Ценети присутни,
Почитувани стопанственици,
Драги пријатели,

Ова е моја прва посета на Египет и можам слободно да ви кажам дека се наоѓам на вистинското место во вистинското време. Еве зошто.

Првата причина е што денес е 3-ти 14-ти - Меѓународниот ден на бројот π што за првпат бил пресметан токму тука, во Египет.

Втората причина е што во Египет се наоѓала и најзначајната македонска инвестиција на сите времиња – Александриската библиотека. Нашите народи со векови биле дел од истиот отворен простор на почитување на различноста.

Третата причина е што сме собрани за да ја градиме иднината на односите меѓу нашите две држави и економии. Но, ни претстои многу работа.

Минаа цели 17 години откако Македонија и Египет потпишаа два важни договора, кои сè уште не се ратификувани од египетска страна: Договорот за одбегнување на двојно оданочување и за заштита на фискална евазија по однос на данокот од доход и данокот на капитал, и Договорот за поттикнување и заемна заштита на инвестициите. Овие важни договори, за жал, останаа само на хартија бидејќи сè уште не се ратификувани од египетскиот парламент. Се надевам дека правната рамка наскоро ќе биде утврдена.

Ценети присутни,

Знам дека во Египет има само 8 македонски компании кои имаат инвестиции во висина од 700 000 американски долари. Додека зборувам, во една од технолошко-индустриските развојни зони во Македонија веќе се гради фабриката на египетската компанија „Беверли Хилс Холдинг" од Шурук.

Но, тоа е далеку од можностите што постојат. Трговската размена меѓу двете земји е на исклучително ниско ниво. Денес сум тука со вас за да ве охрабрам да го следите примерот и да инвестирате во Македонија, и тоа поради три причини.

Прво. Спроведовме сеопфатни реформи за подобрување на бизнис- климата. Воведовме поволен пакет на рамни даноци, кои се меѓу најниските во Европа. Со низа поволности им излегуваме во пресрет на инвеститорите во технолошко-индустриските развојни зони. Ги отстранивме повеќето правни и административни бариери за компаниите.

Второ. Постојано инвестираме во инфраструктурата. Се градат автопати и започна изградбата на железничката пруга кон Бугарија. За развој на магистрални и дистрибутивни гасоводни мрежи ќе се инвестираат околу 300 милиони евра.

Трето. Благодарение на договорите за слободна трговија со ЕУ, ЕФТА и ЦЕФТА, како и билатералните договори со Турција и Украина, инвеститорите преку Македонија имаат непречен пристап до пазар од 660 милиони потрошувачи.

Поради овие мерки, во последните седум Doing Business извештаи на Светска банка, Македонија се најде меѓу топ 10-те најдобри реформатори во светот. Кредитната агенција „Фич" го потврди стабилниот кредитен рејтинг на Македонија. Ова е резултат на подобрените перспективи за економски раст, умерениот буџетски дефицит и државен долг, стабилната валута и стабилниот банкарски сектор.

Имаме неисцрпни можности и во индустријата, и во туризмот. Македонија и Египет најтесно ги поврзува заедничкото минато. Затоа, можностите за историски, археолошки и културен туризам се речиси неисцрпни. Но, затоа е неопходно отворање на директна авионска линија Скопје – Каиро.

Затоа ве повикувам да ја посетите Македонија, да ги разгледате постојните капацитети, да се запознаете со позитивното искуство на веќе присутните компании и сами да се уверите дека Македонија нуди големи можности за ширење на вашиот бизнис.

Ви благодарам и се надевам дека ќе можам да ве пречекам во Македонија.