Под мотото „10 години љубов и грижа“ во Македонската опера и балет беа одбележани 10 години од постоењето на СОС Детското село во Македонија. Покровител на одбележувањето беше сопругата на претседателот на Република Македонија, г-ѓа Маја Иванова.

„Во СОС Детското село оние што ги загубиле билошките родители и родителската грижа наоѓаат топол дом и љубов, растејќи во хармонична семејна средина. Благодарение на грижата и подршката во СОС детското село, децата и младите ја добиваат топлината на семејниот дом, добиваат топол мајчиски збор, нега кога се болни, сочуство во тешките моменти, совети за првите симпатии и љубови. Таму децата наоѓаат место каде своето детство ќе го поминат безгрижно низ смеа и песни, со по некој детски плач, но дом кој секогаш е исполнет со пријатната мелодија на детскиот џагор,“ истакна г-ѓа Иванова во своето обраќање.

На тој начин, додаде таа, СОС Детското село им овозможува на децата да се развијат во силни личности способни да се справат со животните предизвици.

„Децата се нашето најголемо богатство, нашата гордост, нашата радост, и нашата иднина. Сите деца имаат еднакви права и на сите треба да им се даде неопходната поддршка и овозможат еднакви можности. Оние кои се оставени без родителската грижа, како особено ранлива категорија, заслужуваат целосна грижа и заштита која ќе им овозможи правилен психофизички развој. Одговорноста за децата е на целата заедница, на сите нас,“ нагласи првата дама, додавајќи дека светот останува на децата и претставува предизвик да ги научиме да ги спознаат вистинските вредности во животот и да им дадеме сила да истраат и да успеат во овој свет.

Г-ѓа Иванова изрази почит за СОС мајките кои, како што рече, безрезервно ја даваат својата љубов и мајчинска грижа на децата, пребродувајќи ги заедно со нив сите пречки и совладувајќи ги сите предизвици кои се испречуваат на патот низ нивниот живот.

Претседателката на Управниот одбор на СОС Детското село и’ врачи на г-ѓа Маја Иванова плакета во знак на благодарност за поддршката и заложбите за продолжување и зајакнување на мисијата на оваа организација.

Детското село згрижува 87 деца без родители и родителска грижа и поддржува 350 деца во заедницата кои се во ризик да бидат напуштени од своите биолошки родители. СОС Детското село е присутно во повеќе од 132 земји во светот. Овие организации постојат од 1949 година, кога првото СОС-детско село во светот било основано од Херман Гмајнер во местото Имст, Австрија. СОС-детските села ги почитуваат различните култури и религии и работат во духот на Конвенцијата за правата на детето на ООН и ги промовираат овие права низ целиот свет.