„Многу европски политики и обиди за стабилизација на Балканот, Кавказот и Блискиот Исток потонале во она што метафорично се нарекува бермудски триаголник. Денес доминираат перцепциите за овие региони, како области на поделби, конфликти, крвопролевања", рече Претседателот на Република Македонија д-р Ѓорге Иванов во своето предавање во Фондацијата „Црно Море" во Истанбул, во рамки на работната посета на Република Турција.

Во предавањето на тема: „Бермудскиот триаголник на европската политика, промените во рамнотежата на Балканот и улогата на Турција", Претседателот Иванов истакна дека сето она што се случува на Балканот, Блискиот Исток и Кавказот најмногу се одразува на Турција, која се наоѓа во средиштето на Бермудскиот триаголник на европските политики".

Зборувајќи за промените во рамнотежата на Балканот, тој потсети дека како и Република Македонија, така и Република Турција со години е блокирана во европските интеграции.

„Во нејзиното непосредно соседство се водат вооружени конфликти. Црното Море и Источниот Медитеран станаа подрачја на политичка нестабилност и пропаднати држави. Низ територијата на Република Турција минаа милиони бегалци од воените жаришта на Блискиот Исток, а не ја заобиколија ниту економските мигранти од Азија и Африка кои ја користеа Источно медитеранската мигрантска рута", истакна македонскиот претседател.

Во своето предавање, Претседателот Иванов кажа дека со Вестфалскиот мир е создадена традицијата на толеранција како одговор на верските војни.

„Но, границите на толеранцијата се покажаа за време на мигрантската криза. Во многу европски општества завладеа страв, недоверба, ксенофобија. Ние на Истокот имаме традиција на почитување и прифаќање на различноста која е фундаментално различна од толеранцијата. Оваа традиција ја прави Македонија да биде тоа по што е позната, а тоа е вековниот соживот меѓухристијаните и муслиманите. Затоа, треба да го сакаме и чуваме она што го имаме, за еден ден да го добиеме и она што го немаме", заклучи Претседателот Иванов во предавањето во Фондацијата „Црно Море" во Истанбул.

Протестите покажуваат дека лидерството е разведено од реалниот живот на милиони луѓе. Протестите се израз на криза на лидерството насекаде во светот. Ова го потврдуваат и статистиките, порача претседателот на Република Македонија, д-р Ѓорге Иванов, кој денеска се обрати на претседателската сесија на 22. Евроазиски економски самит, што се одржува во Истанбул.

Иванов говореше за суштината, мотивите, но и целите на популизмот кој денеска е се поприсутен, а притоа се осврна на жолтите елеци во Франција и посочи на актуелните состојби во Британија, Венецуела, Германија.

„Луѓето кои ги гледаме како протестираат по улиците и плоштадите не се некоја точно одредена категорија на граѓани, туку луѓе од сите слоеви на општествата на кои глобалистичките елити со своите политики им ја одзедоа иднината, а на многумина им ги уништија и животите", порача Иванов.

Претседателот говореше за улогата на владеачката елита и потребата од стабилна власт.

„Таквата стабилна власт никогаш својата сила не ја црпи од силата и репресијата, туку од авторитетот и почитувањето на јавното мислење, односно волјата на граѓаните. Да се владее не значи да се украде или да се преземе моќта, туку мирно да се спроведува" порачува Иванов.

Станува збор за вистински бунт на граѓаните, додаде претседателот Иванов, против авторитетот на националните, но и европските институции, кои во името на неолибералната агенда и голиот профит ја претворија европската средна класа во прекаријат без иднина.

Глобалните елити, ќе додаде Претседателот, особено ги загрижува трендот кога довчерашните демократи по освојувањето на власта ги загрозуваат основите на демократијата.

„Очигледно е дека на западниот свет му е потребен нов идеал. Идеал што ќе ги комбинира економската динамика, индивидуалните слободи и рамнотежата во општеството. Тоа е идеалот за пристојно општество втемелено врз почитување на меѓусебните права и договори во кое секоја страна ќе знае кои се нејзините права и кои се нејзините обврски. Тоа е идеал за општество во кое договореното нема да може да биде променето од некој политичар или од владата. Односно, во кое општествените договори нема да се прекршуваат", порача претседателот Иванов на денешната претседателска сесија на 22. Евроазиски економски самит.

Темата на која се дебатираше на денешната претседателска сесија е: „Популизам: оживување на нови концепти во светот поради слабеење на либералната демократија. Дали популизмот и расизмот се причина за почеток на нови конфликти?"

Во рамки на работната посета на Република Турција, претседателот Иванов ќе одржи предавање на Фондацијата за образование, култура и заштита на животната средина „Црно море".

Претседателот на Република Македонија, д-р Ѓорге Иванов, денеска во Истанбул, се обрати на свеченото отворање на 22. Евроазиски економски самит, што се одржува во организација на фондацијата Мармара.

Во своето поздравно обраќање на самитот што се одржува под мотото „22 години проект за мир и дијалог", претседателот Иванов изрази задоволство што темите на овој форум повеќе се фокусираат на иднината отколку на минатото, констатирајќи дека сега е вистинското време да се зборува за развојот на технологијата.

„Во третиот милениум, ние сакаме да бидеме дел од новите проекти за развој на човечкиот капитал. Но, прашањето што денес се наметнува е дали ќе бидеме активни учесници или само пасивни набљудувачи на овие неминовни процеси", рече македонскиот претседател.

Во контекст на предизвиците и можностите што ги нуди технологијата, македонскиот претседател се осврна на неговиот проект „Школа за млади лидери", што годинава ќе се одржи по 10-ти пат од 11 до 24 февруари во Струга, а во чијшто фокус ќе бидат предавања од областите на четвртата дигитална индустриска револуција.

„Школата е базирана на идејата и на визијата да им се овозможи на младите талентирани и амбициозни луѓе да ги подобрат нивните вештини и да ја развијат својата креативност и менаџерски капацитети. За изминатите девет генерации, 360 млади луѓе со различен академски и професионален фокус од Македонија и од странство имаа можност да ги слушнат предавањата и искуствата на повеќе од 200 реномирани предавачи", рече претседателот Иванов, додавајќи дека Школата беше наградена како најдобар општествено одговорен проект во Европа за 2017 година на Светскиот форум за бизнис-ангели.

Организатор на Евроазискиот економски форум е Фондацијата „Мармара", чијашто цел е унапредување на односите меѓу ЕУ и земјите од централна Азија и Блискиот Исток. Фондацијата е активно вклучена во јакнење на културата на дијалог, економската соработка и подобрување на регионалната соработка за поуспешно искористување на можностите што ги создава процесот на глобализација.

Претседателот на Република Македонија, д-р Ѓорге Иванов, денеска во црквата „Св. Атанасиј" на Тетовското кале присуствуваше на црковно-народната прослава на големиот христијански празник Св. Атанасиј Велики.

Претседателот Иванов во црквата „Св. Атанасиј" присуствуваше на света божествена литургијa и на церемонијата на осветување на празничниот колач.

Македонскиот претседател на присутните граѓани им го честиташе големиот христијански празник и им посака здравје, радост и бериќет.

Претседателот Иванов присуствуваше и на одбележувањето на празникот „Св. Атанасиј Велики" во црквата „Св. Атанасиј" во селото Сараќино, општина Тетово.