По повод силните шумски пожари кои ја зафатија Руската Федерација и однесоа голем број на животи, Претседателот на Република Македонија д-р Ѓорге Иванов испрати писмо со изрази на сочувство до рускиот Претседател Дмитри Медведев -
Почитуван господине Претседател. Со длабоко жалење ја примив веста за огромните шумски пожари и огнената стихија која предизвика последици од досега невиден размер. Искрено жалам за изгубените животи, за големите и ненадоместливи штети предизвикани од оваа трагедија.
Во овие мигови на длабока тага за Вас, Вашата држава и народ, во свое лично име и во име на граѓаните на Република Македонија, упатувам изрази на најдлабоко сочувство.
Верувам, почитуван господине Претседател, дека солидарноста и хуманоста која веќе пристига од сите страни, ќе помогнат во ублажувањето на последиците од оваа голема трагедија.
Ве молам, господине Претседател, изразите на најдлабоко сочувство да ги пренесете до семејствата на настраданите и воедно сакам да Ве уверам дека граѓаните на Република Македонија искрено жалат за овој трагичен настан.
д-р Ѓорге Иванов