Претседателот на Република Македонија д-р Ѓорге Иванов упати писмо на сочувство до Претседателот на Руската Федерација, Дмитриј Медведев по повод трагичната авионска несреќа кај Петрозаводск во која животот го загубија 44 лица.

„Со длабока тага ја примив веста за авионската несреќа во близина на аеродромот кај Петрозаводск, во рускиот регион Карелија, и искрено жалам за загубените животи во оваа голема трагедија. Во овие тажни моменти за Вас, за граѓаните на Вашата земја и семејствата на настраданите и повредените, дозволете ми, од името на граѓаните на Република Македонија и од мое лично име, да Ви упатам изрази на длабоко сочувство. Ве молам, господине Претседателe, изразите на длабоко сочувство да ги пренесете до семејствата на трагично настраданите,“ наведува Претседателот Иванов во писмото до неговиот руски колега Медведев.