Пред сè како жена, потоа и како мајка, г-ѓа Маја Иванова несебично ја дава својата поддршка на оние на кои им е најмногу потребна - децата. Без разлика дали проблемот со кој се соочуваат е здравствен или социјален, секогаш безусловно се вложува да им помогне и да ги поддржи во нивната борба. Нејзините напори и активност се првенствено насочени кон борбата против аутизмот и подигнувањето на јавната свест за постоењето на оваа болест.

Борба против аутизмот

Согледувајќи ги актуелните проблеми со кои секојдневно се соочуваат аутистичните деца и млади, но и нивните родители и поблиските пријатели, и запознавајќи ја средината во која секој мал напредок е подвиг кон кој вреди да се стремиме, г-ѓа Иванова го направи следниот чекор - ја презеде целата таа иницијатива и посветено почна да работи на унапредување на нивната положба и условите вокои ќе можат да остварат посреќен и побезгрижен живот.

Првата активност на г-ѓа Иванова поврзана со аутизмот беше реализирана при нејзиниот престој во Њујорк, во септември 2009 година, за време на 64-то Генералното Собрание на Обединетите Нации на кое учествуваше Претседателот на Република Македонија. Во рамките на нејзините активности во Њујорк беше и учеството на Втората годишна конференција со фокус на аутизмот, организирана од меѓународната фондација „Аутизмот зборува". На оваа конференција учествуваа околу 150 први дами и високи гости кои со своето присуство го зголемија значењето на настанот, но привлекоа и поголемо медиумско внимание. Со тоа се постигна една од целите на конференцијата - подигање на јавната свест за аутизмот. Во септември 2010 година, г-ѓа Иванова по втор пат учествува на оваа конференција, давајќи го својот придонес кон напорите да се поттикнат државите во светот да одвојуваат средства и ресурси за истражувања за аутизмот, кампањи за подигање на јавната свест и поддршка за семејствата кои се засегнати.

Една година откако г-ѓа Иванова ги започна своите активности во Република Македонија, таа успеа ненаметливо, со непосредни контакти, со огромен ентузијазам, но и со особена упорност, да ги спои поединците од академските кругови кои работат на оваа проблематика, од една страна, и родителите кај чиишто деца е дијагностициран аутизмот, од друга страна. Но, пред сè, г-ѓа Иванова успеа да ги обедини сите засегнати страни во борбата за подигање на јавната свест за аутизмот и да ги стави во функција за најмалите, оние за кои вреди да се изодат милиони чекори само да се постигне една насмевка, еден допир, една прегратка, еден блесок во очите на децата со аутизам.

Под нејзино покровителство на 2 април 2011 година, во Република Македонија за прв пат беше одбележан Меѓународниот ден на аутизмот, во коорганизација со Македонското научно здружение за аутизам. Во центарот на главниот град, под мотото „Аутизмот зборува. Време е да слушнеме!" на едно место се собраа многу граѓани кои на посреден или непосреден начин се засегнати од аутизмот. Особено значајна беше поддршката која ја дадоа сопругите на претставниците на дипломатскиот кор во Република Македонија. Повеќе естрадни уметници ја поддржаа кампањата со нивниот настап и присуство, повеќе дечиња со детски песнички ја освежија и разубавија сцената. Настанот беше обоен во светло сина боја, заштитната боја на меѓународната организација „Аутизмот зборува". А, токму најмалите на кои им беше посветен овој ден беа најрадосни. Музика, игра, детски џагор. Песнички, прегратки и по некоја солза радосница од милиот, искрен и наивен детски настап.

Реакциите кои следеа по Меѓународниот ден на аутизмот беа позитивни и исполнети со оптимизам, и повеќето пристигнуваа токму од родителите и роднините на децата со аутизам, полни со благодарност за тоа што некој ја покрена иницијативата да го потсети општеството за постоењето на болеста и предизвиците кои ги носи. Ова потсетување, оваа искрена иницијатива на г-ѓата Иванова, беше од непроценлива важност, пред сè за децата кај кои е дијагностициран аутизам, за нивните родители и пријатели. Но, уште позначајно беше тоа што го насочи општото внимание кон овој проблем кој некому е секојдневие, ги охрабри и останатите да го препознаат, и ги потсети сегашните и идните родители дека е неопходно навременото откривање на болеста. За г-ѓа Иванова ова беше уште посилен поттик да неуморно да продолжи со активностите, и набрзо потоа ја посети градинка „Лилипут", единствената градинка во која се примаат и дечиња со аутизам. Одблизу беше запознаена со нивниот секојдневен живот и навиките кои ги стекнале со посетувањето на градинката, нивната интеграција, зголемените социјални и комуникациски вештини.

Г-ѓа Иванова продолжува да им помага на родителите чии деца имаат аутизам, како и на нивните организации чија одновна цел е да го помогнат развојот на аутистичните деца, нивното образование и подобрувањето на нивните вештини за комуникација. Посебно интересна инцијатива, чија реализација г-ѓа Иванова со задоволство прифати да ја потпомогне, е проектот за хидротерапија на аутистичните деца. Таа е покровител на Конференцијата „Слобода во вода" на која ќе се обучуваат лица кои понатаму ќе работат на интензивни тренинзи во вода со лицата со посебни потреби, посебно со децата болни од аутизам.

Со цел да придонесе кон подобрување на позицијата на децата со аутизам и збогатување на нивниот секојдневен живот, г-ѓа Иванова се посвети на изнаоѓање позитивни и добри практики кои би можеле да се применат и во нашата земја. При секое нејзино патување надвор од земјата, таа посетува градинки, училишта, клиники посветени конкретно на аутистичните деца, се обидува да собере мислења, предлози и позитивни примери. Така при официјалната посета на Република Австрија во јуни 2011 година, заедно со првата дама, г-ѓа Маргит Фишер, ја посетија единствената специјализирана градинка во Виена за деца со аутизам.

Во јануари 2012 година, г-ѓа Иванова во Доха, Катар учествуваше на 5. Меѓународен форум на Шафалах центарот, каде го посети Центарот за деца со посебни потреби Шафалах, се запозна со условите за домување, терапија, едукација на децата со посебни потреби и за децата со аутизам.

Во 2012 година, по втор пат под покровителство на г-ѓа Маја Иванова се одбележа Светскиот ден на лицата со аутизам, во центарот на Скопје. Целта на симболичното одбележување е да се подобри квалитетот на животот на лицата со аутизам, да им се овозможи рана дијагностика, навремен третман, можност за едукација и соодветна здравствена заштита.

„Преку една ваква манифестација, сакаме да застанеме пред предизвикот наречен аутизам. За него велат дека е тивка болест, меѓутоа ние од овде ќе испратиме гласна порака дека ја даваме нашата безрезервна поддршка за сите оние кои што се справуваат со неа. Од овде сакам да ја упатам мојата безрезервна поддршка на родителите чии што деца боледуваат од аутизам, сакам да им кажам дека не се сами, дека секогаш имаат подадена рака, затоа што вреди да се изодат и милиони чекори преку активности и напори за да се дојде до една детска насмевка, до еден среќен блесок во очите на дете со аутизам", рече г-ѓа Иванова.

На 2 април 2013 година, претседателот Иванов и г-ѓа Иванова, по повод одбележувањето на Светскиот ден за подигање на свесноста за аутизмот, во Вила Водно примија претставниците од Македонското научно здружение за аутизам. На средбата присуствуваа и деца со аутизам и нивните родители.

Претставниците на здружението и родителите го запознаа претседателот Иванов и г-ѓа Иванова со предизвиците со кои се соочуваат во третирањето на децата со аутизам во Република Македонија. Посочија на потребата за формирање на Центар за детекција, рана дијагностика, третман, рехабилитација на децата и лицата со аутизам.

Претседателот Иванов заедно со сопругата Маја ги охрабрија претставниците на здружението и родителите и натаму активно да се залагаат во соочувањето со предизвиците и надминувањето на проблемите. Преку кампањи за подигнување на јавната свест и поддршка за семејствата кои се засегнати, порача претседателот Иванов, родителите ќе сфатат дека не се оставени сами и воедно ја истакна потребата за подготвување на Национална стратегија за справување со аутизмот. Претседателот Иванов, заедно со својата сопруга г-ѓа Маја Иванова, порачаа дека ќе ја поддржат секоја иницијатива што ќе произлезе од здружението и родителите на децата со аутизам. Пред претседателот Иванов беше преставена и иницијативата за организирање Меѓународна конференција во Скопје со специјалисти за аутизам, за што наидоа на поддршка од македонскиот претседател.

Сопругата на Претседателот на Република Македонија на 08 јули 2014 година во Вилата Билјана во Охрид, ги прими учесниците на проектите „Летен камп на аутизмот" и „Волонтеризмот во служба на аутизмот", кои се организирани од Здружението на граѓани за третман на лицата со Аутизам, АДХД и Аспергеров синдром „Во мојот свет".

На средбата г-ѓа Иванова, беше запознаена со проектите „Летен камп на аутизмот" и „Волонтеризмот во служба на аутизмот", како и со планираните активности во рамките на двата проекти, кои имаат за цел развивање и унапредување на комуникациските и социјални вештини на децата со аутизам, како и за промовирање на толеранцијата и почитување на различноста и директна интеракција со луѓето кои имаат аутизам.

Како поддржувач на настаните кои се одржуваат за подигање на јавната свест за аутизмот и начините за справување со него, г-ѓа Маја ги поздрави активностите на здружението „Во мојот свет" и проектите „Летен камп на аутизмот" и „Волонтеризмот во служба на аутизмот". Овие проекти придонесуваат за подобрување на позицијата на децата со аутизам и нивно охрабрување во борбата со овој синдром. Г-ѓа Иванова уште еднаш ја искажа поддршката на претседателот Иванов и нејзината лична поддршка за сите активности и иницијативи што произлегуваат од оваа организации и од родителите на децата со аутизам.

За време на официјалната посета на претседателот Иванов на Република Албанија во април 2015 година, г-ѓа Иванова во Тирана го посети Центарот за аутизам.

За време на работната посета на Република Турција во август 2015 година, г-ѓа Иванова го посети и Центарот за дијагноза, третман, и истражувања за деца со аутизам, посебен институт во рамките на Универзитетот Анкара, каде имаше прилика да размени мислења за состојбите со аутизмот во двете земји, дијагностиката, начинот на третирање, лекување на децата со аутизам, како и да се информира за истражувањата кои ги спроведува институтот.

На 18 февруари 2016 година, г-ѓа Маја Иванова се обрати на работната средба на Интерпартиската парламентарна група за правата на лицата со посебни способности на тема „Аутизмот не е загатка или болест, туку само начин на постоење". Во своето обраќање, г-ѓа Иванова ја истакна потребата за интегриран пристап, добро планирана и координирана реализација на активностите на сите засегнати страни: државните институции, здравствените установи, образовните институции, социјалните центри и граѓанските организации.

„Само со здружени напори и сили можеме навистина да помогнеме и да придонесеме за позитивни промени", рече г-ѓа Иванова.

„Нема ништо поскапоцено од безгрижната детска насмевка, како што нема ништо потегобно и повеќе поразително од дете кое пати, дете кое не може да се радува на детската игра.

Би сакала да ги охрабрам родителите чии дечиња живеат со аутизам, да им порачам да не губат надеж и да останат силни. Нивните деца имаат многу таленти. Во нивниот свет има многу бои со кои можат да сликаат како најголеми и врвни уметници, кога им се дава, првенствено, родителската поддршка, заштита, љубов, нежност и разбирање.

Би сакала во оваа прилика да упатам апел и до сите останати граѓани – да не ги маргинализираат лицата со аутизам, да најдат трпение и доблест да им помогнат да ги развијат социјалните и комуникациски вештини, да ги интегрираат во секојдневниот живот. Поголемото разбирање за ова нарушување ќе доведе и до поголемо прифаќање на лицата кои светот го доживуваат и го поимаат малку поразлично.

За сите вас кои денес сте овде, дозволете ми да го изразам моето најдлабоко почитување и благодарност што ја отворивте темата на аутизмот во Република Македонија", рече г-ѓа Иванова на обраќањето пред Интерпартиската парламентарна група за правата на лицата со посебни способности.

На 2 април 2016 година, г-ѓа Иванова учестуваше на одбележувањето на Меѓународниот ден на аутизмот, а Кабинетот на Претседателот на Република Македонија беше осветлен во сино, приклучувајќи се на глобалната кампања „Да осветлиме во сино", по повод одбележувањето на Меѓународниот ден на аутизмот.

Заложбите на г-ѓа Иванова добија конкретна реализација со отворањето на Центарот за сензорна терапија за лица со аутистичен спектар на нарушувања на Здружението „Во мојот свет", во Скопје. Центарот е отворен на 22 јуни 2016 година под покровителство на Иванова, а со финансиска помош на амбасадата на Република Бугарија во Република Македонија.

Според г-ѓа Иванова, отворањето на центарот е успешен пример за една конструктивна соработка помеѓу граѓанскиот сектор и државните институции.

„Мојата соработка со здружението „Во мојот свет" трае веќе неколку години и денеска центарот ги отвора вратите за сите лица со аутизам, а посебно за децата со аутизам. Нашата цел беше да се обезбедат што посовремени и подобри третмани и терапии за децата со аутизам во Македонија. Сметам дека сите треба колку што можеме да помогнеме на ранливите, различните, а сепак еднакви категории граѓани во нашето општество", изјави г-ѓа Иванова.

За време на учеството на претседателот Иванов на 71. Генерално собрание на Обединетите Нации во Њујорк во септември 2016 година, г-ѓа Иванова учествуваше на 9. Годишна конференција со фокус на аутизам во организација на фондацијата „Аутизмот зборува".

Заложби за здравјето на сите деца

Г-ѓа Иванова е носител на повеќе иницијативи за подобрување на здравјето и унапредување на здравствената заштита на децата.

По нејзина иницијатива, во март 2013 година беше промовирана Националната кампања за изградба на Ургентен центар на Детска клиника „Да помогнеме навреме".

„Јас ќе кажам, за секој од нас не постои ништо повредно и поскапоцено од животот на секое дете. Верувам и очекувам дека граѓаните на Република Македонија ќе ја препознаат оваа голема и благородна мисија и акција и ќе дадат голема поддршка без разлика на нивната верска, етничка или национална припадност, зошто децата се нашата иднината, а и се тие кои секогаш не обединуваат. Она што нам лично можеби ќе ни изгледа како еден мал придонес, верувајте дека е бесценет придонес за оние за коишто е наменет. Секундите се многу значајни во спасување на еден детски живот во ваков Ургентен центар", истакна г-ѓа Маја Иванова.

Во рамки на кампањата, во април 2013 година се одржа донаторски гала настан за Ургентен центар на Детска клиника.

Реконструкцијата на Ургентниот центар при Детската клиника започна во септември 2013 година. Во оваа прилика г-ѓа Иванова изјави дека националната кампања под мотото „Ајде да помогнеме навреме" за собирање средства за реконструкција и адаптација на простор на Клиниката, која почна во април, заврши успешно.

„Поведена од таа општествена одговорност, поведена од инстинктот на мајка, а пред се од огромната поддршка која ја добив од мојот сопруг, кој ми рече „ти тоа го можеш затоа што се работи за иднината на нашите деца", ја прифатив поканата на визионерот за изградба на еден ваков Ургентен центар, директорката на Клиниката Аспазија Софијанова, да бидам главен покровител на една ваква хумана, благородна мисија затоа што нема ништо повредно од животот на нашите деца", изјави г-ѓа Иванова.

„Кога се работи за децата тука нема никакви дилеми, лимити, тука нема ништо затоа што децата се тие што навистина обединија без разлика на верска, национална, полова или религиозна припадност", додаде г-ѓа Иванова.

Првиот Детски ургентен центар во Република Македонија беше отворен на 21 декември 2013 година, во присуство на претседателот Иванов и г-ѓа Маја Иванова.

За потребите на новата организациона единица беа изведени повеќе градежни реконструкции, објектот беше внатрешно преуреден, а беше обезбедена и најсовремена медицинска апаратура.

Средствата за реконструкцијата и адаптацијата на просториите во Клиниката беа собрани во рамки на Националната донаторска кампања под мотото „Да помогнеме навреме", а беше спроведена под покровителство на сопругата на претседателот на Република Македонија, г-ѓа Маја Иванова. Ургентниот центар е целосно изграден со поддршка на Турската меѓународна агенција за соработка и развој (ТИКА), а со дополнителните донации се доопреми Ургентниот центар и новите амбуланти.

Г-ѓа Иванова во обраќањето пред присутните рече дека како покровител на Националната кампања била полна со ентузијазам, имала силна инспирација, но најмногу била охрабрена со безрезервната поддршка на нејзиниот сопруг, претседателот на Република Македонија, д-р Ѓорге Иванов.

„Овој Ургентен центар ќе придонесе во голема мера за здравствени услуги кои нашата држава ги нуди за децата, посебно за итните случаи за кои најнеопходна е првата помош пружена од медицински лица. Итните случаи од денес ќе бидат третирани во Ургентен центар, како што е пракса во многу напредни земји, со добро разработен и крајно ефикасен здравствен систем", посочи г-ѓа Иванова.

Таа рече дека секој има обврска да даде свој личен придонес за активности кои се однесуваат на општото добро на сограѓаните и општеството.

„Таквите активности се тие кои не облагородуваат, кои не оплеменуваат, кои не прават хумани и кои ги истакнуваат нашите доблести и нашите вредности. Затоа, со огромна желба и мотив застанав како покровител на Националната кампања", потенцира г-ѓа Иванова и им се заблагодари на сите кои ја поддржаа кампањата и донираа преку телефонскиот број 14321, како и на медиумите кои овозможија кампањата да допре до секој граѓанин.

По повод Меѓународниот ден на детето, г-ѓа Иванова во ноември 2012 година донираше постелнина на Клиниката за детски болести. Сопругата на македонскиот претседател редовно ги посетува дечињата што се на лекување во детската клиника, а по традиција во пресрет на новогодишните празници доделува новогодишни пакетчиња.

Следејќи ги позитивните светски искуства на примената на музикотерапија во конвенционалната медицина, на иницијатива на семејството Иванови во август 2015 година македонскиот композитор, продуцент и пијанист Дуке Бојаџиев свиреше за дечињата згрижени во Клиниката за детски болести во Скопје.

Г-ѓа Иванова редовно ги посетува и клиниките за детски болести во Република Македонија. Посетата на Центарот за деца болни од церебрална парализа за време на Новогодишните и Божиќните празници е една од оние кои оставаат силен впечаток кај г-ѓа Иванова. Децата ја пречекаа со широки насмевки, а таа им подели пакетчиња со цел да им го разубави овој ден и да им ја даде својата поддршка во борбата против болеста.

Кога се во прашање иницијативите за децата и нивното здравје г-ѓа Иванова е секогаш тука да ги поддржи. Првата дама на Македонија, Маја Иванова, за време на 65-тото Генерално собрание на ООН во Њујорк во 2010, присуствуваше на уште една конференцијата за намалување на смртноста кај родилките и новороденчињата – „Жените се обединија за здравјето". Главното случување за сопругите на присутните претседатели беше излетот организиран од првата дама на САД, Мишел Обама, во Центaрот Стоун Барнс, огромна фарма за органска храна.

При посетата на овој Центар, Мишел Обама ја запозна г-ѓа Иванова со нејзината иницијатива за здрава исхрана на Американците, особено на децата. За таа цел г-ѓата Обама ја покрена кампањата насловена ,,Let's move'' („Да се придвижиме"), поддржана од готвачи од целиот Северноамерикански континент, кои како волонтери во училиштата ќе подготвуваат здрава храна за децата. Сметајќи дека преголемата телесна тежина кај децата не е само американски, туку глобален проблем, првата дама на САД се заложи ова движење да прерасне во меѓународна кампања и во неа да се вклучат голем број Први дами од светот. Оваа иницијатива е прифатена од г-ѓата Иванова. Сепак таа смета дека за разлика од САД, децата во Македонија се хранат со квалитетно овошје и зеленчук и се запознати со вистинското потекло на продуктите, но дека сепак лошите навики се присутни во секојдневната исхрана. Поради тоа покрај активна едукација на децата за правилна исхрана, во иницијативата треба да се вклучат не само готвачи, туку и матичните лекари кои ќе прават проверка на здравствената состојба на децата, а посебно на нивната телесна тежина.

Г-ѓа Иванова оваа иницијатива ја спроведе и на дело, станувајќи покровител и промотор на кампањата „Здрава храна за детство без мана“ - дел од Програмата “Интеграција на еколошката едукација во македонскиот образовен систем“ која ја спреведува здружението на граѓани ОХО, во соработка со Министерството за образование и наука. Г-ѓа Иванова, посети неколку основни училишта каде се спроведуваат едукативни активности, порачувајќи им на родителите да се приклучат кон заедничките напори за создавање свесни генерации кои ќе станат имуни на зависноста од брзата храна со што ќе им обезбедиме сигурна и здрава иднина.

Меѓу многубројните активности во рамки на кампањата „Здрава храна за детство без мана", г-ѓа Маја Иванова присуствуваше на манифестацијата „Здрав ручек" во детската градинка „Гоце Делчев" во Пробиштип. Пред најмалите жители на Пробиштип, г-ѓа Маја Иванова го претстави главниот оброк од ручекот – македонска лазања, приготвена од состојки од македонското поднебје и притоа порача дека сите субјекти вклучени во развојот на децата треба да придонесат кон интензивирање на акцијата, бидејќи децата се иднината на нашата татковина.

Во рамки на кампањата, беа организирани настани и во Скопје, Битола, Велес, Прилеп, Валандово, на кои учествуваше г-ѓа Иванова.

Посети на училишта, особено на оние за децата со посебни потреби, честопати се среќаваат во агендата на г-ѓа Иванова.

Во јуни 2014 година г-ѓа Иванова присуствуваше на промоцијата на проектот „Програма за целосна социјализација на деца со посебни потреби во нивните заедници", финансиран од Европската Унија, а го спроведува Фондацијата Аполонија од Гевгелија во партнерство со Македонското научно здружение за аутизам од Скопје.

Во рамки на проектот беа отворени една терапевтска и три сензорни соби за децата со посебни потреби во Гевгелија, Богданци, Дојран, и во Валандово.

Во ноември 2014 година, претседателот Иванов и г-ѓа Иванова го посетија „Св. Климент Охридски" во Ново Село, наменето за деца со посебни образовни потреби.

Посетата на основното училиште за посебни потреби „Иднина" и изложбата која ја приредија учениците под наслов „Желби рој" на денот на јубилејниот празник на училиштето, е настан кој буди позитивни чувства на љубов, топлина и искреност, средба кога се споделуваат моменти за паметење. Таа при посетата им се обрати на децата и им посака и понатаму да продолжат да зрачат со позитивна енергија како досега и да продолжат со успешна работа:

„Ние мораме да запомниме дека децата со инвалидитет се први и најважни. Секој од нас има обврска да биде хуман, да помогне. Но, само со здружени сили на сите ќе придонесеме и ќе направиме нешто за овие дечиња. Велат, тајната на секој успех лежи во желбата и во упорноста. Несомнено, желба имаме сите, па велам, ајде да бидеме упорни. Да вградиме дел во мозаикот што остварува детски сништа. Да направиме чекор напред во остварување на нешто што ќе остане засекогаш во сеќавањата на овие дечиња," изјави г-ѓа Иванова изразувајки ја својата поддршка во нивниот напор за еднаквост и во исполнувањето на нивните „Желби рој".

Во агендата на сопругата на претседателот Иванов се вклучени и бројни активности за поддршка на СОС Детското село и Домот за деца без родители. Штитениците од двете институции се чести гости во домот на семејството Иванови по повод новогодишните и божиќни празници.

На 30 ноември 2016 година, г-ѓа Маја Иванова беше покровител на 15-годишнината од основањето на СОС Детското село.

„Највисоко ја цениме мисијата на СОС Детското село за згрижување на деца кои се во состојба на ризик и се во опасност да бидат отфрлени од нивното биолошко семејно опкружување. Покрај згрижувањето на децата, СОС Детско село работи и на превентива од можноста детето да биде отфрлено од своето биолошко семејство. Уверена сум дека вашите ангажмани во тој контекст даваат позитивни резултати, за што, уште еднаш, ви упатувам честитки.
Вашата организација им дава поддршка на децата во образовниот процес, ги прави подостапни здравствената заштита и основните здравствени услуги за згрижените деца, им обезбедува социјална нега и грижа, ги учи за нивните права, но и се бори истите да бидат подигнати и почитувани на уште повисоко ниво. И, најмногу од се, им ги отвора вратите на згрижените деца за еден поубав, посветол и повесел свет, каде и тие имаат своја фамилија, каде и тие имаат и браќа и сестри, каде и тие се безгрижни и ослободени од проблемите на возрасните и на секојдневието; им ги отвора вратите за една светла и стабилна иднина во која и тие ги имаат истите права и можности, како и нивните врсници", рече во обраќањето г-ѓа Иванова.

Г-ѓа Иванова е покровител на манифестацијата „Бал на различности", во организација на здружението „Дајте ни крилја" здружение на граѓани за лица со дисфункции, хендикеп, ретки болести и посебни потреби.

Меѓу многубројните примери за хуманиот ангажман на г-ѓа Иванова е посетата на 13-члено семејство Апостоловски во тетовско Старо село во јануари 2014 година, на кое заедно со неговото Високопреосвештенство Митрополитот тетовско-гостиварски г.Јосиф им додели хуманиратна помош.

Сопругата на претседателот на Иванова, по повод Меѓународниот ден на лицата со инвалидност, на 3 декември 2015 година присуствуваше на одбележувањето на јубилејот 10 години постоење на Дневниот центар за лица со церебрална парализа.

Во контекст на потребата за натамошно унапредување на здравствената заштита на децата, г-ѓа Маја Иванова даде поддршка и се обрати на отворањето на 6. Конгрес на Здружението на педијатри на Република Македонија, во ноември 2015 година, а во октомври 2016 година се обрати на свеченото отворање на Првата школа за педијатри во Република Македонија.

„Педијатријата ја препознавам како еден од главните столбови на успешно здравство во една земја. Младите, чисти и од бога дарувани се радост за семејствата, а подобро утре за државата. За нивен здрав и нормален психофизички развој,потребна им е љубов и грижа, првенствено од родителите, но и од пошироката заедница а пред се тука мислам на педијатрите.Потребна е редовна лекарска контрола кај матичните педијатри, кои со својата стручност имаат големо влијание во целокупниотразвој на децата. Секојдневно педијатрите поставуваат соодветни дијагнози, даваат најдобри програми за лекување, прават консултации и вршат прегледи. Педијатрите се првите кои детектираат и ја дијагностицираат нарушена здравствена состојба кај децата. Се трудат да одговорат на потребите, на нивните вознемирени родители, притоа, ставајќи ги малите пациенти во преден план. Крајно сме ви благодарни а и јас како родител, како мајка, за целата континуираната лекарска грижа и за редовните прегледи на децата, надополнети со проактивен пристап, ангажираност, посветеност, професионалност, стручност и пожртвуваност", вели г-ѓа Иванова.

Во рамки на континуираните заложби на Првата дама на Република Македонија за подобрување на квалитетот на животот на децата и унапредување на нивното здравје, на г-ѓа Иванова и беше доделена плакета за хуманост и поддршка на лицата со хендикеп, на манифестацијата „Различни, а еднакви", организирана по повод одбележување на Денот на лицата со хендикеп.

За време на Новогодишните и Божиќни празници, 2010 година, г-ѓа Маја Иванова ги посети „СОС Детското село" и Домот за деца без родители „11 октомври" во Скопје и имаше прилика да присуствува на претставите кои дечињата ги подготвија. Нејзината цел беше да биде дел од нивното семејство, да ги помине празничните мигови заедно со нив, да им ја изрази својата почит и внимание, како мајка да им порача дека тие се прекрасни личности кои успешно се справуваат со предизвиците во животот и да продолжат понатаму да се борат. Нејзино големо задоволство беше можноста да им посака среќни празници на децата.

„Како што рекле старите - Кај и да си за Божик дома да си. Јас решив денеска да бидам дел од ова семејство и среќна сум што за момент овие дечиња ќе почувствуваат дека не се заборавени. Незаменливо е чувството кога во нивните мали душички ќе предизвикате топлина и во нивните очи ќе погледнете радост и исполнетост. Тука сме да им посакаме Среќна Нова година и весели Божиќни празници, да ги гушнеме и да им ја влееме надежта во новата година, која секој од нас ја заслужува" – изјави г-ѓа Иванова пред присутните при посетата на училиштето.

Во 2011 година, за време на Божиќните празници, г-ѓа Иванова во својот дом ги покани децата од „СОС Детското село", повторно да бидат дел од нејзиното семејство и заедно да уживаат во празнувањето.

Низ песна и игра за среќно детство

Г-ѓа Иванова се јавува и како покровител на многу настани од забавен карактер, кои успеваат да измамат насмевки и радост од лицата на децата. Еден таков настан е театарската претстава „Дедо мраз и пријателите" која беше одиграна на повеќе јазици за време на Новогодишните празници.

„Навистина се обидувам да ја поддржам секоја манифестација за деца, без разлика на нивната етничка или верска припадност, без разлика на нивните склоности и интереси, да сум секогаш тука да помогнам во пресретнување на нивните потреби. И како што секој од нас ја има обврската и грижата да им обезбеди посреќна и подобра иднина на нашите деца, јас чувствувам уште поголема обврска - да им обезбедам и подобра сегашност на сите деца, но особено на оние со кои судбината се поиграла и останале сами, или оние кои Господ ги благословил со други таленти, а во очите на јавноста остануваат личности со физички или ментален хендикеп." – изјави г-ѓа Иванова.

Покрај традиционалното покровителство на Претседателот на Република Македонија на фестивалот „Златно Славејче", славејчињата ја имаат целата поддршка и од г-ѓа Иванова, која присуствуваше на промоцијата на монографијата „40 години Златно славејче", а се и редовни гости во Вила Водно.

На 31 мај 2014 година г-ѓа Иванова учествуваше во акцијата „Македонија им чита на децата", што се одржа во организација на издавачката куќа „Култура" и Амбасадата на Република Полска во Македонија.

Пред родителите, г-ѓа Иванова упати апел да ги поттикнуваат своите деца да читаат книги, затоа што, како што рече, со секоја прочитана книга добиваат едно бесценето богатство.