Претседателот на Република Македонија, д-р Ѓорге Иванов, по повод изборот на функцијата Претседател на Украина, упати писмо до г. Петро Порошенко, Избран претседател на Украина

Почитуван господине Порошенко,

Ми претставува особена чест и задоволство, во име на граѓаните на Република Македонија и во свое лично име, да Ви упатам срдечни честитки по повод Вашиот избор за Претседател на Украина, со искрени желби за успешно извршување на оваа висока и одговорна функција.

Ја користам оваа пригода да ја повторам мојата лична увереност дека во периодот што следи, со заемен ангажман можеме да придонесеме за јакнење на традиционално пријателските односи и за уште поплодна соработка, како на билатерален така и на мултилатерален план.

Ваша Екселенцијо, имајќи ја предвид актуелната ситуација во Украина, сакам да ве уверам дека Република Македонија ги поддржува сите обиди, кои можат да донесат мир и стабилност во вашата земја. Убеден сум дека пријателска Украина преку дијалог, со политички и дипломатски средства ќе успее да се справи со предизвиците и ќе продолжи по патот на обезбедување просперитетна иднина на своите граѓани.

Со најискрени честитки и желби за Ваша успешна работа, Ви ги упатувам, изразите на моето високо почитување.

д-р Ѓорге Иванов