните политички случувања во Република Македонија и Црна Гора, како и за состојбите во регионот и Европа.

Двајцата соговорници го потврдија интересот за продолжување на тесната соработка во рамки на регионалните иницијативи и разменија информации за претстојниот Самит на Процесот Брдо-Бриони, чиј домаќин идната година е Република Македонија.

Претседателот на Република Македонија, д-р Ѓорге Иванов, денеска оствари средба со заменик министерот за надворешни работи на Народна Република Кина, г. Ванг Чао.

Двајцата соговорници го поздравија интензивирањето на политичкиот дијалог и зголемената динамика на средби на високо ниво, како и позитивниот развој на севкупната билатерална соработка меѓу Република Македонија и НР Кина.

„Јакнењето и унапредувањето на искреното партнерство со Кина е трајна определба на нашата надворешна политика", истакна претседателот Иванов изразувајќи особено задоволство од процесот на соработка меѓу Кина и земјите на Централноисточна Европа 16+1 и конкретните иницијативи и активности кои произлегуваат од овој процес.

Македонскиот претседател искажа поддршка за глобалниот кинески проект „Патот на свилата" и иницијативата „Еден појас, еден пат", посочувајќи дека оваа иницијатива отвора сериозни перспективи за нови трговски патишта и зголемени инвестиции, како и нова димензија во односите и економската соработка со НР Кина. Во таа насока, претседателот Иванов го реафирмираше интересот за натамошно вклучување на Република Македонија во инфраструктурните проекти кои произлегуваат од овој процес.

Заменик министерот за надворешни работи ја пренесе поканата од кинескиот претседател г. Си Џипинг, за посета на претседателот Иванов на Народна Република Кина по повод 25 годишнината од воспоставување на дипломатските односи меѓу двете земји.

На средбата со заменик министерот за надворешни работи, г. Ванг Чао, македонскиот претседател се заблагодари за севкупната техничката помош од Кина за проекти од различни области, и го поздрави потпишувањето на Меморандумот за разбирање меѓу Кина и земјите на Централноисточна Европа за формирање на Координативен центар за културна соработка со седиште во Република Македонија.