Мора да се свртиме кон регионот, меѓу себе да комуницираме, да си помагаме. Мигрантската криза беше шанса за соработка со сите земји на Коридорот. Предизвиците не се решаваат со бирократија и дипломатија, туку со менаџирање, истакна претседателот на Република Македонија д-р Ѓорге Иванов на состанокот на регионалната бизнис иницијатива „Самит 100", што се одржа во Сараево.

Во своето излагање на пленарниот панел „Нов договор за ново време" претседателот Иванов рече дека е неопходна зголемена регионална соработка во сите сфери од заеднички интерес, како предуслов за попросперитетен, побезбеден и поуспешен регион кој мора да се интегрира во евроатланските структури. Посочи дека сите земји од регионот, пред се, треба да се свртат кон подобрување на инфраструктурата, економијата, енергетските проекти и кратење на бирокатските процедури. – Имаме потенцијал, остануваме оптимисти со искуство, односно реалисти, рече претседателот Иванов.

Во однос на мигрантската криза, укажа на фактот дека милион бегалци поминаа низ нашата територија и оти ние сами како држава го решававме проблемот. - Додека Брисел размислуваше која акција да се преземе, ние донесовме одлука да прогласиме кризна состојба, да ја пратиме војската на границата и да регулираме проток. Кризата беше шанса да соработуваме со сите земји на Коридорот. Тоа беше позитивен пример како треба да се справиме со овие предизвици, истакна претседателот Иванов.

Македонија, која не е ниту во НАТО, ниту во ЕУ, додаде тој, требаше да ја спасува Европската унија од самата ЕУ. Македонија, како што рече, ја чува оградата и не дозволува мигрантите да одат во ЕУ. Според него, ОН, ЕУ, НАТО и ОБСЕ останале во 20 век, не се снаоѓаат во 21 век.

- Македонија е школски пример за неуспешноста и на ЕУ и на НАТО. Македонија е школски пример како не треба да се однесува ниту НАТО ниту ЕУ кон земја кандидат. Станавме колекционери. Имаме 17 акциони планови за членство во НАТО, за во гинис, нема ниту една земја каде што повеќе е проверувана армијата од македонската армија, истакна претседателот Иванов, кој по оваа изјава беше поддржан со силен аплауз од колегите од регионот.

Говорејќи за односот на Европската унија кон Македонија, рече дека досега имаме седум препораки за почеток на преговори, а нула промена.

- Стоиме во место. Зошто, затоа што судбина ни било да имаме сосед со кој не може да излезе на крај ниту цела Европска унија, ниту целиот свет. Се вика Грција. А, сакаат ние со нив да излеземе на крај, да најдеме решение за нешто што е наш идентитет и наша посебност, да менуваме име, идентитет, јазик, топоними... Кој ќе каже дека Тга за југ не е македонски бренд, кој ќе каже дека музика од Македонија не е македонска музика, дека ајварот не е македонски продукт. Сакате сето тоа да ни го земете. Не го даваме. Ние го споделуваме и даваме да го користите како нешто што е придобивка на сите генерации пред нас и да го сочуваме за генерациите после нас, истакна претседателот Иванов во панел излагањето.

Според него, треба да се решаваат билатерални проблеми, но тие да се рационални, реални. Ги информира присутните дека независно од политичките односи, Македонија има одлични економски односи со Грција.

- Не е точна тезата дека нерешавање на билатерални проблеми не создаваат економски односи. Најдобри односи имаме со Грција. Имаме преку 200 чисти грчки компании, а преку 400 мешани. Само македонските туристи секоја година во Грција оставаат една милијарда евра, во туризам и шопинг, а првите шест грчки компании имаат обрт преку една милијарда. Извонредни односи имаме со грчката бизнис заедница. Но, естаблишментот во таа држава останал во 20 век, кога зборува за страв од Македонија, рече претседателот Иванов.

Воедно, македонскиот претседател истакна дека „Самит 100" е одлична можност за претседателите на државите од регионот да ги слушнат потребите и очекувањата од бизнис лидерите, претприемачи и стопанственици од цела Југоисточна Европа, бидејќи смета дека синергијата меѓу бизнис-заедниците и државите е особено неопходна денес. За таа цел тој ја истакна улогата на бизнис-соработката, како придонес кон успехот за целиот регион.

Претседателот Иванов упати покана до присутните на Самитот наредната година да бидат во Македонија, бидејќи тогаш нашата држава ќе биде домаќин на Брдо-Бриони процесот.

На регионалниот „Самит 100", покрај претседателот Иванов учествуваа и членовите на Претседателството на Босна и Херцеговина, Бакир Изетбеговиќ, Младен Иваниќ и Драган Човиќ, претседателите на Хрватска Колинда Грабар-Китаровиќ, на Словенија Борут Пахор, на Црна Гора Филип Вујановиќ, на Србија Томислав Николиќ, на Албанија Бујар Нишани и на Косово Хашим Тачи.

На самитот учествуваа и бизнис лидерите и истакнати претприемачи и стопанственици од Југоисточна Европа, а главни теми на дискусија беа одржливото снабдување со енергија, моделот на циркуларна економија, брендирање на регионот, транспорт и инфраструктура, создавање работна сила на иднината и кластер на автомобилската индустрија. Од Македонија беа присутни компаниите Алкалоид, Тиквеш и Стопанска банка Битола.
На „Самит 100", претседателот Иванов беше придружуван од министерот без ресор задолжен за привлекување странски инвестиции Џери Наумоф.
Овој Самит во 2011 година заеднички е инициран од Хрватска, Србија и Словенија со цел на едно место да се претстави добрата бизнис пракса и истовремено да зајакне соработката која би отворила простор за нови развојни проекти и инвестиции во регионот.
Претседателот Иванов во Сараево утре ќе учествува на состанокот на „Брдо-Бриони Процесот", на кој, покрај лидерите на државите од регионот, специјален гостин ќе биде претседателот на Италија, Серџо Матарела.

На состанокот на лидерите на „Брдо-Бриони Процесот", претседателите ќе разговараат за актуелните состојби во регионот, евроинтеграциите и проширувањето на Европската унија, како и за унапредување на регионалната соработка.

Претседателот на Република Македонија, д-р Ѓорге Иванов, за време на Светскиот хуманитарен самит во Истанбул, оствари средби со претседателот на Турција г. Реџеп Таип Ердоган и со премиерите на Грција и Словенија г. Алексис Ципрас и Миро Церар.

На средбата со турскиот претседател г. Реџеп Таип Ердоган, двајцата соговорници изразија задоволство од високото ниво на севкупните билатерални односи меѓу Република Македонија и Република Турција и подготвеност за натамошно унапредување на соработката во сите сфери од заемен интерес.

Во разговорите, претседателите разменија мислења и информации за состојбите со мигрантската криза, за актуелните политички состојби во земјите, како и за прашања поврзани со енергетската безбедност и гасоводни проекти.

Претседателот Ердоган го информираше претседателот Иванов за состојбите и предизвиците со кои се соочува Турција во однос на бегалската и мигрантската криза, како и во борбата против тероризмот. Во тој контекст го информираше и за спроведувањето и перспективите на Договорот ЕУ-Турција за справување со мигрантската криза.

Македонскиот претседател го информираше неговиот турски колега за мерките и активностите кои ги спроведува и презема Република Македонија за справување со кризата. Претседателот Иванов го запозна претседателот Ердоган со состојбите и заканите на нашата јужна граница, кои се предизвикани од зголемениот степен на илегална миграција и неодамнешните насилни обиди за илегално влегување на македонска територија.

Претседателот Иванов изрази очекување дека Република Турција во пресрет на претстојниот НАТО самит во Варшава ќе продолжи со силната и отворена поддршка за членство на Република Македонија во Алијансата.

Двајцата претседатели се согласија дека е неопходна засилена соработка меѓу државите во регионот во насока на постојано информирање и превенција од заканите и ризиците од тероризмот, насилниот екстремизам и илегалната миграција.

На средбата сo премиерот на Грција г. Алексис Ципрас се разговараше на повеќе теми во контекст на билатералните односи, предизвиците од мигрантската криза, и актуелните политички и економски состојби во двете земји. Во однос на билатералните односи двајцата соговорници ги поздравија напорите што се прават преку имплементацијата на мерките за градење на доверба и се заложија за почести контакти на високо и највисоко ниво. Во таа насока се разговараше за заеднички проекти за инфраструктурните поврзувања и прекуграничната соработка.

Соговорниците се согласија дека треба да се работи на унапредување на економските врски меѓу двете земји. Премиерот Ципрас извести за актуелните економски состојби во Република Грција, и предизвиците од мигрантската криза.

Претседателот Иванов, на интерес на соговорникот, истакна дека политичкaта криза во Република Македонија трае предолго, дека е потребно што е можно побрзо да се стави крај на истата и дека единствениот начин за тоа е спроведување на фер и демократски избори.

Двајцата соговорници разменија мислења за бегалската и мигрантската криза особено за состојбата во бегалскиот камп Идомени и обидите за илегални премини во Република Македонија. Претседателот Иванов и премиерот Ципрас се согласија дека треба да се внимава како на хуманиот така и на безбедносниот аспект на кризата.

На средбата со словенечкиот премиер г. Миро Церар, двајцата соговорници изразија задоволство од развојот на билатералните односи и соработката, и разменија мислења и информации за мигрантската криза, за состојби во регионот како и за актуелните политички и економски состојби во двете земји.

Премиерот Церар упати честитки и благодарност за улогата на Република Македонија во справувањето со бегалската криза. „Македонија направи и прави голема работа за Европа", истакна Церар.

За време на средбата, претседателот Иванов го информираше премиерот Церар за политичката состојба во нашата држава. „Предолгата политичка криза во Република Македонија сериозно влијае на капацитетите на државата за соочување со предизвиците, како мигрантската криза и безбедносните аспекти поврзани со истата". Неопходно политичките лидери да покажат одговорност кон интересите на граѓаните и државата, истакна македонскиот претседател.

Претседателот Иванов побара позасилен ангажман од Словенија во насока на остварување на македонските стратешки цели и приоритети, членствата во ЕУ и НАТО.

Неопходен е континуиран ангажман во мировните процеси, што ќе овозможи трајно решавање на конфликтите. Република Македонија е подготвена да биде вклучени во процесите на градењето мир во светот, истакна претседателот на Република Македонија, д-р Ѓорге Иванов, на отворањето на Светскиот хуманитарен самит, кој се одржува денеска во Истанбул, во организација на Обединетите Нации.

„Агендата за хуманост има за цел ставање крај на страдањата со кои се соочуваат милиони. Република Македонија силно ја поддржува оваа агенда и повикува на храбро политичко лидерство", порача македонскиот претседател.

Претседателот Иванов истакна дека Конфликтите кои се шират и продлабочуваат побргу отколку што се решаваат и отстрануваат.

„Имаме најчесто задоцнета дијагноза, со реактивни, наместо превентивни мерки, со краткорочни и болни одлуки, наместо долгорочни и побезболни решенија". Поради ова, порача претседателот Иванов, потребен е нов пристап кон превенцијата и мировните решенија.

„Неопходно е навремено, кохерентно и одлучно политичко лидерство што ќе се бави со причините, наместо со последиците на кризите", истакна македонскиот претседател во обраќањето.

На обраќањето на лидерскиот сегмент во своето обраќање претседателот Иванов ја поздрави одлуката на Обединетите Нации го свика Светскиот хуманитарен самит и Турција да биде домаќин на истиот. Претседателот Иванов истакна дека Република Македонија, како земја-кандидат за членство во Европската Унија, се приклучува кон изјавата и позициите на ЕУ, според кои, потребно е изнаоѓање на политички решенија за актуелните конфликти, справување со драматичното непочитување на меѓународното хуманитарно право, формирање на донаторски фонд за помагање на погодените од конфликтите, како и искористување на овие фондови порационално.

На Светскиот хуманитарен самит кој за прв пат се одржува денеска и утре во Истанбул, учествуваат околу 5000 учесници, вклучувајќи шефови на држави и влади од педесетина земји, лидери од кризните региони, раководни лица на меѓународните организации, претставници на приватниот бизнис сектор, како и преставници од граѓанскиот сектор. Меѓу учесниците на самитот се Генералниот секретар на Обединетите Нации, Бан Ки-мун, германскиот канцелар Ангела Меркел, претседателите на Турција, Хрватска, Албанија, Црна Гора, Украина, Реџеп Таип Ердоган, Колинда Грабар Китаровиќ, Бујар Нишани, Филип Вујановиќ, Петро Порошенко, претседавачот со босанското претседателство, Бакир Изетбеговиќ, како и премиерите на Грција, Бугарија, Холандија, Словачка, Словенија, Полска, Алексис Ципрас, Бојко Борисов, Марк Руте, Андреј Киска, Миро Церар, Беата Шидло.

Учесниците на Самитот ќе се заложат за преземање иницијативи и акции во насока на поддршка на „Агендата на хуманост", а со цел да се овозможи полесно справување и надминување на кризните состојби во светот.

Покрај со домаќинот, турскиот претседател Реџеп Таип Ердоган и Генералниот секретар на ОН, Бан Ки-мун, претседателот Иванов за време на самитот ќе оствари формални и неформални средби со повеќе лидери, а ќе се обрати и на пленарната сесија на самитот.

На Специјалната сесија посветена на жените и децата во регионите зафатени со криза, во рамки на Светскиот хуманитарен самит, ќе учествува и сопругата на претседателот на Република Македонија, г-ѓа Маја Иванова.

Претседателот на Република Македонија, д-р Ѓорге Иванов, денеска ги прими членовите на Европското здружение на студенти по индустриско инженерство и менаџмент – ЕСТИЕМ, кои се во посета на земјата по повод нивното учество на меѓународниот семинар, чиј домаќин е Македонија.

На средбата на која присуствуваа и македонски студенти, членови на ЕСТИМЕ, претседателот Иванов беше запознаен со целите на ова здружение, за нивните досега реализирани активности и натамошни планови.

Македонскиот претседател им посака успех на студентите во нивните идни активности и изрази задоволство од можноста да се сретне со успешни млади луѓе кои се дел од академската елита на повеќе држави ширум светот. Претседателот нагласи дека го радува фактот што студентите отворено зборуваат за сите предизвици, што укажува на нивната подготвеност да придонесат кон унапредување на своите општества. Воедно истакна дека мора да се вложува во младите луѓе, бидејќи тие го предводат техничкиот и технолошкиот напредок во секоја земја.

Студентите изразија задоволство од престојот во Македонија и благодарност за поддршката од страна на претседателот Иванов.

На средбата со Претседателот студентите воедно пројавија интерес за повеќе теми од областа на науката, образованието и македонската историја, карактеристиките на македонското општество, како и за македонскиот модел на меѓуетнички соживот.

Целта на меѓународниот семинар на кој учествуваат студенти од над 30 држави од Европа и светот е промовирање на македонскиот идентитет и култура. Земјата ќе биде преставена низ призма на актуелната политичка ситуација, економската состојба со која таа се соочува и учесниците ќе бидат запознаени со импресивната историја и културни богатства кои Македонија ги поседува, посочија македонските студенти, членови на ЕСТИЕМ кои се домаќини на настанот. Студентите од повеќе земји од светот ќе се запознаат и со положбата на Македонија во Европа, како и со напредокот на земјата во однос на европските и евроатланските интеграции.

Главната цел на ЕСТИЕМ, е да ја зголеми комуникацијата и соработката помеѓу студентите по индустриско инженерство и менаџмент во Eвропа.

Претседателот Иванов заедно со сопругата г-ѓа Маја, по повод празникот Воскресение Христово – Велигден, денеска присуствуваа на свечената литургија во Соборниот храм „Св.Климент Охридски" со која чиноначалствуваше Архиепископот Охридски и Македонски г.г.Стефан.

Македонскиот претседател на сите православни верници им го честиташе најголемиот христијански празник Воскресение Христово - Велигден и им посакаа многу здравје, радост, среќа, мир, бериќет и успех.

„ На сите што денес го слават Велигден би сакал да им го честитам овој голем христијански празник со традиционалниот поздрав Христос Воскресна, навистина Воскресна. Празникот Велигден не е само воскресение, тоа е празник и момент на лично воздигнување. Како што кажал патронот на нашата црква свети Климент Охридски: Воздигнувањето е престигнување во добрина", рече претседателот Иванов кој воедно порача сите да бидеме добри граѓани, добри родители, добри деца, да шириме добрина околу нас, затоа што овие моменти најмногу ни треба она што го посакува и Велигден - меѓусебе да си простуваме и да се обединуваме.

„Ни останува да ја сакаме Македонија, затоа што во духот на нашата традиција треба да го сакаме тоа што го имаме, а не тоа што го немаме. Затоа посакувам таа љубов кон Македонија да им ја пренесеме и на сите наши потомци и на вакви моменти да се потсетуваме што се сме дале да ја имаме оваа држава и да си ја чуваме", додаде претседателот Иванов.

По Светата Златоустова литургија, претседателот Иванов беше примен од поглаварот на Македонската православна црква – Охридска Архиепископија, г.г. Стефан, а синоќа, македонскиот претседател присуствуваше на објавата на Христовото Воскресение во црквата „ Св.Георги Победоносец" во село Трубарево.